Read KapsikiDC 2 Ka Meghea Kɛfi 25 Bible Online

2 Ka Meghea Kɛfi 25 - KapsikiDC bible

2 Ka Meghea Kɛfi 25

¹Pa senyɛ le ka sewajɛa ŋkɛ kadzembe Zhɛrəzalɛm kamenete ghedəkwəa ŋkɛ pelɛke dzeyi yitea meleme. Pa ka Babilone ntəsləte meleme dzasle. Mbe kwa mesli ta va ta Sɛdɛsiyas, te kwa meŋe ta hɛ mbe kwa meŋe ta tere.

²Mba tagha pa te kwa meŋe kwetɛŋeghəmbe ta va ta meghea ŋkɛ.

³Pa ma menete geva mbe meleme dzawe. Wəsə shɛ kazeme mbeli nyi mbe meleme we. Ma te kwa mesli ta hɛ mbe kwa wəfaɗe ta tere,

⁴pa ka Babilone ŋate ŋkwa te zli ɓɛhwɛ. Ma kwa se viɗi ne, pa ka sewajɛa ka Zhəwda hwɛnji. Ya tsema nza ka sewajɛa ka Babilone dzasle yitea Zhɛrəzalɛm ne, pa hɛ shavenji kwa mɛa degha nya kwelɛ sli bake. Takwa yitea ntsa ta meghe. Pa meghe Sɛdɛsiyas kelete hweŋkwa nya kedzawa laka zlərəa Araba.

⁵Cape ka sewajɛa ka Babilone kakeka hɛ kakeseve te ŋwela ta Zhɛriko. Pɛtɛa ka sewajɛa ŋkɛ kewəfəyite.

⁶Pa ka Babilone keseve ŋkɛ kamava ba'a keleghe nda ŋkɛ ke meghea ka Babilone nya mbe Ribla. Pa ŋkɛ mehate ghwə ta Sɛdɛsiyas.

⁷Pa mbeli peslekɛ wəzege ta Sɛdɛsiyas kwa ntsə ta yitenyɛ. Kwa sebe ta ŋkɛ, pa Nabəkodonozor ntsentsamte ntsə kwa ghə va Sɛdɛsiyas, ghweneghe ŋkɛ kadzembe Babilone kehwepe hwepe tsape tsape le zewe lɛ.

⁸Mbe kwa meŋe meslighəmbe ta va ta Nabəkodonozor, meghea ka Babilone, te kwa mberefaŋe ta hɛ mbe tere kwa mcɛfe ne, pa nebəwzaradan se kadzembe Zhɛrəzalɛm. Gheŋkɛ ya kawəndə nya te ka ya ŋkwa, kawəndə kwelea ka sewajɛa meghea ka Babilone.

⁹Pa teremte ghɛa Shala, ghɛa meghe ba'a cɛ nya wəba nya kaŋa meleme pɛtɛ, ghɛa mbelia jama pɛtɛ.

¹⁰Ma ka sewajɛa ka Babilone nyi kebeghe wəndə nya te ghəa ka ya ŋkwa ne, pa hɛ ŋzlamte sli nya dzeyi yitea Zhɛrəzalɛm.

¹¹Ma kwa sebe ta ŋkɛ ne pa Nabəwzaradan fəte mbeli nyi mba mbe meleme kadzembe Babilone, kwele ma nyi kedzembe Babilone ke nyi ketene mbeli tagha.

¹²Ama pa sərəakɛ kwete bela ta ka titikwəa kɛfi kezha wəza rɛzɛŋe ba'a kweci wəve.

¹³Pa ka Babilone mpəmte yɛ selə mze kwa ghwə ghwə nya mɛa ghɛa Shala, tsagha wəmata gədəwə nya ɓɛhwɛ ba'a kwenə nya wəba[1] pelɛke yitea cɛ nyi le mze kwa ghwə ghwə. Pa hɛ keleghe mze kwa ghwə ghwəa shɛ kadzembe Babilone.

¹⁴Pa hɛ fəte wəshi mze kwa ghwə ghwə nyi mene slene ta gəsəkə mbeli mbe ghɛa Shala le hɛ: wəshi kefə pəsəɗə, yɛ pelɛ, wəshi kepesle ghwə kwa paterela, yɛ kwenə kepisə ŋkwa ba'a yɛ zlerekwe.

¹⁵Pa meghea ka ya ŋkwa fəhwe kweci wəshi kwa mze kwa tere tere, kwa geleɓə, yɛ helape ketere 'wərdə, yɛ kweci wəshi kesa wəsə.

¹⁶Kapesle mbeli kadzeghete wəshi mze kwa ghwə ghwə nyi menete Salomon kezha ghɛa Shala we: yɛ selə nyi bake nyi, kwenə nya wəba ba'a wəmata gədəwə nya ɓɛhwɛ.

¹⁷Geze ta ŋkɛ ne, selə kwetɛŋe ne, mɛtre mesli biya ta ŋkɛ kadzeme ghweme. Pəkələ mze kwa gheme ya kənəa yayata selə, mɛtre ba'a kwete gasle yite biya ta ŋkɛ kadzeme ghweme, nahe ŋkɛ kenza kepesa pesa dzeyi yite le kweci wəshi kala gheleghe mze kwa gheme, kala yɛ ya ta kwakweme kweci wəshi dzeyi yitea ghəa pəkələa shɛ. Kanya kwetɛŋe hɛ seləa shɛhɛ pɛtɛ nci, kanya kwetɛŋe wəshi nyi kala gheleghe nyi te.

¹⁸Pa meghea ka ya ŋkwa kesehwe wəndə kwelea ka dzeghe Shala Seraya, le sləwəfəa ŋkɛ Sefaniya, ba'a ka dzeghe Shala mahekene nyi keya ŋkwa kedzembe ghɛa Shala.

¹⁹Pa keseve kwete nde mene slene nya nza ghena ta ka sewajɛ te dzeve ve perə, zhɛne mcɛfe kweci mbeli nyi ki ghɛa meghe, nde rafe palepa ta kele mbeli kadzembe sewajɛ, meghea ka sewajɛ ŋkɛ, ba'a ŋkwaŋemsə mbelia Zhəwda. Mbeli nyi pɛtɛ ne, mbe Zhɛrəzalɛm hɛ.

²⁰Pa Nebəwzaradan fəghe nda hɛ ke meghea ka Babilone mbe Ribla.

²¹Pa meghea shɛ mpəmte hɛ te ŋkwa shɛ, te hɛɗia ka Hamat. Tsetse fəmte mbelia ka Zhəwda mbeli cakeɗa cakeɗa le hɛɗia nci.

²²Nahe meghe Nabəkodonozor kesərəakɛ kwete bela te hɛɗia Zhəwda. Pa veyi Gedaliya kaŋgwamna nci, wəzege ta Ahikam shia Shafan.

²³Ma kwa fate ghena shɛ ka sewajɛa ka Zhəwda nyi keɗema kedzembe Babilone, ghena nya tarete Nabəkodonozor, pa hɛ lə kasləyi Gedaliya mbe Mispa. Ma mbelia jama ta ka sewajɛa shɛ ne, Ismayɛl, wəzege ta Netaniya, Yohanan, wəzege ta Karɛya, Seraya, wəzege ta Tanehəwmɛt, nde Netofa, ba'a Yazaniya nde Ma'aka.

²⁴Ma ke Gedaliya sha hɛ pɛtɛ: «'Ya kameɗeyi ŋayɛ mba yɛ keghazlənə va yayata wəsə laka ka Babilone. Se mə kantishɛ te hɛɗi nya le nza ta ŋayɛ ba'a fa nda mə ŋa meghea ka Babilone. Katekemave ganyɛa ŋayɛ yɛ.»

²⁵Ama te kwa mberefaŋe ta tere mbe va nya, pa Ismayɛl, wəzege ta Netaniya shia Ɛlishama, nya mbe hwelefe ta meghe, se kadzembe Mispa le mbeli meŋe. Pa hɛ peslekɛ Gedaliya, pɛtɛ le ka Zhəwda nyi ki ghɛa ŋkɛ ba'a ka Babilone nyi ki

²⁶Pɛtɛa mbeli nyi mbe meleme ba'a ka jama jama ta ka sewajɛ slənji kanya kwetɛŋe kadzembe Ɛzhipte, kwa ghazlənənji hɛ va ka Babilone.

²⁷Ma mbe kwa mahekenemsə mberefaŋeghəmbe ta va ta Zhowakin, meghea ka Zhəwda kwa sebe ta nya keleghe ŋkɛ mbeli kadzete kwete hɛɗi ne, pa Ɛvil-Mɛrodak kelete meghe mbe Babilone. Ma te hɛ bakemsə mberefaŋeghəmbe mbe kwa meŋe bakeghəmbe ta tere mbe va shɛ ne, pa ŋkɛ menete nda zlaɓa ke Zhowakin ba'a kelakame ŋkɛ same kwa daŋgayɛ.

²⁸Pa ŋkɛ gezete nda ghena le zeɗe ba'a ndeke nda ŋkwa nya kwele kala kweci ka meghe nyi te hɛɗia Babilone.

²⁹Pa ŋkɛ ndeke nda hweŋkwa ke Zhowakin kezha ɗema kaseɗe lekwesa ta ka daŋgayɛ, ntake ŋkɛ kazeme wəsə kezeme keveci keveci te tabele nya kwetɛŋe le meghea ka Babilone.

³⁰Tsetse menete geva ŋkɛ keveci keveci pa te mte, nahe Zhowakin kekemave wəshi nyi ɗe ŋkɛ kezha tawe ghəa ŋkɛ, se va meghea ka Babilone.