Read KapsikiDC 2 Wəshi nyi Mene Ka Meghe 3 Bible Online

2 Wəshi nyi Mene Ka Meghe 3 - KapsikiDC bible

2 Wəshi nyi Mene Ka Meghe 3

¹Ntake Salomon ghate ŋa ta ghɛa Mahwətə mbe Zhɛrəzalɛm, pelɛ ghweme ta Moriya, tagha ncɛte nda geva Mahwətə ke yitenyɛ David. Nahe David kehite ŋkwa kaghate te ŋwela nya kalane ta Ornan, nde Zhɛbəs.

²Te kwa bake ta hɛ, mbe kwa bake ta tere te kwa wəfaɗe ta va ta Salomon mbe meghe ghate slene ta ŋa ŋkwa ŋkɛ.

³Wa nya tsetse dzeghete ghɛa Shala Salomon: mɛtre mahekenemsə biya ta ŋkɛ kadzeyi ŋwela, mɛtre meŋe bezlea ŋkɛ.

⁴Ma dapa nya mɛ mɛa ŋkɛ ne, mɛtre meŋe kala bezlea ghɛ, ŋkwaŋemsə mɛtre kadzeme ghweme. Le mze kwa tere tere nya ganyɛ menete ŋkwa nya mbe hwəa ŋkɛ mbeli pɛtɛ.

⁵Ma dzeme vare dewe ta kwete cɛ nya wəba hwa hɛ ne, sheghwəa vɛ nyi slapesla slapesla nyi kefi fi le mze kwa tere tere ganyɛ yaslapeyi mbeli, pa mbeli rafeyi yɛ pa ta slekea peha ba'a wəshi kala livə ɓɛhwɛ ɓɛhwɛ te.

⁶Pa mbeli vərəzləte mbe hwəa shɛ le pelɛ nyi nza zləvə te hɛ. Ma mze kwa tere tere nyi mene slene nya mbeli le ne, se mbe Parvayim se hɛ.

⁷Pa mbeli menaghe mze kwa tere tere kənəa yɛ za ta sheghwə, mɛa yɛ mɛ cɛ, dzeme vare yɛ dewe ba'a te gelembe nyi mɛa cɛ, pa mbeli tsasleyi ka shɛrəbɛŋe dzeme vare dewe.

⁸Pa mbeli slave kwete bela ta cɛa shɛ nya heka mbeli kaŋkwa nya keveyi geva kaŋa Shala: kamɛtre meŋe bezlea ŋkɛ, kala nza ta ghɛa shɛ, mɛtre meŋe dzawa vi ta ŋkɛ. Kiləwə mze kwa tere tere 20.000 yamenehwe slene mbeli le kezha fi ŋkwa nya mbe hwə mbe hwə.

⁹Ma kwesa kwa mze kwa tere tere nyi mene slene mbeli le ne, kagwəmsə mcɛfe kwa slibə ta bela ta kiləwə ɗaŋeɗa ta ŋkɛ. Pa le cɛ nyi pelɛ ghəa cɛ fimte mbeli le mze kwa tere tere.

¹⁰Pa mbeli vɛsəte pa ta ka shɛrəbɛŋe bake le mze. Pa mbeli fiaghe mze kwa tere tere kənə kaveyi mbe ŋkwa nya keveyi geva kaŋa Shala tsape.

¹¹Ma ka shɛrəbɛŋe nyi ne, meslete hɛ, kwa ntsə kwa ntsə, teŋa ghəa nci kadzeki.

¹²Yayata wəndəa nci bake bidzə kamɛtre bake ba'a gasle yite, kakwaɗe kwaɗe dewe ta ghɛ kwa ghate, nde bake ne, kakwaɗe ŋa kwete shɛrəbɛŋe.

¹³Ma bidzəa ka shɛrəbɛŋea shɛhɛ ne, mɛtre meŋe tepele. Meslete nzanji hɛ te seɗa ta nci, dzekidze kema ta nci.

¹⁴Pa mbeli tsate mayafe kakwa shɛanɛa kaverezlekɛ le kwa mede mede, kwa gheme ba'a kwa ghɛmɛ kwa mimi mimi, pa mbeli tsate pa ta ka shɛrəbɛŋe te.

¹⁵Pa mbeli vɛsəte selə bake bebiyake kamɛtre meŋe mberefaŋeghəmbe, kamɓeyi te kema ta ghɛa Shala, ma pelɛ ghəa nci ne, pa kweci wəshi kala derə meghe kamɛtre bake gasle yite biya nci yitea ghweme.

¹⁶Pa mbeli menete wəshi kala livə ɓɛhwɛ ɓɛhwɛ, veyi hɛ pelɛ ghəa seləa shɛhɛ. Kwa sebe ta ŋkɛ, pa mbeli menete wəshi kala yɛ ya ta kwakweme gwəmsə, ndɛaŋate hɛ te livəa shɛhɛ.

¹⁷Pa mbeli mɓeyi selə nyighɛ mɛa ŋkwa kedzembe ghɛa Shala, laka bela kwa zeme kwete, laka bela kwa gwela kwete. Yakin heka nya te kwa zeme mbeli, Bowoz nya te kwa gwela.