Read KapsikiDC 2 Wəshi nyi Mene Ka Meghe 21 Bible Online

2 Wəshi nyi Mene Ka Meghe 21 - KapsikiDC bible

2 Wəshi nyi Mene Ka Meghe 21

¹Ma kwa mte Zhozafat ne, pa mbeli lamte ŋkɛ hwa ka shihɛnyɛ mbe meleme ta David. Zhoram wəzege ta ŋkɛ nde kelete meghe kwa sebe ta ŋkɛ.

²Kwele kwele ka kesaka yita nyi kaŋwalea Zhozafat va Zhoram: yɛ Azariya, Yɛhiyɛl, Zakari, Azariyahəw, Mikayɛl ba'a Shefatiya.

³Nahe Zhozafat, yiteyɛa nci kenehave nda wəshi gəmə ke hɛ kwele kwele, nyi le mze kwa ghwə ghwə, mze kwa tere tere ba'a le kweci wəshi nyi nza zləvə te. Pa ŋkɛ ndeke nda hweŋkwa kesleke meleme nyi berete berete nyi mbe Zhəwda ke hɛ. Ama Zhoram yatarete ŋkɛ kanza kameghe, kwa nza ŋkɛ kanya kwele.

⁴Pa Zhoram dzete meghe kwa sebe ta yitenyɛ, pa zhɛrete ghəa kande berete. Pɛtɛ mpəmte ka kesaka yitenyɛ, tsagha kweci mbeli nyi te ghə nyi mbe hɛɗia ŋkɛ.

⁵Va mahekenemsə bakeghəmbe ta Zhoram nda dzembe meghe ŋkɛ, deghese va ta ŋkɛ mbe meghe mbe Zhɛrəzalɛm.

⁶Pa zelete dzeghwa ta ka meghea kɛfia ka Israyɛl kala nya menete mbelia ghɛa Akab, kwa nza ŋkɛ, wəzha ta Akab yawəmeve ŋkɛ. Wəsə nya ndiremi yamenete kwa kema ta Mahwətə.

⁷Ndagwara kaɗe Mahwətə kazamte sebe te meghe ki ghɛa David, tewəmbəreke jikə geva nya menete hɛ le David we. Kwa nza ŋkɛ ne, nahe ŋkɛ kemeɗeyi nda kanza sebe ta ŋkɛ te meghe mbe Zhɛrəzalɛm kaghala ghala.

⁸Te və nya nza Zhoram kameghe ɗema ghena ta sleke nya sleke hɛ Zhəwda ka Ɛdom, pa hɛ ntave ŋa nci meghe.

⁹Cape Zhoram le ka jama jama ta ka sewajɛa ŋkɛ ba'a le yɛ wəmata gədəwəa ta ŋkɛ pɛtɛ. Ama te tepe viɗi ne, pa yɛ meghe le mbeli nyi te ghəa wəmata gədəwə ɗate ka Ɛdom nyi kentəsləte hɛ.

¹⁰Se mɛa vəa shɛ ne, na ka Ɛdom keshavenji mbe dzeve ta ka Zhəwda, hɛ kasleke ghəa nci pa ɓeshi. Te vəa shɛnyɛ, pa meleme ta Libna ɗema meghea Zhoram perə, va nya ɗema Zhoram kahawe va Mahwətə, Shala ta ka shihɛnyɛ zhɛkwa.

¹¹Pa le yɛ kələŋə kedzeghe melɛ menete Zhoram dzeyi hwa yɛ ghweme ta ka Zhəwda, nahe ŋkɛ keghweteyite ka Zhɛrəzalɛm ba'a ka Zhəwda kazhɛre nda geva ke yɛ shala tseŋwə.

¹²Pa Zhoram kemave palepa te kwete hɛ se va nde mɛ ŋkwa Ɛli ma ke: «Wa nya ghena nya gezete Shala Mahwətə ta shi ŋa David nya: Kese na kadzeghwa kala yiteyɛ ŋa Zhozafat le ŋa shi ŋa Asa, meghea ka Zhəwda we.

¹³Ama hweŋkwa ta meghea kɛfia ka Israyɛl yakelete na, nahe na keghwetete ka Zhɛrəzalɛm le ka Zhəwda kazhɛre geva kalə sha yɛ shala tseŋwə, kala mbelia ghɛa Akab. Nahe na kempəmte ka kesaka yiteyɛ ŋa, nyi kenza za ma ke gha.

¹⁴Vatse teve ndiremi nya wəba Mahwətə te mbelia ŋa, ŋwalea ŋa, mia ŋa ba'a wəshi ŋa pɛtɛ.

¹⁵Gha le ghəa ŋa ne, katekese ŋa mama ta zereghwe, ma kwete zereghwea shɛ ne, keveci keveci temtsehe geva ŋkɛ, pa te və nya tesamenji heli kwa hwə va gha.»

¹⁶Pa Mahwətə feɗeghete ka Filisti le ka Arab nyi kwa ghala le ka Ɛtiyopi, kampa le Zhoram.

¹⁷Pa hɛ have nda mpa ke hɛɗia Zhəwda ba'a dzembe ŋkɛ. Pa hɛ fəhwe pɛtɛa wəshi nyi ki ghɛa meghe, fəhwe ŋwale ba'a mia meghe kaka mavashi. Deke wəzege nya ɓɛhwɛ ma hwa ŋwalea ŋkɛ, Ahaziya nde tene ve.

¹⁸Ma kwa sebe ta wəshi nyi ne, pa Mahwətə ndeke nda wəsə kwa hwə nya keshaŋe kakiɗi ke Zhoram.

¹⁹Kamtsehe geva zereghwea shɛ ke hɛ ke hɛ. Ma te kwa kiɗi ta va kwa bake ne, pɛtɛ helia ŋkɛ daɗənyɛ sawa kwa hwə ve, mtiwə ŋkɛ mbe yaka nya wəba. Ya tsagha shɛ ŋkɛ ne, kese mbelia ŋkɛ katere 'wərdə kazləvəa ŋkɛ kala ŋa ka shihɛnyɛ we.

²⁰Ma nda dzembe meghe Zhoram ne, va ta ŋkɛ mahekenemsə bakeghəmbe, va deghese menete ŋkɛ mbe meghe mbe Zhɛrəzalɛm. Ma kwa mtenyɛ ŋkɛ ne, kese kwete wəndə kaheha yite we. Pa mbeli lamte mbe meleme ta David, ama ashɛ kwa kwele ta ka meghe we.