Read KapsikiDC 2 Ka Meghea Kɛfi 14 Bible Online

2 Ka Meghea Kɛfi 14 - KapsikiDC bible

2 Ka Meghea Kɛfi 14

¹Mbe kwa meŋe ta va ta Zhowas wəzege ta Zhowakaz mbe meghe, kameghea ka Israyɛl ne, Amasiya nde kelete meghea ka Zhəwda te ŋkwa Zhowas yitenyɛ.

²Va ta ŋkɛ bakemsə mcɛfeghəmbe nda dzete meghe ŋkɛ, pa ŋkɛ menete va bakemsə meslighəmbe kameghe mbe Zhɛrəzalɛm. Ma meghekɛ ne, wəzha ta ka Zhɛrəzalɛm nde, Yowadan sləa nta.

³Wəsə nya ganyɛ kwa ta Mahwətə yamene Amasiya, ama kala ŋa shinyɛ ŋkɛ David we. Yipə yipə le ŋa yitenyɛ Zhowas mene ŋkɛ.

⁴Kezamte yɛ kələ kedzeghe melɛ ŋkɛ we. Mba mbeli kalə kadzeghe melɛ le wəshi keseɗa ba'a katere 'wərdə te hɛ.

⁵Ma kwa ntishɛte geva meghea Amasiya tiɗiɗi gɛ ne, pa mpəmte ka jama jama nyi kepeslekɛ yitenyɛ meghe Zhowas.

⁶Ama pa sərəakɛ ŋwalea mbeli nyi mpəmte ŋkɛ, kezha yipə ghena nyi kerafete geva mbe palepa ta wəsə mahalegəa Moyize. Kwa nza ŋkɛ Mahwətə nde gezeyi ghena shɛ: «Kampə ka yitehɛnyɛa ŋwale mbeli te fete ta ŋwalea nci we, tsagha ŋwale ɓiyitsa te fete ta yitenyɛ hɛ we. Ama te fete ta ŋkɛ pesle wəndə mbeli.»

⁷Amasiya nde mpəmte ka sewajɛa ka Ɛdom slibə meŋe kwa zlərəa Ghwene. Ma mbe mpa ne, pa kelehwe meleme ta Sɛla, ŋkwa nya hekate nda slə mbeli kaYoktɛl, gheŋkɛ ya kasləa ŋkɛ pa ɓeshi.

⁸Pa Amasiya ghwenakɛ nda mɛ ke meghea ka Israyɛl, Zhowas, wəzege ta Zhowakaz shia Zhɛhə. Ma ke shɛ: «Nde! Gheɓə kampa!»

⁹Ma ke Zhowas zhɛnete nda ke Amasiya: «Ma vəashi ne, le kwete ghɛa wəfe shɛ pelɛ ghweme ta Liban katigə. Pa ŋkɛ 'yɛwakɛ va lekeleke nya mbe Liban kave nda wəzha ta ŋkɛ kamale ke wəzege ta ŋkɛ. Ama pa wəsə keseɗa nya hwa gamba ta Liban dzembe ghɛa wəfea shɛ ba'a ŋkeɗemte ŋkɛ.»

¹⁰Ma ke Zhowas shɛ: «Ma va nya ɗate ka Ɛdom na ne, vatse mene fege na! Gwəfəte ghə yitea zləvəa ŋa, nza mbe meleme ta ŋa! Wa raberə ɗe na kaghate mpa nya ketezhɛre ŋa mehele te kwa keɗaŋe wa?» Nya nza mbeli kapeslekɛ ŋa ba'a kampəmte ka sewajɛa ka Zhəwda pɛtɛ.

¹¹Ama kese Amasiya kafe ghena shɛ we. Ca pa Zhowas meghea ka Israyɛl tsenete ka sewajɛa ŋkɛ. Begeme ka sewajɛa ŋkɛ le ŋa Amasiya kwa Bɛt-Shɛmɛsh te hɛɗia Zhəwda.

¹²Pa ka sewajɛa ka Israyɛl mpəakawa ŋa ka Zhəwda, pɛtɛ nyi ketene ka sewajɛa ka Zhəwda hwɛnji kalə sha ghɛa nci.

¹³Kwa Bɛt-Shɛmɛsh, Zhowas meghea ka Israyɛl kesehwe Amasiya meghea ka Zhəwda kaveyi kwa daŋgayɛ, wəzege ta Zhowas ba'a shia Ahaziya. Pa slə tagha kadzeme Zhɛrəzalɛm kaŋzlamte zlia meleme takwa yitea mɛtre gwəmsə bake, kwelɛ tepe ta mɛ degha ta Ɛfrayim le ŋkwa nya gwekwe zli.

¹⁴Pa hɛ fəhwe mze kwa tere tere, mze kwa tɛawetɛa ba'a pɛtɛa wəshi nyi nza zləvə te hɛ nyi mbe ghɛa Mahwətə ba'a nyi ki ghɛa meghe. Pa hɛ keseve mbeli perə, pa hɛ zhɛneghe geva kadzembe Samari.

¹⁵Ma nyi ketene ghena ta Zhowas ne, nahe hɛ kenza kerafe rafe mbe palepa ta wəshi nyi menete ka meghea ka Israyɛl. Mbe gezete wəshi nyi menete ŋkɛ, le hwepe ghə nya menete ŋkɛ le mpa nya mpate hɛ Amasiya meghea ka Zhəwda.

¹⁶Ma kwa mte Zhowas ne, pa mbeli lamte ŋkɛ kwa kwele ta ka meghea ka Israyɛl. Zhɛrobowam wəzege ta ŋkɛ nde kelete meghe kwa sebe ta ŋkɛ.

¹⁷Ma kwa sebe ta mte ta Zhowas meghea ka Israyɛl, meŋe mcɛfeghəmbe menete va ta Amasiya meghea ka Zhəwda kwa sebe ta ŋkɛ.

¹⁸Ma nyi ketene ghena ta Amasiya ne nahe hɛ kenza kerafe rafe mbe palepa nya nza slene ta ka meghea ka Zhəwda mbe hɛ.

¹⁹Kwa Zhɛrəzalɛm ne, pa mbeli tsate ghena yitea Amasiya. Pa ŋkɛ hwɛnyɛ kadzembe Lakish. Pa mbeli kekave ŋkɛ ba'a peslekɛ ŋkɛ te ŋkwa shɛ.

²⁰Pa mbeli keleke wəndə kemte mtea ŋkɛ kase kadzembe Zhɛrəzalɛm kwa wəmata, kwele kwele gədəwə yite kantsehe, pa mbeli lamte ŋkɛ kwa kwele ta mbelia nci te meleme ta David.

²¹Nahe Azariya, wəzege ta Amasiya kemenete va meŋe ŋkwaŋeghəmbe nda veyi ŋkɛ ka Zhəwda kameghe te ŋkwa yitenyɛ.

²²Gheŋkɛ nde zehwe meleme ta ka Ɛlat, pa zhɛne kaŋate kazhɛnave nda ke meghea ka Zhəwda kwa sebe ta mte ta yitenyɛ.

²³Ma mbe kwa meŋe mcɛfeghəmbe ta va ta Amasiya meghea ka Zhəwda, wəzege ta Zhowas, pa Zhɛrobowam wəzege ta Zhowas meghea ka Israyɛl kelete meghe mbe Samari, pa ŋkɛ menete va wəfaɗemsə kwetɛŋeghəmbe kameghe.

²⁴Wəsə nya keɗema kehi yamene ŋkɛ kwa kema ta Mahwətə. Zhɛrobowam wəzege ta Nebat nde tekete nda mene jaɗafa ke mbeli, pa nyagha meghe kamene jaɗafa kala ŋa ŋkɛa shɛ yipə yipə.

²⁵Pa kelehwe ŋkwa nyi kaŋa ka Israyɛl, se te Lebo-Hamat laka bela kwa gwela hwa'a kwa Ndərəa Kemte laka bela kwa zeme. Kala nya gezete nde mɛ ŋkwa Zhonas, wəzege ta Amitay nde Gat-Hɛfɛr le ghena nya kese va Shala Mahwətə ta ka Israyɛl.

²⁶Ma kwa nakɛ yaka nya Mahwətə, nya te meghea shɛ. Wəndə shɛ nya kenza kakemanakɛ ka Israyɛl we, ya mava ya mamza.

²⁷Ama kezəzəte Mahwətə kazamte hɛ bətə we. Vatse mbeleke hɛ ŋkɛ shave mbe dzeve ta Zhɛrobowam wəzege ta Zhowas.

²⁸Ma ghena ta Zhɛrobowam nyi ketene ne, nahe hɛ kenza kerafe rafe mbe palepa nyi nza slene ta ka meghea ka Israyɛl. Kageze pɛtɛa wəshi nyi menete ŋkɛ, ntsə geva ta ŋkɛ mbe mpa ba'a tsema tsema zhɛnave nda Damas ba'a Hamat, meleme nyi kese mbe hɛɗi meghea David ŋkɛ ke Israyɛl.

²⁹Ma kwa mte Zhɛrobowam, pa mbeli lamte ŋkɛ mbe Samari kwa kwele ta ka meghea ka Israyɛl, Zakari wəzege ta ŋkɛ nde kelete meghe te ŋkwa ŋkɛ.