Read KapsikiDC 2 Ka Meghea Kɛfi 9 Bible Online

2 Ka Meghea Kɛfi 9 - KapsikiDC bible

2 Ka Meghea Kɛfi 9

¹Ma te kwete hɛ ne, pa nde mɛ ŋkwa Ɛlizɛ hekate kwete mempɛhweta hwa wəvəsəa ka mɛ ŋkwa ta Shala, ma ke shɛ: hite geva, «Kelete wəbəzli n'yi nya, shɛ na lə kadzeme Ramot te hɛɗia Gala'ad.

²Katelə na sha Zhɛhə, wəzege ta Zhozafat shia Nimshi pelɛagha. Pa hekate na shave hwa ka mandalahɛnyɛ kadzembe ŋayɛ le mbe cɛ te kwete ŋkwa.

³Katekele tereme ta n'yi na ba'a katesheke ŋkɛ na kənəa ghəa ŋkɛ, ma pa na sha tegeze: Ma ke Mahwətə: ‹'Ya kave ŋa tekeleke kameghea ka Israyɛl!› Ma kwa sebe ta ŋkɛ ne, pa na pelemte cɛ kahwɛ ŋa kahe kahe.»

⁴Cape nde mɛ ŋkwa nya kamempɛhweta nyagha kalə kadzeme Ramot te hɛɗia Gala'ad.

⁵Ma nda ntsehe ŋkɛ ne tetsene mbelia jama ta ka sewajɛa ka Israyɛl. Ma ke nde mɛ ŋkwa nya kamempɛhweta: «Wəndə nya te ghə, ghena ya va 'ya kezha gha!» Ma ke Zhɛhə shɛ: «Kezha nyama wəndə hwa ghen'yɛ wa?» -- «Kezha gha meghe», a ke nde mɛ ŋkwa shɛ.

⁶Pa Zhɛhə sate te ŋkwa ba'a begheghe ŋkɛ kadzeki ghɛ. Pa nde mɛ ŋkwa kasheke n'yi kənəa ghəa ŋkɛ, ma ke shɛ: «Wa nya ghena nya geze Mahwətə nya: 'Ya kave ŋa tekeleke kezha nza na kameghea mbelia ɗa, ka Israyɛl.

⁷Gha nde tempə mbelia ghɛa Akab, nde sleke ŋa nya vəashi. Tsetse tewa ghena ta ka mɛ ŋkwa ta ɗa 'ya le kweci ka mene slene ta ɗa nyi mpəmte Zhɛzabɛl.

⁸E'e, pɛtɛa mbelia ghɛa Akab kampə. Pɛtɛ tezamte zhili nyi ki ghɛa ŋkɛ 'ya, ka mavashi le mbelia nyi waɗe.

⁹Katemene nda 'ya ke ghɛa ŋkɛ kala nya menete nda 'ya ke ghɛa Zhɛrobowam, wəzege ta Nebat, ba'a kala ŋa Basha, wəzege ta Ahiya.

¹⁰Ma Zhɛzabɛl le ŋa nta ne, wəndə shɛ katela ŋkɛ we, kwa nza ŋkɛ ne, katezeme kelɛa keti mbe wəvea Zhizrɛyɛl.» Kwa sebe ta ŋkɛ, pa nde mɛ ŋkwa pelemte cɛ ba'a hwɛnyɛ.

¹¹Ma kwa shave Zhɛhə sha kweci ka jama jama ta ka sewajɛa meghe ne, ma ke hɛ 'yɛwete ve: «Wa nde menete geva wa? Wa yaɗe gezhi nya le gha wa?» Ma ke Zhɛhə: «Wəsə we. Nahe yɛ keɗepe mbeli nyi ba'a ghena nyi geze hɛ.»

¹²Ma ke kweci mbeli shɛ: «Tseŋwəa ŋa! Gezete n'yɛ ghena nya gezete ŋa shɛ ŋkɛ.» Ma ke Zhɛhə sha hɛ: «Wa nya ghena nya gezete ɗa Mahwətə nya: ‹'Ya kave tekeleke kezha nza na kameghea ka Israyɛl!›»

¹³Taghanyɛ, pa mbelia jama ta ka sewajɛ seɗemte lekwesa ta nci kabeteyi nda yitea seɗa ta ŋkɛ, pelɛ te ghəa taŋa nyi dzeme mbeli te ne, ntake mbeli kavɛ tereme, mbeli pɛtɛ katsa lewela: «Nza hɛa meghe Zhɛhə biyake!»

¹⁴Ma mbe vəa shɛ ne, Yoram nya kameghe hɛ le ka sewajɛa pɛtɛa ka Israyɛl ne, mbe hɛ kaɗe kaya meleme ta Ramot te hɛɗia Gala'ad, va Hazayɛl meghea ka Siri. Ama mbe mpa shɛ ne na ka Siri keɗakɛ Yoram le zhi, pa ŋkɛ lə kadzembe Zhizrɛyɛl kezha mpi zhia ŋkɛ. Pa Zhɛhə, wəzege ta Yoshafat, shia Nimshi heɗeyite ŋkwa yitea Yoram. Ma ke sha kweci mbelia jama ta ka sewajɛ: «Ma kenza nde kayɛ ŋa ɗa yɛ ne, wəndə shɛ kalə kageze mbe Zhizrɛyɛl wəsə nya kemenete geva nya teke we.»

¹⁶Ma kwa sebe ta ŋkɛ ne, pa Zhɛhə dzeme wəmata gədəwəa ŋkɛ kalə kadzembe Zhizrɛyɛl. Meɓelahe Yoram te gezle ta ŋkɛ, na Ahaziya meghea ka Zhəwda kese kanjiŋwe.

¹⁷Ma wəndə keya ŋkwa nya pelɛ ghəa ŋkwa mbe Zhizrɛyɛl ne, pa nakɛ wəvəsəa mbeli nyi kebeghe Zhɛhə kase. Pa geze nda ke meghe Yoram: «Wa nya 'ya kenakɛ wəvəsəa mbeli kase.» Ma ke Yoram shɛ: «Ghwenakɛ wəndə le gədəwə kalə ka'yɛwe va hɛ, kenza nde le kwelɛŋe se ta nci.»

¹⁸Pa nde gədəwə lə kabegeme le Zhɛhə. Ma ke shɛ: «Kwelɛŋe yakeleke yɛ na?» Ma ke Zhɛhə shɛ: «Wa ghena ta ŋa hwe wa? Dzeyi kwa sebe ta n'yɛ!» Ma ke nde ya ŋkwa: «Nahe nde ghwenea shɛ kentsehe sha hɛ ne, ama kese kazhɛne geva kase we.»

¹⁹Pa Yoram ghwenakɛ kwete nde gədəwə kakwa bake sha hɛ. Ntake wəndə nyagha ka'yɛwe va hɛ: «Kwelɛŋe yakeleke yɛ na?» Ma ke Zhɛhə zhɛnete nda: «Wa ghena ta ŋa hwe wa? Dzeyi kwa sebe ta n'yɛ.»

²⁰Ma ke nde ya ŋkwa zhɛkwa: «Nahe wəndəa shɛ kentsehe yitea hɛ ne, ama kese kazhɛne geva kase zhɛkwa perə we. Bandanyɛ ne, nahe 'ya keɗepe Zhɛhə shia Nimshi le hwelefe ta zleɗe wəsəa ŋkɛ nya zleɗe ŋkɛ gezhi gezhi.»

²¹Pa meghe Yoram gezete nda ke mbeli kahi nda wəmata gədəwəa ŋkɛ, pa dzeme kantishɛ. Pa Ahaziya meghea ka Zhəwda dzemenyɛ perə. Cape hɛ kalə kabegeme le Zhɛhə takwa yitea wəve nya kese kaŋa Nabot mbe Zhizrɛyɛl.

²²Ma kwa kekave Zhɛhə Zhoram ne, ma ke shɛ: «Kwelɛŋe yakeleke na na Zhɛhə?» Ma ke Zhɛhə zhɛnete: «Tsema 'yɛwe na va 'ya kala nya wa? Nahe na keɗema mba meyɛ ŋa Zhɛzabɛl kahawe va wəshi nyi zhɛrete mbeli kashala ba'a kamene ghwɛ.»

²³Pa Yoram zhɛrete geva kahwɛ le lewela kageze nda ke Ahaziya, ma ke: «Ntsehwele, Ahaziya! Nda nahe na kepamte ɗa gɛ!»

²⁴Pa Zhɛhə penakete rəgi ba'a hekɛ Yoram mbe hate le have, canjala'a have jive mbe geva ta ŋkɛ. Pa Yoram teɗenyɛ kadzawa hwəa wəmata gədəwəa ŋkɛ, mtiwə ŋkɛ kwa.

²⁵Ma ke Zhɛhə ɓiyitsa sha wəndə kwelea ka sewajɛa ŋkɛ Bidkar: «Kelete wəndə kemte mtea ŋkɛ negheyi kwa mbe wəvea Nabot nde Zhizrɛyɛl! Nahe ghəa ŋa keza yitea ŋele nya ŋelete Akab Mahwətə, vəa ŋkwa nya se mə kwa sebe ta ŋkɛ kazleɗe wəmata gədəwə kabeghe ŋkɛ na?

²⁶Ama, ke Mahwətə shɛ: ‹Nahe 'ya kenakɛ mbeɗa, nda mpəmte yɛ Nabot na le ŋwalea ŋkɛ. Yawa, 'ya Mahwətə, kate'yɛ ŋa 'ya teke mbe wəvea ŋkɛ nyagha shɛnyɛ!› Ma ke Zhɛhə mtsehete: Vatse gɛ, kelete wəndə kemte mtea Yoram negheyi mbe wəve nya kala nya gezete Mahwətə.»

²⁷Ma kwa nakɛ wəsə nya kemenete geva Ahaziya meghea ka Zhəwda ne, tereŋe te hwɛ kambale ghəa ŋkɛ laka Bɛt-Gan. Tereŋe Zhɛhə yite kakeka, pa gezete nda ke mbelia ŋkɛ kezha peslekɛ hɛ perə. Pa hɛ ɗamte Ahaziya le zhi shɛ ŋkɛ kazleɗe wəmata gədəwəa ŋkɛ kadzeme laka Gəwr takwa yitea Iblɛyam. Ama nahe Ahaziya kehwɛ hwa'a mbe Mɛgido, mtiwə ŋkɛ mbe.

²⁸Pa mbelia ŋkɛ nyi kemene nda slene keleghe wəndə kemte mtea ŋkɛ pelɛ wəmata gədəwəa ŋkɛ kadzembe Zhɛrəzalɛm. Pa hɛ lamte kwa kwele ta ka shihɛnyɛ mbe meleme ta David.

²⁹Ma nda kelete meghe Ahaziya mbe Zhəwda ne, te kwa meŋe kwetɛŋeghəmbe ta va ta Yoram wəzege ta Akab kameghea ka Zhəwda.

³⁰Ma kwa fate pɛtɛa wəshi nyi kemenete geva Zhɛzabɛl ne, pa nde ɗaheyite wəsə kwa ŋkereyi yitea ntsə ba'a pesakɛ geva megela. Ma kwa se Zhɛhə kadzembe Zhizrɛyɛl, pa nzanyɛ mɛa wəfela ta cɛ.

³¹Ma kadzeki Zhɛhə kwa mɛ degha ta meleme ne, ma ke sha lewela: «Tsema na gɛ hwelefe ta Zimri, nde pesle meghea ŋkɛ?»

³²Pa Zhɛhə kanewe ŋkwa laka wəfela shɛ, ma ke: «Wa yanza ghen'yɛ le wa? Wa wəndə wa?» Bake keɗema mahekene mbeli nyi kemene slene ki ghɛa meghe zhɛrete geva laka wəfela.

³³Pa geze nda ke hɛ kanegha ŋkɛ kadzawa te hɛɗi. Pa hɛ negheyi kwake, ŋkisə mimia nta vare zli ba'a te yɛ gədəwəa lɛmə. Pa Zhɛhə mberɛɗɛmte le wəmata gədəwəa ŋkɛ.

³⁴Pa Zhɛhə dzeki ghɛa meghe, kazehwe wəsə, kasahwe wəsə. Ma ke sha mbeli nyi tagha: «Ma male kwa bezla bezla nya ne, wəzha ta meghe nde, kelete mə lamte mə.»

³⁵Pa hɛ lə katela, ama deke 'yɛ'yɛa ghəa nta ba'a yɛ dzeve le yɛ seɗa ta nta yasləyi hɛ.

³⁶Pa hɛ se kagezete nda ke Zhɛhə, ma ke: «Ghena shɛ yagezete Mahwətə laka mɛa Ɛlizɛ nde mɛ ŋkwa, mbe Tishebɛ, kwa geze ŋkɛ: ‹Kelɛa keti nde zeme geva ta Zhɛzabɛl ke mbe wəvea Zhizrɛyɛl.

³⁷Ma nyi ketene bela ta geva ta nta ne, kala dədə tenza hɛ mbe wəvea shɛ, wəve nya mbe Zhizrɛyɛl. Tsagha ne, mba mbeli shɛ geze: Nya ne Zhɛzabɛl nde ke hɛ we.›»