Read KapsikiDC 2 Wəshi nyi Mene Ka Meghe 19 Bible Online

2 Wəshi nyi Mene Ka Meghe 19 - KapsikiDC bible

2 Wəshi nyi Mene Ka Meghe 19

¹Pa Zhozafat, meghea ka Zhəwda zhɛneke geva kwelɛŋe sha ghɛa ŋkɛ mbe Zhɛrəzalɛm.

²Pɛkwe nde mɛ ŋkwa Yɛhəw, wəzege ta Hanani se kabegeme le, ma ke shɛ: «Wa raberə kemanakɛ nde mefətekwə na wa? Wərə wəndə kaɗe ka ghema ta Mahwətə na? Va wəsə nya menete nya na ne, tehwepe wənəa Mahwətə va gha.

³Ndagwara mba wəsə kwa ganyɛ mbe gha, kwa nza ŋkɛ, nahe na keteremte selə nyi keveyi geva kaŋa Ashɛra mbe hɛɗia ŋa ba'a nahe na ntsəte geva le wənəa ŋa pɛtɛ kayɛ nda fete ke Shala.»

⁴Mbe Zhɛrəzalɛm nzanyɛ Zhozafat. Kwa sebe ta ŋkɛ, ntake ŋkɛ kadzeghwa dzeyi mbe hɛɗia ŋkɛ, se mbe Bɛrshɛba hwa'a dzeme hwa ghweme ta Ɛfrayim, kezha heka ka Israyɛl kase sha Shala Mahwətə ta ka shihɛ nci.

⁵Pa nteyi ka meha ghwə mbe meleme nyi berete berete nyi te hɛɗia Zhəwda,

⁶ma ke sha hɛ: «Ntsehwele mə yitea slene nya temene nya yɛ. Kwa nza ŋkɛ ne, te sləa wəndə temeha ghwə yɛ we, ama te sləa Mahwətə. Gheŋkɛ le ghəa ŋkɛ nde tenza le gheyɛ kenza yɛ kameha ghwə.

⁷Ndeke nda mə hawe nya wəba ke Mahwətə, ntsehwele mə yitea wəsə nya mene yɛ, kwa nza ŋkɛ ne, kayɛ wəsə kwa ndiremi, nta ghala ba'a mbəɗəkwə Shala Mahwətə ta ɓəmə we.»

⁸Mbe Zhɛrəzalɛm ɓiyitsa ne, pa Zhozafat nteyi ka Lɛvi, ka dzeghe Shala ba'a mbeli nyi te ghəa peləa ka Israyɛl kezha meha ghwə tiɗiɗi te sləa Mahwətə ba'a kahi ghena nyi kwelɛ mbeli nyi mbe meleme.

⁹Pa gezave nda ghena nyi ke hɛ: «Nahe ŋkɛ kehi kapele nda ghəa ŋayɛ yɛ ke hawe va Mahwətə, yitea nza yɛ dɛŋe dɛŋe te ba'a le wənə nya tiɗiɗi.

¹⁰Ya hweŋkwa hweŋkwa se ka menəhɛ ŋayɛ, se mbe meleme nyi nza hɛ le ghena sha gheyɛ, kezha meha ghwə ta ŋkɛ yɛ, ghena ta pesle wəndə keɗema ghena ta hawema va wəsə mahalegə, ghena nya gezeke geva kahawe ve, ghena nyi kehwepete geva keɗema ghena ta wəshi keshi, pa yɛ newemte megela. Ma tsagha ne, katenza hɛ kaka fete sha Mahwətə we, katehwepe wənə Mahwətə va gheyɛ le ka menəhɛ ŋayɛ we. Mene mə kala nya, yagha yɛ tenza kaka fete le ghəa ŋayɛ.

¹¹Wəndə kwelea ka dzeghe Shala Amariya nde tenza te ghəa ŋayɛ laka wəshi nyi kaŋa Mahwətə. Wəndə nya te ghəa hɛɗi meghea Zhəwda Zɛbadiya, wəzege ta Ismayɛl ya te ghəa wəshia meghe. Ma ka Lɛvi le ŋa nci, hɛ kaka rafe ŋayɛ wəshi. Dzembe mə slene le hwepe ghə, pa Mahwətə nza le mbeli nyi kemene kwa ganyɛ.»