Read KapsikiDC 1 Ka Meghea Kɛfi 12 Bible Online

1 Ka Meghea Kɛfi 12 - KapsikiDC bible

1 Ka Meghea Kɛfi 12

¹Cape Robowam kajive Sishɛm kwa nza nde pelɛ Sishɛm jive pɛtɛa ka Israyɛl kezha ve kameghe.

²Ma nda fate ghena shɛ Zhɛrobowam, wəzege ta Nebat ne, mbanyɛ ŋkɛ kwa Ɛzhipte kwa hwɛnyɛ ŋkɛ kajive va meghe Salomon, pa tarete kanza kwa.

³Ama pa mbeli ghwenakɛ ŋkwa kaheka. Pa zhɛreke geva le ka Israyɛl nyi ketsenete geva pɛtɛ, ma ke hɛ sha Robowam:

⁴«Nahe yiteyɛ ŋa kezhɛrete n'yɛ kala ka mavashi kambakete yaka nya te ghen'yɛ ɗaŋe ɗaŋe kala sheghwə nya te welɛ va sla kewəza. Ama tsetsenya ne, gweɗakwakɛ n'yɛ yaka nya vate ŋkɛ te ghen'yɛ le berete nda mene ŋa slene ghen'yɛ.»

⁵Ma ke sha hɛ: «Kwiɗi mə, ma mbe hɛ mahekene ne, nda se yɛ sha 'ya zhɛkwa.» Ntəŋə mbeli nyighɛ dzeghwanji.

⁶Cape meghe Robowam kalə sha mbelia jama nyi kese kamene slene le yitenyɛ Salomon mbanyɛ ŋkɛ teghweme kezha 'yɛwe ghena va hɛ, ma ke: «Tsema ɗe yɛ kazhɛne nda 'ya ke mbeli nyi tse wa?»

⁷Ma ke hɛ shɛ: «Ma keveyi ghəa ŋa na kande mene nda slene ke mbeli nyi ɓeshi, pa na pelave nda ghəa ŋa ke hɛ, kagezete nda ghena zeɗe ke hɛ ne, kaka mene slene ta ŋa tenza hɛ kaghala ghala.»

⁸Ama kese Robowam kaɓela ghena ta mbeli nyighɛ kaghena we, cape kalə sha ka mandalahɛnyɛ nyi kaka megelɛgeshi nyi kele ŋkɛ le hɛ, nyi kemene nda slene.

⁹Ma ke sha hɛ: «Take gheyɛ le ŋa ŋayɛ, tsema ɗe yɛ kazhɛne nda mə ke mbeli nyi kegezete nyi ‹Gweɗakwakɛ n'yɛ yaka nya vate nya yiteyɛ ŋa te ghen'yɛ kala sheghwə nya kejikə sla kewəza›, ke hɛ wa?»

¹⁰Ma ke ka mandalahɛnyɛ shɛ: «Wa nya ghena nya tegeze nda na ke mbeli nyi ke gezete ŋa: ‹Nahe yiteyɛ ŋa kezhɛrete n'yɛ kala ka mavashi kambakete yaka nya kwa ghə va ghen'yɛ ɗaŋe ɗaŋe, ama gha ne, gweɗakwakɛ n'yɛ yaka shɛ›, ke hɛ sha gha. Ma pa na sha tezhɛne nda ke hɛ: ‹Deke ma kwatɛka ta dzeve ta ɗa ke dzeve ta yiteyɛ ɗa.

¹¹Ma tsetsenya, kwa nza nde nahe yiteyɛ ɗa keveyi sheghwə nya ɗaŋeɗa kala nya kejikə sla kewəza kwa ghə va gheyɛ ne, ma 'ya le ŋa ɗa, katembake ɗaŋeɗa ta sheghwə nya te welɛ va gheyɛ 'ya. Ma kwa nza nde le kwərəpə se yiteyɛ ɗa ka'yɛ ŋayɛ, le kwərəpə kwa lɛ lɛ te'yɛ ŋayɛ 'ya!›, pa sha hɛ.»

¹²Cape yɛ Zhɛrobowam le mbeli nyighɛ pɛtɛ kalə sha Robowam te kwa mahekene ta hɛ kala nya gezete nda meghe ke hɛ, ma ke sha hɛ: «Nda se yɛ sha 'ya te kwa mahekene ta hɛ.»

¹³Pa meghe zhɛnete nda le dzawea mehele ke mbeli nyighɛ kaɗema yɛ ghena nya gezete nda mbelia jama nyighɛ,

¹⁴pa gezete nda ke mbeli kala nya gezete nda ka mandalahɛnyɛ, ma ke sha hɛ: «Nahe yiteyɛ ɗa keveyi sheghwə nya ɗaŋeɗa kala nya kejikə sla kewəza kwa ghə va gheyɛ, ma 'ya le ŋa ɗa, katembake ɗaŋeɗa ta sheghwə nya te welɛ va gheyɛ 'ya. Ma kwa nza nde le kwərəpə se yiteyɛ ɗa ka'yɛ ŋayɛ, le kwərəpə kwa lɛ lɛ te'yɛ ŋayɛ 'ya.»

¹⁵Ma kala nyagha, kese meghe kafa ghena ta mbeli nyighɛ we. Shala Mahwətə nde menete tsagha kezha yipə ghena nya meɗeyi nda ŋkɛ ke Zhɛrobowam, wəzege ta Nebat laka nde mɛ ŋkwa Ahiya, nde Silo.

¹⁶Ma kwa nakɛ pɛtɛa ka Israyɛl kaɗema meghe kese kafa ghena ta nci. Ma ke hɛ: «Wa wəsə nya kwelɛ ghen'yɛ le David wa? Wəsə shɛ kwelɛ ghen'yɛ le wəzege ta Zhɛsɛ we! Mbara ɓəmə sha ghɛa ɓəmə, ka Israyɛl! Ma gha gɛ ne, yana le meghea ŋa gɛ hwelefe ta David!» Cape ka Israyɛl lənji sha ghɛa nci.

¹⁷Deke ka Israyɛl nyi mbe hɛɗia Zhəwda yanza Robowam kameghea nci.

¹⁸Pa meghe Robowam ghweneghe Adoram wəndə nya te ghəa mbeli nyi kemene slene berete, ama pa pɛtɛa ka Israyɛl jɛwəmte ŋkɛ le pelɛ. Pa ŋkɛ hwepete ghə kadzeme wəmata gədəwəa ŋkɛ kezha hwɛ kadzeme Zhɛrəzalɛm.

¹⁹Tsetse menete geva ŋkɛ nda se ka Israyɛl kaɗema ghena ta mbelia David pa ɓeshi.

²⁰Ma kwa fate ka Israyɛl nahe Zhɛrobowam kezhɛreke geva ke mbeli, pa hɛ hekaghe kaveyi kameghea nci. Deke yita ta Zhəwda nde tene katəkwə təkwə hwelefe ta David.

²¹Ma kwa ntsehe Robowam pelɛ Zhɛrəzalɛm, pa tsenete ka sewajɛ 180.000 hwa mbeli ganji ganji kwa yita ta Zhəwda le ŋa Bɛnjamɛn kezha lə kampa le ka meghea ka Israyɛl ba'a kezha veyi ghəa ŋkɛ kameghea nci gheŋkɛ nya kawəzege ta Salomon.

²²Ama pa Shala gezete nda ghena ke nde mɛ ŋkwa Shemaya, ma ke shɛ:

²³«Geze nda ghena ke Robowam, wəzege ta Salomon nya kameghea ka Zhəwda ba'a ke ka Zhəwda le ka Bɛnjamɛn. Ma pa na sha hɛ:

²⁴‹Wa nya ghena nya geze Mahwətə nya: dzemema yɛ kampa le ka kesaka yitehɛ ŋayɛ ka Israyɛl ma, zhɛneghe geva yayata wəndə kalə sha ghɛa ŋkɛ. Kwa nza ŋkɛ ne, 'ya nde kezəzəte kamene wəsə nya kemenete geva pɛtɛ›, pa sha hɛ.» Pa hɛ fate nda ghena ta Mahwətə, pa hɛ lənji sha ghɛa nci.

²⁵Pa Zhɛrobowam ŋate zli yitea meleme ta Sishɛm nya hwa ghweme kezha nza mbe. Temə ɓɛhwɛ, pa slənyɛ shave mbe Sishɛm kaŋate zli yitea meleme ta Penəwɛl.

²⁶Ma ke Zhɛrobowam mbe ghəa ŋkɛ: «Mbe wəshi nyi kemenete geva nyi kentsehwelema mbeli ne, wərə meghe ɗa kazhɛneghe geva kadzeki ghɛa David.

²⁷Va nya nza ŋkɛ, ma kedzeme Zhɛrəzalɛm mbeli kezha dzeghe melɛ mbe ghɛa Mahwətə ne, katezhɛreghe geva wənəa nci laka nde sleke hɛ Robowam nya kameghea ka Zhəwda, katepesle ɗa hɛ kalənji yitea Robowam kahawe ve.»

²⁸Ma kwa keleke kwete zəzə meghe Zhɛrobowam, pa vɛsəte leve bake le mze kwa tere tere, ma ke sha mbeli: «Kewəba dzeme Zhɛrəzalɛm gheyɛ keveci keveci. Newakɛ mə ka Israyɛl, wa nyi shala ta ŋayɛ nyi fəakave ŋayɛ shave mbe Ɛzhipte.»

²⁹Pa Zhɛrobowam veyi kwete hwa wəshi nyi vɛsəte ŋkɛ yitea mze mbe Bɛtɛl, pa kwete kwa Dan.

³⁰Tsetse tsəkwəyite mbeli ŋkɛ yitea jaɗafa kamene. Kwele kwele mbeli kadzeghwa kwa zəɗə kabeghe kwete leve nyagha hwa'a kwa Dan.

³¹Pa Zhɛrobowam ŋate kweci cɛ kedzeghe shala kwa ghəa yɛ kələŋə, pa tsehave mbeli kala dzeghe Shala hwa mbeli nyi tagha, nyi keɗema kwa yita ta Lɛvi.

³²Pa zlapete gəsəkə te kwa meŋe mcɛfeghəmbe ta hɛ mbe tere kwa deghese kala gəsəkə nya se mbeli kamene mbe Zhəwda, ntake ŋkɛ kadzeghe melɛ te reghwetɛ le ghəa ŋkɛ. Tsagha menete ŋkɛ mbe Bɛtɛl kadzeghe nda melɛ ke leve ta sla nyi vɛsəte ŋkɛ. Pa veyi kweci hwa ka dzeghe shala mbe Bɛtɛl te ghə cɛ kedzeghe shala nyi ŋate ŋkɛ.

³³Ma te kwa meŋe mcɛfeghəmbe ta hɛ mbe tere kwa deghese kala və nya ntave ŋkɛ, pa Zhɛrobowam menete gəsəkə mbe Bɛtɛl kaŋa pɛtɛa ka Israyɛl. Hwa gəsəkəa shɛ ne, pa dzeghekɛ melɛ ba'a terekɛ 'wərdə kwa hə hə.