Read KapsikiDC 1 Ka Meghea Kɛfi 13 Bible Online

1 Ka Meghea Kɛfi 13 - KapsikiDC bible

1 Ka Meghea Kɛfi 13

¹Pa kwete wəndəa Shala slə mbe Zhəwda kadzawa Bɛtɛl kwa gezete nda Mahwətə. Pɛkwe ŋkɛ kwa yipə yipə le və nya dzeghe melɛ kwa tere tere Zhɛrobowam te reghwetɛ.

²Ntake kageze ghena ta Mahwətə nya kadzete reghwetɛ: «Reghwetɛ! Reghwetɛ! Fate ghena nya geze Mahwətə! Kateya kwete wəzege teza mbe hwelefe ta David, Zhoziyas tenza sləa ŋkɛ. Te gha, katesla ghə ŋkɛ te ka dzeghe Shala nyi pelɛ ghəa kələŋə, ŋkwa nya se hɛ katere 'wərdə kwa hə hə te vəashi. Katetere 'yɛ'yɛa wəndə ŋelɛ mbeli te gha!»

³Te vecia shɛnyɛ, ma ke wəndəa Shala shɛ gezete wəsə kencɛ wəsə zhɛkwa: «Wa nya kateperawenyɛ reghwetɛ ba'a katerɛɗɛnyɛ pəsəɗə nya te. Te wəsə kencɛ wəsə nyagha teɗepe yɛ nahe Mahwətə kegezete ghena.»

⁴Ma kwa fate ghena ta wəndəa Shala meghe Zhɛrobowam kadzete reghwetɛ nya mbe Bɛtɛl ne, pa kafete dzeve kənəa reghwetɛ, cape kageze: «Keseve mə wəndə nyagha!» Ama gaŋe dzeve nya kafete ŋkɛ nzanyɛ keghwele ghwele laka wəndəa Shala nyagha, shaŋe kazhɛne sawa pelɛ.

⁵Te ŋkwa shɛnyɛ, pa reghwetɛ perawenyɛ mbe, karɛɗɛ pəsəɗə kadzete hɛɗi kala ghena nya gezete nde mɛ ŋkwa, nya gezeke Mahwətə.

⁶Ma ke meghe sha wəndəa Shala nyagha: «Təhwə təhwə ŋa 'ya, mpi nda dzeve ke Mahwətə, Shala ta ŋa ba'a səkwə ghə kaŋa ɗa yitea nza dzeve ta ɗa kala nya se ŋkɛ.» Pa wəndəa Shala nyagha səkwəte ghə sha Mahwətə, pa dzeve ta meghe mbelenyɛ wɛŋe wɛŋe kala nya se ŋkɛ.

⁷Ma ke meghe sha wəndəa Shala ɓiyitsa: «Mbi kadzeki ghɛa ɗa yitea wəsə kezeme. Kwetere wəmbəa ŋkɛ, kateve ŋa wəsə gəmə 'ya.»

⁸Ma ke wəndəa Shala sha meghe: «Ya gha nza kateve ɗa kwete bela ta wəshi nyi ki ghɛa ŋa ne, kadzeki 'ya we, kazeme wəsə 'ya ba'a kasa yɛmə 'ya te ŋkwa nya we.

⁹Va nya nza ŋkɛ ma ke Mahwətə gezete ɗa: ‹Wəsə shɛ kazeme na we, yɛmə shɛ kasa na we, kwete kwete hweŋkwa yakele na kazhɛre geva kalə sha ghɛa ŋa tekeleke le nya kelete na kadzawa Bɛtɛl.›»

¹⁰Pa zhɛreghe geva laka kwete hweŋkwa tekeleke le nya se ŋkɛ kwa.

¹¹Kwete nde mɛ ŋkwa ta Shala ya shɛ kehale hale mbe Bɛtɛl. Pa ŋwalea tezhilia ŋkɛ se shɛ kagezete nda wəshi nyi menete wəndəa Shala shɛ te vecia shɛ mbe Bɛtɛl, pa hɛ ɓelate nda ghena nyi gezete nda ŋkɛ ke meghe.

¹²Ma ke yitenyɛ hɛ sha hɛ: «Laka nyama hweŋkwa zhɛreghe geva ŋkɛ wa?» Ntəŋə ŋwalea ŋkɛ nyighɛ lə ka'yɛwe nyama nyama hweŋkwa nya zhɛreghe geva wəndəa Shala nya kese mbe Zhəwda.

¹³Ma ke yitenyɛ hɛ sha hɛ ɓiyitsa: «Vate ɗa serede te kwara ta ɗa!» Pa hɛ vate nda te, tarame ŋkɛ pelɛ.

¹⁴Pa kelete hweŋkwa nya kelete wəndəa Shala nyagha, pa kekave kwa nza ŋkɛ mentishɛ yitea hwemeke. Ma ke shɛ: «Gha wəndəa Shala nya kese se pelɛ Zhəwda na?» Ma ke shɛ: «'Ya shɛ ŋkɛ!»

¹⁵Ma ke shɛ zhɛkwa: «Mbi sha ghɛa ɗa yitea wəsə kezeme.»

¹⁶Ma ke sha 'ya: «Ewə, kashɛ 'ya zhɛre geva kezha beghe ŋa we, wəsə shɛ kazeme 'ya ba'a yɛmə shɛ kasa 'ya te ŋkwa nya we.

¹⁷Va nya nza ŋkɛ nahe Mahwətə kegezete ɗa: ‹Wəsə shɛ kazeme na ba'a wəsə shɛ kasa na te ŋkwa shɛ we. Kwete hweŋkwa yakele na kazhɛre geva kalə sha ghɛa ŋa tekeleke le nya kelete na kadzembe.›»

¹⁸Ama terezhɛŋe meha nde mɛ ŋkwa ta Shala nyagha yite, ma ke: «'Ya perə ne, kwete 'ya nde mɛ ŋkwa ta Shala kala gha ba'a nahe kwete nde ghwene ta Shala kegezete ɗa ghena nya kese va Mahwətə: ‹Zhɛneke kase sha ghɛa ŋa. Pa ŋkɛ zehwe wəsə kezeme ba'a sakɛ yɛmə.›» Ama tseŋwə ya slate nda ŋkɛ.

¹⁹Pa wəndəa Shala nyagha begheghe sha ghɛ kezha zeme wəsə ba'a kezha sa yɛmə.

²⁰Ma kazeme wəsə kezeme hɛ, pa Mahwətə gezete nda ghena ke meha nde mɛ ŋkwa nya mbe Bɛtɛl, nya kezhɛreke kwete nyagha.

²¹Pa ŋkɛ geze nda ghena ke wəndə nya kese mbe Zhəwda. Ma ke shɛ: «Wa nya ghena nya geze Mahwətə nya: ‹Ma kwa ɗema na kafa nda ghena ke Mahwətə, kwa ɗema na keyate wəshi mahalegə nya gezete ŋa Shala Mahwətə ta ŋa,

²²pa na zhɛreke geva kazeme wəsə ba'a kasa yɛmə te ŋkwa nya, ndagwara nahe Mahwətə kefɛake ŋa, vatse gɛ, kadzawa kwele ta ka shihɛ ŋa wəndə kemte mtea ŋa we.›»

²³Kwa zehwe wəsə kezeme wəndəa kasahwe yɛmə, pa meha nde mɛ ŋkwa ta Shala nyagha vate nda serede te kwara ta ŋkɛ ke wəndə nya zhɛreke nyagha ŋkɛ,

²⁴ntəŋə ŋkɛ yitea dzeghwa ta ŋkɛ. Begeme hɛ kwa hweŋkwa le nivɛrə, pa nivɛrəa shɛ peslekɛ. Mba geva ta ŋkɛ mɛa hweŋkwa. Mba kwara vare bela ta wəndə kemte mtea ŋkɛ, vare kwete bela nivɛrə.

²⁵Pa kweci mbeli nyi kedzeghwa dzeghwa ta nci nakɛ wəndə kemte mtea ŋkɛ kwa hweŋkwa le nivɛrə nyagha vare bela ta ŋkɛ. Pa hɛ lə kagezete mbe meleme ta nde mɛ ŋkwa ta Shala nya kameha za nyagha.

²⁶Ma kwa fate wəndə nya kezhɛreke nyagha kwa hweŋkwa kageze mbeli, ma ke: «Wəndəa Shala ŋkɛ, gheŋkɛ ɗema fa nda ghena ke Mahwətə. Mahwətə nde ndeke nda ke nivɛrə nya keneghaghe geva kənə ba'a nya kapesle ŋkɛ kala nya gezete nda geva ghena ta Mahwətə.»

²⁷Ma ke sha ŋwalea ŋkɛ: «Vate ɗa mə serede te kwara ta ɗa!» Ma kwa pate wəshi hɛ te kwara nyagha,

²⁸cape ŋkɛ kwa hweŋkwa, pa ŋkɛ lə kanakɛ wəndə kemte mtea wəndə nyagha kwa hweŋkwa va bela ta ŋkɛ kwara lɛmə le nivɛrə. Kese nivɛrəa shɛ kampeɗe wəndə kemte mtea ŋkɛ ba'a kampeɗe kwara ta ŋkɛ we.

²⁹Pa meha za nyagha kelete geva ta ŋkɛ, veyi te kwara ba'a zhɛneghe kadzembe Bɛtɛl kezha nehwene ŋkɛ ba'a kezha lamte ŋkɛ.

³⁰Pa ŋkɛ veyi kwa ŋa ŋkɛ kwele, cape mbeli kanehwene: «Awema, nahe wəza meyɛ ɗa kemte!»

³¹Ma ke nde mɛ ŋkwa ta Shala nya kameha za nyagha sha ŋwalea ŋkɛ kwetere wəmbəa la ta wəndə nyagha: «Ma kemte 'ya ne, kwa kwele nya kwetɛŋe la ɗa yɛ le wəndə nya, vare bela ta ŋkɛ ve geva ta ɗa yɛ.

³²Va nya nza ŋkɛ kaganda gezete ghena nya gezeke Mahwətə ŋkɛ kadzete reghwetɛ kedzeghe Shala nya mbe Bɛtɛl ba'a le kələŋə, nyi mbe Samari: katemene geva ghena nyi gezete ŋkɛ ya tsemanyɛ ŋkɛ.»

³³Ya kwela gezave nda ghena nyighɛ mbeli ke meghe Zhɛrobowam, kezhɛremte nza ta ŋkɛ kwa ndiremi nyagha ŋkɛ we. Mba ŋkɛ kanta mbeli hwa mbeli kezha nza kaka dzeghe melɛ hwa yɛ kələŋə. Ma keɗe wəndə kanza kande dzeghe shala shɛ ne, kave dzeve mbeli kadzeghə yitea nza ŋkɛ te ghəa kələŋəa shɛhɛ.

³⁴Pa dzeghwa nya kala nyagha vame hwelefe ta Zhɛrobowam pɛtɛ mbe jaɗafa, vatse zanyɛ sebe terayɛ te hɛ te hɛɗi.