Read KapsikiDC 1 Ka Meghea Kɛfi 15 Bible Online

1 Ka Meghea Kɛfi 15 - KapsikiDC bible

1 Ka Meghea Kɛfi 15

¹Te kwa meŋe degheseghəmbe ta va ta Zhɛrobowam, wəzege ta Nebat te meghe mbe Israyɛl, pa Abiyam dzete meghe mbe Zhəwda.

²Va mahekene menete ŋkɛ te meghe mbe Zhɛrəzalɛm. Ma'aka sləa meghekɛ, wəzha ta Abishalom nde.

³Pa Abiya menete jaɗafa kala nya menete yitenyɛ mpelɛa ma ke gheŋkɛ. Kese ŋkɛ kaɗe Shala Mahwətə ta ŋkɛ le wənə nya tiɗiɗi kala nya se ŋa shinyɛ David we.

⁴Se te David nda se Shala Mahwətə ta ŋkɛ kandeke nda wəzege kezha dzete ŋkwa ŋkɛ, yagha yita ta ka meghe kazanyɛ ba'a kezha nza Zhɛrəzalɛm kameleme nya nza meghe mbe:

⁵va nya nza ŋkɛ nahe David kemenete wəsə nya tiɗiɗi kwa kema ta Mahwətə kaɗema kentamte kwete hwa wəshi mahalegəa ŋkɛ ya kwetɛŋe kaɗema kahawe ve, keɗema deke mbe ghena ta Əwri, nde Hɛt.

⁶Keveci keveci se mpa kwelɛ yɛ Robowam le Zhɛrobowam.

⁷Ma nyi ketene ghena ta Abiyam ne, nahe hɛ kenza kerafe rafe mbe “Palepa ta wəshi nyi menete ka meghea ka Zhəwda”. Gheŋkɛ perə ne, na kese kampa le Zhɛrobowam.

⁸Ma kwa mtenyɛ ŋkɛ, pa mbeli lamte ŋkɛ mbe Meleme ta David. Wəzege ta ŋkɛ Asa nde kelete meghea ŋkɛ.

⁹Te kwa bakemsə ta va ta Zhɛrobowam te meghe mbe Israyɛl, pa Asa kelete meghe mbe Zhəwda.

¹⁰Va wəfaɗemsə kwetɛŋeghəmbe menete ŋkɛ te meghe mbe Zhɛrəzalɛm. Ma'aka sləa meghekɛa meghekɛ, wəzha ta Abishalom nde.

¹¹Wəsə nya tiɗiɗi yamenete Asa kwa kema ta Mahwətə kala shinyɛ David.

¹²Pa ŋkamte ka mene tahe mbe zele shala ta nci kamene nda slene ke hɛ te hɛɗia shɛ ba'a pa zamte sebe te wəshi nyi ŋate mbeli kazhɛrete hɛ kashala nyi menete ka shihɛ nci.

¹³Pa le Ma'aka meghekɛa meghekɛ fɛake ŋkɛ kenza kala male ta meghe kwa ŋate Ashɛra nya kamale nde kahawe ve kashala. Pa Asa gezete kezha mpə wəsə nya zhɛrete nde kashala ta nta mbeli ba'a tere ŋkɛ mɛa hələa Sɛdron.

¹⁴Ama kezamte sebe ŋkɛ te yɛ kələŋəa nci we. Ndagwara le wənə kwetɛŋe ɗehwe Mahwətə Asa pa te mte ta ŋkɛ.

¹⁵Pa keleke wəshi nyi veyi hɛ kaŋa Shala le yitenyɛ kadzembe ghɛa Shala kala mze kwa ghwə ghwə, le mze kwa tere tere, le kweci wəshi kemene slene.

¹⁶Keveci keveci se mpa kwelɛ yɛ Asa le Basha nya kameghea ka Israyɛl, kala nza ta hɛa nci teghweme.

¹⁷Cape Basha, meghea ka Israyɛl kadzeme le mpa sha ka Zhəwda, pa ŋate zli yitea meleme Rama kezha fɛake nda hweŋkwa ke Asa, meghea ka Zhəwda.

¹⁸Pa Asa kelete mze kwa ghwə ghwə pɛtɛ le mze kwa tere tere nyi hwa mcɛlə nyi mbe ghɛa Mahwətə zlaɓe le mcɛlə nyi ki ghɛa meghe. Pa fəave nda hɛ ke ka mene slene ta ŋkɛ kezha ghwene nda ke Bɛn-Hadad, wəzege ta Tabrimon nya kawəzege ta Hɛziyon nya kameghea ka Aram nya kenza le ghɛ kwa Damas le ghena nya:

¹⁹Ma ke shɛ: «Menete ɓə jikə geva kala nya kese kwelɛ ka yitehɛ ɓə. Wa nya 'ya nya keghweneghe ŋa mze kwa ghwə ghwə le mze kwa tere tere kawəsə gəmə. Kwiɗi nehemte jikə geva ta ŋa le Basha, meghea ka Israyɛl kezha ɗema ŋkɛ kasame sha 'ya zhɛkwa le mpa.»

²⁰Pa Bɛn-Hadad yɛte ghena ta meghe Asa. Pa ghweneghe mbelia jama nyi te ghə ka sewajɛa ŋkɛ kadzembe meleme ta ka Israyɛl, pa hɛ zləgwəhwe meleme ta ka Yon, Dan, Abɛl-Bɛt-Maka, le hɛɗia ka Kinɛrɛt ba'a le hɛɗia Nɛftali pɛtɛ.

²¹Fatema ta Basha ke ghena shɛ, pa sərəakɛ ŋa ta zlia Rama kanzanyɛ kwa Tirsa.

²²Ma ɓiyitsa, pa meghe Asa tsenete mbeli nyi mbe Zhəwda pɛtɛ yagha kwete wəndə katene. Pa mbeli fəhwe pelɛ le sheghwə nyi se Basha kaŋa zlia Rama le. Pa meghe Asa menehwe slene le hɛ kezha ŋa meleme ta ka Gɛba ta Bɛnjamɛn le Mispa kala nya gezete meghe Asa.

²³Ma nyi ketene ghena ta Asa ne, nahe hɛ kenza kerafe rafe mbe Palepa ta wəshi nyi menete ka meghea ka Zhəwda. Kageze ghena mbeli te wəshi nyi ncɛte ŋkɛ le slene nyi se ŋkɛ kamene, meleme nyi ŋate ŋkɛ mbe. Ama te kwa keɗaŋe ta vəa ŋkɛ, pa wəsə zhɛte nda mbe yɛ seɗa.

²⁴Ma kwa mtenyɛ ŋkɛ, pa mbeli lamte hwa ka shihɛnyɛ mbe “Meleme ta David”. Wəzege ta ŋkɛ Zhozafat nde kelete meghea ŋkɛ.

²⁵Ma te kwa bake ta va ta Asa te meghe mbe Zhəwda, pa Nadab wəzege ta Zhɛrobowam dzete meghe mbe Israyɛl, va bake menete ŋkɛ te meghe.

²⁶Pa ŋkɛ menete kwa ndiremi kwa kema ta Mahwətə. Wəshi nyi wale wale yase ŋkɛ kamene kala yitenyɛ nya keghweteyite ka Israyɛl yitea jaɗafa kamene, beze ghena nya kwetɛŋe le ŋa ŋkɛ yase ŋkɛ kamene.

²⁷Pa Basha wəzege ta Ahiya mbe hwelefe ta Isakar tsahwe ghena le kweci mbeli yite. Ma kadambeghənji yɛ Nadab le ka sewajɛa ka Israyɛl kampa mbe meleme ta ka Gibeton nya kaŋa ka Filisti, pa Basha peslekɛ meghe Nadab.

²⁸Te kwa mahekene ta va ta Asa te meghe mbe Zhəwda peslekɛ Nadab Basha. Pa Basha kelehwe meghea ŋkɛ.

²⁹Dzetema ta ŋkɛ kadzete meghe, zhibədikə ŋkɛ kənəa mbelia Zhɛrobowam kampə hɛ kaɗema kesərəakɛ sebe te ya kwetɛŋe, pɛtɛ zamte sebe ŋkɛ te hɛ kala ghena nya gezete nde mɛ ŋkwa ta Shala Ahiya nya mbe Silo, nya gezeke Mahwətə.

³⁰Va nya menete jaɗafa Zhɛrobowam ba'a nya ghweteyite ka Israyɛl yitea jaɗafa, nda hwepete wənə Mahwətə, Shala ta Israyɛl.

³¹Ma nyi ketene wəshi nyi menete Nadab ne, nahe hɛ kenza kerafe rafe mbe Palepa ta wəshi nyi menete ka meghea ka Israyɛl.

³²Te ŋkwa shɛ te ŋkwa shɛ se mpa kamene geva kwelɛ yɛ Asa le Basha nya kameghea ka Israyɛl, kala nza ta hɛa nci te ghweme.

³³Ma te kwa mahekene ta va ta Asa te meghe mbe Zhəwda, pa Basha nya kawəzege ta Ahiya dzete meghe kaŋa pɛtɛa ka Israyɛl. Va bakemsə wəfaɗeghəmbe menete ŋkɛ te meghe kwa Tirsa.

³⁴Pa ŋkɛ menete wəsə kwa ndiremi nya ɗema Mahwətə: kala nya se Zhɛrobowam kamene se ŋkɛ kamene, pa ŋkɛ menete jaɗafa nya se ŋkɛ kamene ba'a tsəkwəyite ka Israyɛl yitea beze ghena.