Read KapsikiDC 1 Ka Meghea Kɛfi 17 Bible Online

1 Ka Meghea Kɛfi 17 - KapsikiDC bible

1 Ka Meghea Kɛfi 17

¹Pa Ɛli, kwete nde meleme ta ka Tishebɛ te hɛɗia Gala'ad gezete nda ghena ke meghe Akab: «Laka Shala Mahwətə ta ka Israyɛl nya le ntsə, nya nza 'ya kamava ta ŋkɛ, wa nya 'ya nya kageze: ‹Ma mbe va nyi ketese ne, katenza mɛnɛ shɛ we, va shɛ kateme keɗema te ghena we.›»

²Ma ke Mahwətə gezete nda ghena ke Ɛli:

³«Slə ŋa teke, kwiɗi laka zeweve ta ghweme shɛ na wəfərə ŋa kwelɛ hələa Kerit, laka ŋkwa kesame ta veci sha Zhəwrdɛŋe.

⁴Ma tagha, katesakɛ yɛmə na kwa hələa shɛ ba'a kategeze nda 'ya ke yɛ ghame kakele ŋa wəshi kezeme hɛ.»

⁵Cape ŋkɛ, pa ŋkɛ menete kala nya gezete nda Mahwətə. Pa lə kanzanyɛ kwa hələa Kerit laka bela kesame ta veci va Zhəwrdɛŋe.

⁶Kakele nda ɗafa le sli ghame masheke le tɛhwɛɗi, kasa yɛmə ŋkɛ kwa hələa shɛ.

⁷Ama temə vireɗi, hase yɛmə kwa hələa nyagha kwa ɗema va kese kame te hɛɗia shɛ.

⁸Tagha gɛ, ma ke Mahwətə gezete nda ghena ke Ɛli:

⁹«Sate, kwiɗi kadzawa Sarɛpta te hɛɗia Sidon kezha nza na mbe. Nahe 'ya kegezete nda ke kwete male wede kezha mene ŋa wəshi kezeme nde.»

¹⁰Cape nde mɛ ŋkwa Ɛli kadzawa Sarɛpta, hwa'a ŋkɛ mbe meleme. Pa nakɛ kwete male wede tagha katseha sheghwəa nta. Pa hekakɛ, ma ke shɛ: «Kwiɗi gəke ɗa yɛmə ɓɛhwɛ le ghwelepe ta ŋa nya kezha sakɛ 'ya təhwə təhwə ŋa 'ya!»

¹¹Cape nde slə kalə kezha gə nda yɛməa shɛ. Pa Ɛli hekate ŋkɛ ɓiyitsa, ma ke shɛ: «Kwiɗi ŋake ɗa ɗafa ɓɛhwɛ təhwə təhwə ŋa 'ya.»

¹²Ma ke malea shɛ zhɛnete nda: «Kala nya nza Mahwətə, Shala ta ŋa teghweme, kazeme ŋa fela 'ya, ɗafa va 'ya we, deke hə demake mbe dzeve ya va 'ya kwa wəmbete həa ɗa, le n'yi keta wəsə ɓɛhwɛ kwa shaga. 'Ya katseha sheghwə ɓɛhwɛ nda lə 'ya katamte kezha ghen'yɛ le wəzege ta ɗa. Ma nahe kezehwe ŋkɛ ghen'yɛ, katempə ghen'yɛ va ma.»

¹³Ma ke Ɛli shɛ: «Ghazlənəma na ma! Kwiɗi menete kala nya gezete na le wəsə nya ketene va gha, ama kaba ne, takɛ ɗa ɗafa ɓɛhwɛ ba'a keleke ɗa nda telə na kata ŋayɛ ŋa ŋayɛ le wəzege ta ŋa.

¹⁴Va nya nza ŋkɛ, wa nya tsetse gezete Mahwətə, Shala ta ka Israyɛl: ‹Hə nya kwa wəmbete nya ne, kakiɗi ŋkɛ tɛape we, n'yi nya kwa shaga nyagha, kanahe ŋkɛ hwa'a te veci nya temakawa va Mahwətə kadzete hɛɗi we.›»

¹⁵Cape malea shɛ, pa ŋkɛ menete kala nya gezete nda Ɛli. Wəsə kezeme ya shɛ kaŋa nci keveci keveci, ghenta le wəzege ta nta ba'a le Ɛli.

¹⁶Kekiɗi hə nya kwa wəmbete nyagha le n'yi nya kwa shaga nyagha kala nya se Mahwətə kagezete laka Ɛli we.

¹⁷Kwetere wəmbəa və ɓɛhwɛ kadzeghə, pa zereghwe keseve wəzege ta male ke ghɛ nyagha, pa mbakete geva, pa mtenyɛ.

¹⁸Ma ke malea shɛ sha Ɛli: «Wəndəa Shala, wa wəsə nya kwelɛ gheɓə le gha wa? Gha se ŋa teke kezha zəzəte nda fete ta ɗa ke Shala ba'a kezha peslekɛ wəzege ta ɗa na?»

¹⁹Ma ke Ɛli zhɛnete nda: «Ndeke ɗa wəzege ta ŋa shɛ.» Pa ŋkɛ kelete se mbe dzeve ta meghekɛ, kakeleghe kadzeme cɛ nya nza ŋkɛ mbe nya pelɛ ghəa kwete cɛ, pa veyi te gezle ta ŋkɛ.

²⁰Cape ŋkɛ kasəkwə Mahwətə, ma ke: «Shala Mahwətə ta ɗa, wəsə nya ndiremi yaɗe na kamene nda kaganda ke male wede nya kekemaneve ɗa nya ki ghɛa nta, kwa pelakɛ wəzege ta nta na kamte na?»

²¹Zhigəa Ɛli mahekene kaɓelahe kənəa wəzegea shɛ, ma ke səkwəte Mahwətə: «Shala Mahwətə ta ɗa, kampi ŋa dzeve 'ya, zhɛnahwe nda mpi ke wəzege nya.»

²²Pa Mahwətə fate nda səkwə ghə ta ŋkɛ ke Ɛli: pa mpi zhɛnahwe nda geva ke wəzegea shɛ kanza teghweme zhɛkwa.

²³Pa Ɛli kelete wəzegea shɛ kasawa mbe cɛ nya kwake ba'a ndeke nda ŋkɛ ke meghekɛ, ma ke shɛ: «Newe, teghweme wəzege ta ŋa.»

²⁴Ma ke malea shɛ shɛ: «Nahe 'ya keɗepe tsetsenya kawəndəa Shala na, ghena ta Mahwətə ya kwa mɛ ŋa kaganda.»