Read KapsikiDC 1 Ka Meghea Kɛfi 9 Bible Online

1 Ka Meghea Kɛfi 9 - KapsikiDC bible

1 Ka Meghea Kɛfi 9

¹Ma kwa nahe ŋa ta ghɛa Shala le ŋa ta ghɛa meghe va Salomon ba'a kwa kemave wəshi nyi mawehwe ŋkɛ pɛtɛ ne,

²pa Mahwətə ncɛte nda geva kakwa bake zhigə kala nya ncɛte nda geva ŋkɛ kwa Gabawon.

³Ma ke Mahwətə shɛ: «Nahe 'ya kefate səkwə ta ŋa le 'yɛwe nya se na ka'yɛwe va 'ya: ma ghɛ nya ŋate nya na ne, nahe 'ya kewəpikɛ kezha veyi sləa ɗa te kaghala ghala. Te nza ntsə ta ɗa le wənəa ɗa keveci keveci.

⁴Ma gha le ŋa ŋa gɛ, ma kenza nde kadzeghwa na mbe kema ta ɗa kala yiteyɛ ŋa David le wənə ganyɛ tiɗiɗi, le mene slene le wəshi mahalegəa ɗa ba'a le ghena nyi gezeke 'ya pɛtɛ ne,

⁵kateve pasla meghea ŋa 'ya kaghala ghala te ghəa ka Israyɛl kala nya gezete nda 'ya ke yiteyɛ ŋa David: ‹Kashaŋe wəndə mbe hwelefe ta ŋa tɛape kezha dzeme pasla meghea ka Israyɛl we›, a 'ya shɛ.

⁶Ama kendave yɛ le mbelia ŋa, le hwelefe ta ŋa kasərəakɛ ɗa, keɗema yɛ keyate ghena nyi gezeke 'ya le wəshi mahalegəa ɗa ba'a kendave yɛ kadzeghwa ŋayɛ kamene nda slene ke kweci shala, kagwəɗəŋə kahawe va hɛ ne,

⁷kateza sebe 'ya te ka Israyɛl se te hɛɗi nya ndeke nda 'ya ke hɛ. Ma ghɛ Shala nya veyi nya 'ya te sləa ɗa ne, katenegha ŋkɛ 'ya cakeɗake le 'ya. Ma tsagha gɛ, katenza Israyɛl kala ghena heca, kawəsə kekiɗi ŋ'wəshi ta kweci hwelefefia mbeli pɛtɛ.

⁸Ma kadzeyi mbeli vare ghɛ nya keŋzla ŋzla nya ne, hake tenza hɛ ba'a ma ke hɛ sha tegeze: ‹Kezha wa menete nda wəsə nya kala nya Mahwətə ke hɛɗi nya ba'a ke ghɛ nya wa?›

⁹Katezhɛne nda mbeli ke hɛ: ‹Va nya sərəakɛ Shala Mahwətə ta nci nya fəakave ka shihɛ nci shave mbe Ɛzhipte hɛ, va nya jikəte geva hɛ le kweci shala, kase kagwəɗəŋə mbe kema ta nci kahawe va hɛ le mene nda slene ke hɛ: vatse nda vate beze nya kala nya Mahwətə te hɛ.›»

¹⁰Kwetere wəmbəa va bakemsə nya ŋate ghɛ nyi bake Salomon te, yɛ ghɛa Shala le ghɛa meghe ne, na Hiram meghea ka Tir, nya kefəave nda sheghwəa lekeleke le sheghwəa vɛ ba'a mze kwa tere tere kala nya ɗe ŋkɛ, pa kemave meleme bakemsə te hɛɗia ka Galilɛ.

¹²Cape Hiram ɓiyitsa shave mbe meleme kezha newe meleme nyi fəave nda Salomon, ama keɗehwe ghəa ŋkɛ we.

¹³Ma ke: «Wa meleme nyi ndeke ɗa nyi na wa wəza meyɛ ɗa!» Pa ŋkɛ ndeke nda slə ke hɛ kaKabəwl, slə nya kenza mba pa va ɓeshi, geze ta ŋkɛ, “Hɛɗi nya ɗema wəsə mbe”.

¹⁴Ndagwara nahe Hiram keghweneghe nda mze kwa tere tere ke Salomon gare kiləwə 3.500.

¹⁵Wa nya wəsə nya menete nya meghe Salomon yitea slene nya mene mbeli le ɗema ta wəndə kezha ŋa nda ghɛa Mahwətə ba'a kezha ŋa ghɛa ŋkɛ, le ŋkwa nya heka mbeli kaMilo, le zli nya yitea Zhɛrəzalɛm, le Hasor, le Mɛgido le Gɛzɛr.

¹⁶Pa Farawon, meghea ka Ɛzhipte lə kahave nda mpa ke Gɛzɛr. Pa ŋkɛ kelehwe ŋkɛ ba'a ndəyite ghwə yite kwetere wəmbəa mpə nya mpəmte ka Kanan nyi mbe ŋkɛ. Pa ŋkɛ ndeke nda melemea shɛ ke wəzha ta ŋkɛ nya wəmeve Salomon kawəsə gəməa gəsəkəa dzembe cɛ ta nta.

¹⁷Vatse zhɛne Salomon kaŋate meleme ta ka Gɛzɛr, tsagha kwete nya heka mbeli kaBɛt-Horon nya kwa deɓa,

¹⁸le Ba'alat, le Tamar te ɓerama nya te hɛɗia shɛ,

¹⁹tsagha pɛtɛa meleme nyi tsene wəshi nyi kenza kaŋa ŋkɛ mbeli mbe, le meleme nyi ve wəmata gədəwəa ŋkɛ ŋkɛ mbe le gədəwəa ŋkɛ. Nahe Salomon keŋate ŋkwa nyi ɗe ŋkɛ kaŋa mbe Zhɛrəzalɛm, mbe Liban ba'a mbe meleme nyi sleke ŋkɛ pɛtɛ.

²⁰Pɛtɛ kweci hwelefefia mbeli nyi ketene kala ka Amor, le ka Hɛt, le ka Pɛrɛs, le ka Hava, le ka Zhɛbəs, nyi keɗema kahwelefe ta ka Israyɛl.

²¹Ma ŋwalea nci nyi ketene, nyi mpəmtema ka Israyɛl te hɛɗia shɛ, na Salomon kefəte hɛ kaka mavashi nyi kemene slene pa ɓeshi.

²²Ama kese Salomon kakele ka Israyɛl kamava we, va nya nza ŋkɛ kaka sewajɛa ŋkɛ hɛ: ka mene nda slene kweci, meghea ka sewajɛ kweci, ka kele wəshi kempa ta ŋkɛ kweci, ka zleɗe wəmata gədəwə kweci, ka zleɗe gədəwəa lɛməa ŋkɛ kweci.

²³Wa nyi ɓela ta mbelia ŋgwamna nyi tsehave mbeli nyi kezha mene slene ta Salomon: mbeli gwəmsə mcɛfe ba'a mcɛfemsə nyi te ghəa mbeli nyi kemene slene.

²⁴Ma nda shave nda wəzha ta Farawon shave mbe “Meleme ta David” kadzeki ghɛa nya ŋate nda Salomon, nahe Salomon ŋamte ŋkwa nya heka mbeli kaMilo.

²⁵Mbe va ne, mahekene zhigə dzeghe melɛ kwa tere tere Salomon le melɛ kejikə ghə te reghwetɛ nya pate ŋkɛ kaŋa Mahwətə, ba'a katere 'wərdə kwa hə hə ŋkɛ te reghwetɛ nya kese mbe kema ta Mahwətə. Tsagha mene ŋkɛ le ghɛa Shala kala nya kehite geva.

²⁶Pa meghe Salomon baŋete kwambelə nyi jama jama kwele kwele kwa Ɛsiyon-Gɛbɛr, terasle yitea Ɛlat, va kema ta ndərə kwa Ghɛmɛ, te hɛɗia Ɛdom.

²⁷Pa Hiram ghwenakɛ ka mene slene ta ŋkɛ kadzete ŋkwa nya nza kwambelə kwa nza hɛ kambeli nyi keɗepe ghena ta ndərə. Ghenci le ka mene slene ta Salomon.

²⁸Pa hɛ ntsehe kwa Ofir, pa hɛ fəke mze kwa tere tere same kwa gare kiləwə 12.000 ke meghe Salomon.