Read KapsikiDC 1 Ka Meghea Kɛfi 2 Bible Online

1 Ka Meghea Kɛfi 2 - KapsikiDC bible

1 Ka Meghea Kɛfi 2

¹Ma kwa ɗepete David takwa takwa ŋkɛ kamte, pa meɗeyi nda ghena ta ŋkɛ ke wəzege ta ŋkɛ Salomon:

²«Takwa takwa 'ya kaslə te hɛɗi nya, nza le hwepe ghə ba'a kala nya nza za ghɛ!

³Pa na yate wəshi mahalegə Shala Mahwətə ta ŋa. Mene wəshi nyi ɗe ŋkɛ, dzeghwa kwa hweŋkwa ta ŋkɛ, yate ghena nyi gezeke ŋkɛ, le wəshi nyi meɗeyi ŋkɛ, le wəshi nyi 'yɛweke ŋkɛ mbe wəshi mahalegəa Moyize. Ma tsagha ne, mbe kema mbe kema tejive yayata wəsə nya mene na te yayata ŋkwa nya dzete na.

⁴Ma tsagha gɛ ne, kateyipə geva ghena ta ŋkɛ nya gezete ɗa Mahwətə kadzawa, ma ke: ‹Ma kenza nde tiɗiɗi dzeghwa ŋwalea ŋa mbe kema ta ɗa, le wənəa nci pɛtɛ ba'a le pɛtɛa nza ta nci, katenca wəndə nya ketenza te ŋkwa ŋa pelɛ pasla ta Israyɛl kaghala ghala.›

⁵Ɓiyitsa, nahe na keɗepe wəsə nya menete ɗa Zhowab, wəzege ta Serəwya ba'a wəsə nya menete nda ŋkɛ ke ka meghea ka sewajɛa ka Israyɛl nyi bake: yɛ Abnɛr wəzege ta Nɛr le Amasa wəzege ta Yɛtɛr. Pa mpəmte hɛ, ma kwa menete ŋkɛ kala nyagha, slene ta mpa yamenete ŋkɛ te və nya ɗema mpa shɛ. Bətə lekwesa ta ŋkɛ va mimi: kwa ghəa ŋkɛ ghena ta ŋkɛ.

⁶Vatse nza ŋkɛ le ntsehwele mene slene na, mba na kesərəakɛ kamte va meha.

⁷Katezəzə ŋwalea Barzilay, nde Gala'ad na perə, kwa se hɛ kakemane ɗa te və nya se 'ya kahwɛ mbe kema ta wəza meyɛ ŋa Absalom. Kwa nza nde tsagha ŋkɛ, le ganyɛa mehele nza na le hɛ, pa hɛ kazeme wəsə keveci keveci le gha.

⁸Ma kakwa keɗaŋe gɛ, mba na kezaghəyite Shimɛyi wəzege ta Gɛra, nde meleme ta ka Bahəwrim te hɛɗia ka Bɛnjamɛn. Zlahe se ŋkɛ kabezla ɗa te və nya se 'ya kahwɛ kadzawa Mahanayim. Ama kwa zhɛneke geva 'ya ne, pa dzawanyɛ mɛa hələa Zhəwrdɛŋe kakemane ɗa. Vatse meɗeyi nda 'ya le fela kwa kema ta Mahwətə kaɗema kapesle le kafayɛ.

⁹Ama tsetsenya ne, kawəndə nya kentsehwele ntsehwele na, mba na kenewe kala wəndə nya kesema kamene kwete ghena. Pa na ɗepe nza le: ya gheŋkɛ nza kehale hale ne, nda mbeli kapeslekɛ ŋkɛ.»

¹⁰Ma kwa mtenyɛ David, pa mbeli lamte ŋkɛ mbe “Meleme ta David” nya kaZhɛrəzalɛm.

¹¹Va wəfaɗemsə menete ŋkɛ kameghea ka Israyɛl, geze ta ŋkɛ, va mberefaŋe menete ŋkɛ mbe Hɛbron, va mahekenemsə mahekeneghəmbe pelɛ Zhɛrəzalɛm.

¹²Pa wəzege ta ŋkɛ Salomon kelete meghea ŋkɛ. Se tagha, pa meghea ŋkɛ mbakete geva megela.

¹³Pa Adoniya, wəzege ta yɛ David le Hagite lə sha Bacɛba, meghekɛa Salomon. Ma ke male nyagha shɛ: «Le kwelɛŋe se na sha 'ya na?» Ma ke zhɛnete nda: «E'e.

¹⁴Le ghena va 'ya kageze ŋa.» Ma ke Bacɛba shɛ: «Geze!»

¹⁵Ma ke: «Nahe na keɗepe kaŋa ɗa veyi geva meghe kaghate. Pɛtɛ ka Israyɛl kaneghe kezha nza 'ya kameghe. Ama tekeleke mene geva ŋkɛ: wəza yiteyɛ ɗa Salomon nde dzete meghe mba 'ya, va nya ɗehwe Mahwətə tsagha.

¹⁶Ma tsetsenya ne, wəsə kwetɛŋe yaɗe 'ya ka'yɛwe va gha, mba na keɗema yɛ ɗa.» Ma ke Bacɛba shɛ: «Geze ɗa gi.»

¹⁷Ma ke shɛ: «Təhwə təhwə ŋa 'ya, gezete nda ke meghe Salomon kezha ndeke ɗa Abishag, wəzha ta ka Shəwnɛm ŋkɛ kamale ta ɗa. Kateɗema ŋkɛ kayɛ ŋa kwa zəzə 'ya we.»

¹⁸Ma ke Bacɛba shɛ: «Ya, ganyɛke, kategeze nda 'ya ke meghe shɛ.»

¹⁹Cape Bacɛba kalə sha meghe Salomon kezha geze nda ghena te Adoniya. Pelɛhetɛme meghe sate te ŋkwa kadzate shɛ, gwəɗəŋə ŋkɛ mbe kema ta nta, ntishɛ ŋkɛ pelɛ pasla ta ŋkɛ, pa veyi nda kwete pasla ke meghekɛ te kwa zeme ta ŋkɛ, ntishɛ nde kwa.

²⁰Ma ke Bacɛba shɛ: «Ghena ɓɛhwɛ ya va 'ya ka'yɛwe va gha. Mba na keɗema kayɛ ɗa.» Ma ke meghe zhɛnete nda: «Ma, 'yɛwete wəsə nya ɗe na, kaŋka ŋa ŋkɛ 'ya we.»

²¹Ma ke zhɛkwa: «Wərə mbeli kandeke nda Abishag, wəzha ta ka Shəwnɛm kamale ke wəza yiteyɛ ŋa Adoniya tse yi?»

²²Ma ke Salomon sha meghekɛ: «Kezha wa 'yɛwe na kave nda Abishag, wəzha ta ka Shəwnɛm mbeli ke Adoniya wa? Megela ma nya 'yɛwe meghe na tsagha kaŋa ŋkɛ, kwa nza ŋkɛ kawəza yiteyɛ ɗa nya kwele tsagha! 'Yɛwe nda kaŋa ŋkɛ ba'a kaŋa mbelia ŋkɛ, yɛ Abiyatar, nde dzeghe Shala le Zhowab, wəndə kwelea ka sewajɛ!»

²³Ma ke meghe Salomon zemete fela kwa kema ta Mahwətə: «Pa Shala ɗate ɗa ndiremike keɗema mpia Adoniya keza te 'yɛwe nya kala nya!

²⁴Ma tsetsenya laka Mahwətə nya le mpi, nya keveyi ɗa pelɛ pasla ta yiteyɛ ɗa David ba'a nya kemeɗeyi ɗa meghe kaŋa ɗa le ŋwalea ɗa kala nya gezete ŋkɛ gɛ ne, kafela zeme 'ya, nda Adoniya kamte ɓeshi veci!»

²⁵Tagha gɛ, pa meghe ghwenakɛ Benaya, wəzege ta Yoyada, zhibədikə ŋkɛ kənə ba'a mbəhə ŋkɛ peslekɛ ŋkɛ. Tsetse mtenyɛ Adoniya.

²⁶Ma ke meghe sha nde dzeghe Shala Abiyatar kwetere wəmbəa nyagha: «Kwiɗi ŋa kadzembe Anatot te hɛɗia ŋa, va nya nza ŋkɛ wərə mte na dayɛ. Ama kapesle ŋa 'ya ɓeshi we, va nya nza nde nahe na kese kakele səndəkwəa jikə geva ta Shala Mahwətə mbe vəa yiteyɛ ɗa David ba'a nahe na kese kasa yaka zlaɓe le.»

²⁷Pa Salomon fɛake Abiyatar kemene slene ta ŋkɛ kande dzeghe Shala ta Mahwətə. Tsetse menete geva ghena nya gezete Mahwətə te hwelefe ta nde dzeghe Shala nya kwele Hɛli, mbe ghɛ Shala nya mbe Silo.

²⁸Ma kwa fate wəsə nya kemenete nda geva Zhowab ke yɛ Adoniya le Abiyatar, pa hwɛnyɛ kadzembe cɛ lekwesa ta Mahwətə kawəfərənyɛ vare reghwetɛ kedzeghe melɛ. Va nya nza nde nahe ŋkɛ kese kajikə geva le Adoniya, ama kese zlaɓe le Absalom kaghate we.

²⁹Ma ke mbeli gezete nda ke meghe Salomon: «Nahe Zhowab kehwɛnyɛ kalə kawəfərənyɛ terasle vare reghwetɛ.» Pa Salomon ghwenakɛ ŋkwa kalə ka'yɛwe va Zhowab: «Va wa wəfərə ŋa na vare reghwetɛ wa?» Ma ke shɛ: «'Ya ghazlənə ɗa va gha vatse wəfərə ɗa 'ya vare Mahwətə.» Pa Salomon ghwenakɛ Benaya, wəzege ta Yoyada, ma ke shɛ: «Kwiɗi peslekɛ.»

³⁰Cape Benaya, shilimə ŋkɛ mbe cɛ lekwesa ta Mahwətə, ma ke sha Zhowab: «Shave mbe wa ke meghe!» Ma ke Zhowab shɛ: «Ewə, teke ɗe 'ya kamte.» Pa Benaya zhɛreghe geva sha meghe kageze nda ghena nyi zhɛnete nda Zhowab.

³¹«Kwiɗi peslekɛ te ŋkwa shɛ kala nya gezete ŋa ŋkɛ, nda lamte na. Ma tsagha ne, pələsə ghen'yɛ le mbeli nyi ki ghɛa yiteyɛ ɗa va ghena kwa ghə te mbeli nyi mpəmte Zhowab bake kaɗema fete va hɛ.

³²Va nya nza nde yɛ meghea ka sewajɛa ka Israyɛl Abnɛr, wəzege ta Nɛr nya le meghea ka sewajɛa ka Zhəwda Amasa, nya kawəzege ta Yɛtɛr ne, tiɗiɗi ma hɛ ba'a za ma hɛ ke Zhowab, ama ghenci yampəmte ŋkɛ le kafayɛ kaɗema yiteyɛ ɗa keɗepe. Yawa, ncɛte nda wəsə nya mbe mpə ta mbeli nyi bake nyi Mahwətə ke Zhowab!

³³E'e, kwa ghəa yɛ Zhowab le ŋwalea ŋkɛ tenza ghena shɛ kaghala ghala, ama yɛ David le hwelefe ta ŋkɛ, le mbelia ŋkɛ ba'a ka meghea kɛfi nyi ketekele meghea ŋkɛ ne, katezlama hɛ mbe zeɗe nza nya keɗema kakiɗi, nya ndeke nda Mahwətə ke hɛ.»

³⁴Pa Benaya zhɛneghe geva kalə sha Zhowab ba'a peslekɛ ŋkɛ, pa lamte ŋkɛ mbe wəvea ŋkɛ hwa gamba.

³⁵Pa meghe veyi Benaya te ghə ka sewajɛ te ŋkwa Zhowab kaveyi Sadok kande dzeghe Shala mbe ghɛ Shala te ŋkwa Abiyatar.

³⁶Pa Salomon hekakɛ Shimɛyi, ma ke shɛ: «Ŋate ghɛ pelɛ Zhɛrəzalɛm. Tagha ɗe 'ya kanza na ba'a mba na keshave mbe melemea shɛ.

³⁷Ma 'ya sha gha gheci gheci: ma kendave na kashave ŋa mbe meleme te kwete hɛ ba'a kezlakemte hələa Sɛdron na ne, katemte na ya tsemanyɛ ŋkɛ, gha nde pəlive mte ta ŋa tsagha.»

³⁸Ma ke Shimɛyi sha meghe: «Ya, ganyɛke ghena nya maze! Katemene 'ya kala nya gezete na.» Pa Shimɛyi nzanyɛ kava kwele kwele mbe Zhɛrəzalɛm.

³⁹Ama mahekene va kadzeghe ne, pa kweci ka mavashia ŋkɛ hwɛnji bake kalə sha Akish, wəzege ta Ma'aka, meghea ka Gat. Ma ke mbeli gezete nda ke Shimɛyi: «Wa nyi ka mavashia ŋa nyi mbe Gat.»

⁴⁰Pelɛhetɛme Shimɛyi sate te ŋkwa, pa vate serede te kwara ta ŋkɛ, cape ŋkɛ kadzawa ghɛa Akish kwa Gat kezha sepa ka mavashia ŋkɛ. Pa ŋkɛ dzawa ba'a zhɛreke geva zlaɓe le hɛ same kwa Gat kadzembe Zhɛrəzalɛm.

⁴¹Pa mbeli gezete nda ke Salomon nahe Shimɛyi kese kwa Gat, ama nahe ŋkɛ kesamenyɛ kazhɛneghe geva kadzeme Zhɛrəzalɛm, ke mbeli shɛ.

⁴²Pa meghe hekake Shimɛyi, ma ke shɛ: «Nahe 'ya kegezete ŋa le zeme fela mbe kema ta Mahwətə yagha na kashave mbe Zhɛrəzalɛm, ɓiyitsa, nahe 'ya kegezete ŋa, ma te veci nya teshave na mbe melemea shɛ ya kadzema dzema ne, katemte na tsemanyɛ ŋkɛ, a 'ya sha gha. Ma pa na sha 'ya, ‹Ganyɛke ghena shɛ! Katemene 'ya kala nya gezete na›, a pa.

⁴³Va wa ɗema na kemenete kala fela nya zemete na mbe kema ta Mahwətə wa? Va wa ɗema na hawe va ghena ta ɗa nya gezete ŋa 'ya kamene wa?»

⁴⁴Ma ke meghe sha Shimɛyi zhɛkwa: «Nahe na keɗepe wəsə kwa ndiremi nya se na kamene nda ke yiteyɛ ɗa David, mba ŋkɛ yitea ghəa ŋa perə. Vatse nda tezhɛne ŋa 'yaghwa ta mehele ta ŋa Mahwətə kadzawa ghə.

⁴⁵Ama kawəpi maze Salomon Mahwətə ba'a katesleke nda meghea David kaghala ghala mbe hwelefe ta ŋkɛ.»

⁴⁶Pa meghe gezete nda ke Benaya, wəzege ta Yoyada, pa shave ki ghɛa meghe le Shimɛyi ba'a peslekɛ ŋkɛ. Tsagha mbakete geva meghea Salomon le berete kesleke ŋkwa dayɛ.