Read KapsikiDC 2 Ka Meghea Kɛfi 17 Bible Online

2 Ka Meghea Kɛfi 17 - KapsikiDC bible

2 Ka Meghea Kɛfi 17

¹Ma mbe va kwa meŋe bakeghəmbe ta Ahaz mbe meghea ka Zhəwda, Ozɛ wəzege ta Ɛla nde kelete meghe mbe ka Israyɛl mbe Samari. Va mesli menete ŋkɛ mbe meghe.

²Wəshi nyi keɗema megela sha Mahwətə yamene ŋkɛ, ya tsagha shɛ ŋkɛ ne, ashɛ kala ŋa kweci ka meghea ka Israyɛl nyi kese te meghe te kema ta ŋkɛ we.

³Pa Salmanasar meghea ka Asiri, se kampa le. Pa Ozɛ yɛhwe fete ve, ntake katsehe nda jaɓeregwale keva keva.

⁴Ma temə ɓahwe ne, pa Ozɛ pate ŋwashɛ ŋwashɛ yite: pa ghwenakɛ ŋkwa kalə sha meghea ka Ɛzhipte mbe Sayis. Pa ɗema katsehe nda jaɓeregwale ke meghea ka Asiri. Ma kwa ɗepete ŋwashɛ ŋwashɛa ŋkɛ Salmanasar ne, pa keseyi Ozɛ kwa dəŋwə.

⁵Pa zehwe hɛɗi kase kantishɛnyɛ mbe Samari kava mahekene,

⁶geze ta ŋkɛ, te kwa mesli ta va ta Ozɛ mbe meghe nda se meghea ka Asiri kakele Samari. Pa ŋkɛ fəghe ka Israyɛl kadzembe Asiri ba'a beteyi hɛ te hɛɗia Hala, te ŋa Gozan nya hwɛ hələa Habor laka ba'a dzeyi mbe yɛ meleme ta Mɛdi.

⁷Ma nda se wəshi nyi kamenete geva ne, kwa menete nda jaɗafa ka Israyɛl ke Mahwətə, Shala ta nci nya kembeleke hɛ va Farawon meghea ka Ɛzhipte, kakelemte hɛ te hɛɗia shɛ. Va nya nza hɛ kahawe va kweci shala,

⁸pa hɛ seneve wəshi keshia felehwe nyi ŋkamte Mahwətə te hɛɗia shɛ kezha veyi nda ke ka Israyɛl, tsagha kweci wəshi keshi nyi tekave nda ka meghea kɛfia ka Israyɛl ke hɛ.

⁹Ghena nyi keɗema kehite geva kageze ne mbe geze hɛ nyi ɗema Shala Mahwətə ta nci. Pɛtɛ hɛ ŋate kələŋə kedzeghe melɛ te yayata ŋkwa, tsagha te ŋkwa keya ŋkwa kala nyi mbe meleme nyi berete berete,

¹⁰pa ŋkɛ mɓete pelɛ ba'a yɛ selə dzeyi kwa ghəa ghweme ba'a te ŋkwa nya nza ghɛa wəfe zhiɓə,

¹¹kadzeghe melɛ te yayata ŋkwa nyi nza melɛ te, kala nyi mene kweci hwelefefi nyi ŋkamte hɛ Mahwətə kezha ve nda ŋkwa ke ka Israyɛl, pa hɛ menete wəshi nyi ndiremi ndiremi nyi kehwepete nda wənəa Mahwətə.

¹²Ntake hɛ kahawe va wəshi nyi zhɛrete mbeli kala Shala, ya tsema geze Mahwətə kaɗema mbeli kamene hɛ.

¹³Pa Mahwətə gezete nda ghena kencɛ ntsehwele ke ka Israyɛl le ka Zhəwda laka mɛa ka mɛ ŋkwa keghə keghə: «Sərəakɛ mə dzeghwa kwa ndiremia ŋayɛ nyi, yɛte nda mə fete ke wəshi mahalegəa ɗa le ghena nyi gezeke 'ya karafete geva mbe wəshi mahalegə nyi ndeke nda 'ya ke ka shihɛ ŋayɛ ba'a nahe 'ya kegezave ŋayɛ laka ka mɛ ŋkwa nyi ka mene slene ta ɗa.»

¹⁴Ama nahe mbelia shɛhɛ keɗema fa wəsə nya geze nda mbeli ke hɛ. Pa ncɛte nza ta nci kaka fama ghena kala ka shihɛ nci, nyi keyɛtema Mahwətə nya kaShala ta nci,

¹⁵pa hɛ betakɛ wəshi mahalegəa Shala le yɛ jikə geva nya menete ŋkɛ le ka shihɛ nci ba'a le ghena kencɛ ntsehwele nyi gezave nda ŋkɛ ke hɛ, pa hɛ ndeke nda ghə ke shala nyi keɗema kanza te nza, ghenci le ghəa nci perə ne, kanzate nza hɛ we, pa hɛ zelete yipə pa ta wəshi nyi mene kweci hwelefefi nyi te ghala le hɛ, nyi gezete nda Mahwətə ke hɛ mba hɛ keyipə ghə le hɛ.

¹⁶Pa hɛ peleyite se yitea wəshi mahalegəa Shala Mahwətə ta nci, pa hɛ menete pa ta leve kwa vɛsə vɛsə ba'a seləa melɛ, ntake hɛ kahawe va wəshi nyi pelɛ yitea ghweme, kamene nda slene ke shala Ba'al,

¹⁷kadzeghe nda melɛ hɛ le ŋwalea nci nyi kazhili le nyi kami, pa hɛ lənji yitea mene yayata ghwɛ keghə keghə, pa hɛ ndeke nda ghə ke mene wəshi nyi ɗema Mahwətə ba'a nyi kehwepe nda wənə.

¹⁸Pa Mahwətə peslaghe hwepe wənəa ŋkɛ kənə ka Israyɛl. Kaɗe ŋkɛ kanewe hɛ kwa ntsə ta ŋkɛ we, deke hwelefe ta Zhəwda nde nza mba.

¹⁹Ama mbelia Zhəwda perə ne, pa hɛ ɗema fa nda ghena ke wəshi mahalegəa Shala Mahwətə ta nci, pa seneve wəshi keshi nyi kesenji kadzembe ka Israyɛl.

²⁰Vatse neghamte ka Israyɛl Mahwətə pɛtɛa nci. Pa ŋkɛ fəame hɛ mbe dzeve ta mbeli nyi kefə wəshia mbeli kezha ve hawe te hɛ. Kakwa keɗaŋe ne, pa fəmte hɛ cakeɗake yitea ghəa ŋkɛ.

²¹Ma kwa zləgwəke ka Israyɛl Mahwətə se va vəa meghe nya mene David ne, kwa veyi Zhɛrobowam wəzege ta Nebat ka Israyɛl kameghe. Pa ŋkɛ zhɛremte hɛ seyi yitea ke Mahwətə ba'a ghweteyi hɛ mbe jaɗafa nyi dzawe dzawe.

²²Se mɛa vəa shɛ ne, kenehe ka Israyɛl le zele sebe te jaɗafa nyi menete Zhɛrobowam.

²³Te kwa keɗaŋe ne, kaɗe Mahwətə kanewe hɛ kwa ntsə ta ŋkɛ we, pa ŋkamte hɛ kadzeme Asiri, pa ɓeshi mba hɛ pelɛ. Kala nya yipəte geva ghena nyi gezete Mahwətə laka ka mene slene ta ŋkɛ ka mɛ ŋkwa.

²⁴Pa meghea ka Asiri fəke ka Babilone, ka Kəwta, ka Ava, ka Hamat ba'a ka Sefarvayim ba'a beteyi hɛ mbe Samari te ŋkwa ka Israyɛl nyi fəmte hɛ. Pa mbelia shɛhɛ kelehwe Samari ba'a ntishɛnji mbe yɛ melemea shɛhɛ.

²⁵Ya tsagha shɛ ŋkɛ ne, kese hɛ kahawe va Mahwətə te kwa ghate we. Pa Mahwətə ghweneke yɛ nivɛrə kampəmte mbeli kwele kwele hwa hɛ.

²⁶Pa mbeli gezete nda ke meghea ka Asiri ma mbeli nyi beteyi na mbe Samari ne, keɗepe hawe hɛ va shala te hɛɗia shɛ we, vatse nda ghweneke yɛ nivɛrə ŋkɛ kezha mpə hɛ.

²⁷Vatse nda ndeke nda hweŋkwa meghe ke mbeli kakele nde dzeghe Shala nya kese mbe Samari ba'a kave ŋkɛ mbe kezha teke nda nyagha mama ta hawe va Shala ke mbeli nyi mbe.

²⁸Tsetse nda se nde dzeghe Shala nya kelehwe mbeli shave mbe Samari kazhɛneke geva kase kanza mbe Bɛtɛl kezha teke nda hawe va Mahwətə ke mbeli.

²⁹Ma ya tsagha shɛ ŋkɛ ne, kesərəakɛ menete pa ta ŋa nci hɛ shala kave kareghwetɛ nyi ŋate mbeli nyi kese tagha vəashi mbe Samari. Yayata mbelia shɛhɛ kamene tsagha mbe meleme nyi nza hɛ mbe:

³⁰ma mbeli nyi fəke mbeli se mbe Babilone ne, pa ta Səwkot-Benot ŋa nci, nyi kese mbe Kəwta ne, Nɛrgal ŋa nci, nyi kese mbe Hamat ne, Ashima ŋa nci,

³¹nyi kese mbe Ava ne, Nibaz ba'a Tartak ŋa nci. Ma mbelia ka Sefarvayim ne pa le ŋwale dzeghe melɛ hɛ le ke shala Adramɛlɛk ba'a Anamɛlɛk.

³²Mbe hawe hɛ pɛtɛ va Mahwətə perə mewelaɗe. Ma ɓiyitsa ne mbe nta wəndə hɛ hwa ghəa nci kanza kande dzeghe melɛa nci ba'a kanza kawəndə nya te ghəa nci.

³³Ma laka kwete bela mbe hawe hɛ va Mahwətə, laka kwete ne, mbe dzeghe melɛa nci hɛ ke kweci shala, kala wəsə keshi nya te hɛɗia nci nyi se hɛ te.

³⁴Pa ɓeshi ne, mba hwelefefia nci kazele wəshi keshi nyi vəashi. Kahawe hɛ va Mahwətə we. Kazele wəshi nyi gezete hɛ ya wəshi keshia nci hɛ we. Kahawe hɛ va wəsə mahalegə ya va ghena nyi gezete nda Mahwətə ke ŋwalea Zhakob nya ndeke nda slə ŋkɛ kaIsrayɛl perə we.

³⁵Ndagwara nahe Mahwətə kemenete jikə geva le hwelefefia Zhakob, ma ke gezete ghena ke hɛ: «Hawema yɛ va kweci shala ma. Gwəɗəŋəma yɛ kwa kema ta nci ma. Mene nda ma slene yɛ ke hɛ ma ba'a mene nda ma yayata melɛ yɛ ke hɛ ma.

³⁶Deke 'ya kwetɛŋe ɗa yahawe yɛ ve, 'ya Mahwətə nya kefəakave ŋayɛ shave mbe Ɛzhipte laka berete ta ɗa nya ɗema mbeli kazereghete. Kwa kema ta ɗa gwəɗəŋə yɛ ba'a ke 'ya dzeghe ɗa melɛ yɛ.

³⁷Katehawe yɛ keveci keveci va ghena, wəshi nyi gezete 'ya ba'a va yɛ ɓela ta gəsəkə, geze ta ŋkɛ, wəsə mahalegə nya keleke ŋayɛ 'ya kerafe rafe. Zhɛne ne, katehawe yɛ va kweci shala we.

³⁸Mba ghəa ŋayɛ keza yitea jikə geva nya menete mə le gheyɛ, kazhɛne 'ya kageze, hawema yɛ va kweci shala ma.

³⁹'Ya ya kaMahwətə Shala ta ŋayɛ, nya hawe yɛ ve, kwa nza ŋkɛ deke 'ya kwetɛŋe nde nza kambaleke ŋayɛ va ka ghema ta ŋayɛ.»

⁴⁰Ama nahe mbelia shɛhɛ keɗema fa. Mba hɛ yitea mene wəshi keshia nci.

⁴¹Kala nya gɛ, laka kwete ŋkwa ne, kahawe hɛ va Mahwətə, ma laka kwete ɓiyitsa kahawe hɛ va kweci shala. Kwetere wəmbəa nci ŋwalea nci ba'a ka shihɛ nci mba hɛ kamene kala nyagha shɛ pa ɓeshi.