Read KapsikiDC 2 Ka Meghea Kɛfi 21 Bible Online

2 Ka Meghea Kɛfi 21 - KapsikiDC bible

2 Ka Meghea Kɛfi 21

¹Va ta Manasɛ meŋe bakeghəmbe nda kelete meghe ŋkɛ, pa ŋkɛ menete va mcɛfemsə mcɛfeghəmbe mbe meghe mbe Zhɛrəzalɛm. Hɛfsi-Ba sləa meghekɛ.

²Wəshi nyi keɗema kehi yamene ŋkɛ kwa kema ta Mahwətə, pa ŋkɛ tekeve mene wəshi nyi ndiremi ndiremi kashasha ta hwelefefi nyi ŋkamte Mahwətə kezha ve nda ke ka Israyɛl.

³Pa ŋkɛ zhɛne kaŋeyi yɛ ŋkwa kedzeghe melɛ nyi ŋzlamte Ɛzɛkiyas, yitenyɛ, pate yɛ reghwetɛ kazləvəa Ba'al, menete seləa melɛ kala nya menete Akab, meghea ka Israyɛl vəashi ba'a ntake ŋkɛ kahawe va pɛtɛa wəshi nyi pelɛ ghweme.

⁴Pa pate kweci reghwetɛa ka ɗepema Shala mbe ghɛa Shala ganyɛ mbe Zhɛrəzalɛm, ma ke Mahwətə gezete te ghəa nci: «Katencɛ nza ta ɗa 'ya hwa gheyɛ te.»

⁵Pelɛke te ŋwela nyi dzeyi yitea ghɛa Shala bake nci ne, pa pepate nda kweci reghwetɛ ke wəshi nyi pelɛ ghweme.

⁶Pa le wəzege ta ŋkɛ slate ŋkɛ te melɛ, kezha mene yayata ghwɛ ba'a ka'yɛwe ntsehwele va mbeli nyi kegeze ghena le mbelia kwahɛɗi. Mbe kema mbe kema lə Manasɛ le mene wəsə kwa ndiremi kwa kema ta Mahwətə, pa ŋkɛ hwepete nda wənəa ŋkɛ.

⁷Pa feɗete pa ta Ashɛra kaveyi mbe ghɛa Shala. Ndagwara nahe Mahwətə kegezete nda ke David ba'a ke Salomon wəzege ta ŋkɛ: «Teke ki ghɛa ɗa nya mbe Zhɛrəzalɛm, meleme nya ntave 'ya hwa meleme nyi va hwelefe ta ka Israyɛl meŋe bakeghəmbe, kancɛ nza ta ɗa 'ya hwa gheyɛ teke kaghala ghala.

⁸Kenza mbelia ka Israyɛl kaya ghena nyi gezeke 'ya ba'a pɛtɛa wəshi mahalegəa ɗa nyi ndeke nda Moyize nde mene slene ta ɗa ke hɛ, kazaghəyite hɛ 'ya we, kanza 'ya cakeɗa cakeɗa le hɛ kagha ghala te hɛɗi nya ndeke nda 'ya ke ka shihɛnyɛ hɛ we.»

⁹Ama mbelia ka Zhəwda ne, kayɛ nda fete hɛ ke Mahwətə we. Kwa tekeleke yamenete hɛ, mbelia Manasɛ ne, nahe hɛ kezamte hweŋkwa kezele Shala za ma ke mbeli nyi keghate kase te hɛɗia shɛ, nyi zamte Mahwətə kezha ve mbelia ŋkɛ te.

¹⁰Pa Mahwətə ndeke nda ghena ke nde mene slene ta ŋkɛ nya kande mɛ ŋkwa kezha geze ɓiyitsa:

¹¹«Nahe meghe Manasɛ kemenete yayata slene kwa ndiremi. Pa ŋkɛ nzate nza za ma ke ka Amor nyi kese tagha. Laka wəshi nyi zhɛrete ŋkɛ kala Shala, pa tsəkwəyi mbelia ka Zhəwda mbe mene jaɗafa.

¹²Vatse gɛ, wa nya ghena nya geze Mahwətə nya, Shala ta ka Israyɛl: ‹'Ya kateɗa Zhɛrəzalɛm le mbelia ka Zhəwda le kwete ba kala berazlɛ ta va, nda nza hɛ kafave ghena.

¹³Katebeze Zhɛrəzalɛm 'ya, kala nya bezemte Samari 'ya ba'a ghɛa Akab. Kateyaɓe mbelia ŋkɛ 'ya shave mbe Zhɛrəzalɛm, kala nya helape nya yaɓemte ba'a nya dzəɓəyi mbeli.

¹⁴Kateneghamte mbelia ɗa nyi ketene 'ya. Kapele nda hɛ 'ya ke ka ghema ta nci nyi ketefə wəshia nci laka beze hɛɗia nci.

¹⁵Ma nda mene 'ya kala nya ne, va nya ɗema mbelia ɗa kesərəakɛ mene wəsə kwa ndiremi ba'a hwepe ɗa wənəa ɗa, ghala shave ka shihɛ nci mbe Ɛzhipte pa tsetsenya.›»

¹⁶Ma meghe Manasɛ ne, pa 'ya kesehwe le kweci mbeli nyi kemenete beze ghena, yare ŋkwa nya mbe Zhɛrəzalɛm va mimi nyi kemenete jaɗafa ne, mtsehe yamtsehe geva hɛ kadzembe nyi tekete nda ŋkɛ ke mbelia ka Zhəwda, katsəkwə hɛ kadzeyitea mene wəshi ndiremi kwa kema ta Mahwətə.

¹⁷Ma nyi ketene ghena ta Manasɛ ne, nahe hɛ kenza kerafe rafe mbe “Palepa ta wəshi nyi menete ka meghea ka Zhəwda”. Pɛtɛ gezete wəshi nyi menete ŋkɛ ba'a ma ta fete nyi menete ŋkɛ.

¹⁸Ma kwa mtenyɛ Manasɛ, pa mbeli lamte ŋkɛ kwa ntsa ta ghɛa meghe, kaheka ntsa shɛ mbeli perə kantsa ta Əwza. Amon wəzege ta ŋkɛ nde kelete meghe te ŋkwa ŋkɛ.

¹⁹Ma nda dzembe meghe Amon ne bakemsə bakeghəmbe va ta ŋkɛ. Bake va ta ŋkɛ kameghe mbe Zhɛrəzalɛm. Sləa meghekɛ ne Meshəwlɛmɛt, wəzha ta Harəws nde Yotba.

²⁰Wəsə kwa ndiremi kwa kema ta Mahwətə yamene Amon kala Manasɛ yitenyɛ.

²¹Nza kwa ndiremi yanzate ŋkɛ kala gheŋkɛ, kahawe va wəshi nyi zhɛrete mbeli kashala kala gheŋkɛ.

²²Kese ŋkɛ kanza kala nya ɗe Mahwətə we. Ama pa zhɛrave nda wəmbə ke Mahwətə, Shala ta ka shihɛnyɛ.

²³Pa mbelia jama ta ka sewajɛa ŋkɛ ɗema ghena ta ŋkɛ, tsate ghena yite ba'a peslekɛ ŋkɛ ki ghɛ meghe.

²⁴Ama pa mbeli nyi mbe meleme ta ka Zhəwda mpəmte mbeli nyi kepeslekɛ meghe ba'a ntave Zhoziyas, wəzege ta ŋkɛ te ŋkwa ŋkɛ.

²⁵Ma nyi ketene ghena ta Amon pɛtɛ ne, nahe hɛ kenza kerafe rafe mbe “Palepa ta wəshi nyi menete ka meghea ka Zhəwda”.

²⁶Pa mbeli lamte kwa kwele ta ŋkɛ, kwa ntsa ta Əwza, Zhoziyas wəzege ta ŋkɛ ya kameghe te ŋkwa ŋkɛ.