Read KapsikiDC 1 Wəshi nyi Mene Ka Meghe 14 Bible Online

1 Wəshi nyi Mene Ka Meghe 14 - KapsikiDC bible

1 Wəshi nyi Mene Ka Meghe 14

¹Pa Hiram, meghea ka Tir ghweneghe nda mbeli ke David. Pa ŋkɛ fəave nda sheghwəa lekeleke ba'a ghweneghe nda mbeli nyi ketsehe pelɛ ba'a ka mene slene ta sheghwə kezha ŋa nda ghɛ meghe.

²Nahe David keɗepete Mahwətə nde veyi ŋkɛ kameghea ka Israyɛl ba'a nde vate zləvə te meghea ŋkɛ kezha ka Israyɛl, mbelia Shala.

³Pa David wəmeve kweci mi mbe Zhɛrəzalɛm, pa yake ŋwale tezhili le ŋwalea kwɛ sawa hwa hɛ.

⁴Wa nyi sləa ŋwale tezhilia ŋkɛ nyi, keya nyi pelɛ Zhɛrəzalɛm: Shaməwa, Shobab, Natan, Salomon,

⁵Ibar, Ɛlishəwa, Ɛlpɛlɛt

⁶Noga, Nɛfɛg, Yafiya,

⁷Ɛlishama, Bɛyɛliyada, ba'a Ɛlifɛlɛt.

⁸Pa ka Filisti fate na mbeli keveyi David kameghea pɛtɛa ka Israyɛl, ma tsagha ɓiyitsa, cape hɛ pɛtɛa nci kadzeme kaghweze. Pa David fate, cape ŋkɛ kalə kezha begeme le hɛ.

⁹Pɛkwe ka Filisti, cape hɛ kampə ŋkwa kwa zlərəa ka Refay.

¹⁰Ma ke David 'yɛwakɛ ghena va Shala: «Lə 'ya kampa le ka Filisti na? Kateve hɛ na mbe dzeve ta ɗa na?» Ma ke Mahwətə shɛ: «Kwiɗi, kateve hɛ 'ya kadzembe dzeve ta ŋa!»

¹¹Pa ka Filisti lə kadzembe Ba'al-Perasim, ŋkwa nya ɗate hɛ David te. Ma ke David: «Laka 'ya, na Shala keŋeyi ŋkwa fawe kala ŋkwa nya ŋa ghwa nya kehwɛ jive te tepe ta ka jaga ta ɗa nyi pate geva.» Tagha se ŋkɛ nda ndeke nda sləa Ba'al-Perasim mbeli ke ŋkwa shɛ.

¹²Pa ka Filisti sərəakɛ wəshia nci nyi zhɛrete hɛ kala shala te ŋkwa shɛ. Pa David gezete nda ke mbelia ŋkɛ kezha teremte wəshia shɛhɛ.

¹³Pa ka Filisti dzawa zlərəa Refay zhɛkwa kakelehwe ŋkwa nya kwa.

¹⁴Pa David 'yɛwakɛ va Shala zhɛkwa, ma ke Shala shɛ: «Mba na kegha nda mpa ke hɛ se kwa sebe! Zhɛrete geva dzeyi sebe nda hende geva na kave nda mpa ke hɛ se laka kema ta yɛ weɗɛaka.

¹⁵Ma kefate gaka ta seɗa na pelɛ ghəa yɛ weɗɛaka ne, ve nda mpa ke hɛ kahe kahe, kwa nza ŋkɛ ma mbe vəa shɛ ne, te kema ta ŋa 'ya kezha ɗa ka Filisti.»

¹⁶Pa David menete kala nya gezete nda Shala, pa ɗate ka Filisti ba'a kekate hɛ se mbe Gabawon hwa'a mbe Gɛzɛr.

¹⁷Se te vəa shɛ, na zləvəa David kedzemte pa mbe yayata hɛɗi, na Mahwətə kezhɛrete kaghazlənə mbeli ve mbe yayata hwelefe.