Read KapsikiDC 2 Ka Meghea Kɛfi 3 Bible Online

2 Ka Meghea Kɛfi 3 - KapsikiDC bible

2 Ka Meghea Kɛfi 3

¹Zhoram, wəzege ta Akab, kelete meghea ka Israyɛl mbe Samari, te kwa meŋe degheseghəmbe ta va ta Zhozafat, meghea ka Zhəwda. Pa ŋkɛ menete va meŋe bakeghəmbe mbe meghe.

²Pa kamene wəsə nya kehima mbe kema ta Mahwətə, ashɛ kala ŋa yɛ yitenyɛ le meghekɛ we. Kwa nza ŋkɛ na keŋzlamte reghwetɛ nya pate nda yitenyɛ ke Ba'al.

³Ama nahe ŋkɛ kezelete sebe ta jaɗafa ta Zhɛrobowam, wəzege ta Nebat, nya ketsəkwəame ka Israyɛl mbe mene jaɗafa. Kesərəakɛ we.

⁴Mɛsha meghea ka Mowab ne, nahe ŋkɛ keyate timɛti kwele kwele. Kapele ghə ŋkɛ yitea meghea ka Israyɛl keva keva, 100.000 zhɛgwəa lɛmə tsagha ŋemia timɛti le shintia nci 100.000 shɛ.

⁵Ama kwa mtenyɛ Akab ne, pa Mɛsha meghea ka Mowab ɗema ghena ta Zhoram.

⁶Pa Zhoram meghea ka Samari lə kaneweve ka sewajɛa pɛtɛa ka Israyɛl.

⁷Pa ghwenakɛ wəndə kalə kageze nda ke Zhozafat meghea ka Zhəwda: «Nahe meghea ka Mowab kezhɛrete ɗa mehele, kalə na kakemane ɗa kampa le na?» Ma ke sha meghea ka Zhəwda: «Kalə 'ya, ashɛ kanya kwetɛŋe mə wəka, gha le 'ya, mbelia ŋa le ŋa ɗa, gədəwəa lɛməa ɗa le ŋa ŋa.»

⁸Ama ma ke shɛ zhɛkwa: «Laka nyama hweŋkwa tedzeme mə wa?» Ma ke Zhoram shɛ: «Laka hweŋkwa ta Ɛdom nya te ɓerama.»

⁹Meghea ka Israyɛl, le ŋa ka Zhəwda, le ka Ɛdom cape hɛ kadzeghwa. Ma kwa menete hɛ mberefaŋe hɛ kadzeghwa ne, kekemave yɛmə hɛ kezha ka sewajɛ ba'a kezha wəshi keseɗa nyi kekele wəshia nci we.

¹⁰Pa meghea ka Israyɛl tsate lewela ɓiyitsa, ma ke: «Ayaga! Mahwətə nde keleke ɓəmə teke, gheɓəmə ka meghe nyi mahekene nyi, kezha veyi ɓəmə mbe dzeve ta ka Mowab!»

¹¹Ama ma ke Zhozafat 'yɛwete: «Nde mɛ ŋkwa ta Mahwətə teke ya kwetɛŋe kezha 'yɛwakɛ mə va Mahwətə tse yi?» Ma ke kwete wəndə kwelea ka sewajɛa meghea ka Israyɛl zhɛnete nda: «Ɛlizɛ ya teke hwa ghen'yɛ, wəzege ta Shafat, nya kese kamcɛ kwa sla pela le Ɛli nde mɛ ŋkwa.»

¹²Ma ke Zhozafat: «Yawa! Wəndə nyagha nde tegeze ɓəmə wəsə nya teɗe Mahwətə kageze ɓəmə.» Taghanyɛ, pa meghea ka Israyɛl, ŋa ka Zhəwda, le ŋa ka Ɛdom lə kasləyi Ɛlizɛ.

¹³Ma ke nde mɛ ŋkwa sha meghea ka Israyɛl: «Wa wəsə nya kwelɛ gheɓə le gha wa? Kwiɗi ka'yɛwe va nde mɛ ŋkwa ta yiteyɛ ŋa keɗema ŋa meyɛ ŋa!» Ma ke meghe shɛ: «Ewə! Mahwətə nde keleke n'yɛ ghen'yɛ ka meghe nyi mahekene nyi, kezha ve nda n'yɛ ke ka Mowab.»

¹⁴Ma ke Ɛlizɛ: «Te sləa Mahwətə nya le mpi, nya kesleke ŋkwa pɛtɛ, nya nza 'ya kande mene slene ta ŋkɛ ne, kezha hawe nya hawe 'ya va Zhozafat, meghea ka Zhəwda nda zhɛne ghena 'ya. Nza kaɓela ghena ta ŋa 'ya we, nza katenewe ŋa 'ya we.

¹⁵Ma tsetsenya gɛ, hekake ɗa mə nde tsa gagera.» Ma mbe tsa gagera ta ŋkɛ nde tsa gagera ne, pa berete ta Mahwətə dzembe Ɛlizɛ.

¹⁶Ntake kageze ghena, ma ke: «Wa nya ghena nya gezeke Mahwətə nya: ‹La mə ki kwele kwele dzeyi kwa hələ nya keghwele ghwele nya,

¹⁷kwa nza ŋkɛ 'ya, Mahwətə, nde gezete, viɗi nza ki nya va yɛmə. Kafa sefə yɛ we, kenakɛ va yɛ we, ya tsagha ŋkɛ yɛmə kesa nde tenza va gheyɛ, kezha gheyɛ, kezha ka sewajɛa ŋayɛ, kezha wəshi keseɗa nyi kefə wəshi ŋayɛ.›

¹⁸Ama ma ke Ɛlizɛ mtsehete: Wəsə nya ɓɛhwɛ nya sha Mahwətə, kateve ŋayɛ hɛɗia ka Mowab ŋkɛ kasleke yɛ.

¹⁹Wərə yɛ kabezemte meleme nyi kaka berete le meleme nyi ganji ganji va hɛ, kampəmte wəfe nyi nza ya kezeme te, kazhiɓəmte belageji, kampəhwe pelɛ hwa wəve nyi wəzakɛ mbeli kezha bezemte.»

²⁰Ma te hendɛ ta ŋkwa yipə yipə le və kedzeghe melɛ nya masheke ne, pa mbeli nakɛ yɛmə kasawa pelɛ hɛɗia Ɛdom ba'a kazhiɓə geva kənəa hɛɗi.

²¹Ma kwa fate mbeli na ka meghe nyi mahekene nyighɛ kese kadzembe hɛɗia ka Mowab le mpa, pa mbeli hekakɛ zhili nyi nza va ta nci gare mpa pɛtɛ le nyi nza va ta nci kwele ma, pa mbeli fəyi hɛ kwa ghala.

²²Ma masheke kwa feɗeghe ka sewajɛa ka Mowab, kaɓele veci te yɛmə. Ma kanewe yɛməa shɛ hɛ cakeɗa cakeɗa ne, ghɛmɛ newe hɛ kala mimi,

²³ma ke hɛ sha lewela: «A mimi! Ka meghe le ka sewajɛa nci heɗete geva kwelɛ ghəa nci kampəkawa ghəa nci. Sate mə ka Mowab, mbi ɓəmə kafə wəshi!»

²⁴Ama vəa ŋkwa nya hendave nda geva hɛ ke ghedəkwəa ka Israyɛl ne, pa ka sewajɛa ka Israyɛl shave ba'a have nda mpa ke hɛ. Tagha gɛ, kwetɛ kwetɛŋe ka Mowab hwɛnji. Tereŋe ka Israyɛl yitea keka hɛ, shilimə hɛ mbe hɛɗia nci ba'a mɛke hɛ mpəmte hɛ.

²⁵Pa hɛ ŋzlakawa yɛ meleme, yayata wəndə kabeza pelɛ kwete kwete kadzembe wəve nya kewəza wəza bətə wəve mbe, pa hɛ zhiɓəmte belageji pɛtɛ, kampəmte wəfe nyi nza ya kezeme te. Kakwa keɗaŋe ne, deke meleme ta Kir-Hɛrɛs ya mba kala ghəa ŋkɛ, ama pa ka sewajɛ nyi le beza pelɛ se kezha ntəslə ŋkɛ ba'a kezha ha nda mpa perə.

²⁶Nahe meghea ka Mowab keɗepe kazhɛnete ghə ŋkɛ mbe mpa shɛ we. Pa tsenete ka sewajɛ gwəmsə mberefaŋe nyi nza kafayɛ va hɛ kezha ŋate hweŋkwa kalə laka ŋkwa nya nza meghea ka Siri, ama ndɛare kamenete geva.

²⁷Pa kelete tezhɛa wəzege ta ŋkɛ ɓiyitsa nya kehi kanza kameghe kwa sebe ta ŋkɛ, pa teremte kamelɛ te zlia meleme. Pa ghazlənə keseve ka Israyɛl, pa hɛ slənji kazhɛneghe geva sha hɛɗia nci.