Read KapsikiDC 2 Wəshi nyi Mene Ka Meghe 25 Bible Online

2 Wəshi nyi Mene Ka Meghe 25 - KapsikiDC bible

2 Wəshi nyi Mene Ka Meghe 25

¹Ma nda dzembe meghe Amasiya ne, va ta ŋkɛ bakemsə mcɛfeghəmbe, pa ŋkɛ menete va bakemsə meslighəmbe te meghe mbe Zhɛrəzalɛm. Meghekɛ ne, wəzha ta ka Zhɛrəzalɛm nde, Yowadan sləa nta.

²Wəsə nya ɗe Mahwətə yase Amasiya kamene, ama ashɛ le wənəa ŋkɛ pɛtɛ we.

³Ma kwa hite meghea ŋkɛ Amasiya megela ne, pa mpəmte mbelia jama nyi kepeslekɛ yitenyɛ, meghe Zhowas.

⁴Ama pa sərəakɛ ŋwalea nci kezha yipə wəsə nya kerafete geva mbe wəsə mahalegə nya kapalepa ta Moyize. Kwa nza ŋkɛ, nahe Mahwətə kegezete mbe palepa shɛ: «Kahi mbeli kampə ka yitehɛnyɛa ŋwale te yɛ jaɗafa ta ŋwalea nci we, keɗema ŋwale te yɛ jaɗafa ta ka yitehɛ nci we. Ma nda pesle wəndə mbeli ne, te yɛ jaɗafa ta ŋkɛ le ghəa ŋkɛ.»

⁵Pa Amasiya tsenete mbeli nyi te hɛɗia ŋkɛ, ka Zhəwda le ka Bɛnjamɛn, pa ntave ŋkwa keyita keyita kambeli nyi te ghəa ka sewajɛ slibə ba'a ŋa ka sewajɛ gwəmsə. Ma kwa ɓelate mbeli nyi nza va ta nci se te bakemsə kajive mbe kema ne, pa mbeli kemave hɛ 300.000 nyi wərə dzemte mpa ba'a nyi keɗepe ghena ta megha le gelə.

⁶Kwa sebe ta ŋkɛ, pa Amasiya fəke ka katsala ka sewajɛ 100.000 te hɛɗia ka Israyɛl te kiləwəa mze kwa tɛawetɛa 3.000.

⁷Ama pa nde mɛ ŋkwa ta Shala se kageze nda: «Meghe, kehi ka sewajɛa ka Israyɛl kalə le gha we, kwa nza ŋkɛ, kakemane hɛɗia Israyɛl, ŋwalea Ɛfrayim Mahwətə we.

⁸Ma kebegheghe ŋa hɛ, ya tsema nza kande berete kwa mpa ne, kande dewə ŋeli teve ŋa Shala kwa kema ta ka ghema ta ŋa. Kwa nza ŋkɛ, deke Shala nde nza kandeke nda hərə ŋkwa keɗema teɗe ke wəndə.»

⁹Ma ke Amasiya sha nde mɛ ŋkwa ta Shala: «Tsema tenza ghena ta cɛdɛ nyi fəave nda nyi 'ya ke ka sewajɛa ka Israyɛl wa?» Ma ke shɛ: «Wərə Mahwətə kandeke ŋa kwete kwele ke nyagha.»

¹⁰Pa Amasiya zhɛnemte ka sewajɛ nyi kese te hɛɗia Israyɛl kalə sha ghɛa nci. Cape hɛ zhɛnete geva, ama kwele kwele zhɛ nda wənəa nci ke hɛ va hɛɗi Zhəwda.

¹¹Pa Amasiya sahwe hwəa ŋkɛ, cape ŋkɛ te ghəa ka sewajɛa ŋkɛ kadzawa zlərəa ghwene, kwagha mpəmte ka sewajɛ ka Ɛdom ŋkɛ 10.000.

¹²Pa ka Zhəwda keseve kweci te ghweme ka 10.000. Pa hɛ fəghe hɛ kadzeme ghəa ghweme, tsəkwəyi hɛ dzawa mɛ nda dzawa hɛ kancɛncɛhwenji kwagha te hɛɗi.

¹³Ama pa ka sewajɛa ka Israyɛl nyi zhɛnemte Amasiya kezha ɗema hɛ kadzawa mpa pesleyi geva mbe yɛ meleme ta ka Zhəwda nyi kwelɛ yɛ Samari le Bɛt-Horon. Pa hɛ mpəmte mbeli 3.000 ba'a fəhwe wəshi kwele kwele.

¹⁴Ma kwa zhɛneke geva Amasiya sheke kwamte mpa nya hərəte ka Ɛdom ŋkɛ ne, kəliɓə fəte wəshi nyi zhɛrete ka Ɛdom kashala, kaveyi hɛ kala yɛ shala ta ŋkɛ. Ntake kahawe va hɛ ba'a kadzeghe nda melɛ ke hɛ.

¹⁵Mɓɛke Mahwətə hwepete wənə ve. Pa ghweneke kwete nde mɛ ŋkwa nya kegeze nda: «Wa raberə zhɛrave nda geva na ke shala nyi keshaŋe kambele mbelia nci shave mbe dzeve ta ŋa wa?»

¹⁶Hatse meghe slamte nda ghena kwa mɛ, ma ke 'yɛwete ve: «Nahe 'ya kentave ŋa kande ncɛ nda ntsehwele ke meghe na? Zhɛnema ghə na keɗema na kaɗe kapesle ŋa mbeli ma.» Tikə tikə nde mɛ ŋkwa, ama ma ke: «Nahe 'ya keɗepe Shala nde tarete kapesle ŋa, kwa menete wəsə nya kala nya ba'a kwa ɗema na kefate ghena ta ɗa.»

¹⁷Za ma kweci ntsehwele yaɗehwe Amasiya, meghea ka Zhəwda, pa ghwenakɛ nda mɛ ke meghea ka Israyɛl Zhowas, wəzege ta Zhowakaz ba'a shia Zhɛhə. Ma ke shɛ: «Nde kabegemete geva mə kwa mpa!»

¹⁸Ma ke Zhowas zhɛnete nda ke Amasiya: «Pa kwete wəfe katigə pelɛ ghweme ta Liban vəashi 'yɛwakɛ wəzha ta lekelekea Liban kezha wəme nda ŋkɛ ke wəzege ta ŋkɛ. Ama pa kwete wəsə keseɗa nya hwa gamba se kaŋkeɗemte wəfea shɛ.»

¹⁹Ma ke Zhowas ɓiyitsa: «Gha kamene fege va nya ɗate ka Ɛdom na na. Fare fare wənəa ŋa te, ama nde kele ghə na gəmə! Megela ma nza ŋa na divə te hɛɗia ŋa! Wa raberə ɗe na kagha mpa nya ketekele ŋa wəsə kwa ndiremi ba'a nya tehərə ŋa ba'a pɛtɛa ka sewajɛa ka Zhəwda mbeli hwe wa?»

²⁰Ama kese Amasiya kave ghə te ghena shɛ we. Kwa ɗe Shala kazamte yɛ Amasiya le ka sewajɛa ŋkɛ, va nya zhɛrave nda geva hɛ ke yɛ shala ta ka Ɛdom.

²¹Cape Zhowas, meghea ka Israyɛl kadzemte mpa. Begeme ka sewajɛa ŋkɛ le ŋa Amasiya kwa mpa mbe Bɛt-Shɛmɛsh te hɛɗia Zhəwda.

²²Pa ka sewajɛa ka Israyɛl ɗate ka sewajɛa ka Zhəwda, kweracɛ ka sewajɛa ka Zhəwda hwɛnji kalə sha ghɛa nci.

²³Pa Zhowas, meghea ka Israyɛl keseve Amasiya meghea ka Zhəwda, wəzege ta Zhowas ba'a shia Ahaziya kamava kwa Bɛt-Shɛmɛsh. Se tagha, pa keleghe kadzembe Zhɛrəzalɛm ba'a pa ŋzlamte zli nya yitea meleme gare mɛtre gwəmsə bake biya ta ŋkɛ kadzeyi ŋwela, nya kwelɛ peləa Ɛfrayim le peləa nya te megwekwe ta zli.

²⁴Pa fəhwe mze kwa tere tere, mze gheme ba'a kweci wəshi nyi ndeɗe ndeɗe mbe ghɛa Shala, nya ya Obɛd-Ɛdom ba'a nyi ki ghɛa meghe. Pa ŋkɛ keseve ka mavashi ɓiyitsa, tewətelɛwe ŋkɛ zhɛneke geva kadzembe Samari.

²⁵Ma kwa sebe ta mte ta Zhowas, wəzege ta Zhowakaz ba'a meghea ka Israyɛl ne, pa Amasiya meghea ka Zhəwda menete va meŋe mcɛfeghəmbe.

²⁶Ma nyi ketene ghena ta Amasiya se te kwa ghate pa te kwa keɗaŋe ne, nahe hɛ kenza kerafe rafe mbe palepa ta slene nyi menete ka meghea ka Zhəwda ba'a ŋa ka Israyɛl.

²⁷Ma se te və nya zhɛrave nda wəmbə Amasiya ke Mahwətə, ntake mbeli katsa ghena kadzeyite mbe Zhɛrəzalɛm. Ma te kwete hɛ ne, pa hwɛnyɛ kadzembe Lakish, ama pa mbeli kekave ŋkɛ ba'a peslekɛ ŋkɛ te ŋkwa shɛ.

²⁸Ma kwa sebe ta ŋkɛ ne, pa mbeli keleke wəndə kemte mtea ŋkɛ kadzembe Zhɛrəzalɛm kwa wəmata gədəwə nya ntsehe gədəwə kwele kwele, pa mbeli lamte ŋkɛ kwa kwele ta ka shihɛnyɛ.