Read KapsikiDC 2 Wəshi nyi Mene Ka Meghe 15 Bible Online

2 Wəshi nyi Mene Ka Meghe 15 - KapsikiDC bible

2 Wəshi nyi Mene Ka Meghe 15

¹Pa Sefəa Shala dzeghənyɛ kənəa Azariya, wəzege ta Odɛd.

²Cape kalə sha Asa, ma ke shɛ: «Meghe Asa le gheyɛ ka Zhəwda ba'a ka Bɛnjamɛn pɛtɛ, fa mə ghena ta ɗa! Le gheyɛ Mahwətə shanda ɗema ta ŋayɛ mba yite. Ma kenza yɛ kazele ne, katencɛ ŋayɛ ghəa ŋkɛ ŋkɛ. Ma keneghamte yɛ, kanegha ŋayɛ ŋkɛ perə.

³Kwele kwele nzahwe nza ka Israyɛl kaɗema Shala ganyɛ va hɛ, kaɗema nde dzeghe Shala shɛ kezha teke nda wəshi ke hɛ ba'a kaɗema wəsə mahalegə shɛ.

⁴Ama mbe yaka ta nci ne, nahe hɛ kese sha Mahwətə, Shala ta ka Israyɛl. Pa hɛ zelete, pa ncɛte nda ghəa ŋkɛ ke hɛ.

⁵Ma mbe vəa shɛ ne, wəndə kalə yitea dzeghwa keɗema kase le kwelɛŋe we. Kwa nza ŋkɛ və kwa ndiremi ŋkɛ te mbeli nyi te hɛɗi pɛtɛ.

⁶Kwete hwelefe ne, kampa dzawe dzawe le kwete ba'a kwete meleme le kwete, kwa nza ŋkɛ Shala nde gaŋkəɗəte hɛ le mama ta ndiremi.

⁷Ama gheyɛ tsetsenya, nza mə le berete, mba yɛ kedake ŋayɛ, kwa nza ŋkɛ, katekemave zhɛme yɛ te slene ta ŋayɛ.»

⁸Ma kwa fate ghena nya gezete nya nde mɛ ŋkwa Azariya, wəzege ta Odɛd meghe Asa ne, pa hwepete ghə. Pɛtɛ zamte wəshi nyi zhɛrete mbeli kashala te hɛɗia Zhəwda le ŋa ka Bɛnjamɛn. Tsagha shɛ menete ŋkɛ le meleme nyi fəhwe ŋkɛ dzeme hwa ghweme ta Ɛfrayim. Kwa sebe ta ŋkɛ, pa hite reghwetɛa Mahwətə nya kwa kema ta dapa ta ghɛa Shala.

⁹Nahe kweci Israyɛl kwele kwele nyi kwa yita ta Ɛfrayim, Manasɛ, Simɛyon kejikəte geva le meghe Asa ba'a kenzanji te hɛɗi meghea ŋkɛ va nya nakɛ hɛ nahe Shala Mahwətə ta ŋkɛ kenza le. Pa meghe hekakɛ hɛ pɛtɛ le mbeli nyi te hɛɗia Zhəwda ba'a ŋa Bɛnjamɛn.

¹⁰Pa hɛ tsenete tsene mbe Zhɛrəzalɛm, te kwa mahekene ta tere mbe kwa meŋe mcɛfeghəmbe ta va ta Asa mbe meghe.

¹¹Ma te veci nya se hɛ ne, pa hɛ dzeghekɛ nda melɛ ke Mahwətə le wəshi keseɗa nyi fəke hɛ va ka ghema ta nci: mcɛmcɛli gwəmsə mberefaŋe ba'a timɛti 7.000.

¹²Pa hɛ meɗeyi kwa kema mbeli pɛtɛ kezha mene ɗe ta Mahwətə le wənəa nci pɛtɛ ba'a le mehele ta nci kaɗepete wəsə nya ɗe Mahwətə, Shala ta ka shihɛ nci.

¹³Ma keɗema kwete wəndə kamene ba'a kaɗepete ɗe ta Shala Mahwətə ta ka Israyɛl, ya wəzege keɗema wəndə nya wəba, ya za keɗema male, nahe ŋkɛ kehi kapesle ŋkɛ mbeli.

¹⁴Pa hɛ zemete nda fela ke Mahwətə le tsa ta lewela kewəbanyɛ, le mpi dzeve, le vɛ veke ba'a tereme.

¹⁵Pɛtɛ ka Zhəwda kazlama yitea fela nya zemete hɛ, kwa nza ŋkɛ nahe hɛ kezemete le wənə kwetɛŋe. Yayata wəndə kaɗe zele Mahwətə, nya kepelakɛ ghəa ŋkɛ kezha sləyi hɛ ba'a nya kendeke nda kwelɛŋe ke hɛ kwa ghala ta nci pɛtɛ.

¹⁶Pa le meghekɛ Ma'aka kelemte meghe Asa seyi te nza kanya kwelea mi, va nza menete wəsə kwa ndiremi Ashɛra, nya zhɛrete mbeli kashala. Pa ŋkɛ gezete nda ke mbeli kampə wəsəa shɛ, kancɛhwe ŋkɛ ba'a katere le ghwə mɛa hələa Sɛdron.

¹⁷Ndagwara kezamte kələŋə nyi keveyi geva kaŋa melɛ ŋkɛ mbe Israyɛl we, ya tsemanyɛ se ŋkɛ kaɗe Shala le wənəa ŋkɛ pɛtɛ mbe nza ta ŋkɛ te ghweme.

¹⁸Pa fəke wəshi gəmə kadzembe ghɛa Shala, nyi veyi yitenyɛ tekeleke kaŋa Shala le nyi veyi ŋkɛ le ghəa ŋkɛ: yɛ mze kwa ghwə ghwə, mze kwa tere tere ba'a kweci wəshi kwele kwele.

¹⁹Kegha mpa kanza shɛ nda jivenyɛ va ta Asa mahekenemsə mcɛfeghəmbe te meghe we.