Read KapsikiDC 1 Ka Meghea Kɛfi 18 Bible Online

1 Ka Meghea Kɛfi 18 - KapsikiDC bible

1 Ka Meghea Kɛfi 18

¹Kwetere wəmbəa və kwele kwele, ma ke Mahwətə gezete nda ghena ke Ɛli te kwa mahekene ta va: «Kwiɗi ncɛte nda ghəa ŋa ke meghe Akab kwa nza 'ya katekele va kase kadzete hɛɗi nya keghwele ghwele nya.»

²Cape Ɛli kalə kancɛ nda ghəa ŋkɛ ke Akab. Nahe ma kembakete geva kwele kwele kwa Samari.

³Pa Akab hekake Obadiya, wəndə nya wəba nya te ghəa ghɛ meghe. Kawəndə nya kehawe kwele kwele tsape tsape Obadiya va Mahwətə:

⁴ma kwa mpəmte ka mɛ ŋkwa ta Mahwətə Zhɛzabɛl nya kamale ta meghe, na Obadiya kewəfərəakɛ kweci ka mɛ ŋkwa gwəmsə mbe gezlɛŋə. Mcɛfemsə kewəvəsə kewəvəsə, kamene nda wəshi kezeme ke hɛ le yɛmə.

⁵Ma ke Akab gezete nda ke Obadiya: «Nde, mbara ɓə kezha dzeghwamte meleme ba'a kezha newemte yɛ ɗasle le yɛ hələ. Ya kwete katenakɛ gwəzə gheɓə kezha zeme yɛ gədəwə le yɛ gədəwə kwara, ma tsagha gɛ, katempəmte wəshi keseɗa ta ɓə gheɓə we.»

⁶Pa hɛ nehete hɛɗi nya tedzembe yayata wəndəa nci te. Cape Akab kelete ŋa ŋkɛ hweŋkwa, ntəŋə Obadiya kwa ŋa ŋkɛ.

⁷Ma kwa hweŋkwa Obadiya, begeme hɛ le Ɛli. Pa Obadiya ɗepete, vəkwə ŋkɛ mbe kema ta ŋkɛ, ma ke: «Gha ŋkɛ dayɛ na nde sleke ɗa Ɛli?»

⁸Ma ke Ɛli shɛ: «'Ya shɛ ŋkɛ dayɛ! Kwiɗi gezete nda ke nde sleke ŋa Akab: ‹Wa nya Ɛli kase!›, pa shɛ.»

⁹Ma ke Obadiya shɛ: «Wa beze ghena nya menete ŋa 'ya nda ve nda ɗa na kadzembe dzeve ke Akab wa? Katepesle ɗa ŋkɛ!

¹⁰Laka Shala ta ŋa Mahwətə nya le ntsə geze ŋa 'ya, kwete shɛ hwa meleme le yayata bela ta hɛɗia ka meghe nya ghwenakɛma mbeli Akab te kezha sepa ŋa we. Ma kegeze nda mbeli: ‹Gheŋkɛ mbe meleme ta n'yɛ we›, ke mbeli shɛ ne, kageze nda ŋkɛ ke mbeli pɛtɛ kala hɛɗia meghe kazeme fela keɗema mbeli kenakɛ ŋa.

¹¹Ama tsetsenya, ma pa sha 'ya kezha geze nda ke nde sleke ŋa Akab: ‹Wa nya Ɛli kase pa shɛ!›»

¹²Ma keslə 'ya yitea gha tsetsenya, katekele ŋa Sefəa Mahwətə kadzete ŋkwa nya ɗepema 'ya, ma kalə 'ya kagezete nda ke nde sleke ɗa Akab, katepesle ɗa ŋkɛ keshaŋe mbeli va gha. Ndagwara mbe hawe 'ya va Mahwətə se kawəzege.

¹³Kese mbeli kageze ŋa wəsə nya menete 'ya kwa se Zhɛzabɛl kampə ka mɛa ŋkwa ta Mahwətə wəshi nde sleke ɗa? Nahe 'ya kewəfərəakɛ ka mɛa ŋkwa ta Mahwətə gwəmsə, mbe gezlɛŋə bake. Kave nda wəshi kezeme 'ya le yɛmə ke hɛ.

¹⁴Ama tsetsenya, ma pa na sha 'ya: «Kwiɗi gezete nda ke nde sleke ŋa: ‹Wa nya Ɛli kase, pa shɛ› a pa sha 'ya! Katepesle ɗa ŋkɛ!»

¹⁵Ama, ma ke Ɛli zhɛnete nda: «Laka Shala Mahwətə nde berete nya le ntsə, nya nza 'ya kamava ta ŋkɛ, ɓeshi veci nya, katencɛ nda ghəa ɗa 'ya ke Akab.»

¹⁶Cape Obadiya lə sha Akab kagezete nda ghena shɛ. Ntəŋə Akab kalə kezha keme le Ɛli.

¹⁷Nakɛma ma ta ŋkɛ, ma ke shɛ: «Gha nya kekele ndiremi kadzembe Israyɛl ya teke kaganda na?»

¹⁸Ma ke Ɛli shɛ: «'Ya nde kekele ndiremi kadzembe Israyɛl we, ama gha le mbelia ŋa kwa nza ŋkɛ nahe yɛ keɗema kayɛ wəshi mahalegəa Mahwətə kadzeghwa ŋayɛ kahawe va yɛ shala Ba'al yɛ.

¹⁹Ma tsetsenya, ghwenakɛ mbeli katsene pɛtɛa ka Israyɛl kwetere wəmbəa ɗa pelɛ ghweme ta Karmɛl, zlaɓe le ka mɛ ŋkwa ta Ba'al nyi gwəmsə wəfaɗe ba'a mcɛfemsə ba'a ka mɛ ŋkwa ta Ashɛra, shala nya kamale nyi kenza gwəmsə wəfaɗe, nyi yate hɛ Zhɛzabɛl, male ta meghe.»

²⁰Pa Akab ghwenakɛ mbeli katsene pɛtɛa ka Israyɛl zlaɓe le ka mɛ ŋkwa pelɛ ghəa ghweme ta Karmɛl.

²¹Pa Ɛli hendave nda geva ke mbeli, ma ke: «Hwa'a tema tenza yɛ le ndeŋe ta ŋayɛ hwa'a teke hwa'a teke wa? Ma kenza nde Mahwətə ya kaShala ganyɛ, pa yɛ təkwə təkwəte kahawe ve. Ma kenza nde Ba'al, təkwə təkwə mə ŋkɛ!» Ama wəndə shɛ kese kazhɛne nda kwete ghena we.

²²Ma ke Ɛli zhɛkwa: «Deke 'ya kwetɛŋe ɗa nde tene kande mɛ ŋkwa ta Mahwətə, ama ka mɛ ŋkwa ta Ba'al, gwəmsə wəfaɗe ba'a mcɛfemsə hɛ.

²³Kesave n'yɛ mcɛmcɛli bake mbeli: ntave ŋa nci ka mɛ ŋkwa ta Ba'al kwetɛŋe, slekwemte ŋkɛ hɛ mbe ba'a veyi ŋkɛ hɛ te sheghwə. Ama mba hɛ kendə ghwə kadzeyite. Tsagha temene 'ya le kwete mca, kateve ŋkɛ 'ya te kwete sheghwə, ama katendə ghwə 'ya kadzeyite perə we.

²⁴Katesəkwə shala ta nci hɛ, ma 'ya ne, katesəkwə Mahwətə 'ya. Ma Shala nya kezhɛnete səkwə ghə laka ndə ghwə kadzeyite, gheŋkɛ Shala ganyɛ.» Ma ke mbeli pɛtɛ zhɛnete: «Tsagha shɛ ŋkɛ.»

²⁵Ma ke Ɛli sha ka mɛ ŋkwa ta Ba'al: «Ntave mə ŋa ŋayɛ mca kwetɛŋe mpelɛa ma shɛ yɛ menete kala nya kegezete geva, va nya nza ŋkɛ kwele ma yɛ. Pa yɛ kasəkwə ghə sha shala ta ŋayɛ, ama mba yɛ kemeha ghwə kadzeyite.»

²⁶Pa hɛ kelete mca nya ndeke nda mbeli ke hɛ, pa hɛ kahi melɛa nci ba'a səkwəte Ba'al se va masheke vaŋe kwa ghə veci, ma ke hɛ sha geze: «Ba'al, zhɛnete n'yɛ!» Kawetse hɛ dzeyi yitea reghwetɛ nya pate hɛ, ama kefa zhɛne ta ghena hɛ we.

²⁷Ma kwa ghə veci, ntəŋə Ɛli kaŋ'wəshi hɛ, ma ke: «Zlape nda mə ghena le berete! Ma kwa nza nde shala ŋkɛ, kwele kwele slene ve kamene keɗema gheŋkɛ ɗema tagha, keɗema wərə ŋkɛ kalənyɛ yitea dzeghwa. Wərə ŋkɛ kadzeyitea hɛnyɛ perə ɓiyitsa, megela ma feɗeghete yɛ.»

²⁸Ntake hɛ katsa lewela le berete za ma. Kala nya seneve hɛ, pa hɛ rerahemte ghəa nci le kafayɛ ba'a megha hwa'a te hwɛ ta mimi.

²⁹Ma kwa verazle veci sawa pelɛghə, ntəŋə hɛ kaheka Ba'al za ma le zlape ghena vaŋe te vəa melɛ nya dzeghe mbeli kwa mtsa veci. Ama keŋ'wete kwete hɛ hwa zhɛne, ya laka ghena, ya laka wəsə kencɛ wəsə we.

³⁰Ma ke Ɛli sha mbeli pɛtɛ ɓiyitsa: «Hendave ɗa mə geva.» Pɛtɛ mbeli hendave nda geva. Pa hite reghwetɛa Mahwətə nya kese keŋzla ŋzla.

³¹Pa fəte pelɛ meŋe bakeghəmbe kala nza ta yita ta ŋwalea Zhakob nya gezete nda ghena Mahwətə, ma ke shɛ: «Israyɛl tezhɛne sləa ŋa kanza.»

³²Pa Ɛli zhɛne kapate reghwetɛ kaŋa Mahwətə le pelɛa shɛhɛ. Pa late ki dzasle yitea reghwetɛ shɛ gare kelete litrə mahekenemsə.

³³Pa ŋkɛ pate sheghwə te reghwetɛ shɛ, pa ŋkɛ henemte mca nyagha ba'a veyi te.

³⁴Ma ke sha mbeli nyi tagha: «Viɗikɛ mə ghwelepe nyi wəfaɗe nyi le yɛmə shɛ yɛ shekeyi kənəa melɛ nya ba'a kənəa sheghwə.» Pa hɛ menete tsagha. Ma ke Ɛli zhɛkwa: «Menete mə kakwa bake zhigə.» Pa hɛ menete. Ma ke zhɛkwa: «Menete mə kakwa mahekene zhigə.» Pa hɛ menete tsagha shɛ.

³⁵Cape yɛmə kahwɛ dzeyi yitea reghwetɛ, pa viɗikɛ ki nya dzasle yite.

³⁶Ma te və nya dzeghe nda melɛ kwa tɛhwɛɗi mbeli ke Shala, pa nde mɛ ŋkwa Ɛli hendeghe geva kadzeyi yitea reghwetɛ, ma ke: «Mahwətə, Shala ta Abraham, ŋa Izak le ŋa Zhakob, menete kezha ɗepe mbeli ɓeshi gha ya kaShala ta ka Israyɛl, kande mene slene ta ŋa 'ya ba'a laka ghena ta ŋa menete wəshi nyi 'ya pɛtɛ.

³⁷Zhɛnete ɗa Mahwətə, zhɛnete ɗa kezha ɗepe mbeli nyi gha Mahwətə, gha ya kaShala ganyɛ ba'a gha nde zhɛre wənəa mbelia kase gha.»

³⁸Pa Mahwətə ghwenakawa ghwə nya keteremte melɛ, sheghwə, yɛ pelɛ ba'a keləwə. Pa ghwəa shɛ hasemte yɛmə nya kwa ki perə.

³⁹Ma kwa nakɛ ka Israyɛl, ntiŋə hɛ sha ghə mbe hɛɗi, ma ke hɛ zlapete: «Mahwətə ya kaShala ganyɛ! Mahwətə ya kaShala ganyɛ!»

⁴⁰Ma ke Ɛli sha hɛ: «Keseve mə ka mɛ ŋkwa ta Ba'al, yagha kwete wəndəa nci kahwɛnyɛ.» Pa hɛ keseve hɛ pɛtɛ. Pa Ɛli gezete kezha fə hɛ mbeli kadzawa hələa Kishon, pa mbeli slamte ghə te hɛ kwagha.

⁴¹Kwetere wəmbəa ŋkɛ, ma ke Ɛli sha Akab: «Kwiɗi kazeme wəsə kezeme ba'a kasa wəsə, va nya nza ŋkɛ nahe 'ya kefate berazlɛ ta va», ke shɛ.

⁴²Cape Akab lə kazeme wəsə ba'a kasa wəsə. Ma Ɛli le ŋa ŋkɛ, ntəŋə ŋkɛ kadzeme ghəa ghweme ta Karmɛl, pa gwəɗəŋə te hɛɗi le ghə dzawa kwelɛ seɗa.

⁴³Ma ke sha nde mene slene ta ŋkɛ: «Dzeme newakɛ ŋkwa nya laka ndərə.» Cape nde mene slene ta ŋkɛ kadzeme, ma ke shɛ kwa sawa ŋkɛ: «Wəsə shɛ ya ɓɛhwɛ we.» Zhigə mberefaŋe se Ɛli kaghwene kadzeme kanewe ŋkwa.

⁴⁴Ma te kwa mberefaŋe ta zhigə, ma ke nde mene slene ta ŋkɛ shɛ: «Kwete ləmbə nya ɓɛhwɛ nya kesame kwa ndərə ya shɛ. Kala dzeve nya taslete mbeli wəba ta ŋkɛ.» Ma ke Ɛli shɛ ɓiyitsa: «Kwiɗi kadzeme sha Akab, ma pa na shɛ: ‹Pate gədəwəa ŋa ba'a sawa ŋa tewə va kefiyi ŋa.›»

⁴⁵Mbake yambake ghweme kamene zhikwətəkwə va ləmbə nyi keleke sefə, ntake va nya wəba kame. Tarame meghe Akab pelɛ wəmata gədəwəa ŋkɛ kadzawa Zhizrɛyɛl.

⁴⁶Ma kwa ndeke nda berete Mahwətə ke Ɛli, pa hwepete kanda ta ŋkɛ hwa hwə, cape ŋkɛ te hwɛ te kema va wəmata gədəwəa Akab hwa'a mbe Zhizrɛyɛl.