Read KapsikiDC 1 Wəshi nyi Mene Ka Meghe 20 Bible Online

1 Wəshi nyi Mene Ka Meghe 20 - KapsikiDC bible

1 Wəshi nyi Mene Ka Meghe 20

¹Ma te vəa nya se kwete va ne, və nya dzemte mpa ka meghe kwa, pa Zhowab nya te ghəa ka sewajɛ, lə kampə ŋkwa te hɛɗia ka Amon. Pa hɛ hite geva kezha ha nda mpa ke meleme ta Raba. Ma David le ŋa ŋkɛ, mba ŋkɛ pelɛ Zhɛrəzalɛm. Ma kwa kelehwe meleme ta Raba Zhowab kampəkawa ŋkwa mbe ne,

²pa David kelehwe derə meghe mze kwa tere tere nya yitea ghə va Molɛk, shala ta ka Amon. Kiləwə mahekenemsə ɗaŋeɗa ta zlavea shɛ ba'a kwete pelɛ nya nza zləvə te ya mbe. Pa David kelehwe kadzeyitea zlave meghea ŋkɛ. Ɓiyitsa, pa fəte kweci wəshi kwele kwele shave mbe melemea shɛ.

³Pa David fəghe mbeli kandeke nda slene berete ke hɛ kaka perawe sheghwə, kaka tsehe pelɛ ba'a kaka mpə wəfe le tseyɛ. Tsagha shɛnyɛ menete ŋkɛ le kweci meleme ta ka Amon pɛtɛ. Kwetere wəmbəa ŋkɛ, pa zhɛneghe geva kadzeme Zhɛrəzalɛm le ka sewajɛa ŋkɛ pɛtɛ.

⁴Ma kwa sebe ta ŋkɛ ne, pa ka Israyɛl have nda mpa ke ka Filisti kwa Gɛzɛr. Mbe nyagha və ne, pa Sibkay, nde Həwsha, peslekɛ Sipay nya kahwelefe ta ka Refay. Pa hɛ hərəte ka Filisti.

⁵Ma hwa kwete mpa shɛ le ka Filisti, pa Ɛlanan nya kawəzege ta Yayir peslekɛ Lami, wəza meghekɛa Goliyat, nde Gat, nya nza geta megha ta ŋkɛ kedekenyɛ kala geta ta tsayɛwa ketsa zlave.

⁶Pa kwete mpa menete geva zhɛkwa mbe Gat. Le kwete sewajɛ shɛ tagha kande jaga kebiyanyɛ. Nahe ŋwalea dzeve kenza ŋkwaŋe te tsagha ŋwalea seɗa, jikə ta nci bakemsə wəfaɗeghəmbe, kahwelefefia Harafa ŋkɛ kala kweci mbelia ŋkɛ.

⁷Ntake ŋkɛ kaŋele ka Israyɛl. Pa Zhonatan wəzege ta Shama nya kawəza meghekɛ David peslekɛ.

⁸Pa ka sewajɛa ka Filisti nyi kahwelefefia Harafa, nde Gat, mpənji hwa mpa va yɛ David le mbelia ŋkɛ.