Read KapsikiDC 2 Wəshi nyi Mene Ka Meghe 23 Bible Online

2 Wəshi nyi Mene Ka Meghe 23 - KapsikiDC bible

2 Wəshi nyi Mene Ka Meghe 23

¹Ma te kwa mberefaŋe ta va, pa nde dzeghe Shala Yoyada hwepete ghə: pa hɛ tsahwe ghena le mbeli nyi te ghəa ka sewajɛa Azariya, wəzege ta Yerowam, Ismayɛl, wəzege ta Yohanan, Azariya, wəzege ta Obɛd, Masɛya, wəzege ta Adaya ba'a Ɛlishafat, wəzege ta Zikri.

²Cape hɛ dzeyi mbe hɛɗia Zhəwda. Ma mbe pɛtɛa yɛ meleme ne, pa hɛ tsenete ka Lɛvi ba'a mbeli nyi te ghəa ka yita nyi mbe Israyɛl, kwa sebe ta ŋkɛ, tewətelɛwe hɛ zhɛneke geva le hɛ kadzembe Zhɛrəzalɛm.

³Pɛtɛ mbeli nyi ketsenete geva nyi mbe ghɛa Shala tsahwe ghena te nza ta meghe. Ma ke Yoyada sha hɛ: «Wa nya Zhowas nya kawəzege ta meghe nya! Gheŋkɛ nde hi kanza kameghe, kala nya meɗeyi nda Mahwətə ke hwelefe ta David.

⁴Wa nya wəsə nya temene yɛ nya: Ma vəa ŋkwa nya tegha slene ta nci ka dzeghe Shala le ka Lɛvi te veci kezhɛne mpi ne, pa kwa ghate ta wəvəsə kaya ŋkwa nyi kedzembe ghɛa Shala,

⁵pa kwa bake ta wəvəsə mɛa ghɛa meghe, pa kwa mahekene ta wəvəsə kaya mɛa cɛ nya laka shihə. Pɛtɛa mbeli kanza ŋwela ta ghɛa Shala.

⁶Yagha kwete wəndə tekeleke kadzembe ghɛa Mahwətə, deke ka dzeghe Shala le ka Lɛvi nyi te slene yanza hweŋkwa va hɛ kadzembe, kwa nza ŋkɛ nahe mbeli nteyi hɛ tekeleke kezha gheŋkɛ. Pɛtɛa mbeli kahawe va ghena nya gezeke Mahwətə.

⁷Ma kweci ka Lɛvi ne, pa hɛ dzaslete meghe le wəshi kempa ta nci yitea dzeve. Kabeghe hɛ kalə te yayata ŋkwa nya telə ŋkɛ te. Ma wəndə nya keɗe kadzembe ghɛa Shala ne, pa mbeli peslekɛ.»

⁸Pa ka Lɛvi le ka Zhəwda pɛtɛ menete kala nya gezave nda Yoyada ke hɛ. Yayata wəndə kwele katsene mbelia ŋkɛ, tsagha shɛ nyi kegha slene ta nci hwa veci kezhɛne mpi ba'a nyi kekiɗi te vecia shɛ, kwa nza ŋkɛ ne, kendeke nda zhɛne mpi Yoyada ke yayata kwete hwa wəvəsə we.

⁹Pa Yoyada fəave nda yɛ megha ba'a kweci gelə keghə keghə nyi kese va meghe David ba'a nyi beteyi mbeli mbe ghɛa Shala ke mbeli nyi te ghəa ka sewajɛ.

¹⁰Pa ŋkɛ veyi mbeli pɛtɛ, yayata wəndə le megha yitea dzeve, se laka bela kwa zeme hwa'a laka bela kwa gwela ta ghɛa Shala, kwa kema ta yɛ cɛ le reghwetɛ, kehi hi geva kezha dzasle meghe.

¹¹Ma kwa sebe ŋkɛ gɛ, laŋe mbeli keleke Zhowas: pa mbeli seɗete nda derə meghe ba'a wəshia jikə geva, kwetere wəmbə ŋkɛ, pa yɛ Yoyada le ŋwalea ŋkɛ veyi ŋkɛ kameghe laka sheke nda n'yi kənəa ghə. Taghanyɛ, pɛtɛ mbeli katsa kaka: «Nza hɛa meghe biyake!»

¹²Ma kwa fate gaka ta mbeli nyi kehwɛ katsa kaka kənəa meghe Atali ne, pa ŋkɛ se kadzehwa mbeli mbe ghɛa Mahwətə.

¹³Pa nakɛ meghe kwa teve, meslete dzeme vare selə nya mɛa ŋkwa kedzembe ghɛa Shala. Ma mbelia jama ta ka sewajɛ le ka vɛ veke ne, meslete yite. Pɛtɛa mbeli kancɛ zlama ta nci, kavɛ veke ka vɛ veke, Ma ka gha cimə le wəshi ketsa ta nci ne, te kema ta ka tsa kaka hɛ. Pa Atali ŋkwahemte yɛ lekwesa ta nta, kɛake sha lewela: «Nahe yɛ kepamte ɗa! Nahe yɛ kepamte ɗa!»

¹⁴Keɗe Yoyada kapesle mbeli mbe ghɛa Shala we. Vatse hekakɛ mbelia jama nyi te ghəa ka sewajɛ ŋkɛ, ma ke sha hɛ: «Kesemte mə ŋkɛ shave hwa gheyɛ. Ma wəndə nya ketəkwə təkwə ne, pa mbeli peslekɛ.»

¹⁵Pa mbeli keleghe kalə laka ghɛa meghe, ma kwa kekave mɛ degha ta Gədəwə nde, pa mbeli peslekɛ.

¹⁶Pa Yoyada tsahwe ghena ta jikə geva kwelɛ mbeli pɛtɛ, meghe ba'a gheŋkɛ le ghəa ŋkɛ kezha nza kambelia Mahwətə.

¹⁷Ma ɓiyitsa gɛ, mbeli pɛtɛ lə kaŋzlamte cɛa Ba'al kampəmte yɛ reghwetɛa ŋkɛ le wəshi nyi zhɛrete mbeli kashala ba'a pa mbeli peslekɛ Matan, nde dzeghe nda melɛ ke Ba'al te kema ta yɛ reghwetɛ.

¹⁸Ma kwa sebe ta ŋkɛ ne, pa Yoyada dapave nda ya ghɛa Mahwətə ke ka dzeghe Shala le ka Lɛvi. Nahe David keneheve hɛ vəashi kezha mene slene ta melɛ kwa tere tere mbe ghɛa Mahwətə, kala nyi rafete geva hɛ mbe wəsə mahalegəa Moyize. Pa gezave nda ke hɛ kezha mene slene ta nci hɛ le cimə zlama.

¹⁹Pa Yoyada beteyi ka ya ŋkwa mɛa ghɛa Mahwətə, yagha wəndə nya wale wale katedzeki.

²⁰Pa Yoyada zhɛne katsenete mbeli nyi te ghəa ka sewajɛ, mbelia jama, mbeli nyi te ghəa mbeli ba'a pɛtɛa mbeli nyi te hɛɗi. Pa hɛ beghakɛ meghe shave mbe ghɛa Mahwətə kadzeki ghɛa meghe dzeki kwa mɛ degha nya pelɛ ghəa ŋkwa. Ma kwa veyi Zhowas mbeli pelɛ pasla ta meghe ne,

²¹Pɛtɛa mbeli kancɛ zlama ta nci. Gweɗakwe se meleme kwa peslekɛ Atali mbeli.