Read KapsikiDC 2 Ka Meghea Kɛfi 11 Bible Online

2 Ka Meghea Kɛfi 11 - KapsikiDC bible

2 Ka Meghea Kɛfi 11

¹Atali meghekɛa Ahaziya, ma kwa nakɛ wəzege ta nta nde kemte, pa ŋkɛ lə kampəmte hwelefe ta ghɛa meghe.

²Ama mbe və nya kempə ŋkwa ne, Yoshɛba wəzha ta meghe Zhoram wəzha ta meghekɛa Ahaziya, pa kelemte Zhowas wəzege ta Ahaziya kambalemte hwa ŋwalea meghe nyi mpəmte hɛ mbeli. Pa veyi mbe cɛ nya bete gezle kehɛ mbeli mbe, kawəfərəakɛ hɛ le male nya kedəkwə yagha Atali kanakɛ, vatse nda mtema ŋkɛ.

³Kava ŋkwaŋe ne, nahe ŋkɛ kenza tewəfərə le male nya kedəkwə ŋkɛ mbe ghɛa Mahwətə. Atali ya kamale nya kameghe te hɛɗia shɛ.

⁴Ma mbe va kwa mberefaŋe, pa nde dzeghe Shala Yoyada hekakɛ mbelia jama ta ka sewajɛa nyi kaka mentiɓə le kweci ka ya ghɛa Shala kadzembe ghɛa Mahwətə. Pa ŋkɛ tsahwe ghena le hɛ ba'a gezete nda ke hɛ kazeme fela mbe ghɛa Mahwətə. Zhɛne ne, pa ncɛte nda wəzege ta meghe ke hɛ.

⁵Ma kwa sebe ta ŋkɛ, ma ke gezave nda ghena ke hɛ: «Wa nya wəsə nya mene yɛ nya: ma hwa mbeli nyi kegha ŋa nci slene kamene te veci kezhɛne mpi ne, pa yɛ neheve geva mbe mahekene, kwete bela kwetɛŋe ne, kadzeme kaya ghɛa meghe.

⁶Kwa bake ta bela ne, kwa mɛ degha ta Səwr, ma kwa mahekene ta bela ne, kwetere wəmbəa ka ya ŋkwa: pa yɛ yate ŋkwa kadzeki.

⁷Ma kweci bela bake nyi keɗema te slene te veci kezhɛne mpi ne, kase kaya cɛa Mahwətə nya nza meghe nya kawəzege nya mbe.

⁸Pɛtɛa ka sewajɛ le wəshi kempa yitea dzeve. Terasle nza yɛ yitea meghe shɛ ŋkɛ kashave ba'a shɛ ŋkɛ kadzeki ghɛ. Yayata wəndə nya kehende geva kadzete ŋkwa nya nza yɛ ne, mtiwə nza ŋkɛ.»

⁹Pa mbelia jama ta wəvəsəa ka sewajɛ menete kala nya gezave nda nde dzeghe Shala Yoyada ke hɛ, pa hɛ fəte mbelia nci kedzete slene te veci kezhɛne mpi le nyi kekiɗimte ŋa nci slene hwa veci kezhɛne mpi kalə sha Yoyada, nde dzeghe Shala.

¹⁰Pa nde dzeghe Shala fəave nda yɛ megha le yɛ geləa David nyi kese mbe ghɛa Mahwətə ke hɛ.

¹¹Dzasle ka sewajɛ dzaslete meghe, pɛtɛa nci le wəshi kempa yitea dzeve, se laka bela kwa zeme hwa'a laka bela kwa gwela va ghɛa Shala, terasle yitea reghwetɛ.

¹²Pa Yoyada kelakave Zhowas wəzege ta meghe, kaveyi nda derə mbe ghə ba'a wəshi nyi kencɛ nza ta ŋkɛ kameghe. Pa mbeli veyi ŋkɛ tekeleke kameghe laka sheke n'yi kwa ghəa ŋkɛ. Taghanyɛ ne, ntake mbeli pɛtɛ kampi dzeve, ma ke hɛ sha kaka: «Hɛyi ŋa Shala meghe.»

¹³Ma kwa fate gaka ta ka ya ŋkwa le yɛ mbeli Atali ne, pa ŋkɛ lə kadzehwa mbeli nyi kwele kwele mbe ghɛa Mahwətə.

¹⁴Pa nakɛ meghe nya kwa teve meslete vare selə nya mbe cɛa shɛ kala wəsə keshi. Mbelia jama ta ka sewajɛ le ka vɛ veke meslete yitea meghe. Pɛtɛ mbeli nyi te hɛɗia shɛ kazlama, kavɛ veke ka vɛ veke. Pa Atali ŋkwahemte lekwesa ta nta katsa lewela: Nahe mbeli kepamte ɗa gɛ! Nahe mbeli kepamte ɗa gɛ!

¹⁵Kaɗe Yoyada kapesle mbeli mbe ghɛa Mahwətə we. Ma ke sha wəndə kwelea ka sewajɛ: «Kelemte mə shave hwa mbeli kajive te ŋwela, ma yayata wəndə nya ketəkwə təkwə ne, pa mbeli peslekɛ le kafayɛ.»

¹⁶Pa mbeli keseve kakeleghe kadzeki ghɛa meghe laka hweŋkwa nya dzeki gədəwə kwa, tsagha peslekɛ hɛ.

¹⁷Pa Yoyada menete jikə geva kwelɛ yɛ meghe le mbelia ŋkɛ ba'a Mahwətə. Nda zhɛrete geva hɛ kambelia Mahwətə. Pa ŋkɛ menete jikə geva kwelɛ yɛ mbeli le meghe perə.

¹⁸Pa mbeli pɛtɛ lə kampəmte ghɛa Ba'al, pa hɛ tsəhwəmte yɛ reghwetɛ ba'a yɛ pa ta yɛ shala ta ŋkɛ, pa hɛ peslekɛ Matan, nde dzeghe nda melɛ ke Ba'al te kema ta yɛ reghwetɛ. Pa Yoyada veyi mbeli kaya ghɛa Mahwətə.

¹⁹Pa Yoyada tsenete ka meghea ka sewajɛ nyi kamentiɓə le kaya ŋkwa le mbeli pɛtɛ, kakelete meghe shave mbe cɛa Mahwətə kakeleghe kadzeki ghɛa meghe laka mɛ degha ta kaya ŋkwa, ntishɛ Zhowas pelɛ pasla ta ka meghe,

²⁰pa pɛtɛa mbeli nyi te hɛɗia shɛ zlamate zlama. Nahe hɛɗi kenza gweɗakwe kwa sebe ta nya peslekɛ Atali mbeli le hwa ki ghɛa meghe.