Read KapsikiDC 2 Ka Meghea Kɛfi 1 Bible Online

2 Ka Meghea Kɛfi 1 - KapsikiDC bible

2 Ka Meghea Kɛfi 1

¹Ma kwa sebe ta mte ta Akab, pa ka Mowab ɗema sleke nya sleke hɛ ka Israyɛl.

²Ma te kwete hɛ pelɛ cɛ nya pelɛ ghəa cɛa meghe Ahaziya, nya mbe Samari ne, pa teɗenyɛ sawa te wəfela ta cɛ kadzete hɛɗi, pa zhi ɗakɛ kwele kwele. Pa ŋkɛ ghwenakɛ wəndə, ma ke shɛ: «Kwiɗi 'yɛwakɛ ɗa ghena va Ba'al-Zebəwb, shala ta ka Ɛkron, kenza nde kanza 'ya te ghweme va zhi nya.»

³Ma ke nde ghwene ta Mahwətə sha nde mɛ ŋkwa Ɛli, nde Tishebɛ: «Dzeme begeme mə le mbeli nyi ghwenakɛ meghea ka Samari, ma pa na sha hɛ: ‹Ashɛ Shala va ka Israyɛl nda lə yɛ ka'yɛwe ghena va Ba'al-Zebəwb shala ta ka Ɛkron na?›

⁴Ma pa na mtsehete: ‹Wa nya ghena nya geze nda Mahwətə ke meghea ka Israyɛl nya: Kasate na te gezle nya nza na te meɓelahe we, katemte na!›» Pa Ɛli menete wəsə nya gezave nda Mahwətə.

⁵Pa mbeli nyighɛ zhɛneke geva kase sha meghe. Pa ka'yɛwe va hɛ: «Wa raberə nda zhɛneke geva yɛ wa?»

⁶Ma ke hɛ zhɛnete nda: «Kwete wəndə dzeme kabegeme le ghen'yɛ, ma ke sha ghen'yɛ: ‹Zhɛnete mə geva kalə sha meghe nya keghweneke ŋayɛ, ma pe yɛ: Ma ke Mahwətə ne, va nya ɗema Shala mbe ka Israyɛl nda lə na ka'yɛwe ghena va Ba'al-Zebəwb, shala ta ka Ɛkron na? Va wəsə nya kala nya gɛ, kasate na te gezle nya nza na we. Kamte na.›»

⁷Ma ke meghe sha hɛ: «Tsema nza ta wəndə nya begemea shɛ yɛ le, nya kegezete ŋayɛ ghena wa?»

⁸Ma ke hɛ shɛ: «Wəndə le zleke ta hweta ta zlegwemə ya kənə, pa hətə hwa hwə ve.» Ma ke meghe tsate lewela: «Ɛli ŋkɛ nde Tishebɛ!»

⁹Pa ghweneghe meghea ka sewajɛ nya te ghəa ka sewajɛ mcɛfemsə kezha kese Ɛli. Nahe Ɛli kentishɛnyɛ pelɛ ghəa ghweme, ma ke meghea ka sewajɛa shɛhɛ shɛ: «Wəndəa Shala, sawa ke meghe!»

¹⁰Ma ke Ɛli sha meghea ka sewajɛ: «Ma nda wəndəa Shala 'ya ne, kageze 'ya kezha sawa ghwə pelɛ ghweme katere ŋayɛ, gha le ka sewajɛa ŋa!» Taghanyɛ, pa ghwə sawa pelɛ ghweme kateremte ŋkɛ zlaɓe ka sewajɛa ŋkɛ nyi mcɛfemsə.

¹¹Pa meghe ghweneghe nda kwete meghea ka sewajɛ, le ka sewajɛ mcɛfemsə zhɛkwa sha Ɛli, ma ke meghea ka sewajɛ sha Ɛli: «Nde mɛ ŋkwa ta Shala, sawa kahe kahe! Meghe nde gezete!»

¹²Ma ke Ɛli sha hɛ: «Ma kenza nde mɛ ŋkwa ta Shala 'ya ne, kageze 'ya nda ke ghwə sawanyɛ ŋkɛ pelɛ ghweme kateremte ŋa le mbelia ŋa nyi mcɛfemsə nyi!» Taghanyɛ, pa ghwə nya ghweneke Shala sawa kateremte wəndəa kwele le ka sewajɛa ŋkɛ mcɛfemsə.

¹³Kakwa mahekene zhigə, pa meghe ghwenakɛ meghea ka sewajɛ le ka sewajɛ mcɛfemsə. Pa hɛ dzeme ghweme. Ma kwa nakɛ Ɛli hɛ, pa meghea ka sewajɛ gwəɗəŋənyɛ te kema ta Ɛli kampi nda dzeve kala nya: «Nde mɛ ŋkwa ta Shala, sərəakɛ mpia ɗa le ŋa mbelia ɗa nyi mcɛfemsə nyi!

¹⁴Nahe 'ya keɗepe na ghwə kesawa pelɛ ghweme kateremte mbelia jama ta ka sewajɛ nyi bake nyi ba'a mbeli nyi yitea hɛ. Ama kasəkwə ŋa 'ya, sərəakɛ ɗa mpia ɗa!»

¹⁵Ma ke nde ghwene ta Mahwətə sha Ɛli: «Dzawa mə le, ghazlənəma na ve ma.» Pa Ɛli sawa le shɛ kalə sha meghe.

¹⁶Ma ke shɛ: «Wa nya ghena nya geze Mahwətə nya: ‹Va nya ghwenakɛ ŋkwa na kalə ka'yɛwe ghena va Ba'al-Zebəwb, shala ta ka Ɛkron, kala wəsə nya ɗema Shala mbe ka Israyɛl gare 'yɛwe ghena mbeli ve, vatse gɛ, kasate na te gezle nya nza nya na te we. Kamte na.›»

¹⁷Mtiwə Ahaziya kala ghena nya gezeke Mahwətə laka mɛa Ɛli. Ma kwa ɗema wəzege ve ne, pa wəza meghekɛ Zhoram kameghe te ŋkwa ŋkɛ, te kwa bake ta va ta Zhoram mbe meghe, wəzege ta Zhozafat, meghea ka Zhəwda.

¹⁸Ma nyi ketene ghena ta Ahaziya, le wəshi nyi menete ŋkɛ, nahe hɛ kenza kerafe rafe mbe “Palepa ta wəshi nyi menete ka meghea ka Israyɛl”.