Read KapsikiDC 1 Ka Meghea Kɛfi 20 Bible Online

1 Ka Meghea Kɛfi 20 - KapsikiDC bible

1 Ka Meghea Kɛfi 20

¹Pa Bɛn-Hadad, meghea ka Siri tsenete ka sewajɛa ŋkɛ le ka meghe mahekenemsə bakeghəmbe nyi nza hɛ jikə, le yɛ gədəwə ba'a le yɛ wəmata gədəwə. Cape kadzeme kaveyi ghedəkwə pelɛ Samari, tereŋe kagha mpa mbe.

²Pa ghwenakɛ mbeli sha Akab, meghea ka Israyɛl, ma ke shɛ:

³«Wa nya ghena nya kese nya va meghe Bɛn-Hadad: ‹Fəave ɗa mze kwa ghwə ghwə nya va gha le mze kwa tere terea ŋa ba'a mia ŋa le ŋwalea ŋa nyi ganji ganji.›»

⁴Ma ke meghea ka Israyɛl shɛ: «Meghe nya kesleke ɗa, kala nya gezete na, kaŋa ŋa 'ya zlaɓe le wəshi nyi va 'ya pɛtɛ», ke shɛ.

⁵Pa ka ghwene ta ŋkɛ nyighɛ zhɛreke geva sha Akab, ma ke hɛ shɛ: «Wa nya ghena ta meghe Bɛn-Hadad nya: ‹Nahe 'ya keghweneghe ŋa mbeli kezha geze ŋa: Fəave ɗa mze kwa ghwə ghwə nya va gha le mze kwa tere tere ta ŋa ba'a le yɛ mia ŋa le ŋwalea ŋa nyi ganji ganji.

⁶Pa na ɗepete kateghwene ŋa ka mene slene ta ɗa 'ya hendɛ tsetse veci. Katesepa ghɛ meghea ŋa ba'a ghɛa ka mene slene ta ŋa hɛ. Katefə wəshia ŋa nyi nza ntsə te hɛ kase pe yɛ shɛ› wa ke.»

⁷Pa meghea ka Israyɛl tsenete mbelia jama nyi mbe meleme pɛtɛ, ma ke sha hɛ: «Nahe yɛ keɗepe gheyɛ le ghəa ŋayɛ wəsə kwa ndiremi yaɗe wəndə nya kamene ɓəmə fate fate. Va nya nza ŋkɛ ma kwa ghwenakɛ ka mene slene ta ŋkɛ ŋkɛ kezha 'yɛwe mia ɗa le ŋwalea ɗa ba'a mze kwa ghwə ghwə le mze kwa tere tere nya va 'ya, keɗema 'ya yɛ nda we!»

⁸Ma ke pɛtɛa mbelia jama ba'a mbeli pɛtɛ shɛ: «Fama ghena ta ŋkɛ na ma, yɛma na ma.»

⁹Ma ke sha ka ghwene ta Bɛn-Hadad: «Gezete nda mə ke meghe: Ma wəshi nyi ghweneke ŋkwa na ka'yɛwe va nde mene slene ta ŋa kaghate te kema ne, katemene 'ya. Ama kwete nya mbarave nya, 'ya shɛ kamene we, pe yɛ shɛ.» Cape ka ghwene ta ŋkɛ lə kazhɛnete nda mɛ tsagha.

¹⁰Tagha gɛ, pa Bɛn-Hadad ghweneghe nda mɛ ke Akab, ma ke: «Pa yɛ shala ɗate ɗa zlahe kesərəakɛ kwete 'ya hwa wəsə ya ɓɛhwɛ te hɛɗia Samari!»

¹¹Ma ke meghea ka Israyɛl zhɛnete: «Zəzəte nda mə ghena ŋela nya ke Bɛn-Hadad: ‹Ma wəndə nya kedzemte mpa ne, mba ŋkɛ keve zləvə kadzete ghəa ŋkɛ kala wəndə nya kehərəte ŋkwa se kwamte, pe yɛ shɛ!›»

¹²Ma kwa fate zhɛne ta ŋkɛ nyagha Bɛn-Hadad shɛ hɛ kasa mbazlia nci le kweci ka meghe mbe cɛ lekwesa ne, pa gezete nda ke ka meghea ka sewajɛa ŋkɛ yitea hi geva yitea mpa. Pa hɛ hite geva.

¹³Tagha gɛ ne, pɛkwe kwete nde mɛ ŋkwa ta Shala se sha Akab, meghea ka Israyɛl, ma ke shɛ: «Wa nya ghena nya geze Mahwətə nya: Nahe na kenakɛ mbeli nyi kwele kwele nyi we? Kateve hɛ 'ya kadzembe dzeve ta ŋa ɓeshi veci nya, kateɗepe na 'ya Mahwətə.»

¹⁴Ma ke Akab shɛ: «Laka nyama wəndə teve hɛ na kadzembe dzeve ta ɗa wa?» Ma ke shɛ: «Wa nya ghena nya geze Mahwətə nya: Laka ka megelɛgeshia ka sewajɛ nyi veyi mbeli nyi te ghəa sla ta hɛɗi.» Ma ke Akab: «Wa nde tegha mpa wa?» Ma ke shɛ: «Gha!»

¹⁵Pa Akab ɓelate ka megelɛgeshia ka sewajɛ nyi veyi mbeli nyi te ghəa sla ta hɛɗi. Gwəmsə bake ba'a mahekenemsə bakeghəmbe hɛ. Kwetere wəmbəa nci, pa newakɛ nza ta ka sewajɛa ŋkɛ le pɛtɛa ka Israyɛl, 7.000.

¹⁶Pa hɛ shave yitea mpa kwa ghə veci, ama ghwəyia nci yaghwəyi yɛ Bɛn-Hadad mbe cɛ lekwesa le kweci ka meghe nyi mahekenemsə bakeghəmbe, nyi kwetere wəmbəa ŋkɛ.

¹⁷Pa megelɛgeshia ka sewajɛ jivenji mpelɛa ma kaba yitea mpa. Pa Bɛn-Hadad ghwenakɛ wəvəsəa ka sewajɛ kanewe wəsə nya kemene geva. Ma ke mbeli gezete nda: «Kweci mbeli same kwa Samari», ke mbeli shɛ.

¹⁸Ma ke sha hɛ: «Kenza nde ghenci same le kwelɛŋe, pa yɛ keseve hɛ le mpi, ama kenza nde le mpa same hɛ ne, kekeseve mə hɛ le mpi!»

¹⁹Ma kwa shavenji ka megelɛgeshia ka sewajɛ nyi veyi mbeli nyi te ghəa sla ta hɛɗi shave mbe meleme le ka sewajɛ nyi kwetere wəmbəa nci,

²⁰yayata wəndəa nci kapesle nde ghema ta ŋkɛ. Kweracɛ ka Siri, tereŋe ka Israyɛl yitea hɛ. Pa Bɛn-Hadad hwɛnyɛ le gədəwə, zlaɓe le kweci ka zleɗe gədəwəa lɛmə.

²¹Wa nya kala nya ndeke nda mpa meghea ka Israyɛl ke hɛ: pa mpəmte gədəwəa lɛmə, teremte yɛ wəmata gədəwə, ɗate ka sewajɛa ka Siri dzawe dzawe.

²²Pa nde mɛ ŋkwa ta Shala se sha meghea ka Israyɛl kezha geze nda: «Nza le ntsə geva, pa na zəzəte wəsə nya temene na tiɗiɗi, va nya nza ŋkɛ ma heshi tsetse ŋkwa tsetse və ne, katese meghea ka Siri le mpa sha gha.»

²³Ma ke mbeli nyi yite dzasle sha meghea ka Siri: «Ma Shala ta ka Israyɛl ne, Shala nya hwa ghweme ŋkɛ: vatse nda nza ka Israyɛl berete ma ke gheɓəmə. Mpa ɓəmə le hɛ te ŋwela, tsagha ne, ghəpə yite kahərə hɛ gheɓəmə we.

²⁴Ma tsetsenya, menete kala nya. Kelemte meghe nyi nza yɛ jikə le hɛ pɛtɛ, mbeɗemte hɛ ba'a fəate mbeli nyi te ghə te ŋkwa nci.

²⁵Ma gha le ŋa ŋa, vame mbeli mbe sewajɛ kwele kwele kala ka sewajɛ nyi mpəmte mbeli yitea gha, tsagha le gədəwə ba'a le wəmata gədəwə ŋ'wete hɛ kwele kwele kala nyi vəashi. Ma tsagha, katempa mə le ka sewajɛa ka Israyɛl te ŋwela. Ya tsemanyɛ ŋkɛ, berete ma tenza mə ke hɛ.» Pa Bɛn-Hadad yɛte kafate nda ghena ntsehwelea nci ke hɛ.

²⁶Ma zake va, kala vəa shɛ ne, pa njiŋwakɛ ka sewajɛa ka Siri, cape hɛ kadzeme Afɛk, kezha gha nda mpa ke ka Israyɛl.

²⁷Nahe Akab kenjiŋwemte ka sewajɛa ka Israyɛl ba'a kefəave nda wəshi kezeme ke hɛ, cape hɛ kalə sha ka mpa ta nci ka Siri. Pa ka Israyɛl menete ŋkwa kenza ta nci kwa kema kwa kema le hɛ kala wəvəsəa kwi bake ɓɛhwɛ ɓɛhwɛ, ama ndɛkwe ŋkwa nya hɛɗi va ka Siri.

²⁸Pa nde mɛ ŋkwa ta Shala zhɛne kalə sha meghea ka Israyɛl, ma ke shɛ: «Wa nya ghena nya geze Mahwətə nya: ‹Ma kala nya gezete ka Siri 'ya Mahwətə, Shala nya hwa ghweme 'ya kaɗema kanya te ŋwela ne, mbe dzeve ta ŋa tenza pɛtɛa wəvəsəa ka sewajɛa nci nyi kwele kwele nyighɛ. Ma tsagha, kateɗepe yɛ 'ya ya kaMahwətə.›»

²⁹Hɛ mberefaŋe menete hɛ mbe ghedəkwəa nci kwa ntsə kwa ntsə. Te kwa mberefaŋe ta hɛ, ŋkelikə hɛ mbe mpa. Pa ka Israyɛl ɗate ka Siri kampəmte ka sewajɛ 100.000 te veci kwetɛŋe.

³⁰Ma nyi ketene ka sewajɛ 27.000 ne, kweracɛ hɛ hwɛnji kadzembe meleme ta ka Afɛk, ama pa zli nya yitea melemea shɛ ŋzlanyɛ kadzeghəa hɛ. Ama Bɛn-Hadad nya kehwɛnyɛ le ŋa ŋkɛ, pa wəfərənyɛ mbe meleme mbe cɛ nya cakeɗa ki kwete ghɛ.

³¹Ma ke mbeli nyi dzasle yite shɛ: «Fate, nahe ghen'yɛ kefate kageze geva nahe ka meghea kɛfi nyi mbe Israyɛl kenza kaka zhɛ heli. Katehwepe wəshi gheɓəmə hwa hwə ba'a katehwepe yɛ zewe gheɓəmə yitea ghə. Katelə gheɓəmə sha meghea ka Israyɛl, nda kwete katesərə ŋa ŋkɛ teghweme.»

³²Pa hɛ hwepahwe wəshi hwa hwə, hwepeyite yɛ zewe yitea ghə, cape hɛ kalə sha meghea ka Israyɛl, ma ke hɛ shɛ: «Kasəkwə ŋa mava ta ŋa Bɛn-Hadad nda kwete sərəakɛ nda mpia ŋkɛ na.» Ma ke Akab: «Mba ŋkɛ teghweme na? Ya, ganyɛke, wəza meyɛ ɗa ŋkɛ!»

³³Pa ka ghwene ta Bɛn-Hadad sləyi zhɛne ta ghena shɛ megela. Ma ke hɛ taghanyɛ sha Akab: «Nda wəza meyɛ ŋa Bɛn-Hadad yi!» Ma ke Akab: «Kwiɗi mə kalə kasepa ŋkɛ.» Pa Bɛn-Hadad shavenyɛ mbe ŋkwa kewəfərə ta ŋkɛ, ntəŋə ŋkɛ kalə sha Akab, pa ŋkɛ se kasləyi Akab nya kekesame ŋkɛ wəmata gədəwə ta ŋkɛ.

³⁴Ma ke Bɛn-Hadad sha Akab: «'Ya kaɗe kazhɛne ŋa meleme nyi fəhwe yiteyɛ ɗa va yiteyɛ ŋa. Wərə na kalə kaveyi wəshi səkəməa ŋa kwa Damas kala nya se yiteyɛ ɗa kaveyi wəshi səkəməa ŋkɛ kwa Samari.» Ma ke Akab shɛ: «Ma 'ya le ŋa ɗa ne, kaɗe 'ya kanza na kande jikə geva ta ɗa, kwetere wəmbəa ŋkɛ katesərə ŋa 'ya werete.» Ma kwa menete jikə geva ta shɛ hɛ, pa pelakɛ werete.

³⁵Pa Mahwətə gezete nda ke kwete wəndə hwa jikə ta ka mɛ ŋkwa kezha geze nda ke kwete hwa mbelia ŋkɛ: «Mpave ɗa təhwə təhwə ŋa 'ya», ke shɛ, hɛreɗɛ nyagha ɗema ɗa.

³⁶Ma ke nde mɛ ŋkwa shɛ shɛ: «Ma kala nya ɗema na yɛ ghena nya kese va Mahwətə, sləma ta ŋa yitea 'ya, katepesle ŋa nivɛrə.» Sləma ta ŋkɛ cakeɗake le, begeme hɛ le nivɛrə nya kepeslekɛ.

³⁷Ntəŋə nde mɛ ŋkwa shɛ sha kwete wəndə, ma ke shɛ: «Mpave ɗa təhwə təhwə ŋa 'ya!» Pa wəndə shɛ mpave ŋkɛ ba'a ɗakɛ ŋkɛ le zhi.

³⁸Cape nde mɛ ŋkwa nyagha kalənyɛ mɛa hweŋkwa kaneghe meghe Akab. Nahe ŋkɛ kepeɗete ghə le zlave bətə ntsə ta ŋkɛ yagha mbeli kaɗepete.

³⁹Ma kwa se meghe, ma ke nde mɛ ŋkwa nyagha shɛ: «Meghe yawe, hwa mpa nya dzawe se 'ya, pa kwete wəndə shavenyɛ hwa mbeli nyi kenderete geva yitea kampa le mava, ma ke: ‹Ya ɗa wəndə nya! Ma kehwɛnyɛ ŋkɛ va gha ne, kateza mpia ŋa keɗema kateŋki ɗa dəɓərəa mze kwa tɛawetɛa 3.000 na.›

⁴⁰Ma kwa nza 'ya kamene kweci wəshi ne, pa mava shɛ hwɛnyɛ!» Ma ke meghea ka Israyɛl: «Ya, nahe na kegezete ɗa nya teve mbeli te gha le mɛa ŋa.»

⁴¹Pa wəndəa shɛ pelemte zlave nya dəpəte kema ta ŋkɛ ŋkɛ le kahe kahe, pa meghe nyagha ɗepete kakwete ŋkɛ wəndə hwa jikə ta ka mɛ ŋkwa.

⁴²Ma ke nde mɛ ŋkwa shɛ shɛ ɓiyitsa: «Wa nya ghena nya kese nya va Mahwətə: ‹Kala nya pelakɛ na kambelenyɛ wəndə nya vate mte 'ya te, le mpia ŋa teŋki na ba'a katempə mbelia ŋa te zhia mbelia ŋkɛ.›»

⁴³Pa meghea ka Israyɛl dzeghwanyɛ sha ghɛa ŋkɛ kwa Samari le zəzə kwele kwele ba'a le wənə tehwepe.