Read KapsikiDC 1 Ka Meghea Kɛfi 11 Bible Online

1 Ka Meghea Kɛfi 11 - KapsikiDC bible

1 Ka Meghea Kɛfi 11

¹Pa meghe Salomon wəmeve kweci mi kwele kwele se mbe kweci meleme keghə keghə kadzeghəa wəzha ta Farawon: se mbe Mowab, se mbe Amon, se mbe Ɛdom, se mbe Sidon ba'a se mbe Hɛt.

²Ndagwara na Mahwətə kegezete nda ke ka Israyɛl te ghəa nza ta ka zelema Shala: «Mba yɛ kegweɗə geva le mbeli nyi mbe kweci meleme ba'a mba yɛ kepele hɛ kagweɗə geva le gheyɛ, va nya nza ŋkɛ kateghwete ŋayɛ hɛ kezha hawe yɛ va shala ta nci.» Ama pa Salomon jikəte geva le mi nyi kese mbe kweci meleme nyighɛ kwa ɗehwe hɛ ŋkɛ.

³Mi gwəmsə mberefaŋe wəmeve ŋkɛ kamakwashi ŋwalea ka meghea kɛfi, gwəmsə mahekene nyi kami meghwa, kwele kwele zhɛremte nza ta wənəa ŋkɛ hɛ.

⁴Ma kwa halenyɛ Salomon, pa mia ŋkɛ kesehwe mehele ta ŋkɛ kezha hawe va kweci shala, ntake kaɗema ve nda wənəa ŋkɛ pɛtɛ ke Shala Mahwətə ta ŋkɛ, tekeleke le ŋa yitenyɛ David.

⁵Cape kahawe va Astartɛ, shala nya kamale sha ka Sidon ba'a va Molɛk nya zhɛrete ka Amon kashala kendireminyɛ.

⁶Pa Salomon menete wəsə nya ndiremi nya ɗema Mahwətə, kwa ɗema ŋkɛ kese kahawe fate fate va Mahwətə kala yitenyɛ David.

⁷Mbe və nyagha ŋate ŋkwa kedzeghe melɛ Salomon pelɛ ghəa kələŋə mbe kema ta Zhɛrəzalɛm kaŋa Kemosh, shala kwa ndiremia ka Mowab ba'a kaŋa Molɛk perə, shala kwa ndiremia ka Amon.

⁸Tsagha menete nda ŋkɛ pɛtɛ ke shala ta mia ŋkɛ nyi kese mbe kweci meleme, kezha dzeghe nda melɛ hɛ le 'wərdə kwa hə hə ba'a le wəshi keseɗa ke shala ta nci.

⁹Pa Mahwətə hwepete wənə va Salomon kwa zhɛremte geva wənəa ŋkɛ kaɗema Mahwətə, Shala ta ka Israyɛl nya kencɛte nda geva bake zhigə

¹⁰ba'a nya kegezete nda tiɗiɗi yagha ŋkɛ kazele kweci shala. Ama keyate ghena nya gezete nda Mahwətə Salomon te ghəa wəshi nyi we.

¹¹Ma ke Mahwətə sha Salomon: «Ma kala nya menete na tsetse, kaɗema na keyate jikə geva ta ɗa le wəshi mahalegə nyi gezete ŋa 'ya ne, 'ya katekelehwe meghe va gha kandeke nda ke kwete hwa ka mene slene ta ŋa.

¹²Ama kakele 'ya va gha shɛ na mba teghweme we, se te ɗe ta yiteyɛ ŋa David. Se mbe dzeve ta wəzege ta ŋa tekele 'ya.

¹³Kakelehwe meghea shɛ 'ya pɛtɛ ve we, le kwete wəvəsəa hwelefe kave nda 'ya kasleke ŋkɛ te zlaɓa ta David nya kande mene slene ta ɗa ba'a Zhɛrəzalɛm nya ntave 'ya.»

¹⁴Pa Mahwətə ghweneghe nda nde mpa ke Salomon: Hadad nde Ɛdom nya kwa yita ta ka meghe nyi mbe Ɛdom.

¹⁵Ma mbe və nya ɗate ka Ɛdom David ne, Zhowab nya kese ka meghea ka sewajɛ nde mpəmte zhili nyi mbe Ɛdom kwa dzeme ŋkɛ kezha la mbeli nyi kempə mpə.

¹⁶Tere ŋkwaŋe menete yɛ Zhowab le pɛtɛa ka Israyɛl pelɛ nda mpəmte zhili nyi mbe Ɛdom hɛ pɛtɛ.

¹⁷Nahe yɛ Hadad kehwɛnji kajive Ɛzhipte le ka Ɛdom nyi kemene slene ta yitenyɛ. Mba Hadad kawəzege vəa ŋkwa nyagha.

¹⁸Ma kwa slə hɛ mbe Madiyan, pɛkwe hɛ pelɛ Paran. Cape hɛ le kweci ka Paran, pɛkwe hɛ pelɛ sha Farawon, meghea ka Ɛzhipte. Pa ŋkɛ ndeke nda ghɛ ke Hadad, le wəshi kezemea ŋkɛ, kandeke nda wəve.

¹⁹Kwele kwele ŋ'wete zlaɓa Hadad va Farawon nya kendeke nda wəzha ta meghekɛa male ta ŋkɛ kamale, wəzha ta meghekɛa Tapenɛs.

²⁰Pa wəzha ta meghekɛa Tapenɛs yake nda wəzege teza nya hekate ŋkɛ kaGenəwbat. Tapenɛs nde dəkwəte ŋkɛ ki ghɛa Farawon, kiagha kele Genəwbat hwa ŋwalea Farawon.

²¹Pelɛ Ɛzhipte Hadad, pa fate nahe yɛ David le Zhowab nya kameghea ka sewajɛ kempə perə. Ma ke Hadad sha Farawon: «Pelakɛ ɗa kadzete hɛɗia ɗa.»

²²Ma ke Farawon shɛ: «Wa wəsə nya keɗema va gha teke sha 'ya nda geze na 'ya kadzeghwa ɗa kadzete hɛɗia ɗa, a pa vəkə tsagha wa?» Ma ke shɛ: «Wəsə we, ama pelakɛ ɗa keta ŋa.»

²³Pa Shala zhɛne kaghwenakɛ kwete nde jaga sha Salomon: Rezon sləa ŋkɛ, wəzege ta Ɛliyada ŋkɛ. Gheŋkɛ hwɛnyɛ shave ki ghɛa meghea ka Soba Hadadɛzɛr nya kesleke.

²⁴Pa tsenete mbeli kwetere wəmbəa ŋkɛ, pa zhɛrenyɛ kameghea nci. Ma kwa nza David kampə hɛ, pa hɛ dzawanji kadzawa Damas kanzanji kwa, ghenci ka se kasleke ŋkwa kwa.

²⁵Kande jaga ta ka Israyɛl se Rezon kala vəa Salomon teghweme. Ma wəsə kwa ndiremi nya menete Hadad. Pa ɗema ghena ta ka Israyɛl kala və nya se ŋkɛ kameghea ka Siri.

²⁶Ma Zhɛrobowam, wəzege ta Nebat nya kande Ɛfrayim mbe Serɛda, male wede meghekɛ, Serəwya sləa nta, kande mene slene ta Salomon se ŋkɛ, ama pa ɗema ghena ta ŋkɛ. Wa nya tsetse zhɛrete nda mehele ŋkɛ ke meghe. Te və nya ŋa ŋkwa nya heka mbeli kaMilo Salomon, hi yahi kwete ŋkɛ wəfela te zlia “Meleme ta David”.

²⁸Kakatsala ba'a wəndə nya kenza kamene yayata wəsə se Zhɛrobowam. Ma kwa nakɛ mempɛhweta shɛ Salomon kamene slene ne, pa veyi kande newe slene ta mbeli nyi kemene slene ki ghɛa Zhozɛf pɛtɛ.

²⁹Ma te kwete və kashave Zhɛrobowam mbe Zhɛrəzalɛm, begeme hɛ kwa hweŋkwa le nde mɛ ŋkwa ta Shala Ahiya nya kande Silo, lekwesa kwatepa ya kənəa Ahiya, bake nci hɛ mbe gamba.

³⁰Pa Ahiya kelete lekwesa nya kənə kaŋkwahemte mbe meŋe bakeghəmbe.

³¹Ma ke sha Zhɛrobowam: «Kelete ŋa ŋa bela meŋe! Kwa nza ŋkɛ ne, wa nya ghena ta Mahwətə, Shala ta ka Israyɛl nya: ‹Wa nya 'ya nya katekelehwe meghe va Salomon ama kateve ŋa yita ta mbeli 'ya meŋe.

³²Yita kwetɛŋe yatekele ŋkɛ te zlaɓa ta nde mene slene ta ɗa David ba'a te ghəa Zhɛrəzalɛm, meleme nya ntave 'ya mbe hwelefe nyi mbe Zhɛrəzalɛm pɛtɛ.

³³Va nya sərəakɛ ɗa ŋkɛ kahawe va Astartɛ, shala nya kamale ta ka Sidon, Kemosh, shala ta ka Mowab, Milkom, shala ta ka Amon ba'a va nya sema ŋkɛ kazele hweŋkwa nya ncɛte nda 'ya, kaya wəshi mahalegə ba'a wəshi nyi kehi kezha mene wəsə nya ganyɛ kwa ntsə ta ɗa kala yitenyɛ David.

³⁴Ama shave mbe dzeve ta Salomon tekele meghe 'ya we, va nya nza ŋkɛ nahe 'ya keveyi kameghe pa te kiɗi ta vəa ŋkɛ se te David nya kande mene slene ta ɗa nya ntave 'ya ba'a nya keyate wəshi mahalegəa ɗa le ghena nyi gezeke 'ya.

³⁵Shave mbe dzeve ta wəzege ta ŋkɛ tekele meghe 'ya kave ŋa. Geze ta ŋkɛ ne, yita meŋe.

³⁶Ama kateve nda yita 'ya kwetɛŋe ke wəzege ta ŋkɛ kezha nza hwelefe ta nde mene slene ta ɗa David kala paterela keveci keveci mbe kema ta ɗa pelɛ Zhɛrəzalɛm, meleme nya ntave 'ya kezha veyi sləa ɗa mbe.

³⁷Ma kaŋa ŋa gɛ ne Zhɛrobowam ne, katekele ŋa 'ya kezha sleke ŋkwa nya ɗe na pɛtɛ ba'a katenza na kameghe mbe Israyɛl.

³⁸Ma kenza nde kahawe na va ghena nyi tegeze ŋa 'ya, kenza nde kadzeghwa na kwa hweŋkwa ta ɗa, kenza nde kamene wəsə nya tiɗiɗi na kwa ntsə ta ɗa, kaya wəshi mahalegəa ɗa le ghena nyi gezeke 'ya kala nya se nde mene slene ta ɗa David kamene ne, le gha tenza 'ya. Kateve nza kameghe 'ya ki ghɛa ŋa kaghala ghala kala nya veyi nda 'ya ke David. Kateve ŋa Israyɛl 'ya.

³⁹Kateshifə hwelefe ta David 'ya, ama kenza kaghala ghala we.›»

⁴⁰Ntake Salomon kazele hweŋkwa kezha peslekɛ Zhɛrobowam. Pelɛhetɛme Zhɛrobowam, pələsə hwɛnyɛ kajive Ɛzhipte sha Shishak meghe nya mbe Ɛzhipte, mba ŋkɛ pelɛ pa te mte ta Salomon.

⁴¹Nyi ketene slene nyi menete Salomon le wəshi nyi menete ŋkɛ pɛtɛ, le ntsehwelea ŋkɛ ne, nahe hɛ kenza kerafe rafe mbe “Palepa ta wəshi nyi menete Salomon”.

⁴²Va wəfaɗemsə menete Salomon kameghea pɛtɛa ka Israyɛl mbe Zhɛrəzalɛm.

⁴³Kwetere wəmbəa ŋkɛ, pa Salomon mtenyɛ, pa mbeli lamte ŋkɛ mbe “Meleme ta David”. Wəzege ta ŋkɛ Robowam nde kelete meghe te ŋkwa ŋkɛ.