Read KapsikiDC 2 Wəshi nyi Mene Ka Meghe 20 Bible Online

2 Wəshi nyi Mene Ka Meghe 20 - KapsikiDC bible

2 Wəshi nyi Mene Ka Meghe 20

¹Ma kwa sebe ta ŋkɛ, pa ka Mowab ba'a ka Amon, zlaɓe le ka Mawon nyi kwa sebe ta nci have nda mpa ke Zhozafat.

²Pa mbeli se kagezete nda ke meghe, ma ke mbeli shɛ: mbeli kwele kwele kase le mpa sha gha. Shave pelɛ kema ta ndərə kwa Ghwənəghwə shave hɛ, te hɛɗia Ɛdom. Tsetsenya ne, mbe Hasason-Tamar hɛ, geze ta ŋkɛ Ɛn-Gɛdi.

³Ntake ghazlənə kazhɛ nda ke Zhozafat, pa zəzəte kazele ntsehwele va Mahwətə, pa zlapete səwəmayɛ te hɛɗia Zhəwda pɛtɛ.

⁴Ntəŋə ka Zhəwda se mbe pɛtɛa meleme nyi te hɛɗia nci, pa hɛ tsenete geva kezha səkwə kemane va Mahwətə.

⁵Pa Zhozafat sletenyɛ te tepe ta ka Zhɛrəzalɛm ba'a kweci ka Zhəwda, te ŋwela nya kamɛnɛfɛ kwa kema ta ghɛa Shala.

⁶Ma ke hɛ səkwəte ghə: «Mahwətə, Shala ta ka shihɛnyɛ, gha ya kameghe pelɛ ghweme ba'a gha nde sleke pɛtɛa hwelefefi! Va gha nza berete ba'a kwele, wəndə shɛ kaghereŋe kwa kema ta ŋa we.

⁷Ashɛ gha ya kaShala ta n'yɛ, nya keŋkamte mbeli nyi kese te hɛɗi nya kwa kema ta ka Israyɛl mbelia ŋa ba'a nya kendeke nda hɛɗi nya kaghala ghala ke hwelefe ta mcɛ ŋa Abraham wəka?

⁸Pa hɛ ntishɛnji te le ba'a kaŋate ŋkwa nya keveyi geva tekeleke kaŋa ŋa. Ma ke hɛ kwa sebe ta ŋkɛ:

⁹‹Ma kese ndiremi, ɗa ta Shala, mpa, ba keɗema ma kadzete ghen'yɛ ne, katese n'yɛ kadzete kema ta ŋkwa nya keveyi geva tekeleke, geze ta ŋkɛ, te kema ta ŋa, kwa nza ŋkɛ teke ncɛ nza ta ŋa na ba'a ma ketsave ŋa lewela n'yɛ mbe tepe ta yaka ta n'yɛ ne, katefate na ba'a katembele n'yɛ na.›

¹⁰Ma tsetsenya gɛ, newema: Wa nyi ka Amon, ka Mowab ba'a ka Ɛdom nyi kampa le ghen'yɛ. Ma kwa shavenji ka shihɛ n'yɛ mbe Ɛzhipte ne, kendeke nda hweŋkwa na ke hɛ kezha dzete hɛɗia mbeli nyi we. Pa ka shihɛ n'yɛ zhɛrete geva dzeyi te sebe ba'a kezamte sebe hɛ te hɛ we.

¹¹Ama wa nyi hɛ kawa te ghen'yɛ ɓeshi gɛ, kase hɛ kakeka n'yɛ te hɛɗi nya ndeke n'yɛ nya na!

¹²Shala Mahwətə ta n'yɛ, kaɗa hɛ na le meha ghwə kwa tiɗiɗia ŋa wəka? Dewə berete va ghen'yɛ te kema ta ka sewajɛ nyi kwele kwele nyi kese nyi kaɗa n'yɛ, keɗepe wəsə kemene ghen'yɛ we. Vatse zhɛrete kema ta n'yɛ ghen'yɛ laka gha.»

¹³Pɛtɛ ka Zhəwda le ghɛa nci, mia nci ba'a ŋwale nci sletenji kwa kema ta Mahwətə.

¹⁴Hwa tsene ta mbeli tipə tipə ne, pa sefəa Shala dzeghənyɛ kənəa Yaziyɛl, nde Lɛvi, wəzege ta Zakari ba'a shia Benaya. Benaya le gheŋkɛ le ghəa ŋkɛ ne, wəzege ta Yɛyiyɛl ŋkɛ, shia Mataniya ba'a hwelefe ta Asaf hɛ.

¹⁵Kɛake Yaziyɛl sha lewela: «Fa mə ghena ta ɗa le mehele, pɛtɛa gheyɛ ka Zhɛrəzalɛm, ka Zhəwda ba'a gha le ghəa ŋa meghe Zhozafat. Wa nya ghena nya gezeke Mahwətə nya: ‹ghazlənəma yɛ tɛape ma, dakema yɛ va ka sewajɛ nyi kwele kwele nyi ma! Ŋa ŋayɛ mpa nya we, ama ŋa ɗa, 'ya Shala ta ŋayɛ.

¹⁶Hendɛ ne, katedzawa yɛ sha ka jaga ta ŋayɛ, mbe same hɛ laka wəmbəa Tsits. Mɛa metɛŋe ta zlərə tebegeme yɛ le hɛ, kwa kema ta ɓerama ta Yerowɛl.

¹⁷Ha nda ma mpa yɛ ke hɛ tagha ma. Ka Zhɛrəzalɛm ba'a ka Zhəwda, ghereŋe ŋayɛ mə tagha ke ta ŋayɛ, nza ŋayɛ mə te ŋkwa shɛ, nda tenewe yɛ tsema tsema tembele ŋayɛ 'ya. Ghazlənəma yɛ tɛape ma, bare barema yɛ ma! Hendɛ, kwiɗi mə kabegeme le hɛ, ma 'ya Mahwətə ne, le gheyɛ tenza 'ya.›»

¹⁸Gwəɗəŋə Zhozafat ntiŋə ghə mbe hɛɗi kwa kema ta Mahwətə. Pɛtɛa ka Zhɛrəzalɛm le ka Zhəwda kagwəɗəŋə perə kahawe va Mahwətə.

¹⁹Ma kwa sebe ta ŋkɛ, pelɛhetɛme ka Lɛvi nyi kwa yita ta Kɛhat ba'a Korɛ sate te ŋkwa, ntake hɛ katsahe Mahwətə, Shala ta ka Israyɛl zlape zlape.

²⁰Masheke masheke te hendɛ ta ŋkwa, cape hɛ kwa hweŋkwa pɛtɛ kadzete ɓerama ta Tɛkowa. Ma kateslə hɛ ne, pa Zhozafat slete kwa kema ta nci, ma ke: «Fa mə ghena ta ɗa ka Zhɛrəzalɛm le ka Zhəwda! Vate mə ghəa ŋayɛ te Shala Mahwətə ta ŋayɛ, kaka berete tenza yɛ. Yɛte mə ghena ta ka mɛ ŋkwa ta ŋkɛ, katehərəte ŋkwa yɛ!»

²¹Kala nya tsahwe hɛ le mbeli, pa Zhozafat veyi ka gha cimə nyi mbe lekwesa nyi keveyi geva kaŋa Shala te kema ta ka sewajɛ katsahe Mahwətə le cimə: «Tsahe mə Mahwətə, kwa ɗema ɗe ta ŋkɛ kakiɗi.»

²²Ma kwa ghate gha cimə hɛ le zlama ne, pa Mahwətə tazemte mehele ta ka Amon, ka Mowab le ka Ɛdom nyi kelə kampa le ka Zhəwda kwelɛ ghəa nci, pa hɛ mpə mpəmte ghəa nci.

²³Pa ka Amon le ka Mowab ghate ɗa ka Ɛdom, kampəkawa hɛ pa te kwa keɗaŋe. Ma kwa sebe ta ŋkɛ ne, pa hɛ mpə mpəmte ghəa nci.

²⁴Ma kwa ntsehe ka Zhəwda te ŋkwa nya nza wəndə kanakɛ ŋkwa nya te ɓerama ne, newe ke hɛ sha ŋkwa laka ka ghema ta nci ne, ama deke mbeli nyi kempə mpə ya selekə lekə te hɛɗi: nya kembele shɛ ya kwetɛŋe we.

²⁵Ntake Zhozafat le mbelia ŋkɛ kafə wəshi kwa ghwa mpa. Kwele kwele hɛ kekemave wəshi keseɗa, mcɛlə, yɛ lekwesa le kweci wəshi nyi ndeɗe ndeɗe. Kewəba wəshia shɛhɛ, hɛ mahekene menete hɛ kafə, shaŋe hɛ kafə hɛ pɛtɛ.

²⁶Ma te kwa wəfaɗe ta hɛ ne, pa hɛ tsenete geva kwa zlərəa Beraka kezha tsa nda hana ke Mahwətə. Vatse nda nza sləa zlərəa shɛ kaBeraka pa ɓeshi, geze ta ŋkɛ «Hana.»

²⁷Cape ka Zhɛrəzalɛm le kweci ka Zhəwda kwa hweŋkwa, te kema ta nci Zhozafat kazhɛne geva kase kadzembe Zhɛrəzalɛm le zlama. Kwa nza ŋkɛ nahe ne, Mahwətə kendeke nda zlama nya wəba ke hɛ te ka jaga ta nci.

²⁸Shilimə hɛ mbe Zhɛrəzalɛm le gaka ta yɛ gagera, yɛ ŋgwəleŋə ba'a yɛ veke, kata kata hɛ kadzembe ghɛa Mahwətə.

²⁹Ma kwa fate mbeli nyi te kweci hɛɗi nahe Shala Mahwətə keɗate ka ghema ta ka Israyɛl ne, pa mbeli pɛtɛ ghazlənənji ve.

³⁰Tsetse kemave mene meghea ŋkɛ Zhozafat le gwezlayɛ, kwa nza ŋkɛ Shala ta ŋkɛ nde ndeke nda kwelɛŋe laka yayata ŋkwa.

³¹Ma nda dzembe meghea ka Zhəwda Zhozafat ne mahekenemsə mcɛfeghəmbe va ta ŋkɛ, va bakemsə mcɛfeghəmbe menete ŋkɛ mbe meghe mbe Zhɛrəzalɛm. Sləa meghekɛ ne, Azəwba nya kawəzha ta Shili.

³²Tiɗiɗi dzeghwate dzeghwa ŋkɛ kala yitenyɛ Asa, kamene wəsə nya megela sha Mahwətə.

³³Ndagwara kempəmte kelɛŋə kedzeghe melɛ ŋkɛ we, vatse nda ɗema mbeli kese kave nda ghə le wənə kwetɛŋe ke Shala ta ka shihɛ nci.

³⁴Ma nyi ketene slene nyi menete Zhozafat, se te nyi keghate pa nyi kekeɗaŋe ne, nahe hɛ kenza kerafe rafe mbe Palepa ta wəshi nyi menete ka meghea ka Israyɛl.

³⁵Kwa sebe ta ŋkɛ, pa Zhozafat, meghea ka Zhəwda jikəte geva le Ahaziya, meghea ka Israyɛl nya nza dzeghwa ta ŋkɛ kendireminyɛ.

³⁶Pa hɛ tsahwe kanya kwetɛŋe kamene yɛ kwambelə nyi kelə cakeɗake. Kwa Ɛsiyon-Gɛbɛr menete yɛ kwambeləa shɛhɛ.

³⁷Ama pa nde mɛ ŋkwa Ɛliyɛzɛr, wəzege ta Dodava, nde Marɛsha gezete nda ke sha Zhozafat: «Kwa nza ŋkɛ nahe na kejikəte geva le Ahaziya ne, pɛtɛ tebeze wəsə nya baŋete nya na Mahwətə.» Kaganda shɛ, kekekave ŋkwa yɛ kwambeləa nci we, kwa nza ŋkɛ nahe hɛ kedzəɓənji.