Read KapsikiDC 1 Ka Meghea Kɛfi 21 Bible Online

1 Ka Meghea Kɛfi 21 - KapsikiDC bible

1 Ka Meghea Kɛfi 21

¹Wa nyi wəshi nyi kemenete geva kwetere wəmbəa ghena shɛhɛ nyi: Kwete wəndə ya shɛ kese mbe Zhizrɛyɛl, Nabot sləa ŋkɛ. Wəvea rɛzɛŋe ya ve mbe melemea shɛ dekwede yitea ghɛa Akab, meghea ka Samari.

²Ma ke Akab gezete nda ke Nabot: «Ndeke ɗa wəvea rɛzɛŋe ŋa kezha menete ntsa kewəza wəshi keta nɗeli 'ya kwa, kwa nza ŋkɛ terasle yitea ghɛa ɗa. Kateve ŋa kwete 'ya wəve nya ganyɛ ma, keɗema pa 'ya ŋkikɛ ŋa cɛdɛ.»

³Ama ma ke Nabot zhɛnete nda: «Hweŋkwa va 'ya kwa kema ta Mahwətə kave ŋa wəvea rɛzɛŋe ka shihɛ ɗa nya zehwe ghɛ 'ya yite tɛape we!»

⁴Pa Akab zhɛreghe geva kalə sha ghɛa ŋkɛ sheŋwe sheŋwe va hawe ba'a le wənə tehwepe kwa nza ŋkɛ ma ke Nabot shɛ: «Kave ŋa wəvea ka shihɛ ɗa nya zehwe ghɛ 'ya yite we.» Pa ŋkɛ ɓelahenyɛ te gezle ta ŋkɛ, zhɛrave nda kema ke dewe ba'a ɗema zeme wəsə kezeme.

⁵Pa male ta ŋkɛ Zhɛzabɛl lə shɛ, ma ke 'yɛwete ve: «Va wa nza na le wənə tehwepe kaɗema wəsə kezeme wa?»

⁶Ma ke zhɛnete nda: «Kwa gezete nda ghena 'ya ke Nabot nde Zhizrɛyɛl. Ma 'ya shɛ: ‹Ndeke ɗa wəvea rɛzɛŋe ŋa te cɛdɛ keɗema na kaɗe, pa 'ya ndeke ŋa kwete wəvea rɛzɛŋe te.› Nda geze ŋkɛ: ‹Kave ŋa 'ya we.›»

⁷Ma ke male ta ŋkɛ Zhɛzabɛl shɛ: «Ashɛ gha nde sleke ka Israyɛl deŋwa wəka! Sate, zehwe wəsə kezeme, nza wənəa ŋa le farefa! 'Ya nde teve ŋa wəvea rɛzɛŋea Nabot, nde Zhizrɛyɛl!»

⁸Pa nde rafete palepa kwele kwele te sləa Akab, dɛkate lamba ta meghe te hɛ ba'a ghweneghe nda hɛ ke mbelia jama ba'a ke ka sleke meleme nya se Nabot mbe.

⁹Ma rafete nde mbe palepa shɛhɛ: «Tsenete mə mbeli shɛ yɛ zlapete səwəmayɛ, pa yɛ veyi Nabot te ghə tsenea shɛ.

¹⁰Pa yɛ veyi mbeli nyi kezəzəma ghena mbe kema ta ŋkɛ kezha ve nda fete laka geze nahe ŋkɛ kebezlakɛ Shala ba'a meghe. Kwetere wəmbəa ŋkɛ, katekele ŋkɛ yɛ shave mbe meleme ba'a katebeze ŋkɛ yɛ le pelɛ.»

¹¹Pa mbelia jama le mbeli nyi kesleke ŋkwa mbe meleme ta Nabot menete kala nya gezete Zhɛzabɛl te palepa ta nta.

¹²Pa hɛ tsenete mbeli yitea vəa səwəmayɛ, pa hɛ veyi Nabot te ghəa tsenea shɛ.

¹³Pa mbeli nyi kezəzəma ghena bake se kantishɛnji kwa kema ta ŋkɛ. Ntake hɛ kave nda fete le ghena, ma ke hɛ shɛ: «Nahe Nabot kebezlamte yɛ Shala le meghe!» Pa mbeli kelemte shave mbe meleme, ntəŋə mbeli kabeza le pelɛ, pa mtenyɛ.

¹⁴Pa mbeli ghweneghe nda mɛ ke Zhɛzabɛl, ma ke mbeli shɛ: «Nahe mbeli keŋkwapemte Nabot le pelɛ, nahe ŋkɛ kemte.»

¹⁵Ma kwa fate Zhɛzabɛl nahe mbeli keŋkwapemte Nabot le pelɛ, nahe ŋkɛ kemte ne, ntəŋə nde kalə sha Akab, ma ke shɛ: «Sate, kwiɗi kelehwe wəvea rɛzɛŋe nya ɗema Nabot, nde Zhizrɛyɛl kapamte ŋa te cɛdɛ, kwa nza nde mba Nabot teghweme we, nahe ŋkɛ kemte.»

¹⁶Ma kwa fate Akab nahe Nabot kemte ke mbeli, cape ŋkɛ kadzawa wəvea rɛzɛŋea nde Zhizrɛyɛl Nabot kezha kelehwe.

¹⁷Pa ghena ta Shala gezete nda geva ke Ɛli, nde Tishebɛ:

¹⁸«Sate, kwiɗi kadzawa sha Akab, meghea ka Israyɛl nya kwa Samari. Kwa ŋkɛ mbe wəvea rɛzɛŋea Nabot, kwa dzawanyɛ ŋkɛ kezha kelehwe kaŋa ŋkɛ.

¹⁹Kwiɗi gezete nda, ma pa na shɛ: ‹Wa nya ghena nya geze Mahwətə nya: Ma kwa peslekɛ wəndə na, gha se ŋa kezha fəhwe wəshia ŋkɛ na?› Ma pa na shɛ zhɛkwa: ‹Wa nya ghena nya geze Mahwətə nya: Te ŋkwa nya se kelɛa keti kanini mimia Nabot, te ŋkwa shɛ tenini ŋa ŋa hɛ mimi.›»

²⁰Cape Ɛli, ama ma ke Akab shɛ: «Yawa, nahe na keseke ɗa se wəshi nde ghema ta ɗa?» Ma ke Ɛli: «E'e, nahe 'ya keseke ŋa se va nya dzembe ŋa na kamene wəshi nyi wale wale kwa kema ta Mahwətə.

²¹Wa nya ghena nya gezeke ŋkɛ nya: ‹Kateghwene ndiremi 'ya kadzete gha. Bətə tenza na, kateza sebe 'ya te hwelefe ta Akab pɛtɛ. Zhili, ka mavashi le mbeli nyi kaka mamza mbe Israyɛl.

²²Kala nya menete 'ya le ghɛa Zhɛrobowam, wəzege ta Nebat ba'a ŋa Basha wəzege ta Ahiya, tsagha temene 'ya le ghɛa ŋa, va ghena nya bezemte ɗa na kwele kwele ba'a va nya ghweteyite ka Israyɛl na yitea beze ghena›.

²³Ma Zhɛzabɛl le ŋa nta, na Mahwətə kegezete te: ‹Katezeme Zhɛzabɛl kelɛa keti terasle yitea zlia Zhizrɛyɛl.›

²⁴Zhɛne, ma yayata wəndə nya mbe hwelefe ta Akab nya kemte mbe meleme ne, kelɛa keti ka tezeme ŋkɛ, ma nya kemte hwa gamba, yɛ zleŋa ka tempa ŋkɛ.»

²⁵Wəndə shɛ kegha mbeli kanakɛ nya kendeke nda ghəa ŋkɛ tsape tsape ke wəshi nyi ndiremi ndiremi kamene, nyi ɗema Mahwətə kala Akab we. Male ta ŋkɛ Zhɛzabɛl nde se katsəkwə ŋkɛ kadzeyitea hɛ.

²⁶Kwele kwele menete wəshi nyi ndiremi ndiremi kashasha ŋkɛ laka wəshi nyi zhɛrete ŋkɛ kashala kahawe va hɛ kala ka Amon nyi ŋkamte Mahwətə kezha ve nda ŋkwa ke ka Israyɛl.

²⁷Ma kwa fate ghena ta Mahwətə Akab ne, pa ŋkwahemte lekwesa ta ŋkɛ, pa seɗete lekwesa nehwene, ntəŋə ŋkɛ yitea mene səwəmayɛ. Te lekwesa nehwenea shɛ se ŋkɛ kahɛ ba'a le same kadzeghwa ŋkɛ.

²⁸Pa Mahwətə gezete nda ghena ke Ɛli, nde Tishebɛ, ma ke shɛ:

²⁹«Nahe na kenakɛ tsema tsema shifəmte ghəa ŋkɛ Akab kwa kema ta ɗa na? Ma kwa shifəmte ghəa ŋkɛ ŋkɛ mbe kema ta ɗa, mba 'ya kave beze kadzete mba ŋkɛ teghweme we. Ama te və nya tenza wəzege ta ŋkɛ te meghe teve beze 'ya kadzete ghɛa ŋkɛ.»