Read KapsikiDC 1 Ka Meghea Kɛfi 10 Bible Online

1 Ka Meghea Kɛfi 10 - KapsikiDC bible

1 Ka Meghea Kɛfi 10

¹Pa male nya kameghea ka Saba fate zləvəa Salomon te sləa Mahwətə, cape nde kase kezha dzeghakɛ laka 'yɛwe nyi dzawe dzawe kazhɛne.

²Pɛkwe nde pelɛ Zhɛrəzalɛm le mbeli kwele kwele kwetere wəmbəa nta, le zlegweməa lɛmə nyi hwepate 'wərdə mbeli te, le mze kwa tere tere kwele kwele te ba'a le pelɛ nyi nza səkəmə te dzawe dzawe. Ma kwa ntsehe nde sha Salomon, pa gezete nda ghena nyi zəzəve nde pɛtɛ.

³Pa Salomon zhɛnete nda 'yɛwe ta nta pɛtɛ, 'yɛwe shɛ nya shaŋe meghe va geze nda ghena nya mbe we.

⁴Pa meghe ka Saba nyagha nakɛ ntsehwelea Salomon le ghɛ nya ŋate ŋkɛ pɛtɛ,

⁵ba'a wəshi kezeme nyi te ŋkwa kezeme wəshia ŋkɛ, le ghɛ nyi hɛ ka mene slene ta ŋkɛ ki, le nza ta mbeli nyi yite, le slene nya mene nda hɛ ba'a nza ta hwelefe ta lekwesa nya kənə hɛ, le nya ve nda wəshi kezeme hɛ le wəshi kesa ke mbeli, le melɛ nyi dzeghe ŋkɛ mbe ghɛa Mahwətə, terayɛ mehele ta nta tagha.

⁶Ma ke sha meghe: «Nda kaganda ghena nya fate 'ya kageze mbeli mbe hɛɗia ɗa te ghena ta ŋa ba'a te ntsehwelea ŋa.

⁷Keghate 'ya kayɛ ghena shɛ kaghate keɗema 'ya kese kanakɛ le ghəa ɗa we. Ma tsetsenya gɛ, kegezete ɗa wəba ta ŋkɛ mbeli we. Za ma nza ta ŋa ba'a ntsehwelea ŋa ke zləvə nya fate 'ya kageze mbeli te gha.

⁸Zeɗe nza ta nci yazeme mbeli nyi ki ghɛa ŋa le ka mene slene ta ŋa! Ghenci nyi kenza te ŋkwa va gha keveci keveci mbe kema ta ŋa kafa ghena ntsehwele ta ŋa.

⁹Hana ke mbeli sha Mahwətə, Shala ta ŋa nya kentave ŋa kaveyi ŋa pelɛ pasla ta ka Israyɛl! Va nya nza ŋkɛ kaghala ghala ɗehwe Israyɛl Mahwətə nda se ŋkɛ kaveyi ŋa kameghe kezha meha ghwə nya tiɗiɗi na le kaganda.»

¹⁰Kwetere wəmbəa ŋkɛ, pa meghe ka Saba ndeke nda mze kwa tere tere gare kiləwə 3.500, le 'wərdə kwele kwele ba'a kweci pelɛ nyi nza səkəmə dzawe te.

¹¹Ma kwambeləa Hiram nyi kejive Ofir ne, nahe hɛ keshave le mze kwa tere tere, sheghwəa ndakwela ba'a pelɛ nyi nza zləvə te hɛ.

¹²Nahe meghe keslate kwete ŋkwa le sheghwəa ndakwela shɛhɛ mbe ghɛa Mahwətə ba'a mbe ghɛ meghea ŋkɛ. Pa feɗete kweci ŋgwəleŋə le getsepele kaŋa ka gha cimə. Kezhɛne mbeli kakeleke sheghwəa ndakwela kala nyagha tɛape mbe Israyɛl we, kezhɛne mbeli kanakɛ pa ɓeshi tɛape we.

¹³Pa meghe Salomon fəave nda wəshi ke male nya kameghea ka Saba shɛ kala nya ɗe nde ba'a kala nya 'yɛwe nde. Zhɛne ne, pa fəave nda wəshi gəmə meghe. Kwetere wəmbəa ŋkɛ, cape nde zhɛreghe geva kalə kadzete hɛɗia nta le ka mene slene ta nta.

¹⁴Ma mze kwa tere tere nya ŋ'we Salomon keva keva ne, gare kiləwə 20.000.

¹⁵Mba nyi sema mbeli kaɓela nyi kele ŋkɛ va mbeli nyi kese mbe kwete meleme ba'a jaɓeregwale nya 'yɛwe ŋkɛ va ka mene fəli le kweci ka mazea kɛfi le mbelia ŋgwamna nyi mbe hɛɗia ŋkɛ.

¹⁶Pa meghe Salomon gezete nda ke mbeli kavɛsə gelə nyi jama jama gwəmsə bake yitea mze kwa tere tere kwa keɓe keɓe gwəmsə bake, kiləwə ŋkwaŋe ke gelə ke gelə.

¹⁷Pa ŋkɛ vɛsəte kweci gelə nyi ɓɛhwɛ ɓɛhwɛ gwəmsə mahekene yitea mze kwa tere tere kwa gezla gezla nya kakiləwə ba'a kwete yite. Pa ŋkɛ gezete nda ke mbeli kezha bete hɛ mbe cɛ nya heka mbeli Kaghɛa wəfe ta Liban.

¹⁸Pa meghe menete pasla nya wəba nya kepesa pesa le slene ta cewe ba'a nya kefi fi le mze kwa tere tere nya ganyɛ.

¹⁹Ma pasla shɛ ne, ŋkwaŋe taŋa mbe, wəmbə ya te ŋkwa kedəŋəzə ta ŋkɛ. Ŋkwa keve dzeve ya bake te yayata bela ta ŋkwa kentishɛ. Yɛ nivɛrə yafeɗeyi mbeli bake te yayata bela ta pasla,

²⁰nivɛrə meŋe bakeghəmbe te yayata bela ta ŋkwa keŋkeɗe seɗa nyighɛ ŋkwaŋe te kwa zeme, ŋkwaŋe te kwa gwela. Wəsə nya kala nyagha shɛ kegha mbeli kamenete mbe kwete pasla ta meghe we.

²¹Pɛtɛ zlerekwe kesa yɛmə ta meghe Salomon ne, le mze kwa tere tere menete geva hɛ, le mze kwa tere tere nya wɛŋe menete wəshi nyi mbe cɛ nya heka mbeli “Kaghɛa wəfe ta ka Liban”: kwete shɛ kevɛsəte mbeli le mze kwa ghwə ghwə we, va nya ɗema zləvə kese te mbe vəa Salomon.

²²Kwambelə nyi ghwene ŋkɛ kadzehwa mte cakeɗake zlaɓe le ŋa Hiram ya va meghe. Mbe yayata va mahekene ne, kazhɛne kwambeləa shɛhɛ kase viɗi viɗi va mze kwa tere tere, mze kwa tɛawetɛa, slene ta cewe, peshia keti ba'a kweci mama ta 'yɛ.

²³Kwele ma meghe Salomon ke kweci meghe nyi te hɛɗi pɛtɛ laka mcɛləa ŋkɛ ba'a laka ntsehwelea ŋkɛ.

²⁴Pɛtɛ mbeli nyi te hɛɗi kasepa kezha newe Salomon baŋe hɛ kafate ntsehwelea nya ndeke nda Shala.

²⁵Yayata wəndə kakele nda wəsə nya ve nda ŋkɛ gəmə: wəshi nyi vɛsəte mbeli le mze kwa ghwə ghwə ba'a le mze kwa tere tere, le lekwesa, le wəshi kempa, le 'wərdə, le gədəwə, le gədəwə kwara lɛmə keva keva.

²⁶Pa Salomon tsenete yɛ wəmata gədəwə le yɛ gədəwə: 1.400 ɓela ta wəmata gədəwə tsenete ŋkɛ le yɛ gədəwə 12.000 nyi fəghe ŋkɛ kadzembe meleme nya veyi ŋkɛ kaŋa nci dekwede le meghe mbe Zhɛrəzalɛm.

²⁷Te zlaɓa ta meghe nda se mze kwa ghwə ghwə kanza mbe Zhɛrəzalɛm kwele kwele kala pelɛa hɛɗi, nahe yɛ lekeleke kenza kwele kwele kala mekweɗa nyi kepese te hɛɗi nya kwake kwake.

²⁸Se mbe Ɛzhipte ba'a se mbe Silisi se gədəwə nyi va Salomon nya dzawa ka zhɛre dzeve kapa hɛ same kwa.

²⁹Ma yayata wəmata gədəwə nya kesame kwa Ɛzhipte, dəɓərə gwəmsə ŋkwaŋe səkəməa ŋkɛ, yayata gədəwə, kadəɓərəa mze kwa ghwə ghwə gwəmsə ba'a mcɛfemsə. Tsagha se ŋkɛ kaŋa meghea ka Hɛt le meghea ka Siri nyi kese kapa laka ka zhɛre dzevea shɛhɛ.