Read KapsikiDC 2 Wəshi nyi Mene Ka Meghe 11 Bible Online

2 Wəshi nyi Mene Ka Meghe 11 - KapsikiDC bible

2 Wəshi nyi Mene Ka Meghe 11

¹Ma ntsehema ta Robowam pelɛ Zhɛrəzalɛm ne, pa tsenete ka katsala ka sewajɛ nyi te hɛɗia Zhəwda le ŋa ka Bɛnjamɛn 180.000, kezha lə kampa le ka Israyɛl nyi laka bela kwa gwela yitea nza Robowam kameghea nci.

²Ama pa Mahwətə keleke nda ghena ke nde mɛ ŋkwa Shemaya ma ke shɛ:

³«Geze nda ke Robowam, wəzege ta Salomon nya kameghea ka Zhəwda, tsagha ke pɛtɛa ka Israyɛl nyi mbe Zhəwda le Bɛnjamɛn. Ma pa na sha hɛ:

⁴Wa nya ghena nya geze Mahwətə nya: ‹Ləma yɛ kampa le ka kesaka meyɛ ŋayɛ ma. Zhɛne geva yayata wəndəa ŋayɛ kalə sha ghɛa ŋkɛ. Kwa nza ŋkɛ 'ya nde tarete wəshi nyi kemenete geva nyi pɛtɛ.›» Ma kwa fate ghena ta Mahwətə nya hɛ ne, pa hɛ belewəmte mpa le Zhɛrobowam.

⁵Ma kwa sebe ta nya ntishɛnyɛ Robowam mbe Zhɛrəzalɛm ne, pa ŋeyite zli yitea meleme kwele kwele te hɛɗia Zhəwda:

⁶Bɛtelɛhɛm, Ɛtam, Tɛkowa,

⁷Bɛt-Səwr, Soko, Adəwlam,

⁸Gat, Marɛsha, Zif,

⁹Adorayim, Lakish, Azɛka,

¹⁰Sora, Ayalon ba'a Hɛbron. Ma meleme nyi nza nyi zli yite ne, te hɛɗia yɛ Zhəwda le Bɛnjamɛn hɛ.

¹¹Pa ŋkɛ ntəsləte hɛ le zli nyi berete berete, beteyi ka ŋgwamna mbe hɛ ba'a tsenete nda wəshi kezeme, n'yi ba'a tɛ mbe hɛ.

¹²Mbe yayata melemea shɛhɛ perə ne, yɛ gelə le yɛ megha ya mbe hɛ. Te zlaɓa ta meleme kwa berete nyi nda se ŋkɛ kamene berete te ka Zhəwda le ka Bɛnjamɛn.

¹³Pɛtɛ ka dzeghe Shala le ka Lɛvi se te hɛɗia pɛtɛa ka Israyɛl kakemane Robowam.

¹⁴Pa ka Lɛvi slənji te hɛɗia nci shave mbe meleme nyi dzeyi yite kezha dzembe Zhɛrəzalɛm ba'a hɛɗia Zhəwda, kwa nza ŋkɛ mbe fɛa hɛ Zhɛrobowam kemene slene ta dzeghe nda melɛ Mahwətə.

¹⁵Kwa nza ŋkɛ ne, nahe Zhɛrobowam kentave ŋa ŋkɛ ka dzeghe Shala kezha shala tseŋwə nyi hawe mbeli va hɛ hwa kələŋə, nyi menete ŋkɛ kala zhɛfa lɛmə keɗema levea lɛmə.

¹⁶Ma mbeli nyi mbe hwelefefi nyi laka bela kwa gwela, nyi nza zəzə kehawe va Shala Mahwətə ta ka Israyɛl kwa wənəa nci, pɛtɛ senji hɛ kadzembe Zhɛrəzalɛm kwa sebe ta ka Lɛvi kezha ɗepe dzeghe nda melɛ ke Shala Mahwətə ta ka shihɛ nci.

¹⁷Pa hɛ mtsehete nda berete ke hɛɗia Zhəwda ba'a kemanakɛ Robowam, wəzege ta Salomon kakaganda kava mahekene, kwa nza ŋkɛ kadzeghwa ŋkɛ kala ɗe ta yɛ David le Salomon kava mahekene.

¹⁸Pa Robowam wəmeve Mahalat, wəzha ta Yerimot, wəzege ta David. Meghekɛ Abihayil ne, wəzha ta Ɛliyab nya kashia Zhɛsɛ.

¹⁹Pa Mahalat yake nda ŋwale tezhili mahekene, Yɛyəwsh, Shemariya ba'a Zaham.

²⁰Kwa sebe ta nta, pa Robowam wəmeve Ma'aka, wəzha ta Abishalom nya keyake nda ŋwale tezhili wəfaɗe, Abiya, Atay, Ziza ba'a Shelomit.

²¹Za ma ɗe Ma'aka Robowam, wəzha ta Abishalom ke kweci mia ŋkɛ pɛtɛ. Kwa nza ŋkɛ meŋe degheseghəmbe mi nyi kamakwashi ba'a ŋkwaŋemsə mi meghwa. Ŋwale tezhili bakemsə degheseghəmbe ba'a ŋwalea kwɛ ŋkwaŋemsə yave ŋkɛ hwa hɛ.

²²Pa Robowam veyi Abiya wəzege ta Ma'aka kanya kwele ki ghɛa ŋkɛ. Pa ŋkɛ veyi ŋkɛ kameghea ka kesaka yiteyɛa nci, kwa ɗete ŋkɛ kanza ŋkɛ kameghe.

²³Kentsehwele ntsehwele ŋkɛ kezha neheyi kweci ŋwalea ŋkɛ dzeyi mbe meleme nyi le berete mbe Zhəwda le Bɛnjamɛn. Pa ŋkɛ fəave nda wəshi kezeme kwele kwele ke hɛ ba'a 'yɛwete mi kwele kwele kezha hɛ.