Read KapsikiDC 2 Wəshi nyi Mene Ka Meghe 17 Bible Online

2 Wəshi nyi Mene Ka Meghe 17 - KapsikiDC bible

2 Wəshi nyi Mene Ka Meghe 17

¹Pa Zhozafat, wəzege ta Asa kelete meghe te ŋkwa yitenyɛ. Pa ŋkɛ menete berete mbe meghea ŋkɛ za ma ke ŋa ka Israyɛl.

²Pa fəyi ka sewajɛ mbe meleme nyi berete berete mbe Zhəwda, pa nteyi ka ŋgwamna mbe hɛɗia ŋkɛ, tsagha shɛ mbe meleme nyi fəhwe yitenyɛ Asa va ka Ɛfrayim.

³Pa Mahwətə nzanyɛ kənəa Zhozafat, kwa nza ŋkɛ kala nya se shinyɛ David kadzeghwa te kwa ghate ta meghea ŋkɛ dzeghwa ŋkɛ. Kese ŋkɛ kazele kemane va yɛ shala Ba'al we,

⁴ama pa zelete Shala ta shinyɛ ba'a pa yɛte fete yitea ghena nyi gezeke ŋkɛ, tekeleke le nya kemene geva pelɛ Israyɛl.

⁵Pa Mahwətə veyi meghea ŋkɛ bereteke. Pɛtɛa ka Zhəwda kave nda wəshi gəmə ke Zhozafat, vatse nda kemave wəshi ŋkɛ kwele kwele, pa le zləvə.

⁶Ntake ŋkɛ kamene nda slene ke Mahwətə le wənəa ŋkɛ pɛtɛ, pa ŋkɛ mpəmte kələŋə kedzeghe melɛ ba'a selə nyi keveyi geva tekeleke te hɛɗia Zhəwda.

⁷Ma mbe kwa mahekene ta va ta ŋkɛ mbe meghe ne, pa ghwenakɛ kweci mbelia jama hwa ka mene slene ta ŋkɛ kalə kateke nda wəshi ke mbeli nyi te hɛɗia Zhəwda: yɛ Bɛn-Hayil, Obadiya, Zakari, Netanɛyɛl ba'a Mikaya.

⁸Ka Lɛvi mesli ka beghakɛ hɛ: Shemaya, Netaniya, Zɛbadiya, Asayɛl, Shemiramot, Yonatan, Adoniya, Tobiya ba'a Tob-Adoniya, pa ka dzeghe Shala bake perə, Ɛlishama le Yoram.

⁹Laŋe hɛ kelete palepa ta wəsə mahalegəa Mahwətə, pa hɛ dzeghwamte meleme nyi te hɛɗia Zhəwda, kezha teke nda wəshi nyi mbe ke mbeli nyi te hɛɗia ŋkɛ pɛtɛ.

¹⁰Pɛtɛ kweci hɛɗi nyi kwa ghala le Zhəwda kaghazlənə va Mahwətə, wəndə nya kezəzə ve nda mpa ke Zhozafat shɛ we.

¹¹Nahe mbeli kenakɛ pa le ka Filisti kafə nda wəshi gəmə keɗema jaɓeregwale ke Zhozafat ba'a ka Arab nyi kefəke nda gamea lɛmə 7.700 ba'a zhɛfa lɛmə 7.700.

¹²Mbe kele berete ta Zhozafat mbe kema mbe kema. Pa ŋkɛ ŋate meleme nyi berete berete mbe Zhəwda ba'a kweci meleme kezha tsene wəshi kezeme mbe hɛ.

¹³Wəshi kezeme yave kwele kwele dzeyi mbe yɛ meleme ta ŋkɛ. Ma ka sewajɛa ŋkɛ nyi keɗepemte mpa za ma ne, mbe Zhɛrəzalɛm hɛ le nza.

¹⁴Kala yita ta nci neheve geva ka sewajɛa shɛhɛ. Hwa hwelefe ta Zhəwda ne, mbeli nyi te ghəa ka sewajɛ slibə ya shɛ. Mazea ka sewajɛ Adna nde sleke ka sewajɛ 300.000.

¹⁵Va bela ta ŋkɛ, mazea ka sewajɛ Yohanan nde sleke ka sewajɛ 280.000,

¹⁶ba'a Amasiya, wəzege ta Zikri, nya kendeke nda ghəa ŋkɛ ke slene ta Mahwətə le ghəa ŋkɛ nde sleke ka sewajɛ nyi keɗepe mpa 200.000.

¹⁷Mbe hwelefe ta Bɛnjamɛn ne, katsala sewajɛ Ɛliyada nde sleke ka sewajɛ 200.000 nyi nza yɛ gwecɛ le yɛ gelə va hɛ,

¹⁸ma va bela ta ŋkɛ, Yozabad nde sleke ka sewajɛ 180.000 nyi kenza gare mpa.

¹⁹Tsetse nza ta ka sewajɛ nyi mene nda slene ke meghe mbe Zhɛrəzalɛm, mba nyi nteyi ŋkɛ mbe meleme nyi berete berete nyi te hɛɗia ŋkɛ pɛtɛ.