Read KapsikiDC 2 Ka Meghea Kɛfi 6 Bible Online

2 Ka Meghea Kɛfi 6 - KapsikiDC bible

2 Ka Meghea Kɛfi 6

¹Ma te kwete veci, pa kweci hwa wəvəsəa ka mɛ ŋkwa ta Shala geze nda ke Ɛlizɛ: «Ma ŋkwa nya nza nya tsene nya ghen'yɛ mbe yitea gha ne, keɓɛhwɛ ŋkɛ ke gheɓəmə.

²Ndeke n'yɛ hweŋkwa kadzawa mɛa Zhəwrdɛŋe, yayata wəndəa n'yɛ katetsasle sheghwə kezha ŋa kwete ŋkwa ketsene.» -- «Kwiɗi mə», a ke Ɛlizɛ sha hɛ.

³Ma kwete wəndəa ka mɛ ŋkwa shɛ: «Megela kelə na hwa ghen'yɛ wəndə kwele!» -- «Yewə, kalə 'ya», a ke Ɛlizɛ shɛ.

⁴Pa dzawa le hɛ kadzawa mɛa hələa Zhəwrdɛŋe, te ŋkwa nya tetsasle sheghwə hɛ.

⁵Ma vəa ŋkwa nya slera sheghwə kwete wəndəa nci ne, pa tseyɛ teɗenyɛ seyi yitea leghe kadzawa yɛmə. Kɛake wəndə nyagha sha lewela: «Wa ya ɗa gɛ, nde sleke ɗa! Səkwə səkwəve tseyɛ nya 'ya!»

⁶Ma ke Ɛlizɛ 'yɛwete ve: «Tiɗiɗi le ma teɗenyɛ ŋkɛ wa?» Pa ncɛte nda ŋkwa ŋkɛ. Pa Ɛlizɛ ɓeleve sheghwə kanegheyi dzawa te ŋkwa shɛ. Taghanyɛ ne, pa tseyɛa shɛ samenyɛ te ghəa yɛmə.

⁷«Kelete gɛ», ke Ɛlizɛ shɛ. Pa wəndəa shɛ hate dzeve kakelete.

⁸Ma te və nya nza meghea ka Siri mbe mpa le ka Israyɛl, pa 'yɛwete ghena va mbelia jama ta ka sewajɛa ŋkɛ, pa geze nda ke hɛ tema tema ɗe ŋkɛ kamene ghedəkwə ka sewajɛ.

⁹Ama ma ke Ɛlizɛ sha meghea ka Israyɛl: «Ntsehwele mə! Mba yɛ kedzeyi laka ŋkwa nyagha, kwa nza ŋkɛ laka ŋkwa shɛ ka sewajɛa ka Siri.»

¹⁰Pa meghea ka Israyɛl ghwenakɛ ka sewajɛ kaya ŋkwa nya ncɛte mbeli. Kwele kwele zhigəa Ɛlizɛ kancɛ nda ntsehwele ke meghea ka Israyɛl, nda ɗepe hi geva ŋkɛ.

¹¹Kwele kwele bezenyɛ mehele ta meghea ka Siri. Pa hekakɛ ka jama jama ta ka sewajɛa ŋkɛ, ma ke sha hɛ: «Le kwete nde mbəɗəkwə shɛ hwa gheɓəmə nya kemene slene kezha meghea ka Israyɛl! Kaɗe yɛ kancɛte ɗa wəka?»

¹²Ma ke kwete wəndə kwelea ka sewajɛ zhɛnete nda: «Nde mbəɗəkwə hwa gheɓə we! Ama nde mɛ ŋkwa ta Shala Ɛlizɛ ne, berete ya ve gare ncɛte nda ke meghea ka Israyɛl ya ghena nya geze na mbe cɛ kehɛa ŋa.»

¹³Ma ke meghea ka Siri: «Kwiɗi mə kanewe ŋkwa nya nza ŋkɛ te nda teghwene ŋkwa 'ya kakese.» Pa mbeli gezete nda kwa Dotan Ɛlizɛ, ke hɛ.

¹⁴Pa meghe ghwenakɛ ka sewajɛ kwele kwele le wəmata gədəwə ba'a yɛ gədəwə, ma kwa ntsehe hɛ heviɗi ne, pa hɛ ntəsləte meleme.

¹⁵Ma hendɛ masheke ne, pa nde mene slene ta Ɛlizɛ feɗeghe masheke masheke kashave mbe meleme. Pa nakɛ ka sewajɛ le yɛ wəmata gədəwə ntəslə meleme va hɛ. Ma ke sha Ɛlizɛ «Wa ya ɓə gɛ, nde sleke ɗa! Tsema temene mə wa?»

¹⁶Ma ke Ɛlizɛ shɛ: «Ghazlənəma na ma! Ma nyi yitea gheɓə mbeli ne, kwele ma hɛ ke hɛ.»

¹⁷Ma ke səkwəte ghə: «Mahwətə, ghwenemte ntsə ta ŋkɛ nda nza ŋkɛ kanakɛ ŋkwa.» Pa Mahwətə ghwenemte ntsə ta nde mene slene ta Ɛlizɛ, pa nakɛ rayɛ ghweme va gədəwəa lɛmə ba'a yɛ wəmata gədəwə nyi kaghwə dzasle yitea Ɛlizɛ.

¹⁸Ntake ka sewajɛa ka Siri kase sha nde mɛ ŋkwa ta Shala. Ma ke Ɛlizɛ səkwəte ghə zhɛkwa: «Mahwətə, ghwələpəmte ntsə ta pɛtɛa ka sewajɛa shɛhɛ.» Pa Shala ghwələpəmte ntsə ta nci kala nya 'yɛwete Ɛlizɛ.

¹⁹Ma Ɛlizɛ sha ka sewajɛ: «Hweŋkwa ganyɛ yakelete yɛ we, meleme nya ncɛte ŋayɛ mbeli nya we. Təkwə təkwəte ɗa mə, 'ya kabeghe ŋayɛ kalə sha wəndə nya zele yɛ.» Ama nda kadzembe Samari beghe hɛ Ɛlizɛ.

²⁰Ma kwa nza ŋkɛ nahe hɛ kedzembe ne, ma ke Ɛlizɛ səkwəte ghə zhɛkwa: «Mahwətə, ghwenemte ntsə ta nci baŋe hɛ kanakɛ ŋkwa tsetsenya.» Ma kwa ghwenemte ntsə ta nci Mahwətə ne, newe ke hɛ ne, te tepe ta meleme ta ka Samari hɛ.

²¹Ma kwa nakɛ ka sewajɛ nyighɛ meghea ka Israyɛl ne, pa ka'yɛwe va Ɛlizɛ: «Yita yawe, mbeli kampə hɛ na?»

²²Ma ke Ɛlizɛ: «Ewə, mpəma hɛ yɛ ma. Ghalanza ne, mpə mpə mbeli nyi keseke na kamava le kafayɛ keɗema le gwecɛ se hwa mpa na? Ma tsetse ŋkɛ, menave nda mə wəshi kezeme le wəshi kesa ke hɛ, nda pelakɛ hɛ yɛ kazhɛne geva hɛ kalə sha meghea nci.»

²³Pa meghea ka Israyɛl menete nda wəshi kezeme kwele kwele ke hɛ. Ma kwa zehwe wəshi hɛ kasahwe wəshi ne, pa sərəakɛ hɛ kazhɛne geva kalə sha meghea ka Siri. Se mɛa vəa shɛ ne, ma ka sewajɛ ka Siri nyi keɗa ŋkwa ghalanza ne, pa hɛ sərəakɛ ŋkeɗe hɛɗia ka Israyɛl.

²⁴Ma te kwete və ne, pa meghea ka Siri, Bɛn-Hadad tsenete ka sewajɛ kalə kazehwe Samari.

²⁵Pa ma menete geva kwele kwele mbe meleme. Pa mbeli nyi kezehwe melemea shɛ fɛake wəshi kedzembe, ghəa kwara kwetɛŋe ne, kapa mbeli gare deghesemsə dəɓərə, gasle kiləwəa dədə ne, kapa mbeli kadəɓərə mcɛfe.

²⁶Ma te kwete veci ne, ntake meghea ka Israyɛl kadzeghwa dzeyi te zli. Ma ke kwete male tsate lewela: «Kemanakɛ ɗa meghe yawe!»

²⁷Ama ma ke meghe zhɛnete nda: «Ma keɗema Mahwətə kekemanakɛ ŋa ne, tsema nza 'ya kakemanakɛ ŋa wa? Wəsə shɛ ketene, ya ha, ya tɛ ŋkɛ we.»

²⁸Ma ke meghe shɛ zhɛkwa: «Wa yaɗe na wa?» Ma ke malea shɛ: «Kenakɛ male nya na tse yi? Ma ke sha 'ya: ‹Zehwe ɓə wəzege ta ŋa, nda zeme ŋa ɗa mə hendɛ.›

²⁹Pa ghen'yɛ tahwe wəzege ta ɗa kazehwe. Ama te hendɛ ta ŋkwa, ma 'ya shɛ: ‹Ndeke ɗa wəzege ta ŋa kezha zeme mə gɛ.› Ama nahe ŋkɛ kewəfərəakɛ ŋkɛ.»

³⁰Ma kwa fa meghe kaɓela nda ghena shɛ male nyagha, pa ŋkwahemte lekwesa ta ŋkɛ. Ma mbe dzeghwa ŋkɛ dzeyi te zli ne, pɛtɛ mbeli kanewe newe behwe bəzə kənəa meghe.

³¹Kɛake meghe te lewela: «Pa Shala mtsehete ɗa yaka kwele ma kehɛ Ɛlizɛ, wəzege ta Shafat le ghə mɛa geva ta ŋkɛ ɓeshi.»

³²Pa Ɛlizɛ menete tsene le mbelia jama nyi mbe meleme ki ghɛa ŋkɛ, pa meghe ghwenakɛ wəndə. Ama nda tese wəndə nya ne, nahe Ɛlizɛ kegezete nda ke mbelia jama: «Nahe yɛ keɗepe na! Wa nya nde mpə ŋkwa nya keghweneke wəndə kezha sla ghə te 'ya. Ntsehwele mə: ma kese wəndəa shɛ ne, ŋzlete mə cɛ fɛake mə kedzembe. Bandanyɛ, mbe fa gaka ta wəndə nya kesleke mbeli kase kwa sebe ta ŋkɛ.»

³³Mba Ɛlizɛ kageze ghena nda se nde ghwene ta meghe nyagha kageze: «Mahwətə nde keleke ɓəmə ndiremi nya! Wa wəsə nya zəzə 'ya kateve ɗa Mahwətə zhɛkwa wa?»