Read KapsikiDC 2 Wəshi nyi Mene Ka Meghe 26 Bible Online

2 Wəshi nyi Mene Ka Meghe 26 - KapsikiDC bible

2 Wəshi nyi Mene Ka Meghe 26

¹Ma Oziyas, wəzege ta Amasiya ne, va ta ŋkɛ meŋe ŋkwaŋeghəmbe nda ntave ka Zhəwda kaveyi kameghe te ŋkwa yitenyɛ.

²Gheŋkɛ nde zhɛne kaŋate meleme ta Ɛlat, kandeke nda ke Zhəwda kwa sebe ta mte ta yiteyɛ.

³Ma nda kelete meghe Oziyas ne, meŋe ŋkwaŋeghəmbe va ta ŋkɛ, pa ŋkɛ menete va mbe meghe mcɛfemsə bakeghəmbe mbe Zhɛrəzalɛm. Wəzha ta ka Zhɛrəzalɛm meghekɛ, Yekoliya sləa nta.

⁴Wəsə nya zlama Mahwətə te yamene Oziyas, tɛfɛa tɛfɛa kala yitenyɛ Amasiya.

⁵Ma kwa nza Zakari nya kenza kafate ghena nyi ghweneke Shala mba teghweme ne, pa Oziyas ntsəte geva kezha ɗepete ɗe ta Shala Mahwətə, pa Shala shɛ kemanakɛ te kema te kema.

⁶Cape Oziyas yitea mpa le ka Filisti: pa ŋzlamte zlia Gat, ŋa Yabnɛ le ŋa Asdod, zhɛne pa ŋate zli yitea meleme nyi dzeyi yitea Asdod ba'a nya ketene hɛɗia ka Filisti.

⁷Pa Shala kemanakɛ mbe mpa ta nci le ka Filisti, ka Arab nyi mbe Gəwr-Ba'al ba'a ka Mɛwən.

⁸Pa le ka Mawon kaŋki nda jaɓeregwale. Pa Oziyas kemave berete kwele kwele, pa sləa ŋkɛ dzemtenyɛ pa kwa ghala le ka Ɛzhipte.

⁹Pa ŋkɛ ŋate cɛ nyi bebiya bebiya keya ŋkwa mbe Zhɛrəzalɛm, te ghəa mɛ degha nya te megwekwe ta zli, tsagha laka mɛ degha ta zlərə ba'a te ŋkwa nya nza gwekwe va zli.

¹⁰Pa ŋate yɛ cɛ keya ŋkwa te hɛɗi nyi te ɓerama ɓiyitsa, pa late ghwa kwele kwele, kwa nza ŋkɛ ne, kwele kwele wəshi ve mbe meleme nyi kwake te ŋwela ba'a pelɛ wəmbəa ŋkwa. Kwele kwele ka wəza ba'a ka hetəsə yɛməa rɛzɛŋe nyi kemene nda slene dzeme hwa ghweme ba'a mbe wəvea rɛzɛŋe, kwa nza ŋkɛ kwele kwele ɗehwe ghena ta wəza ŋkɛ.

¹¹Zhili nyi kenza wərə dzemte mpa ya va Oziyas. Kewəvəsə kewəvəsə hɛ kala nya neheve mbeli se te rafe nya rafete hɛ ka rafe wəshi, yɛ Yɛyiyɛl le Masɛya kala nya gezete nda Hananiya, wəndə kwelea ka sewajɛa meghe ke hɛ.

¹²Ma zhilia ghɛ nyi te ghəa ka katsala ka sewajɛa nyi ne, 2.600 hɛ.

¹³Ka katsala kɛfia ka sewajɛ nyi le berete ba'a ɗeke ɗeke kampa le ka ghema ta meghe 307.500 ya te dzeve ta nci.

¹⁴Mbe nyama nyama ta və nya dzemte mpa hɛ ne, kafə nda yɛ gelə, yɛ megha, yɛ derə kwenə, yɛ rəbəci, yɛ gwecɛ ba'a yɛ kwa beza pelɛ meghe ke hɛ.

¹⁵Ma mbe Zhɛrəzalɛm ne, kagezla kweci wəmata kehe have ba'a kebeza pelɛ nyi jama jama nyi ncake nde nca wəshi Oziyas kezha ve hɛ pelɛ yɛ ŋkwa keya ŋkwa ba'a te yɛ megwekwe ta zli. Pa zləvəa Oziyas dzemte cakeɗake, kwa nza ŋkɛ nahe Shala kekemanakɛ ŋkɛ kameŋele ba'a nahe ŋkɛ kezhɛrenyɛ berete ma.

¹⁶Ama pa berete nya ve ndeke nda kele ghə nya kevate teɗe te, pa ɗema nza dɛŋe dɛŋe te Shala Mahwətə ta ŋkɛ: ma te kwete hɛ, lahwe dzekinyɛ mbe ghɛa Shala katere 'wərdə te reghwetɛ ketere 'wərdə.

¹⁷Shilimə wəndə kwelea ka dzeghe Shala Azariya le kweci ka dzeghe Shala nyi kebeghe ŋkɛ deghesemsə nyi sahwe hwəa nci mbe kwa sebe ta ŋkɛ.

¹⁸Slete hɛ kwa kema ta meghe Oziyas, ma ke hɛ shɛ: «Hweŋkwa va gha katere nda 'wərdə le ghəa ŋa ke Mahwətə we, kaŋa ka dzeghe Shala nyi kahwelefefia Aron nyi keveyi geva tekeleke kezha gheŋkɛ ŋkɛ. Jive ŋa mbe ŋkwa nya keveyi geva nya tekele, kwa nza ŋkɛ ne, wəsə nya wale wale yamene na, nya keɗema kavate zləvə te gha kwa kema ta Shala Mahwətə.»

¹⁹Mɓɛke Oziyas nya kehimte geva takwa katetere 'wərdə hwepete wənə va ka dzeghe Shala. Taghanyɛ mbe cɛa shɛnyɛ, vare reghwetɛ ketere 'wərdə ba'a te kema ta ka dzeghe Shala, zlayɛ zlayɛ derena ncanyɛ kwa kema ve.

²⁰Pa Azariya, wəndə kwelea ka dzeghe Shala le kweci ka dzeghe Shala nyi kenewe, nakɛ derena kenca kwa kema ve. Kahe kahe hɛ kelakave, ma kwa fate ŋkɛ le ghəa ŋkɛ nahe Mahwətə keɗate, pa ntsəte geva kashave mbe ŋkwa nya wɛŋe.

²¹Mba meghe Oziyas le derena pa te mte ta ŋkɛ. Ma va zereghwea shɛ ne, ntishɛ ŋkɛ cakeɗake le kweci mbeli, kaɗema hweŋkwa kese kadzembe ghɛa Mahwətə ve zhɛkwa. Yotam, wəzege ta ŋkɛ nya te ghəa ghɛa meghe, yanza hweŋkwa ve kasleke hɛɗi.

²²Ma nyi ketene slene ta Oziyas, se nyi keghate pa te kwa keɗaŋe ne, nde mɛ ŋkwa Ɛzayi wəzege ta Amots nde rafete hɛ.

²³Ma kwa mte ŋkɛ ne, pa mbeli lamte hwa kwele ta ka meghe, ama kwa nza ŋkɛ kande derena ne, kese mbeli kala kwa kwele ta ka yita ta nci we. Yotam, wəzege ta ŋkɛ nde kelete meghe te ŋkwa ŋkɛ.