Read KapsikiDC 1 Ka Meghea Kɛfi 16 Bible Online

1 Ka Meghea Kɛfi 16 - KapsikiDC bible

1 Ka Meghea Kɛfi 16

¹Pa Mahwətə gezete nda ghena ke Yɛhəw, nde mɛ ŋkwa ta Shala, wəzege ta Hanani kezha geze nda ghena nya ke Basha:

²«Kawəndə gəmə nya ɗema zləvə te se na hwa mbeli, pa 'ya kelete ŋa kaveyi ŋa kameghea mbelia ɗa ka Israyɛl. Ama kala ndiremia dzeghwa ta Zhɛrobowam se na kadzeghwa, nahe na keghweteyite mbelia ɗa ka Israyɛl yitea jaɗafa kamene, kahwepete ɗa wənəa ɗa hɛ le jaɗafa ta nci.

³Vatse teza sebe 'ya te gha le mbelia ŋa kala nya menete 'ya le ghɛa Zhɛrobowam, wəzege ta Nebat.

⁴Yayata wəndə nya kemte ki ghɛa ŋa mbe meleme ne, kelɛa keti katezeme geva ta ŋkɛ. Ma wəndə nya kemte hwa gamba, yɛ zleŋa nyi yitea ghweme katempa geva ta ŋkɛ.»

⁵Ma nyi ketene wəshi nyi menete Basha, nahe hɛ kenza kerafe rafe mbe Palepa ta wəshi nyi menete ka meghea ka Israyɛl. Kageze slene nyi menete ŋkɛ mbeli mbe le ntsə geva nya ncɛte ŋkɛ.

⁶Ma kwa mtenyɛ ŋkɛ, pa mbeli lamte ŋkɛ mbe Tirsa. Wəzege ta ŋkɛ Ɛla nde kelete meghea ŋkɛ.

⁷Laka nde mɛ ŋkwa ta Shala Yɛhəw, wəzege ta Hanani gezete nda ghena Mahwətə ke yɛ Basha le mbelia ŋkɛ perə te ghena bake: te beze ghena ta ŋkɛ laka Mahwətə kwa mene wəshi nyi wale wale nyi ɗema Mahwətə ŋkɛ kala Zhɛrobowam ba'a kwa bake ne, va nya mpəmte hwelefe ta Zhɛrobowam ŋkɛ.

⁸Te kwa bakemsə ŋkwaŋeghəmbe ta va ta Asa te meghe mbe Zhəwda, pa Ɛla wəzege ta Basha kelete meghe mbe Israyɛl. Va bake menete ŋkɛ mbe Tirsa kameghe.

⁹Pa nde mene slene ta ŋkɛ Zimri, meghea kwete bela ta ka sewajɛ nyi le wəmata gədəwə tsahwe ghena yite le kweci mbeli. Ma vəa ŋkwa nyagha, kwa Tirsa meghe kasa wəshi kesa ba'a kaghwəyi ki ghɛa Arsa nya kwele te ghəa ghɛa meghe.

¹⁰Shilimə Zimri ki, pa peslekɛ Ɛla. Te kwa bakemsə mberefaŋeghəmbe ta va ta Asa mbe Zhəwda te meghe. Pa Zimri kelehwe meghea ŋkɛ.

¹¹Keletema ta ŋkɛ ke meghe ne, ntishɛ ŋkɛ pelɛ pasla, tereŋe ŋkɛ yitea mbelia Basha kampə: wəndə shɛ kesərəakɛ ŋkɛ le mpi ya wəzege, ya wəndə kwele, ya menəhɛnyɛ keɗema ya mcɛhɛnyɛ we.

¹²Pɛtɛ zamte sebe Zimri te mbelia Basha kala ghena nya kese va Mahwətə nya kegezete geva laka nde mɛ ŋkwa Yɛhəw.

¹³Ma nda menete geva wəshi nyighɛ ne, va nya menete jaɗafa yɛ Basha le wəzege ta ŋkɛ Ɛla ba'a va nya tsəkwəyite ka Israyɛl hɛ yitea jaɗafa kamene, ɓiyitsa te ghena nya bezemte nda hɛ ke Mahwətə, Shala ta ka Israyɛl le wəshi nyi zhɛrete hɛ kashala kahawe va hɛ.

¹⁴Ma nyi ketene wəshi nyi menete Ɛla ne, nahe hɛ kenza kerafe rafe mbe Palepa ta wəshi nyi menete ka meghea ka Israyɛl.

¹⁵Te kwa bakemsə mberefaŋeghəmbe ta va ta Asa te meghe mbe Zhəwda, pa Zimri dzete meghe mbe Israyɛl. Hɛ mberefaŋe menete ŋkɛ mbe Tirsa kameghe. Hi yahi geva ka sewajɛa ka Israyɛl mbe və nyagha yitea mpa le ka Gibeton nyi sleke ka Filisti.

¹⁶Pa ka sewajɛa shɛhɛ fate na Zimri kentsəɓəte mɛ le kweci mbeli kapeslekɛ meghe, ke mbeli. Te ŋkwa shɛnyɛ mbe ghedəkwəa ka sewajɛ, pa hɛ tsate kanya kwetɛŋe kaveyi Omri, wəndə kwelea ka sewajɛ kameghea ka Israyɛl.

¹⁷Ntəŋə Omri slə mbe Gibeton le pɛtɛa ka sewajɛa ka Israyɛl, pa hɛ lə kezha ha nda mpa ke Tirsa.

¹⁸Ma kwa nakɛ Zimri na mbeli kekelehwe melemea shɛ, pa hwɛnyɛ kadzembe kwete cɛ nya ki ghɛa meghe, tivə sha ghwə yite, mtiwə ŋkɛ mbe ghwəa shɛ.

¹⁹Se te beze ghena nyi menete ŋkɛ laka mene wəsə nya keɗema zeɗehwe nda ke Mahwətə ba'a laka dzeghwa mbe wəsə kwa ndiremi kala Zhɛrobowam nya ketsəkwəyite ka Israyɛl yitea beze ghena menete geva wəsəa shɛ.

²⁰Ma nyi ketene wəshi nyi menete Zimri, nahe hɛ kenza kerafe rafe mbe Palepa ta wəshi nyi menete ka meghea ka Israyɛl. Nahe mbeli kegezete mɛ nya ntsəɓəte hɛ le kweci mbeli mbe.

²¹Kwetere wəmbəa mte ta Zimri, pa ka Israyɛl neheve geva bake mbe: zake kwete bela ta mbeli nyi keɗe kave Tibni, wəzege ta Ginat kameghe. Omri yaɗe kweci mbeli kwa ŋa nci bela.

²²Pa mbeli nyi kwetere wəmbəa Omri zehwe te kema ta mbeli nyi keɗe Tibni, wəzege ta Ginat. Pa Tibni mtenyɛ, Omri nde kelete meghe.

²³Te kwa mahekenemsə kwetɛŋeghəmbe ta va ta Asa, meghea ka Zhəwda, pa Omri dzete meghe mbe Israyɛl kava meŋe bakeghəmbe. Va ŋkwaŋe menete ŋkɛ kameghe mbe Tirsa kaghate.

²⁴Kwetere wəmbəa ŋkɛ, pa ŋkɛ lə sha Sɛmɛr kapave kwete ghəa ghweme mbe Samari kadəɓərə mze kwa ghwə ghwə 6.000. Pa ŋate meleme pelɛ ghəa ghwemea shɛ kandeke nda sləa kaSamari, se te sləa Sɛmɛr, wəndə nya se ŋkwa kaŋa ŋkɛ.

²⁵Ama pa Omri menete wəsə nya ndiremi kwa kema ta Mahwətə, za ma wəshi nyi ndiremi ndiremi nyi menete ŋkɛ ke pɛtɛa ka meghe nyi mpelɛa ma ke gheŋkɛ.

²⁶Wəshi kwa ndiremi yase ŋkɛ kamene kala Zhɛrobowam, wəzege ta Nebat nya keghweteyite ka Israyɛl yitea jaɗafa kamene ba'a kabeze nda wənə ke Shala Mahwətə ta ka Israyɛl laka wəshi nyi zhɛrete hɛ kashala.

²⁷Ma nyi ketene ghena ta Omri le wəshi nyi menete ŋkɛ ba'a nyi se ŋkɛ kantsə geva kancɛ, nahe hɛ kenza kerafe rafe mbe Palepa ta wəshi nyi menete ka meghea ka Israyɛl.

²⁸Ma kwa mtenyɛ ŋkɛ, pa mbeli lamte ŋkɛ mbe Samari. Wəzege ta ŋkɛ Akab nde kelete meghea ŋkɛ.

²⁹Te kwa mahekenemsə degheseghəmbe ta va ta Asa te meghe mbe Zhəwda, pa Akab, wəzege ta Omri dzete meghe mbe Israyɛl. Va bakemsə bakeghəmbe menete ŋkɛ kameghea ka Israyɛl mbe Samari.

³⁰Pa Akab wəzege ta Omri menete wəsə kwa ndiremi kwa kema ta Mahwətə za ma ke ka meghe nyi mpelɛa ma ke gheŋkɛ.

³¹Deke jaɗafa nyi menete Zhɛrobowam wəzege ta Nebat nahe yamenete ŋkɛ we, na kelə kawəmeve Zhɛzabɛl, wəzha ta Ɛtba'al nya kameghea ka Sidon, pa ŋkɛ lə kagwəɗəŋə mbe kema ta kwete shala Ba'al kahawe ve.

³²Pa ŋate nda cɛ kwa Samari ke Ba'al, kapate reghwetɛ kedzeghe nda melɛ mbe.

³³Pa mɓete selə kashala Astartɛ mbe: pa bezemte nda wənə ke Mahwətə, Shala ta ka Israyɛl le wəshi nyi menete nyighɛ ŋkɛ za ma ke kweci ka meghe nyi mpelɛa ma ke gheŋkɛ.

³⁴Mbe vəa shɛ, na kwete nde Bɛtɛl, Hiyɛl sləa ŋkɛ kezhɛne kaŋamte meleme ta Zhɛriko. Ama nahe ghena nya gezete Mahwətə laka Zhozəwɛ, wəzege ta Nəwn kemenete geva: nahe Abiram, tezhɛa wəzege ta Hiyɛl kemte kagha shihə ŋkɛ yitea melemea shɛ. Ma kave gelembe mbeli kadzemɛ, mtiwə Sɛgəwb, kwa keɗaŋe ta wəzege ta ŋkɛ.