Read KapsikiDC 2 Wəshi nyi Mene Ka Meghe 13 Bible Online

2 Wəshi nyi Mene Ka Meghe 13 - KapsikiDC bible

2 Wəshi nyi Mene Ka Meghe 13

¹Ma mbe kwa meŋe degheseghəmbe ta va ta Zhɛrobowam te meghe ne, pa Abiya kelete meghea ka Zhəwda,

²pa ŋkɛ menete va mahekene kameghe mbe Zhɛrəzalɛm. Mikaya sləa meghekɛ, wəzha ta Əwriyɛl nde Gibɛya. Pa yɛ Abiya le Zhɛrobowam kampa.

³Cape Abiya kadzemte mpa le ka katsala ka sewajɛ 400.000. Pa Zhɛrobowam pate ka katsala ka sewajɛ 800.000 yitea mpa.

⁴Tarame Abiya dzemenyɛ pelɛ ghəa ghweme ta Semarayim nya hwa ghweme ta Ɛfrayim, ntake kazlape nda ghena ke yɛ Zhɛrobowam le ka Israyɛl: «Fa mə ghena ta ɗa!

⁵Keɗepe yɛ nahe Shala Mahwətə ta ka Israyɛl, kendeke nda meghe te ka Israyɛl ke David le ka shihɛnyɛ laka jikə geva nya keɗema kanehe wəka?

⁶Ma Zhɛrobowam, wəzege ta Nebat ne, ashɛ kande mene nda slene ke Salomon, wəzege ta David se ŋkɛ, nda ɗema ghena ta nde sleke ŋkɛ ŋkɛ wəka?

⁷Kwa sebe ta ŋkɛ tsenete geva mbeli nyi ɗema zləvə te hɛ, ka ghəa demea kɛfi. Nda kelehwe ŋkwa hɛ va Robowam wəzege ta Salomon, mempɛhweta nya dewə zəzə ve, shaŋe kazhɛne nda ghə ke hɛ.

⁸Ya, ma tsetsenya gɛ, gheyɛ ɗe kazhɛne nda ghə ke meghe nya dapave nda Mahwətə ke ka shihɛnyɛa David na? Pa yɛ tsenete ka sewajɛ kwele kwele, levea lɛmə yavɛsəte Zhɛrobowam yitea mze kwa tere tere kazhɛrete kala shala ta ŋayɛ.

⁹Nahe yɛ keŋkamte ka dzeghe melɛ nda ke Mahwətə, ka shihɛnyɛa Aron tsagha ka Lɛvi perə, pa yɛ ntave kweci ka dzeghe melɛ kala nya mene kweci hwelefefi te kweci hɛɗi: ma nahe kekeleke mca ba'a gamea lɛmə mberefaŋe wəndə ne, wərə kezha nta mbeli kande dzeghe nda melɛ ke shala nyi keɗema shɛ.

¹⁰Ma ghen'yɛ le ŋa n'yɛ ne, Mahwətə ya kaShala ta n'yɛ, keɗema ŋkɛ ghen'yɛ we. Ma sha ghen'yɛ ne, ka shihɛnyɛ Aron ya kaka dzeghe Shala ba'a mbe mene slene ta nci ka Lɛvi.

¹¹Masheke le tɛhwɛɗi tere nda 'wərdə ba'a melɛ kwa tere tere hɛ ke Mahwətə kawəshi gəmə, ma ɗafa nyi ve nda mbeli ke Shala ne, te tabele nya wɛŋe bete hɛ mbeli, sema ta tɛhwɛɗi ne, tivə tivə hɛ sha ghwə te paterela nyi nza wəshi kekele ta nci kamze kwa tere tere. Kamene slene ta Mahwətə ghen'yɛ tsape tsape, ama gheyɛ le ŋa ŋayɛ ne, nahe yɛ keɗema Shala nya kaganda.

¹²Ma tsetsenya gɛ, Shala le ghəa ŋkɛ ya te ghəa n'yɛ. Nahe ka dzeghe nda melɛ kehite geva teke yitea vɛ tereme ketsa kaka kelə yitea mpa le gheyɛ. Ma tsagha gɛ ka Israyɛl, mpama yɛ le Shala Mahwətə ta ka shihɛ ŋayɛ ma, kwa nza ŋkɛ kateɗema yɛ katehərəte ŋkwa.»

¹³Ma vəa ŋkwa nyagha ne, nahe Zhɛrobowam keghwenakɛ kweci bela ta ka sewajɛ kalə kaŋsleyi ghweɓe kwetere wəmbəa ka Zhəwda, kezha nza ka sewajɛa ka Zhəwda va ŋa ka Israyɛl.

¹⁴Ma kwa zhɛrete geva ka Zhəwda ne, pa hɛ ntsate nda bake ghwa mpa yitea hɛ, pa hɛ 'yɛwete kemane va Mahwətə. Ma vəa ŋkwa nya vɛte tereme ka dzeghe Shala ne,

¹⁵kɛake ka sewajɛa ka Zhəwda sha kaka kempa. Taghanyɛ, pa Shala zhɛneghe yɛ Zhɛrobowam le ka sewajɛa ka Israyɛl dzeyi te sebe kwa kema ta yɛ Abiya le ka Zhəwda.

¹⁶Kweracɛ ka Israyɛl yitea hwɛ te kema ta ka Zhəwda ama pa Shala veyi hɛ mbeyitere berete ta nci.

¹⁷Pa yɛ Abiya le ka sewajɛa ŋkɛ ɗate ka Israyɛl ndiremike, kampəmte hwa hɛ mcɛfe slibə ka sewajɛ nyi kejaŋga jaŋga.

¹⁸Ma te vəa shɛ ne, pa zləvə kelemte geva te ka Israyɛl, ama ka Zhəwda ne, nahe hɛ kehərəte ŋkwa va nya dɛŋate geva hɛ te Mahwətə, Shala ta ka shihɛ nci.

¹⁹Pa Abiya kekate Zhɛrobowam. Pa kelehwe yɛ meleme ta Bɛtɛl, Yeshana ba'a Ɛfron le yɛ meleme nyi dzeyi yitea hɛ.

²⁰Nda menehwe meghea ŋkɛ Abiya ne, kezhɛne Zhɛrobowam kakemave berete ta ŋkɛ nya vəashi tɛape we. Ma kakwa keɗaŋe ne, pa Mahwətə mpamte, pa mtenyɛ.

²¹Ama Abiya le ŋa ŋkɛ ne, nahe berete ta ŋkɛ kemtsehete geva. Mi meŋe wəfaɗeghəmbe wəmeve ŋkɛ, ŋwale tezhili bakemsə bakeghəmbe ba'a ŋwalea kwɛ meŋe ŋkwaŋeghəmbe yave ŋkɛ hwa hɛ.

²²Ma nyi ketene ghena ta Abiya, wəshi nyi menete ŋkɛ le nyi gezete ŋkɛ ne, nahe hɛ kenza kerafe rafe mbe palepa ta ghena ta nde mɛ ŋkwa Ido.

²³Ma kwa mte ŋkɛ ne, pa mbeli lamte ŋkɛ mbe meleme ta David. Wəzege ta ŋkɛ Asa nde kelete meghe te ŋkwa ŋkɛ. Ma mbe vəa meghea Asa ne, gweɗakwe se hɛɗi kava meŋe.