Read KapsikiDC 2 Wəshi nyi Mene Ka Meghe 24 Bible Online

2 Wəshi nyi Mene Ka Meghe 24 - KapsikiDC bible

2 Wəshi nyi Mene Ka Meghe 24

¹Va ta Zhowas mberefaŋe nda kelete meghe ŋkɛ, pa ŋkɛ menete va wəfaɗemsə mbe meghe mbe Zhɛrəzalɛm. Ma meghekɛ ne, wəzha ta ka Bɛrshɛba, Sibiya sləa nta.

²Wəsə nya ɗe Mahwətə yamenete Zhowas mbe vəa nza ta Yoyada, nde dzeghe Shala teghweme.

³Pa ŋkɛ wəmave nda mi bake, mi nyi yake ŋwale tezhili ba'a ŋwalea kwɛ ŋkɛ kwele kwele hwa hɛ.

⁴Ma mbe kwete və ne, pa Zhowas zəzəte kahi ghɛa Mahwətə.

⁵Pa tsenete ka dzeghe Shala le yɛ ka Lɛvi ma ke sha hɛ: «Kwiɗi mə kadzeyi mbe meleme ta ka Zhəwda tseneke mə cɛdɛ va pɛtɛa ka Israyɛl, nda nza yɛ kahite ŋkwa nya mbe ghɛa Shala ta ŋayɛ keva keva. Kwiɗi mə kamene kahe kahe.» Ama pa ka Lɛvi deranji.

⁶Pa meghe hekakɛ wəndə kwelea ka dzeghe Shala Yoyada, ma ke shɛ: «Va wa nda ɗema na deneve ka Lɛvi kezha tsehe jaɓeregwale hɛ va ka Zhɛrəzalɛm ba'a ka Zhəwda kala nya slate Moyize, nde mene slene ta Mahwətə ba'a le tsene ta ka Israyɛl kezha ŋkwa nya wɛŋe nya nza palepa ta jikə geva mbe wa?

⁷Kwa nza ŋkɛ nahe Atali kwa 'yaghwa mehele nya le mbelia nta kesərəakɛ ghɛa Shala kabezenyɛ. Zhɛne ne, pa le wəshi nyi keveyi geva tekeleke mbe ghɛa Shala se hɛ kamene nda slene ke yɛ Ba'al le hɛ.»

⁸Ma te ghena nya gezeke meghe ne, pa mbeli menete səndəkwə kaveyi mɛa ŋkwa kedzembe ghɛa Shala.

⁹Ma kwa sebe ta ŋkɛ, pa mbeli zlapete mbe Zhɛrəzalɛm ba'a ya tema tema te hɛɗia ŋkɛ, kezha keleke nda jaɓeregwale nya sləyi Moyize, nde mene slene ta Shala te ka Israyɛl yayata wəndə ke Mahwətə, vəa ŋkwa nya nza hɛ mbe jive te ɓerama.

¹⁰Pɛtɛ mbelia jama ba'a mbeli pɛtɛ se kabeteyi wəshi nya hi hɛ kabete kwa səndəkwə le zlama pa te viɗi ta ŋkɛ.

¹¹Ma kwa se və kekele nda səndəkwə ke ka Lɛvi kezha newe wəshi nyi kwa hɛ te sləa meghe ne, pa hɛ kemave cɛdɛ kwele kwele kwa, pa yɛ nde rafe wəshia meghe le wəndə nya te ghəa wəshia wəndə kwelea ka dzeghe Shala se kabetehwe ŋkɛ, kwa sebe ta ŋkɛ, pa hɛ zhɛneyi səndəkwə ta ŋkwa ŋkɛ. Tsagha menete hɛ keveci keveci nda kemave cɛdɛ hɛ kwele kwele.

¹²Pa yɛ meghe le Yoyada ndeke nda cɛdɛa shɛ ke mbeli nyi nza slene ta ghɛa Shala te dzeve va hɛ. Pa mbelia shɛhɛ fəte ka tsehe pelɛ, ka sla sheghwə, ka gezla wəshi lɛ ba'a ka vɛsə mze, kezha hite ghɛa Shala.

¹³Ntake ka mene slene kamene slenea shɛ. Kwa nza hɛ kecaŋa caŋa nda se slene kamene geva mbe kema mbe kema, pa ghɛa Shala kemave nza ta ŋkɛ le berete ta ŋkɛ nya kaghate.

¹⁴Ma kwa nahemte slene hɛ ne. Pa mbeli te ghəa slene ndeke nda nyi ketene cɛdɛ ke yɛ meghe le Yoyada. Pa mbeli menete wəshi kemene slene mbe ghɛa Shala le: wəshi kemene slene ta səkwə ghə ba'a ŋa dzeghe melɛ, yɛ kwenə le yɛ helape kwa mze kwa tere tere le kwa mze kwa ghwə ghwə. Nda nzahwe nza Yoyada teghweme ne, keveci keveci dzeghe melɛ kwa tere tere mbeli mbe ghɛa Mahwətə.

¹⁵Nahe Yoyada kehale tsape, va ta ŋkɛ gwəmsə ba'a mahekenemsə nda mte ŋkɛ.

¹⁶Pa mbeli lamte kwa kwele ta ka meghe mbe meleme ta David, kwa nza ŋkɛ keveci keveci mene ganyɛ ŋkɛ kezha ka Israyɛl ba'a kezha zləvəa Shala le ŋa ghɛa ŋkɛ.

¹⁷Ma kwa sebe ta mte ta Yoyada ne, pa mbelia jama ta ka Zhəwda se kagwəɗəŋə kwa kema ta Zhowas. Pa meghe fate ghena ta nci,

¹⁸tsetse nda se ka Israyɛl kasərəakɛ ghɛa Mahwətə, Shala ta ka shihɛ nci, kalənji yitea hawe va selə nyi keveyi geva tekeleke ba'a kweci wəshi nyi zhɛrete mbeli kashala. Pa beze ghena shɛ hwepete nda wənəa Shala va Zhɛrəzalɛm ba'a va hɛɗia meghea ka Zhəwda pɛtɛ.

¹⁹Ma kwa sebe ta ŋkɛ ne, pa Shala ghwenave nda ka mɛ ŋkwa ke hɛ kezha zhɛre geva hɛ kase shɛ, ama wəndə shɛ kese kafa ghena ta nci we.

²⁰Pa Sefəa Shala dzembe nde dzeghe Shala Zakari, wəzege ta Yoyada. Slete ŋkɛ kwa kema ta mbeli, ma ke: «Fate mə ghena nya gezeke Shala: Yitea wa dzawa ŋayɛ yɛ wəmbəa ghena nyi gezeke 'ya wa? Wəsə shɛ kakemave yɛ mbe ya ci'a we! Ma nahe yɛ kewəfəyite ɗa, 'ya katewəfə ŋayɛ perə!»

²¹Ama pa hɛ tsate ghena yitea Zakari, kala nya gezeke meghe, ntake hɛ kabeza le pelɛ kiagha te ŋwela ta ghɛa Shala.

²²Yare ghəa meghe Zhowas yitea ganyɛ nya menete nda Yoyada, yitenyɛa Zakari, pa peslekɛ. Ma nda temte Zakari ne, pa zlapete ghena zhɛkwa: «Pa Mahwətə neweve wəsə nya kemene geva nya, pa ŋkɛ ndeke ŋa zhɛme ta ŋkɛ!»

²³Ma te kwa keɗaŋe ta va ne, pɛkwe ka sewajɛa ka Siri se kampa le Zhowas. Hwa'a hɛ mbe hɛɗia Zhəwda ba'a meleme ta Zhɛrəzalɛm, pa hɛ mpəmte mbeli nyi te ghəa mbeli ba'a ghweneghe nda wəshi nyi fəhwe hɛ mbe mpa ke meghea nci, pelɛ Damas.

²⁴Kwele kwele ka sewajɛa shɛhɛ we, ama pa Mahwətə veyi ka sewajɛa ka Zhəwda nyi kwele kwele mbe dzeve ta nci, va nya wəfəyite Shala ta ka shihɛ nci hɛ. Tsetse ɗa nya kese te Zhowas.

²⁵Kwa sebe ta ŋkɛ, cape ka Siri dzeghwanji, mba ŋkɛ shewə kwele kwele. Pa mbelia jama ta Zhowas tsate ghena yite, kezha wa ghena ta mte ta ŋwalea nde dzeghe Shala Yoyada, mbəhə hɛ peslekɛ te gezle ta ŋkɛ. Pa mbeli lamte mbe meleme ta David, ama kwa kwele ta ka meghe we.

²⁶Ma mbeli nyi ketsate ghena yitea pesle Zhowas ne, yɛ Zabad, wəzege ta wəzha ta ka Amon nya nza sləa nta kaShimɛyat ba'a Yozabad, wəzege ta wəzha ta ka Mowab nya nza sləa nta kaShimrit.

²⁷Ma sləa ŋwalea Zhowas, ghena ta ka mɛ ŋkwa nyi kegezete geva te ghəa ŋkɛ ba'a ghena hi ta ghɛa Shala ne, nahe hɛ kenza kerafe rafe mbe Ghena nyi gezete palepa ta ka meghe. Wəzege ta ŋkɛ Amasiya nde kelete meghe te ŋkwa ŋkɛ.