Read KapsikiDC 2 Ka Meghea Kɛfi 5 Bible Online

2 Ka Meghea Kɛfi 5 - KapsikiDC bible

2 Ka Meghea Kɛfi 5

¹Pa kwete meghea ka sewajɛa meghea ka Siri sləa ŋkɛ Na'aman. Kwele kwele ɗehwe wəndə kwelea ŋkɛ kamene nda ganyɛ. Kwa nza ŋkɛ laka gheŋkɛ ndeke nda hərə ŋkwa Mahwətə ke ka Siri. Ama wəndəa shɛ ne, katsala ganyɛ tsape, kande derena ŋkɛ.

²Ma ka sewajɛa ka Siri nyi kedzembe hɛɗia ka Israyɛl ne, pa hɛ keseke kwete wəzha makwa kamava, pa male ta Na'aman kelete kamene nda slene.

³Pa wəzha shɛ geze nda ke male nya kesleke: «Ma ya na nde sleke ɗa kelə sha nde mɛ ŋkwa ta Shala nya kwa Samari ne, katemə nda kiɗimte nda derena ta ŋkɛ ŋkɛ we.»

⁴Pa Na'aman lə kagezete nda ke meghe ghena nya gezete wəzha ta ka Israyɛl shɛ.

⁵Ma ke meghe: «Yewə, megela, kwiɗi sha meghea ka Israyɛl le palepa nya rafave ŋa nya 'ya kezha ve nda.» Cape Na'aman tsagha, pa ŋkɛ kelete dəɓərəa mze kwa tɛawetɛa gwəmsə mahekene, dəɓərəa mze kwa tere tere ŋkwaŋemsə ba'a lekwesa gəsəkə meŋe.

⁶Pa ŋkɛ ndeke nda palepa nya rafave nda meghea ka Siri ke meghea ka Israyɛl: «'Ya kaghwene ŋa wəndə nya te ghəa ka sewajɛa ɗa Na'aman, nya kekeleghe ŋa palepa nya, kezha mpimte nda derena ta ŋkɛ na.»

⁷Jaŋgamtema ta meghea ka Israyɛl sha palepa nyagha ne, pa ŋkwahemte lekwesa ta ŋkɛ, kɛake sha lewela: «Shala 'ya na, nya nza berete ve kapeslekɛ wəndə ba'a kaveyi teghweme? Newema mə meghea ka Siri ghweneke ɗa wəndə kampi derena te! Kanewe newe yɛ megela we: mɛ yaghweze ŋkɛ hwa 'ya nda heɗe geva ghen'yɛ!»

⁸Ma kwa fate Ɛlizɛ na meghea ka Israyɛl keŋkwahemte lekwesa ta ŋkɛ ne, pa ghwenakɛ ŋkwa kageze nda: «Wa raberə bezenyɛ mehele ta ŋa kala nya wa? Se wəndəa shɛ sha 'ya, nda teɗepete ŋkɛ kaganda nza nde mɛ ŋkwa ta Shala shɛ te hɛɗia ka Israyɛl.»

⁹Pɛkwe Na'aman le wəmata gədəwəa ŋkɛ le yɛ gədəwə se kaneghe kwa degha ta Ɛlizɛ.

¹⁰Pa Ɛlizɛ ghwenakɛ wəndə kalə kageze nda: «Kwiɗi pɛkɛ pɛ mberefaŋe zhigə kwa ndərəa Zhəwrdɛŋe. Ma tsagha ne, katembe na ba'a wɛŋe tenza na.»

¹¹Tewətelɛwe Na'aman slənyɛ le wənə, ma ke: «Ma zəzə 'ya ne, kateshave nde mɛ ŋkwa le ghəa ŋkɛ sha 'ya, kasəkwə Shala Mahwətə ta ŋkɛ, kadape ŋkwa nya nza 'ya shewə te le dzeve ta ŋkɛ nda mpi derena te 'ya, a 'ya sha ŋa ɗa.

¹²Ma banda ne hələa Damas, le ŋa Abana ba'a Parpar, ashɛ lɛŋe ma hɛ ke pɛtɛa hələ nyi te hɛɗia Israyɛl wəka? Hwe 'ya pɛkɛ pɛ kwa hɛ kezha mbele tsagha wa?» Pa Na'aman zhɛrete geva kadzeghwanyɛ le wənə.

¹³Ama pa ka mene slene ta ŋkɛ se kageze nda: «Nde sleke ɗa, ma ya wəsə nya dzawe kamene yagezete ŋa nde mɛ ŋkwa ne, nza ashɛ katemene na wəka? Wa raberə ɗema na mene wəsə nya gezete ŋa ŋkɛ: deke pɛkɛ pɛ hwa yɛmə kezha nza wɛŋe wa?»

¹⁴Pa Na'aman dzawa hələa Zhəwrdɛŋe kapɛkɛ pɛ mberefaŋe zhigə hwa yɛmə, kala nya gezete nda Ɛlizɛ, pa geva ta ŋkɛ zhɛrenyɛ wɛŋe: pa hweta ta geva ta ŋkɛ zhɛrenyɛ kala ŋa wəzege nya ɓɛhwɛ.

¹⁵Pa ŋkɛ zhɛneghe geva kalə laka nde mɛ ŋkwa ta Shala, gheŋkɛ ba'a pɛtɛa mbelia ŋkɛ nyi kebeghe ŋkɛ: «Tsetsenya nahe 'ya keɗepe, kwete Shala shɛ teke te hɛɗi pɛtɛ, keɗema Shala ta ka Israyɛl we. Kampi ŋa dzeve 'ya, yɛhwe wəsə gəmə nya keleke ŋa mava ta ŋa.»

¹⁶Ma ke Ɛlizɛ zhɛnete nda: «Te sləa Mahwətə nya le mpi, nya mene nda slene 'ya, ashɛ 'ya kakele wəsə we.» Pa Na'aman təməsəte ŋkɛ kezha kele, ama pa Ɛlizɛ ɗema yɛ.

¹⁷Pa Na'aman kageze ɓiyitsa: «Ma kwa nza ŋkɛ nahe na keɗema wəshi nyi ve ŋa 'ya gəmə pɛtɛ ne, pelakɛ mava ta ŋa ntave hɛɗi ŋkɛ teke mbe meleme nya gare kele ta kwara bake, kwa nza ŋkɛ ne, katezhɛne 'ya katere nda wəshi keseɗa, kadzeghe nda melɛ ke kweci shala keɗema deke ke Mahwətə we.

¹⁸Deke təhwə təhwə ya'yɛwe 'ya warakenyɛ va Mahwətə te ghena nya: Ma vəa ŋkwa nya dzembe cɛa shala ta ŋkɛ nya kaRimon nde sleke ɗa, meghea ka Siri kasəkwə ghə ne, kavəkwə 'ya ntiŋə ghə mbe hɛɗi kala gheŋkɛ, kwa nza ŋkɛ te dzeve ta ɗa dɛŋe ŋkɛ. Pa Mahwətə kelemte ɗa wəsə nya menete nyagha 'ya te wənə.»

¹⁹Ma ke Ɛlizɛ shɛ: «Kwiɗi kwelɛŋe.» Pa Na'aman dzeghwanyɛ. Kenaka Na'aman kalə cakeɗake kaba we,

²⁰nda kekave Gɛhazi, nde mene nda slene ke Ɛlizɛ kageze mbe ghəa ŋkɛ: «Nahe nde sleke ɗa keɗema kele wəshi nyi ɗave nda nyi Na'aman nde Siri nya. Yawa, ma 'ya gɛ ne, le Mahwətə nya teghweme, 'ya kalə kakekave ŋkɛ kezha kemave kweci 'ya wəshi ve!»

²¹Tereŋe Gɛhazi kalə kakeka. Ma kwa nakɛ ŋkɛ Na'aman kahwɛ ne, pa ŋslakawa bale pelɛ wəmata ta gədəwəa ŋkɛ kalə shɛ kahe kahe, ma ke 'yɛwete ve: «Wa nde menete geva wa?»

²²Ma ke Gɛhazi: «Ghena shɛ we! Deke nde sleke ɗa nde ghwenakɛ ɗa kageze ŋa se kweci ka mɛ ŋkwa ta Shala bake sawa pelɛ meleme nyi hwa ghweme ta Ɛfrayim. Kasəkwə ŋkɛ va gha kezha ndeke nda kiləwəa mze kwa ghwə ghwə na mahekenemsə le lekwesa gəsəkə bake kezha hɛ.»

²³Ma ke Na'aman shɛ: «Yɛhwe ndeke ŋa dəɓərəa mze kwa ghwə ghwə 'ya ŋkwaŋemsə.» Pa ŋkɛ deneve ŋkɛ ba'a beteyi mze kwa tɛawetɛa kwa behwe bake nyi hwepete ŋkɛ, pa hɛ hite lekwesa bake perə. Pa ŋkɛ fəave nda ke ka mene slene ta ŋkɛ bake nyi kekele hɛ mbe kema ta Gɛhazi.

²⁴Ma kwa kekave ŋkwa nya heka mbeli kaOfɛl hɛ, pa Gɛhazi fəte slibə nyighɛ le yɛ lekwesa kabeteyi ki ghɛa ŋkɛ, kazhɛneghe geva mbelia Na'aman.

²⁵Pa Gɛhazi zhɛneke geva sha nde sleke ŋkɛ, ma ke Ɛlizɛ 'yɛwete ve: «Tema se na wa Gɛhazi?» Ma ke Gɛhazi shɛ: «Kese 'ya te kwete ŋkwa we nde sleke ɗa we.»

²⁶Ma ke Ɛlizɛ: «Kaɗema kelɛŋə yitea ghə va 'ya kanewe ŋkwa nda ŋslakawa bale wəndəa shɛ sawa pelɛ wəmata gədəwəa ŋkɛ kase sha gha na? Ama ashɛ nya kavə kekele cɛdɛ nya le yɛ lekwesa ganji, kezha pave wəvea bekele ba'a wəvea rɛzɛŋe, timɛti le sla, kezha pave yɛ mava le ka kwaterashi we.

²⁷Ya ma gɛ, te gha tenza derena ta Na'aman le yɛ hwelefefia ŋa kaghala ghala!» Ma nda shave Gɛhazi ki ghɛa Ɛlizɛ ne, pɛtɛ geva ta ŋkɛ va derena, tɛawe tɛawe kala kwacakelɛ.