Read KapsikiDC 1 Wəshi nyi Mene Ka Meghe 18 Bible Online

1 Wəshi nyi Mene Ka Meghe 18 - KapsikiDC bible

1 Wəshi nyi Mene Ka Meghe 18

¹Ma kwa sebe ta ŋkɛ ne, pa David ɗate ka Filisti kapate nda hawe ke hɛ. Pa kelehwe meleme ta ka Gat va hɛ le kweci meleme nyi ɓɛhwɛ ɓɛhwɛ nyi dzeyi yite.

²Pa ɗate ka Mowab perə, pa hɛ zhɛrenji kambeli nyi sleke ŋkɛ kaŋki nda jaɓeregwale

³Pa ŋkɛ zhɛne kaɗate Hadadɛzɛr meghea ka Soba, nya te hɛɗia ka Siri. Pa va hɛɗia ka Hamat hɛɗia ŋkɛ, te və nya ɗe Hadadɛzɛr kakele bela ta hɛɗia Efrate.

⁴Pa David fəhwe wəmata gədəwəa ŋkɛ slibə, kakesehwe ka zleɗe gədəwəa lɛmə 7.000 kamava ba'a ka sewajɛa Hadadɛzɛr nyi le seɗa 20.000. Pa sərəakɛ gədəwə kentsehe wəmata gədəwə gwəmsə kaŋa ŋkɛ, ama pɛtɛ tsaslemte ŋeli yitea kweci gədəwə.

⁵Pa ka Siri nyi laka Damas se kakemane Hadadɛzɛr, meghea ka Soba. Pa David ɗate hɛ perə kampəmte mbeli yitea hɛ 22.000.

⁶Pa veyi ka meghe te ghəa nci le ɗema ta nci, mba ka Siri kambeli nyi kepele ghə yite, kaŋki nda jaɓeregwale. Tsetse ndeke nda hərə ŋkwa Mahwətə ke David mbe mpa nyi se ŋkɛ kamene pɛtɛ.

⁷Pa David fəhwe gelə mze kwa tere tere nyi va ka sewajɛ nyi keya Hadadɛzɛr ba'a fəghe hɛ kadzeme Zhɛrəzalɛm.

⁸Pa fəte mze kwa tɛawetɛa kwele kwele se mbe Tibat ba'a mbe Kəwn, meleme bake te hɛɗia Hadadɛzɛr. Temə kwetere wəmbəa ŋkɛ, pa Salomon menehwe slene le mzea shɛ kezha gezla dəghwə nya wəba taghele ghele le yɛ selə ba'a wəshi kemene slene nyi menete mbeli yitea mze mbe ghɛa Mahwətə.

⁹Pa Towə, meghea ka Hamat fate nahe David kempəmte ka sewajɛa Hadadɛzɛr, meghea ka Soba pɛtɛ.

¹⁰Pa ghwenakɛ wəzege ta ŋkɛ Hadoram kanjiŋwe David ba'a katsa nda same mbe mpa nya hərəte Hadadɛzɛr ŋkɛ. Va nya nza ŋkɛ ne, nde ghema ta Towə Hadadɛzɛr. Pa Hadoram fəghe nda wəshi kwa mze kwa tere tere, kwa mze kwa ghwə ghwə le kwa mze kwa tɛawetɛa.

¹¹Pa meghe David veyi hɛ kaŋa Mahwətə, kala nya menete ŋkɛ le mze kwa ghwə ghwə ba'a mze kwa tere terea kweci meleme nyi fəhwe ŋkɛ, kala ka Ɛdom, ka Mowab, Amon, Filisti le ka Amalɛk.

¹²Pa Abishay nya nza sləa meghekɛ kaSerəwya ɗate ka Ɛdom kwa zlərə nya nza Ghwene kwa mpəmte mbeli ŋkɛ slibə 18.000 hwa hɛ.

¹³Pa David veyi ka meghe te ghəa nci le ɗema ta nci, cape ka Ɛdom kapele ghə yitea hɛ. Tsetse ndeke nda hərə ŋkwa Mahwətə ke David mbe yayata mpa nyi se ŋkɛ kampa.

¹⁴Te ghəa pɛtɛa ka Israyɛl nza David kameghe. Ghwə nya le hweŋkwa tiɗiɗi yameha ŋkɛ te mbelia ŋkɛ.

¹⁵Zhowab, Serəwya sləa meghekɛ, gheŋkɛ ya kameghea ka sewajɛ. Yoshafat, wəzege ta Ahiləwd, ya kande geze ghena ta meghe.

¹⁶Sadok, wəzege ta Ahitəwb, le Ahimɛlɛk, wəzege ta Abiyatar ya kaka dzeghe Shala. Shavesha ya kande rafe wəshi.

¹⁷Benaya, wəzege ta Yoyada, ya te ghəa ka Krɛte ba'a ka Pɛlɛt nyi keya ghɛa meghe. Ŋwalea David perə ne, mbelia jama hɛ yite.