Read KapsikiDC 2 Wəshi nyi Mene Ka Meghe 27 Bible Online

2 Wəshi nyi Mene Ka Meghe 27 - KapsikiDC bible

2 Wəshi nyi Mene Ka Meghe 27

¹Ma nda dzembe meghe Yotam ne, bakemsə mcɛfeghəmbe va ta ŋkɛ, pa ŋkɛ menete va meŋe ŋkwaŋeghəmbe te meghe mbe Zhɛrəzalɛm. Sləa meghekɛ ne, Yerəwsha nya wəzha ta Sadok.

²Wəsə nya ɗe Mahwətə yamenete Yotam, tɛfɛa tɛfɛa kala nya se yitenyɛ Oziyas kamene, kaɗema kese kedzembe ghɛa Shala. Ama mbeli le ŋa nci ne, kehite dzeghwa ta nci hɛ we.

³Yotam nde ŋate mɛ degha nya pelɛ te ghə va ghɛa Mahwətə, pa sekawete kweci ŋkwa keghə keghə te zlia ghedəkwəa Ofɛl.

⁴Pa ŋate kweci meleme dzeme hwa ghweme ta ka Zhəwda perə, tsagha ghɛ nyi bebiya dzeme yitea ghweme ba'a yɛ cɛa ka ya ŋkwa mbe ghɛa wəfe.

⁵Cape Yotam kalə yitea mpa le meghea ka Amon, pa hərəte. Ma te va shɛ ne, kaŋki nda jaɓeregwale ka Amon kakiləwəa mze kwa tɛawetɛa 3.000, kakiləwəa ha miliyeŋə mahekene ba'a kakiləwəa megi miliyeŋə mahekene. Ma mbe va nyi kedzeghe bake ne, tsagha shɛ ŋkikɛ nda hɛ.

⁶Pa Yotam mtsehete berete mbe kema mbe kema, va nya nza ŋkɛ kadzeghwa tiɗiɗi kwa kema ta Shala Mahwətə ta ŋkɛ.

⁷Ma nyi ketene slene ta Yotam ne, nahe hɛ kenza kerafe rafe mbe palepa ta slene nyi menete ka meghea ka Israyɛl le ŋa ka Zhəwda. Mbe palepa shɛ gezete ghena ta yɛ mpa ta ŋkɛ le yɛ slene ta ŋkɛ mbeli.

⁸Ma nda dzembe meghe Yotam ne, bakemsə mcɛfeghəmbe va ta ŋkɛ, pa ŋkɛ menete va meŋe kwetɛŋeghəmbe te meghe mbe Zhɛrəzalɛm.

⁹Ma kwa mte ŋkɛ ne, pa mbeli lamte ŋkɛ mbe meleme ta David. Wəzege ta ŋkɛ Ahaz nde kelete meghe te ŋkwa.