Read KapsikiDC 2 Wəshi nyi Mene Ka Meghe 14 Bible Online

2 Wəshi nyi Mene Ka Meghe 14 - KapsikiDC bible

2 Wəshi nyi Mene Ka Meghe 14

¹Megela menete slene Asa, wəsə nya tiɗiɗi kwa kema ta Shala Mahwətə ta ŋkɛ yamenete ŋkɛ.

²Pa ŋkɛ zamte sebe te yɛ reghwetɛ ba'a yɛ ŋkwa kesəkwə ghəa kweci hwelefefi, pa mpəmte yɛ gɛaŋa nyi mɓeyi mbeli ba'a tsetsaslemte selə nyi keveyi geva tekeleke.

³Waɗe ndeke nda hweŋkwa ke ka Zhəwda kazele Mahwətə, Shala ta ka shihɛ nci ba'a kahawe va wəsə mahalegəa ŋkɛ le ghena nyi gezeke ŋkɛ.

⁴Pɛtɛ zamte sebe te yɛ ŋkwa kesəkwə ghəa ka ɗepema Shala ŋkɛ te hɛɗia Zhəwda ba'a yɛ reghwetɛ ketere 'wərdə, vatse nda nzate nza hɛɗia ŋkɛ gweɗakwe mbe vəa nza ta ŋkɛ mbe meghe.

⁵Wəndə shɛ kese kave nda mpa mbe va shɛhɛ we, Mahwətə le ghəa ŋkɛ nde ndeke nda kwelɛŋe tiɗiɗi. Nahe ŋkɛ kekemave hweŋkwa mbe və nya nza gweɗakwe nyagha te hɛɗi kezha hite kweci meleme kwele kwele kaka berete te hɛɗia Zhəwda.

⁶Ma ke sha ka Zhəwda: «Ŋate ɓəmə meleme nyi, ntəsləte ɓəmə hɛ le zli, le yɛ cɛ kenewe ŋkwa pelɛ ghəa zli, le yɛ gelembe kwa lɛ lɛ mɛa hɛ, kwa nza hɛɗi mba va gheɓəmə. Kwa nza ŋkɛ nahe gheɓəmə kese dɛŋe dɛŋe te Shala Mahwətə ta ɓəmə, tewəmbəreke nya se gheɓəmə dɛŋe dɛŋe te Shala nda se ŋkɛ kandeke ɓəmə kwelɛŋe laka yayata bela.» Ntake hɛ kaŋa zli yitea melemea shɛhɛ.

⁷Ka sewajɛa Asa ne, 300.000 ka Zhəwda nyi kenza kakelete gelə nyi jama jama le yɛ megha, 280.000 ka Bɛnjamɛn, nyi kenza kakelete gelə nyi ɓɛhwɛ ɓɛhwɛ ba'a ka ɗepe he have. Pɛtɛ hɛ kaka katsala kempa.

⁸Pa Zɛra nde Ɛtiyopi se yitea mpa le hɛ le ka sewajɛ miliyeŋə ba'a yɛ wəmata gədəwə gwəmsə mahekene. Pa ntsehe hwa'a mbe Marɛsha.

⁹Pa Asa shave shɛ: pa hɛ pate geva le ka sewajɛa ŋkɛ yitea mpa kwa zlərəa Sefata, takwa yitea Marɛsha.

¹⁰Ma ke Asa 'yɛwete kemane va Shala Mahwətə ta ŋkɛ: «Mahwətə, dzawe ŋkɛ sha gha kakemanakɛ nde dewə ŋeli kanza za ma ke nde berete we. Nde kemanakɛ n'yɛ, Shala Mahwətə ta n'yɛ, kwa nza ŋkɛ te gha dɛŋe geva ghen'yɛ. Te sləa ŋa lə ghen'yɛ yitea mpa le ka sewajɛ kwele kwele kala nya. Gha ya kaMahwətə Shala ta n'yɛ, pelema na kahərə ŋa wəndə ŋelɛ ma.»

¹¹Pa Mahwətə zhɛrete ka Ɛtiyopi dzeyi te sebe kwa kema ta Asa le yɛ ka sewajɛa ka Zhəwda. Kweracɛ hɛ te hwɛ

¹²Pa yɛ Asa le ka sewajɛa ŋkɛ kekate hɛ hwa'a mbe Gɛrar. Kwele kwele bete hɛ kwa hweŋkwa, kembele kwete hwa hɛ ya kwetɛŋe we, kwa nza ŋkɛ pɛtɛ hɛ kempə te kema ta Mahwətə ba'a te kema ta mbelia ŋkɛ. Kwele kwele fəte wəshi nyi sərəakɛ hɛ ka Zhəwda.

¹³Pa ɗate meleme nyi dzeyi yitea Gɛrar pɛtɛ, kwa nza ŋkɛ ne, shewə mbeli nyi mbe melemea shɛhɛ va ghazlənə ta Mahwətə. Pa hɛ tazemte melemea shɛhɛ ba'a fəhwe wəshi kwele kwele.

¹⁴Pa hɛ have nda mpa ke yɛ ghedəkwəa ka ya wəshi ba'a fəhwe timɛti ba'a zlegweməa lɛmə kwele kwele. Ma kwa sebe ta ŋkɛ ne, pa hɛ zhɛneke geva kadzembe Zhɛrəzalɛm.