Read KapsikiDC 1 Wəshi nyi Mene Ka Meghe 12 Bible Online

1 Wəshi nyi Mene Ka Meghe 12 - KapsikiDC bible

1 Wəshi nyi Mene Ka Meghe 12

¹Ma mbe və nya se David kawəfərə mbe Siklag kezha mbelenyɛ va Sawəl, wəzege ta Kish ne, na kweci mbeli kalə kadzawa shɛ. Hwa ka katsala ka sewajɛ ɓela hɛ mbeli, ɗeke ɗeke hɛ yitea mpa zlaɓe le.

²Rəgi ya va hɛ ba'a yɛ beza pelɛ, wərə hɛ kabezate pelɛ ba'a kahe have le dzeve kwa gwela kala nya le dzeve kwa zeme. Wa nyi mbeli nyi kese nyi se mbe hwelefe ta Sawəl:

³Ahiyɛzɛr nya kameghe, le wəza meghekɛ Yowash, ŋwalea Shɛma nya kande Gibɛya hɛ, yɛ Yeziyɛl le Pɛlɛt nyi kaŋwalea Azmavɛt, yɛ Beraka le Yɛhəw, ka Anatot hɛ,

⁴Ishemaya, nde Gabawon, kwete ŋkɛ hwa ka meghe nyi mbe wəvəsəa mbeli kempa nyi mahekenemsə,

⁵Zhɛrɛmi, Yaziyɛl, Yohanan le Yozabad, se mbe Gedɛra,

⁶Ɛləwzay, Yerimot, Bɛyaliya, Shemariya le Shefatiya, se mbe Harəwf,

⁷Ɛlkana, Isiya, Azarɛl, Yowɛzɛr le Yashobam, hwelefe ta Kora,

⁸ba'a yɛ Yowɛla le Zɛbadiya, ŋwalea Yerowam, nde Gedor.

⁹Nahe kweci mbeli keslə mbe hwelefe ta ka Gad kadzawa sha David te ɓerama nya wəfərənyɛ ŋkɛ. Kweci katsala ka mpa hɛ, nyi keɗepe mpa le gelə ba'a le megha. Kala nivɛrə dzawe dzawea nci, kala kɛme hwa ghweme wɛrewɛa nci.

¹⁰Ɛzɛr ya kameghe, zhɛne Obadiya kadzeyite, nde mahekene Ɛliyab,

¹¹Mishemana nde wəfaɗe, Zhɛrɛmi nde mcɛfe,

¹²Atay nde ŋkwaŋe, Ɛliyɛl nde mberefaŋe,

¹³Yohanan nde deghese, Ɛlzabad nde mesli,

¹⁴Zhɛrɛmi nde meŋe, Makbanay nde meŋe kwetɛŋeghəmbe.

¹⁵Nya ya kaka Gad nyi te ghəa ka sewajɛ. Ma nya ɓɛhwɛ ma hwa hɛ, wərə ŋkɛ kanza te ghəa ka sewajɛ gwəmsə. Ma nya wəba ma, wərə kanza te ghəa ka sewajɛ slibə.

¹⁶Ghenci ka jivenji te hələa Zhəwrdɛŋe te kwa ghate ta tere mbe va, te və nya nza ŋkɛ viɗi pa pelɛ hələ. Pa hɛ ŋkamte pɛtɛa mbeli nyi dzeyi kwelɛ yɛ zlərə laka ŋkwa kesame ta veci ba'a laka ŋkwa kepəkwə ta veci.

¹⁷Pa kweci wəvəsəa mbeli mbe hwelefe ta ka Bɛnjamɛn le ŋa ka Zhəwda lə kanewakɛ David te ŋkwa nya wəfərənyɛ ŋkɛ.

¹⁸Cape David kalə sha hɛ, ma ke: «Ma kenza nde gheyɛ se sha 'ya le kwelɛŋe ba'a kezha kemane ɗa ne, kageze ŋayɛ zayɛ mə le se 'ya. Ama kenza nde kezha pamte ɗa ba'a kezha ncɛ nda ɗa ke ka jaga ta ɗa se yɛ kaɗema 'ya kemenete wəsə nya ndiremi ne, pa Shala ta ka shihɛ ɓəmə neghate fete te ghena shɛ, pa ɗate ŋayɛ!»

¹⁹Ma ɓiyitsa gɛ ne, pa Sefəa Shala dzembe Amasay meghea ka ya ŋkwa, ma ke le berete: «Ŋa ŋa ghen'yɛ le gha nza ghen'yɛ David, wəzege ta Zhɛsɛ! Nza kwelɛŋe kaŋa ŋa ba'a kaŋa mbeli nyi kekemane ŋa va nya nza nde nahe Shala ta ŋa kekemanakɛ ŋa.» Pa David kemaneve hɛ kaveyi hɛ te slene hwa ka meghea ka sewajɛ.

²⁰Pa kweci mbeli mbe hwelefe ta Manasɛ jikəyite geva yitea David te və nya jikəte geva ŋkɛ le ka Filisti yitea mpa le Sawəl. Ama kese yɛ David le mbelia ŋkɛ kakemane ka Filisti kaganda we, va nya nza nde kwa ntishɛ ka meghea ka Filisti, nahe hɛ kezhɛnaghe hɛ. Ma ke hɛ: «Katejikə geva David le wəndə nya kesleke ghalanza kapamte ɓə ve.»

²¹Ma kwa slə David kadzawa Siklag ne, pa kweci mbelia Manasɛ jikəte geva le: yɛ Adna, Yozabad, Ɛlihəw le Siletay, ka meghe nyi te ghəa ka sewajɛa Manasɛ.

²²Kaka katsala kempa se hɛ ba'a kakemane mbelia David hɛ. Pa hɛ zhɛrenji kaka meghe te ghə ka sewajɛa ŋkɛ.

²³Keveci keveci se mbeli kadzehwa wəvəsəa ka sewajɛa David kakemane. Ma tsagha, kwele kwele mbakete geva ka sewajɛa ŋkɛ kala ka sewajɛa Shala.

²⁴Wa nyi ɓela ta mbeli nyi wərə mpa nyi, nyi kejikəte geva le David kwa Hɛbron kezha ve nda meghea Sawəl kala nya gezete Mahwətə:

²⁵Hwa hwelefe ta Zhəwda, ka sewajɛ 6.800 nyi le gelə ba'a le megha.

²⁶Hwa hwelefe ta Simɛyon, 7.100 ka katsala kɛfia ka sewajɛ.

²⁷Hwa hwelefe ta Lɛvi, zhili 4.600,

²⁸ba'a Yoyada, meghe nya kwa yita ta yɛ Aron le kweci zhili 3.700.

²⁹Tagha Sadok nya kamempɛhweta kakwete katsala kempa le ka meghe bakemsə bakeghəmbe, nyi te ghəa mbeli kwa yita ta ŋkɛ.

³⁰Hwa hwelefe ta Bɛnjamɛn, hwelefe ta Sawəl le ghəa ŋkɛ, zhili 3.000. Kwele ma nyi kese kamene nda slene ke ka hwelefefia Sawəl pa te vəa shɛ.

³¹Hwa hwelefe ta Ɛfrayim, 20.800 ka katsala kempa, pɛtɛ kambeli nyi nza zləvə te hɛ mbe hwelefe ta nci.

³²Hwa bela ta hwelefe ta Manasɛ nyi laka ŋkwa kepəkwə ta veci, zhili 18.000 nyi tsehave hɛ mbeli təhə kezha veyi David kameghe.

³³Hwa hwelefe ta Isakar, gwəmsə bake ka meghea ka sewajɛ le mbeli nyi sleke hɛ, mbeli nyi keɗepe newe, te nyama və ba'a tsema tsema hi ka Israyɛl kamene ghena.

³⁴Hwa hwelefe ta Zabəlon, 50.000 ka sewajɛ nyi tekete nda mpa mbeli ke hɛ, nyi ɗeke ɗeke yitea dzemte mpa le yayata wəsə kempa ba'a nyi kempa jikə kanya kwetɛŋe.

³⁵Hwa hwelefe ta Nɛftali, slibə ka meghea ka sewajɛ le ka sewajɛ 37.000 nyi nza gelə le megha va hɛ.

³⁶Hwa hwelefe ta Dan, 28.600 ka sewajɛ nyi ɗeke ɗeke yitea mpa.

³⁷Hwa hwelefe ta Asɛr, 40.000 ka sewajɛ nyi tekete nda mpa mbeli tiɗiɗi ke hɛ, nyi ɗeke ɗeke perə yitea mpa.

³⁸Hwa kweci hwelefefia yɛ Rəbɛn, ŋa Gad ba'a bela ta hwelefe ta Manasɛ, nyi laka ŋkwa kesame ta veci yitea Zhəwrdɛŋe, 120.000 zhili nyi nza pɛtɛa wəshi kempa va hɛ.

³⁹Pɛtɛ mbeli kempa nyi ɗeke ɗeke nyighɛ yitea mpa kedzawa Hɛbron le wənə kwetɛŋe kaveyi David kameghea pɛtɛa ka Israyɛl. Pɛtɛ kweci ka Israyɛl keyɛte kave nda meghea shɛ mbeli.

⁴⁰Hɛ mahekene menete hɛ tagha le David kazeme wəshi ba'a kasa wəshi kwa nza nde nahe kweci mbelia nci ketakɛ nda wəshi ke hɛ.

⁴¹Ɓiyitsa, pa le kweci mbeli nyi dekwede yitea hɛ vaŋe va Isakar, Zabəlon le Nɛftali kakele nda wəshi te kwara lɛmə, zlegwemə, gədəwə kwara lɛmə ba'a te sla ke hɛ: hə, gatewe nya takɛ mbeli le ya ta dasekwa, rɛzɛŋe keghwele ghwele, tɛ, le yɛ n'yi. Pa le yɛ sla le timɛti kese nda hɛ, kwa nza ŋkɛ zlama ya shɛ te hɛɗia Israyɛl.