Read KapsikiDC 2 Ka Meghea Kɛfi 12 Bible Online

2 Ka Meghea Kɛfi 12 - KapsikiDC bible

2 Ka Meghea Kɛfi 12

¹Ma Zhowas ne, mberefaŋe va ta ŋkɛ nda dzembe meghe ŋkɛ.

²Te vəa meghea Zhɛhə hwa ka Israyɛl nda kelete meghe Zhowas. Deke mberefaŋe nda va ta ŋkɛ, nda kelete meghea ka Zhəwda ŋkɛ. Va wəfaɗemsə menete ŋkɛ kameghe mbe Zhɛrəzalɛm. Nahe sləa meghekɛ kenza kaSibiya, wəzha ta ka Bɛrshɛba.

³Wəsə ganyɛ yamene Zhowas kwa kema ta Mahwətə mbe nza ta mpia ŋkɛ pɛtɛ, kwa nza nde nahe Yoyada ketekete nda megela.

⁴Ama kezamte geva kələŋə nyi dzeghe melɛ mbeli hwa hɛ we, mba mbeli kalə kadzeghe melɛ ba'a katere 'wərdə hwa hɛ.

⁵Ma ke Zhowas sha nde dzeghe Shala te kwete hɛ: «Nahe ŋkɛ kehi katsene pɛtɛa cɛdɛ nyi kedzembe ghɛa Shala kezha slene ta Mahwətə yɛ: cɛdɛ nyi kese te jaɓeregwale ba'a kele mbeli kase le ɗe ta nci. Tseneke ŋkɛ laka ka tsene cɛdɛ. Kwa sebe ta ŋkɛ, katemene slene le cɛdɛa shɛ kezha hi ghɛa Shala, te yayata ŋkwa nya nza bezenyɛ ŋkɛ.

⁶Pa ka dzeghe Shala kakele kezha ghəa nci, yayata wəndəa nci shave mbe wəsə nya ɗepe ŋkɛ, ama pa hɛ hite ghɛa Shala, te yayata ŋkwa nya beze ŋkɛ.»

⁷Ama mbe va nyi menete nyi ŋkɛ bakemsə mahekeneghəmbe mbe meghe ne, kenaka ka dzeghe Shala kahite ŋkwa nya mbe ghɛa shɛ we.

⁸Pa meghe Zhowas hekakɛ Yoyada nde dzeghe Shala le kweci ka dzeghe Shala ma ke sha hɛ: «Wa raberə nda ɗema yɛ kehite ghɛa Shala wa? Ma tsetse ŋkɛ kala nya ne, mba yɛ kazhɛne kakele cɛdɛ nyi kele yɛ mbelia ŋayɛ nyi ketsene we. Sərəakɛ mə kezha hi ghɛa Shala.»

⁹Pa Yoyada nde dzeghe Shala ɗema kele cɛdɛ va mbeli kenaka kahite ŋkwa nya mbe ghɛa Shala perə we.

¹⁰Pa nde dzeghe Shala Yoyada menete səndəkwə, ntsate wəfela te wəsə nya mɛ ba'a veyi ŋkɛ vare reghwetɛ, laka bela kwa zeme ta ŋkwa nya dzembe mbeli kadzembe ghɛa Mahwətə. Ma nde dzeghe Shala nya ki ghɛa shɛ ne, pa beteyi cɛdɛ nyi keleke mbeli kwa.

¹¹Ma kwa nakɛ ŋkɛ kwele kwele cɛdɛ kwa səndəkwə ne, pa hɛ hekakɛ nde rafe wəshi ba'a wəndə kwelea ka dzeghe Shala, nyi kelete cɛdɛa shɛ ba'a nyi kedzeghete ɗaŋeɗa ta ŋkɛ.

¹²Ma kwa ɓelamte cɛdɛ mbeli ne, pa mbeli shɛ va wəndə nya kekelete slenea shɛ ba'a mbeli nyi kenewe slenea shɛ kezha ŋki nda ke ka mene slene ba'a ka baŋe ŋkwa,

¹³ke ka ŋa ŋkwa ba'a ka tsehe pelɛ. Wərə hɛ kapave sheghwə ba'a pelɛ nyi ketsehe tsehe, tsagha kweci wəshi nyi kehi kezha hi ta ghɛa Shala.

¹⁴Kamene kweci wəshi mbeli le mze kwa tɛawetɛa shɛ, ya yɛ tsə, ya wəshi kepesle paterela, ya yɛ kwenə kesheke mimi, ya yɛ veke, ya kweci wəshi mze kwa tere tere keɗema mze kwa tɛawetɛa we.

¹⁵Kave pɛtɛa mze kwa tɛawetɛa shɛ mbeli ke mbeli nyi te ghəa slenea shɛ kezha mene wəshi nyi nakɛ mbeli gare hite mbe ghɛa Mahwətə.

¹⁶Kazele mbeli kanewe ghena ta cɛdɛ nyi ŋki nda hɛ ke ka mene slene we, kwa nza ŋkɛ mbe mene hɛ kakwa gezleŋema ghə.

¹⁷Ma cɛdɛa melɛ kedimə ghə ba'a melɛ kekele jaɗafa seyi te wənə ne, kabete hɛ mbeli kwa səndəkwə we, ama kaŋa ka dzeghe Shala hɛ.

¹⁸Ma mbe vəa shɛ ne, pa Hazayɛl meghea ka Siri, se kampa le meleme ta Gat. Ma kwa kelehwe ŋkɛ, pa zəzəte kalə kampa le Zhɛrəzalɛm.

¹⁹Tewə ketemə, pa Zhowas tsenete wəshi nyi nza zləvə te mbe ghɛa Shala nyi tsenete ka shihɛnyɛ, meghea ka Zhəwda, Zhozafat, Zhoram le Ahaziya, pa le nyi ndeke nda ŋkɛ ke Mahwətə le ghəa ŋkɛ, tsagha pɛtɛa mze kwa tere tere nyi beteyi mbeli mbe cɛ kebete wəshi nyi nza zləvə te hɛ ta ghɛa Shala le nyi ki ghɛa meghe. Pa fəave nda pɛtɛ kawəsə gəmə ke meghe Hazayɛl, ca pa ɗema lə kampa le Zhɛrəzalɛm.

²⁰Ma nyi ketene ghena ta Zhowas le wəshi nyi menete ŋkɛ ne, na nahe hɛ kenza kerafe rafe mbe palepa ta wəshi nyi menete ka meghea ka Zhəwda.

²¹Pa mbelia jama ta ka sewajɛa ŋkɛ peslekɛ mbe Bɛt-Milo nya kwa ŋkwa kedzawa Sila.

²²Yɛ Yozabad, wəzege ta Shimɛyat, le Yozabad wəzege ta Shomɛr, ka mene slene ta ŋkɛ kampave kamte. Pa mbeli lamte ŋkɛ hwa ka yitehɛnyɛ mbe meleme ta David. Pa wəzege ta ŋkɛ Amasiya dzete meghe te ŋkwa ŋkɛ.