Read KapsikiDC 2 Ka Meghea Kɛfi 23 Bible Online

2 Ka Meghea Kɛfi 23 - KapsikiDC bible

2 Ka Meghea Kɛfi 23

¹Taghanyɛ, pa meghe hekakɛ mbelia jama ta ka Zhəwda ba'a ŋa ka Zhɛrəzalɛm pɛtɛ.

²Cape hɛ kanya kwetɛŋe kalə kadzembe ghɛa Mahwətə, kabeghe hɛ ka Zhɛrəzalɛm le ka Zhəwda, ka dzeghe Shala, ka mɛ ŋkwa ba'a yayata wəndə pɛtɛ. Pa meghe jaŋgate nda ke hɛ pɛtɛ palepa ta ghena ta jikə geva nya ntsate mbeli mbe ghɛa Shala.

³Pa meghe ghereŋenyɛ terasle yitea selə nya mbe ghɛa Shala ba'a zhɛne kamenete jikə geva le Mahwətə. Yayata wəndə kakele zəzə kanza dɛŋe dɛŋe te Mahwətə, kayɛ nda fete le wənəa ŋkɛ ba'a le mpia ŋkɛ ke ghena nyi kegezeke geva ba'a nyi tekete mbeli ba'a kayɛpə kwa kala nya kerafete geva pɛtɛ mbe palepa ta jikə geva. Pɛtɛa mbeli keyɛte kakelete zəzə.

⁴Ma kwa sebe ta ŋkɛ, pa meghe geze nda ke wəndə kwelea ka dzeghe Shala Hilkiya, ka sləwəfəa ŋkɛ ba'a ka dzeghe Shala nyi keya ŋkwa kedzembe ghɛa Shala, kezha fəmte wəshi nyi kaŋa melɛa Ba'al kwelɛ ŋkwa nya keveyi geva kaŋa Shala le reghwetɛ, le yɛ ŋa Ashɛra ba'a ŋa wəshi nyi pelɛ yitea ghweme. Pa mbeli teremte wəshia shɛhɛ pelɛke te ŋwela ta Zhɛrəzalɛm, kwa zlərəa Sɛdron, nda fəte pəsəɗəa nci mbeli kadzawa Bɛtɛl.

⁵Pa Zhoziyas ŋkamte ka mɛ ŋkwa katseŋwə nyi veyi ka mazea kɛfia ka Zhəwda kadzeghe melɛ, kasla mimi te ŋkwa melɛ nyi mbe meleme ta ka Zhəwda le nyi dzeyi yitea Zhɛrəzalɛm. Pa ŋkamte hɛ va nya nza hɛ kadzeghe nda melɛ ke Ba'al, ba'a ke, veci, le tere, ke ŋkwa nyi kencɛ hweŋkwa ta veci pelɛ ghweme ba'a ke pɛtɛa saseregwa.

⁶Pa ŋkɛ kelemte ghɛa Ashɛra ba'a yɛ seləa ŋkɛ shave mbe Zhɛrəzalɛm kezha tere hɛ kwa zlərəa Sɛdron. Katere hɛ mbeli hɛmɗɛke ɗɛke kapəsəɗə ba'a kabete pəsəɗəa shɛ mbeli dzeyi te yɛ kwele ta ka dewə ŋeli.

⁷Pa Zhoziyas ŋzlamte cɛ nyi mene vale tahe mbeli mbe hɛ kala wəshia Gətəli le yɛ nyi tsa nda lekwesa mi mbe ke ka dzeghe melɛa Ashɛra.

⁸Pa Zhoziyas tseneke ka dzeghe Shala nyi mbe Gɛba le nyi mbe Bɛrshɛba kase kadzembe Zhɛrəzalɛm, pɛtɛ hɛ fɛamte ŋkwa nyi kaŋa melɛ pɛtɛa hɛɗia Zhəwda, mpəmte reghwetɛ kedzeghe melɛ dekwe yitea mɛa meleme, tsagha kwete nya yitea mɛa degha ta Yoshəwa, ŋgwamna ta meleme, laka bela kwa gwela shɛ mbeli kadzeki.

⁹Ma ya tsagha shɛ ŋkɛ ne, ma ka dzeghe shala nyi kadzeghe melɛ ne, hweŋkwa va hɛ kadzeghe Shala te reghwetɛa Mahwətə mbe Zhɛrəzalɛm we. Ama wərə hɛ kazeme ɗafa kwalekwala kala kweci ka mɛ ŋkwa.

¹⁰Pa Zhoziyas zhɛrete Tofɛt ŋkwa ketere ŋwale nya kwa zlərəa Hinom kakwa wale wale, yagha mbeli katere ŋwalea nci nyi kazhili keɗema nyi kami ke shala Molɛk.

¹¹Pa fɛamte ghena ta gədəwə nyi veyi meghea ka Zhəwda kazləvəa veci. Ma gədəwəa shɛ ne, tagha hɛ vare ŋkwa kedzembe ghɛa Shala, kwete cɛ nya vare, takwa yitea cɛa nde mene slene ta Ŋgwamna Netan-Mɛlɛk sləa ŋkɛ. Pa Zhoziyas teremte wəmata gədəwə nya kaŋa veci.

¹²Pa ŋkɛ ŋzlamte reghwetɛ nya pate ka meghea ka Zhəwda pelɛ ŋwela ta dɛɓere nya kənəa cɛa Ahaz, pa le nyi veyi Manasɛ kwa yitea ghɛa Shala. Pa ŋkɛ mpəmte tagha shɛ, pa beteyi yɛ kwetiɓə kwa zlərəa Sɛdron.

¹³Pa ŋkɛ fɛamte mene slene te ŋkwa melɛ nya menete meghe Salomon laka bela kwa zeme pelɛ ghweme ta bekele, ghweme nya kwa kema ta Zhɛrəzalɛm. Pelɛ ŋkwa melɛa Astartɛ, kazləvəa shala ta ka Sidon, pelɛ kemosh, kazləvəa shala ta ka Mowab, ba'a pelɛ Molɛk, shala kwa ndiremia ka Amon.

¹⁴Pa Zhoziyas mpəmte pelɛ nyi mɓete mbeli, kampəmte seləa melɛ pa zhiɓəmte ki nya tsene 'yɛ'yɛa wəndə ŋelɛ mbeli kwa.

¹⁵Pa Zhoziyas mpəmte ŋkwa nya mbe Bɛtɛl nya menete Zhɛrobowam, wəzege ta Nebat, kezha teke nda ke mbelia ka Israyɛl kamene jaɗafa. Pa ŋkɛ ndəmte ŋkɛ le ghwə, mpəmte reghwetɛ, teremte selə nya keveyi geva tekeleke ba'a zhɛrete pɛtɛa ŋkwa shɛ kakeləwə.

¹⁶Laka mene ta ŋkɛ kala nya, nda nakɛ kwele Zhoziyas pelɛ ghweme kwa zhɛre geva ŋkɛ. Pa ghwenakɛ ŋkwa kalə kafə 'yɛ'yɛ kwa kwelea shɛ, kezha tere te reghwetɛ kezha zhɛrete wale wale, kayɛpə ghena nya gezete nde mɛ ŋkwa ta Mahwətə, ma vəa ŋkwa nya nza Zhɛrobowam meslete kənəa reghwetɛ hwa gəsəkə. Pa Zhoziyas zhɛrete geva kanakɛ kwele ta nde mɛ ŋkwa ta Mahwətə,

¹⁷ma ke yiwəte: «Wa wəsə nya newe nya 'ya kala kwele pelɛke wa?» Ma ke mbeli nyi mbe meleme zhɛnete nda: «Kwele ta nde mɛ ŋkwa nya kesame kwa Zhəwda, gheŋkɛ nde gezete ghena nyi mene nyi na teke te reghwetɛ nya.»

¹⁸Ma ke Zhoziyas sha hɛ: «Sərəakɛ mə kwelea shɛ! Yagha wəndə kakwaɗe yɛ'yɛa nde mɛ ŋkwa shɛ!» Tsetse nda nza 'yɛ'yɛa ŋkɛ mba, kala ŋa nde mɛ ŋkwa nya kesame kwa Samari.

¹⁹Nahe ka mazea kɛfia ka Israyɛl kehwepete nda wənəa Mahwətə kwa ŋate ŋkwa melɛ hɛ kala ka dzeghe melɛ dzeyi mbe meleme ta Samari. Pɛtɛ Zhoziyas mpəmte cɛa shɛhɛ kala nya menete ŋkɛ mbe Bɛtɛl tɛfɛa tɛfɛa.

²⁰Te reghwetɛ ne, mbe sla ghə ŋkɛ te ka dzeghe shala kələŋə ya ghenci nza kadzeghe shala, katere 'yɛ'yɛa wəndə ŋelɛ ŋkɛ. Kwa sebe ta ŋkɛ, pa Zhoziyas zhɛneghe geva kadzeme Zhɛrəzalɛm.

²¹Pa Zhoziyas gezete nda ke mbeli pɛtɛ kamene gəsəkəa Pake kazləvəa Shala Mahwətə ta nci, kala nya gezete palepa ta jikə geva.

²²Va nya nza ŋkɛ ne, ghala se ka meha ghwə kamene meghe te ka Israyɛl, ba'a mbe vəa ka meghe nyi kemenehwe meghe te ka Israyɛl ba'a te ka Zhəwda ne, kegha mbeli kamenete gəsəkəa Pake kala nyagha we.

²³Ama mbe Zhɛrəzalɛm menete mbeli kazləvəa Mahwətə, mbe va kwa meŋe degheseghəmbe ta Zhoziyas te meghe.

²⁴Kezha yɛte nda fete ke ghena nyi mbe palepa ta wəsə mahalegə, nya ntsate wəndə kwelea ka dzeghe Shala Hilkiya mbe ghɛa Mahwətə ne, pa Zhoziyas fɛamte mbeli nyi ke'yɛwe ghena va mbelia kwahɛɗi mbe Zhɛrəzalɛm ba'a te hɛɗia Zhəwda, pa mpəmte ŋkwa melɛ nyi ŋate mbeli, wəshi nyi zhɛrete mbeli kala Shala le yɛ kweci wəshi melɛa ka ɗepema Shala.

²⁵Kwa keɗaŋe ta ghena ne, meghe shɛ kekemave geva kaghate kala Zhoziyas we, nya kendeke nda ghə ke Mahwətə le wənəa ŋkɛ pɛtɛ we, le mpia ŋkɛ pɛtɛ, ba'a le berete ta ŋkɛ, kala nya gezeke wəsə mahalegəa Moyize. Kwa sebe ta ŋkɛ ne, kekemave geva zhɛkwa perə we.

²⁶Ama nahe hwepe wənəa Mahwətə nya wəba kegweɗakwetema geva yitea hɛɗi meghea Zhəwda. Ma hwepe wənəa shɛ ne, meghe Manasɛ nde mtseke ŋkɛ laka mene wəshi nyi ɗema ghəa ŋkɛ.

²⁷Vatse geze ŋkɛ: «Tsagha shɛ ɗe 'ya kaŋkamte pa le Zhəwda cakeɗa cakeɗa le ntsə ta ɗa kala ŋa ka Israyɛl, kaɗe 'ya kanewe we. 'Ya kateneghamte Zhɛrəzalɛm meleme nya ntave 'ya, ba'a ghɛa ɗa, nya tagha nya meɗeyi nda 'ya ke hɛ kancɛ nza ta ɗa hwa hɛ.»

²⁸Ma nyi ketene pɛtɛa ghena ta Zhoziyas ne, nahe hɛ kenza kerafe rafe mbe “Palepa ta slene ta ka meghea ka Zhəwda”.

²⁹Mbe vəa meghea ŋkɛ nyi jivenyɛ Farawon Nɛko, meghea ka Ɛzhipte le ka sewajɛa ŋkɛ laka Efrate kezha kemane meghea ka Asiri. Pa meghe Zhoziyas ɗe kafɛa nda ŋkwa ke meghea ka Ɛzhipte, ama pa mbeli peslekɛ kwa Mɛgido mbe kwa ghate ta mpa.

³⁰Pa mbelia jama ta ka sewajɛa ŋkɛ kelete geva ta ŋkɛ kwa wəmata gədəwə slə mbe Mɛgido kadzembe Zhɛrəzalɛm nya lamte ŋkɛ mbeli kwa kwele ta ŋkɛ mbe. Pa mbeli nyi mbe meleme ta ka Zhəwda ntave Zhowakaz, wəzege ta Zhoziyas, kaveyi kameghe te ŋkwa yitenyɛ.

³¹Va ta Zhowakaz bakemsə mahekeneghəmbe nda kelete meghe ŋkɛ. Deke tere mahekene menehwe meghe ŋkɛ mbe Zhɛrəzalɛm. Haməwtal sləa meghekɛ, wəzha ta Zhɛrɛmi nde Libna nde.

³²Wəsə nya ɗema Mahwətə yamenete Zhowakaz kala ka shihɛnyɛ.

³³Pa Farawon Nɛko kesehwe kamava kakeleghe kadzembe Ribla, te hɛɗia ka Hamat, miɗi mene meghea ŋkɛ tagha. Zhɛne zhɛkwa, pa Nɛko ndeke nda le berete kaŋki nda kiləwəa mze kwa tɛawetɛa slibə mahekene ba'a mze kwa tere tere kiləwə mahekenemsə.

³⁴Ma kwa sebe ta ŋkɛ ne, pa veyi Ɛliyakim wəzege ta Zhoziyas kala meghe te ŋkwa yitenyɛ, pa zhɛrete sləa ŋkɛ kaZhowakim. Ma Zhowakaz ne, pa keleghe kadzembe Ɛzhipte mbe gha mte ŋkɛ.

³⁵Pa Zhowakim tsehete jaɓeregwale se te hɛɗia ŋkɛ pɛtɛ va yayata wəndə kezha ve nda ke Farawon kwa nza ŋkɛ ka'yɛwe ve. Pa Zhowakim ndeke nda mze kwa tɛawetɛa ba'a mze kwa tere tere ke Nɛko.

³⁶Va ta Zhowakim bakemsə mcɛfeghəmbe nda kelete meghe ŋkɛ. Va meŋe kwetɛŋeghəmbe menete ŋkɛ mbe meghe mbe Zhɛrəzalɛm. Zɛbəwda sləa meghekɛ, wəzha ta Pedaya, nde Rəwma.

³⁷Wəsə nya ɗema Mahwətə, yamenete ŋkɛ kala ka shihɛnyɛ pɛtɛ.