Read KapsikiDC 2 Ka Meghea Kɛfi 2 Bible Online

2 Ka Meghea Kɛfi 2 - KapsikiDC bible

2 Ka Meghea Kɛfi 2

¹Ma nda keleghe Ɛli Mahwətə kadzeme ghweme mbe sefə masefafele ne, hɛ le Ɛlizɛ slə mbe Gilgal kadzeghwa zlaɓe.

²Ma kwa hweŋkwa hɛ ne, ma ke Ɛli sha Ɛlizɛ: «Nza ŋa teke. Mahwətə kaghwene ɗa kadzawa Bɛtɛl.» Ama ma ke Ɛlizɛ zhɛnete nda: «Te zlaɓa ta mpia Mahwətə ba'a ŋa ŋa ne, kazeme ŋa fela 'ya, kaslə 'ya yitea gha we!» Pa hɛ dzawa Bɛtɛl zlaɓe.

³Pa wəvəsəa ka mɛ ŋkwa nyi mbe Bɛtɛl shave sha Ɛlizɛ, ma ke hɛ shɛ: «Nahe na keɗepe kakele nde sleke ŋa Mahwətə kadzeme ghweme ɓeshi na?» Ma ke zhɛnete: «Nahe 'ya keɗepe ya 'ya ŋkɛ. Ama geze ɗa ma ghena yɛ te ghəa ŋkɛ ma!»

⁴Ma ke Ɛli sha Ɛlizɛ zhɛkwa: «Ntishɛ ŋa teke, Ɛlizɛ! Mahwətə kaghwene ɗa kadzawa Zhɛriko.» Ama ma ke Ɛlizɛ zhɛnete nda: «Te zlaɓa ta mpia Mahwətə ba'a le ŋa ŋa ne, kazeme ŋa fela 'ya, kaslə 'ya yitea gha we!» Hwa'a hɛ kwa Zhɛriko zlaɓe.

⁵Pa kweci wəvəsəa ka mɛ ŋkwa nyi kwa Zhɛriko hendeke nda geva ke Ɛlizɛ, ma ke hɛ 'yɛwete ve: «Nahe na keɗepe ɓeshi tse ne, katekelehwe nde sleke ŋa Mahwətə kadzeme ghweme na?» Ma ke Ɛlizɛ zhɛnete nda ke hɛ: «E'e, nahe 'ya keɗepe le ghəa ɗa perə, ama geze ɗa ma ghena yɛ te ghəa ŋkɛ ma!»

⁶Ma ke Ɛli sha Ɛlizɛ zhɛkwa: «Ntishɛ ŋa teke, Mahwətə kaghwene ɗa kadzawa mɛa hələa Zhəwrdɛŋe.» Ama ma ke Ɛlizɛ zhɛnete nda: «Te zlaɓa ta mpia Mahwətə le ŋa ŋa deŋwa, kazeme ŋa fela 'ya kaslə 'ya yitea gha we!» Cape hɛ kadzeghwa zlaɓe.

⁷Pa kweci ka mɛ ŋkwa gare mcɛfemsə təkwə təkwəte hɛ, ya tsagha shɛ ŋkɛ cakeɗa cakeɗa hɛ le yɛ Ɛli le Ɛlizɛ, pa hɛ dzeyi kaghereŋenji mɛa hələbəa Zhəwrdɛŋe.

⁸Pa Ɛli kelete karalamea ŋkɛ, peɗete ŋkɛ ba'a mpave yɛmə nya kwa hələ le, pa yɛmə slanyɛ bake mbe. Pa hɛ jivenji te bake nci le seɗa, keghwele ghwele ŋkwa.

⁹Ma mbe jive hɛ ne, ma ke Ɛli sha Ɛlizɛ: «'Yɛwe wəsə nya ɗe na kamene ŋa 'ya, nda tekelehwe ɗa Mahwətə seyi yitea gha.» Ma ke Ɛlizɛ zhɛnete nda: «Kaɗe 'ya kakemave Sefəa Shala nya mene kelɛŋə na le bake zhigə kala ŋa ŋa.»

¹⁰Ma ke Ɛli shɛ: «Wəsə nya dzawe ya 'yɛwete na. Ma ya tsagha shɛ ŋkɛ, ma kenza nde katenakɛ ɗa na vəa ŋkwa nya tekelehwe ɗa Mahwətə seyi yitea gha ne, katemene ŋa geva 'yɛwe ta ŋa tsagha shɛ. Ma keɗema ŋkɛ kala nyagha ne, kamene ŋa geva ŋkɛ we.»

¹¹Ma mbe dzeghwa hɛ kageze ghena, pa wəmata gədəwə kwa ghwə ghwə le gədəwə kwa ghwə ghwə se kanehemte hɛ mbe. Taghanyɛ, pa Ɛli slə kadzeme ghweme mbe masefafele.

¹²Ma kwa nakɛ Ɛlizɛ wəsəa shɛ ne, ma ke tsate lewela: «Yita yawe! Yita yawe! Za ma na ke wəmata gədəwə le ka zleɗe gədəwəa lɛməa ka Israyɛl!» Ma kwa nakɛma Ɛli ŋkɛ ɓiyitsa, pa keseve lekwesa ta ŋkɛ ba'a ŋkwahemte bake mbe.

¹³Pa kelete gare nya sərəakɛ Ɛli kateɗe. Pa seyi kaghereŋe mɛa hələbəa Zhəwrdɛŋe.

¹⁴Pa kelete gare nya sərəakɛ Ɛli kateɗe, pa mpave yɛmə le, ma ke: «Tema Shala Mahwətə ta Ɛli wa?» Pa ŋkɛ mpave yɛmə perə, pa nde nehenyɛ bake mbe. Pa Ɛlizɛ jivenyɛ te.

¹⁵Ma wəvəsəa ka mɛ ŋkwa nyi kwa Zhɛriko ne, kanewe hɛ cakeɗa cakeɗa, ma ke hɛ: «Nahe ŋkɛ kelɛŋəa Ɛli kedzembe Ɛlizɛ!» Pa hɛ lə kabegeme le kagwəɗəŋə kwa kema ta ŋkɛ ntiŋə ghə mbe hɛɗi,

¹⁶ma ke hɛ shɛ: «Zhili nyi berete berete ya shɛ mcɛfemsə teke hwa ghen'yɛ ka mene ŋa slene. Kateghwene hɛ ghenci kelə kazele nde sleke ŋa! Nda kwete nahe Sefəa Mahwətə nya kekelehwe ŋkɛ kenegheyi pelɛ ghweme keɗema kwa zlərə.» Ma ke Ɛlizɛ sha hɛ: «Ghwenema hɛ yɛ ma.»

¹⁷Ama pa hɛ deneve 'yɛwe ve, tagha gɛ, pa Ɛlizɛ yɛte nda ke hɛ. Pa hɛ ghwenakɛ mbeli mcɛfemsə kalə kaghweze Ɛli kahɛ mahekene, ama kenakɛ ŋkɛ hɛ we.

¹⁸Pa hɛ zhɛneke geva kase sha Ɛlizɛ nya mba mbe Zhɛriko. Ma ke Ɛlizɛ sha hɛ: «Kegezete ŋayɛ kezha ɗema yɛ kalə wəka?»

¹⁹Ma ke mbeli nyi mbe Zhɛriko sha Ɛlizɛ: «Megela meleme kezha nza kala nya newe nya na tse nde sleke ŋkwa. Ama yɛmə ne megela nde we, kamene wəshi te hɛɗi nya we.»

²⁰Ma ke Ɛlizɛ: «Keleke ɗa mə ghwene kwa helape mɛnɛfɛ.» Pa hɛ keleke nda.

²¹Pa Ɛlizɛ lə kadzemɛa ɗasle kwa ntsə ta ŋkɛ ba'a beteyi ghwene hwa yɛmə, ma ke: «Wa nya ghena nya geze Mahwətə nya: ‹Nahe 'ya kezhɛrete yɛməa shɛ wɛŋe. Kazhɛne ŋkɛ kampə wəshi nyi nza mpi hwe we, kazhɛne ŋkɛ kafɛa hɛɗi kemene wəshi perə we.›»

²²Pa yɛmə zhɛrenyɛ wɛŋe pa ɓeshi, kala ghena ta Ɛlizɛ nya gezete ŋkɛ.

²³Pa Ɛlizɛ slə tagha mbe Zhɛriko kadzeme Bɛtɛl. Ma kwa hweŋkwa ŋkɛ kadzeme ne, pa ŋwale shave kaŋ'wəshi, ma ke hɛ: «Dzeme, dəhwəa ghə! Dzeme, dəhwə ghəa!»

²⁴Pa ŋkɛ zhɛrete geva, newakɛ hɛ ba'a bezlamte hɛ te sləa Mahwətə. Pa ŋemia mtsekwele bake shave mbe ghɛa wəfe ba'a slekwemte kweci ŋwalea shɛhɛ wəfaɗemsə bakeghəmbe.

²⁵Pa ŋkɛ dzemenyɛ pelɛ ghweme ta Karmɛl. Pa ŋkɛ sawa pelɛ kadzembe Samari.