Read KapsikiDC 1 Wəshi nyi Mene Ka Meghe 19 Bible Online

1 Wəshi nyi Mene Ka Meghe 19 - KapsikiDC bible

1 Wəshi nyi Mene Ka Meghe 19

¹Ma temə kwa sebe ta ŋkɛ ne, pa Nahash, meghea ka Amon mtenyɛ, pa wəzege ta ŋkɛ kelete meghe te ŋkwa ŋkɛ.

²Ma ke David mbe ghəa ŋkɛ: «'Ya katemene nda ganyɛ ke Hanəwn kala yitenyɛ Nahash le ndeɗea mehele, kala nya menete ɗa yitenyɛ perə.» Pa ghwenakɛ kweci hwa mbelia ŋkɛ kanjiŋwe Hanəwn va mte ta yitenyɛ. Pa ka ghwene ta David ntsehe te hɛɗia ka Amon.

³Ama ma ke mbeli nyi te ghə mbe Amon sha Hanəwn: «Ma zəzə na ne, deke kezha njiŋwe ŋa va mte ta yiteyɛ ŋa ghweneke mbelia ŋkɛ David na? Ashɛ kezha newemte meleme ta ŋa kwa dzeghwa hɛ mbe, kezha kelehwe te kwete hɛ wəka?»

⁴Ma tsagha gɛ, pa Hanəwn keseve ka ghwene ta David: pa ŋsəmte ghwɛmɛa nci, slamte lekwesa ta nci ghala zeweve ba'a ŋkamte hɛ.

⁵Cape hɛ dzeghwanji. Pa mbeli gezete nda wəsə nya menete nda mbeli ke mbelia jama ta ŋkɛ ke David. Pa ghweneghe nda mɛ ke mbeli nyi te ghə nyi yite, ma ke sha hɛ: «Nza ŋayɛ mə kwa Zhɛriko pa te və nya tepese ghwɛmɛa ŋayɛ zhɛkwa nda tesame yɛ», ke sha hɛ.

⁶Nahe yɛ Hanəwn le ka Amon kefate nahe wənəa David keɗema ghena nya menete hɛ. Tagha gɛ, pa hɛ ŋkikɛ kakiləwəa mze kwa ghwə ghwə mahekenemsə kezha ŋ'wete kemane ta ka Siri nya pelɛ Ghəa Mɛzopotami, le ka Ma'aka ba'a le ka Soba, le yɛ wəmata gədəwə ba'a ka zleɗe gədəwəa lɛmə.

⁷Pa hɛ ŋ'wete wəmata gədəwə 32.000, pa hɛ ŋkikɛ nda wəsə nya menete nda megha ka Ma'aka le ka sewajɛa ŋkɛ ke hɛ. Cape hɛ lə kanzanji le ghweɓea nci terasle yitea Mɛdeba, ama ka Amon le ŋa nci, nahe hɛ ketsenete geva yitea mpa kwa shavenji hɛ mbe meleme ta nci.

⁸Ma kwa fate David ne, pa ghwenakɛ Zhowab, wəndə kwele nya te ghəa ka sewajɛ ba'a ka katsala kɛfia ka sewajɛ kalə kadzete ŋkwa shɛ.

⁹Pa ka Amon lə kanderete geva yitea mpa mɛa ŋkwa kedzembe wədəa meleme ta nci. Ma ka meghe nyi kese kezha kemane hɛ, te kwete ŋkwa hite geva hɛ hwa gamba.

¹⁰Nahe Zhowab keɗepete bake veyi nda geva ghweɓea mbeli kempa. Te kema kwete ve, kwetere wəmbə kwete. Pa tsehave ka sewajɛa ka Israyɛl nyi ghyana kaveyi hɛ kwa kema ta ka Siri.

¹¹Pa ŋkɛ ndeke nda nyi ketene ka sewajɛ ke wəza meghekɛ Abishay kaveyi hɛ laka kema ta ka Amon.

¹²Ma ke sha wəza meghekɛ: «Ma kendakɛ ɗa berete ka Siri ne, nda se na kaya ɗa. Ama kenza nde ka Amon ndakɛ ŋa berete ne, 'ya nde telə kaya ŋa.

¹³Nza le ntsə geva, mpa ɓə mpa le ntsə geva kezha mbelia ɓə ba'a kezha meleme ta Shala ta ɓə. Menete Mahwətə kala nya nakɛ ŋkɛ megela.»

¹⁴Ntake yɛ Zhowab le mbelia ŋkɛ kahende geva yite mpa le ka Siri. Kweracɛ ka Siri nyighɛ hwɛnji mbe kema ta ŋkɛ.

¹⁵Ma kwa nakɛ ka Amon na ka Siri kehwɛnji ne, pa hɛ hwɛnji perə mbe kema ta Abishay wəza meghekɛa Zhowab, kadzembe meleme ta nci. Ma tagha ɓiyitsa, pa Zhowab zhɛreghe geva kadzeme Zhɛrəzalɛm.

¹⁶Ma kwa nakɛ ka Siri nahe ka Israyɛl keɗate hɛ, pa hɛ ghweneghe mbeli katsene kweci mbelia nci nyi kenzanji pelɛ kwete kema ta Efrate. Shofak ya te ghəa ka sewajɛa Hadadɛzɛr.

¹⁷Pa David fate. Pa tsenete ka sewajɛa ka Israyɛl kajive te Zhəwrdɛŋe, kambakete dzeghwa kalə sha hɛ, kaŋ'wete ŋkwa kenza dekwede yitea hɛ. Pa tseɓate mbelia ŋkɛ ke zəɗə ke zəɗə yitea mpa kwa kema ta ka Siri. Cape ka Siri kagha mpa.

¹⁸Ama pɛtɛ hɛ hwɛnji va ka Israyɛl. Pa yɛ David le mbelia ŋkɛ mpəmte mbeli nyi le wəmata gədəwə 7.000 ba'a mbeli nyi le seɗa 40.000, pa hɛ peslekɛ Shofak, wəndə kwelea ka sewajɛ.

¹⁹Ma kwa nakɛ ka meghe nyi kese mbe dzeve ta Hadadɛzɛr nahe ka Israyɛl keɗate hɛ pɛtɛ ne, pa hɛ jikəte geva le David kaɗema mpa shɛ ba'a kaveyi geva mbe dzeve ta ŋkɛ. Se te vəa shɛ, mba ka Siri kaɗe kakemane ka Amon we.