Read KapsikiDC 2 Ka Meghea Kɛfi 13 Bible Online

2 Ka Meghea Kɛfi 13 - KapsikiDC bible

2 Ka Meghea Kɛfi 13

¹Ma mbe kwa bakemsə mahekeneghəmbe ta va ta Zhowas wəzege ta Ahaziya mbe meghe, ka meghea ka Zhəwda, Zhowakaz wəzege ta Zhɛhə ya kameghe hwa ka Israyɛl mbe Samari. Va meŋe mberefaŋeghəmbe menete ŋkɛ te meghe.

²Wəshi nyi ɗema Mahwətə yamene ŋkɛ. Kefɛake geva kemene jaɗafa ta Zhɛrobowam wəzege ta Nebat we, nya ketsəkwəte ka Israyɛl yitea jaɗafa kamene.

³Pa Mahwətə hwepete wənə va ka Israyɛl ba'a fəyi hɛ mbe dzeve ta Hazayɛl, meghea ka Siri, kwa sebe ta ŋkɛ ɓiyitsa pa mbe dzeve wəzege ta ŋkɛ Bɛn-Hadad. Nahe ŋkɛ ketemə kwele kwele.

⁴Ama pa Zhowakaz səkwəte Mahwətə kezha gweɗakwete geva wənəa ŋkɛ. Pa fate kwa nakɛ ŋkɛ tsema tsema sa nda yaka meghea ka Siri ke ka Israyɛl,

⁵pa Mahwətə ndeke nda wəndə kembele hɛ ke ka Israyɛl nya kembalemte hɛ va berete ta ka Siri. Se te nyagha və, kwelɛŋe nza ta ka Israyɛl kala kwa ghate.

⁶Ndagwara kesərəakɛ mene fete ta Zhɛrobowam le yɛ mbelia ghɛa ŋkɛ ŋkɛ we, kwa nza ŋkɛ Zhɛrobowam nde tsəkwəyite mbelia ka Israyɛl yitea mene fete. Pa le selə nya keveyi geva kaŋa Ashɛra nya veyi mbeli kala shala meslete mbe Samari.

⁷Ma te kwa keɗaŋe, ma ka sewajɛa Zhowakaz ne, kandakɛ mcɛfemsə ka gədəwə we meŋe wəmata gədəwə ba'a 10.000 ka sewajɛ. Kwa nza ŋkɛ nahe meghea ka Siri kezamte hɛ kwele kwele, ɓɛhwɛ tenakɛ hɛ ŋkɛ dzeyi mɛa hweŋkwa.

⁸Ma nyi ketene ghena ta Zhowakaz nahe hɛ kenza kerafe rafe mbe palepa ta wəshi nyi menete ka meghea ka Israyɛl. Nahe mbeli kegezete wəshi nyi menete ŋkɛ ba'a ntsə geva nya ncɛte ŋkɛ.

⁹Ma kwa mte ŋkɛ ne, pa mbeli lamte ŋkɛ mbe Samari. Wəzege ta ŋkɛ Zhowas nde kelete meghe te ŋkwa ŋkɛ.

¹⁰Ma mbe kwa mahekenemsə mberefaŋeghəmbe va ta Zhowas kameghea ka Zhəwda, Zhowas wəzege ta Zhowakaz ya kameghea ka Israyɛl mbe Samari. Meŋe ŋkwaŋeghəmbe menete va ŋkɛ te meghe.

¹¹Wəshi nyi kehima yamene ŋkɛ kwa kema ta Mahwətə, kesərəakɛ mene jaɗafa nyi se Zhɛrobowam wəzege ta Nebat, nya ketsəkwəame ka Israyɛl mbe mene jaɗafa kamene ŋkɛ we.

¹²Ma ghena ta Zhowas nyi ketene ne, nahe hɛ kerafeyi geva mbe palepa ta slene ta ka meghea ka Israyɛl. Pɛtɛ mbeli gezete wəshi nyi menete ŋkɛ mbe, ba'a ntsə geva ta ŋkɛ nya ncɛte ŋkɛ kwa ɗate Amasiya ŋkɛ meghea ka Zhəwda.

¹³Ma kwa mte ŋkɛ ne, pa mbeli lamte ŋkɛ mbe Samari kwa kwele ta ka meghea ka Israyɛl. Zhɛrobowam nde kelete meghe.

¹⁴Ma kwa keseve Ɛlizɛ zereghwe takwa ŋkɛ katemte ne, pa Zhowas meghea ka Israyɛl se shɛ. Bərəɓə kənə, kanehwene: «Yiteyɛ ɗa! Yiteyɛ ɗa! Za ma na ke wəmata gədəwə pɛtɛ ba'a ka zleɗe gədəwəa lɛməa pɛtɛa ka Israyɛl!»

¹⁵Ma ke Ɛlizɛ shɛ: «Kelete rəgi pa na sha yɛ have kwa.» Pa meghe kelete rəgi ba'a yɛ have.

¹⁶Ma ke Ɛlizɛ shɛ: «Ghwenemte wəfela ta cɛ laka ŋkwa nya same veci.» Pa meghe ghwenemte. «Kelete rəgia ŋa benakete», ke nde mɛ ŋkwa shɛ zhɛkwa. Pa meghe kelete rəgi. Pa Ɛlizɛ dapeyi ŋa ŋkɛ dzeve te ŋa meghe ba'a gezete nda kahe rəgi. Ma kwa hete meghe ne, ma ke nde mɛ ŋkwa tsate lewela: Ma have nya ne, hərə ŋkwa nya kese va Mahwətə yageze ŋkɛ, hərə ta ka sewajɛa ka Siri! Kaganda ne, katempə ka Siri na kwa Afɛk.

¹⁸Ma ke Ɛlizɛ shɛ kwa sebe ta ŋkɛ: «Fəte kweci have.» Pa meghe fəte yɛ have. Ma ke nde mɛ ŋkwa shɛ: «Heyi mbe hɛɗi!» Pa meghe heyi mbe hɛɗi mahekene zhigə ba'a nzanyɛ.

¹⁹Pa nde mɛ ŋkwa hwepete wənə ve, ma ke shɛ: «Ma ya nahe na kehekɛ hɛɗi mcɛfe zhigə keɗema ŋkwaŋe zhigə ne, nza wərə na kampəmte ka Siri kaghala ghala. Ma tsetsenya ne, deke mahekene zhigə teɗa hɛ na.»

²⁰Mtiwə Ɛlizɛ pa mbeli lamte. Keva keva se wəvəsəa ka mefətekwəa ka sewajɛa ka Mowab kadzembe hɛɗia ka Israyɛl.

²¹Ma te kwete hɛ ne, pa mbeli nyi kelə kalamte wəndə nakɛ kwete wəvəsəa shɛ. Pa hɛ negheyi wəndə kemte mte kwa kwele ta Ɛlizɛ kahwɛ nci. Ma kwa kwaɗakɛ 'yɛ'yɛa Ɛlizɛ wəndə kemte mte ne, pa zhɛneke wənə ba'a satenyɛ.

²²Nahe Hazayɛl, meghea ka Siri kesahwe nda yaka ke ka Israyɛl te vəa meghea Zhowakaz pɛtɛ.

²³Ama Mahwətə, mbe zeɗea mehele ta ŋkɛ ne, te kwa keɗaŋe ne, pa zhɛakɛ heli yitea hɛ. Pa kelemte nda ghena shɛ te wənə ke hɛ, tewəmbəreke jikə geva nya menete ŋkɛ le Abraham, le Izak ba'a le Zhakob, pa belewəmte za sebe te hɛ, kenaka ŋkɛ kaŋkamte hɛ cakeɗake yitea ghəa ŋkɛ te vəa shɛ we.

²⁴Ma kwa mte Hazayɛl ne, wəzege ta ŋkɛ Bɛn-Hadad ya kameghea ka Siri kwa sebe ta ŋkɛ.

²⁵Taghanyɛ pa Zhowas fəhwe meleme ta ka Israyɛl nyi va Hazayɛl kwa fəhwe ŋkɛ va yitenyɛ Zhowakaz mbe meghe ŋkɛ vəa ŋkwa shɛ. Mahekene zhigə ɗate Bɛn-Hadad Zhowas, pa zhɛneve meleme ta ŋkɛ pɛtɛ.