Read KapsikiDC 2 Wəshi nyi Mene Ka Meghe 34 Bible Online

2 Wəshi nyi Mene Ka Meghe 34 - KapsikiDC bible

2 Wəshi nyi Mene Ka Meghe 34

¹Ma nda kelete meghe Zhoziyas ne, deghese va ta ŋkɛ, pa ŋkɛ menete va mahekenemsə kwetɛŋeghəmbe te meghe mbe Zhɛrəzalɛm.

²Wəsə nya ɗe Mahwətə yamenete ŋkɛ. Tɛfɛa tɛfɛa kala shinyɛ David se ŋkɛ kadzeghwa, kaɗema kezlakemte ya te kwa zeme ya te kwa gwela.

³Ma te kwa deghese ta va ta ŋkɛ te meghe, ndagwara mba ŋkɛ kawəzege, ntake kazele ɗe ta Shala ta shinyɛ David. Va wəfaɗe kwa sebe ta ŋkɛ ne, ntake kampəmte ŋkwa kedzeghe melɛ nyi hwa kələŋə, yɛ selə nyi keveyi geva tekeleke ba'a wəshi nyi zhɛrete mbeli kashala pɛtɛ mbe Zhɛrəzalɛm le hɛɗia Zhəwda.

⁴Pa mbeli mpəmte yɛ reghwetɛa yɛ Ba'al kwa ntsə ta ŋkɛ, tsagha shɛ le yɛ ŋkwa ketere 'wərdə nyi kənə, pa mbeli tsaslemte selə nyi keveyi geva tekeleke ba'a pa mbeli mpəmte wəshi nyi zhɛrete mbeli kashala pɛtɛ. Pa mbeli zhɛrete hɛ kakeləwə, kwərə kwərəyi te yɛ kwele ta mbeli nyi kese kadzeghe nda melɛ ke hɛ.

⁵Kakwa keɗaŋe, pa mbeli teremte 'yɛ'yɛa ka dzeghe nda melɛ ke Ba'al te reghwetɛ nyi se hɛ kadzeghe melɛ te. Tsetse yaɓemte meleme ta Zhɛrəzalɛm ba'a hɛɗia Zhəwda Zhoziyas.

⁶Ma kwa sebe ta ŋkɛ ne, cape ŋkɛ kadzeyi mbe yɛ meleme ta Manasɛ, Ɛfrayim, Simɛyon, pa le ŋa Nɛftali, tsagha le meleme nyi keŋzla ŋzla dzeyi yitea hɛ.

⁷Pa ŋzlamte yɛ reghwetɛ, kancɛncɛhwemte selə nyi keveyi geva tekeleke ba'a wəshi nyi zhɛrete mbeli kashala, kampəmte ŋkwa ketere 'wərdə te hɛɗia Israyɛl pɛtɛ. Kwa sebe ta ŋkɛ, tewətelɛwe zhɛneke geva kadzembe Zhɛrəzalɛm.

⁸Ma te kwete hɛ mbe va kwa meŋe ta ŋkɛ te meghe, mba ŋkɛ kayaɓe hɛɗi le ghɛa Shala ne, pa Zhoziyas ndeke nda hweŋkwa ke Shafan, wəzege ta Asaliya, ke Masɛya, ŋgwamna ta meleme ba'a ke Yowa, wəzege ta Zhowakaz nya kande kele nda ghena ta meghe ke mbeli, kalə kahi ghɛa Shala Mahwətə ta ŋkɛ.

⁹Cape mbeli nyi kalə sha Hilkiya, wəndə kwelea ka dzeghe Shala. Pa hɛ keleghe cɛdɛ nyi kemave ka Lɛvi nyi keya ŋkwa kedzembe cɛ kawəsə gəmə kezha ghɛa Shala, va mbelia Manasɛ, ŋa Ɛfrayim le ka Israyɛl, tsagha va ka Zhəwda, ka Bɛnjamɛn ba'a ka Zhɛrəzalɛm.

¹⁰Pa hɛ ndeke nda cɛdɛa shɛ ke mbeli nyi nza slene ta hi ghɛa Shala te dzeve va hɛ, kezha ɗepe ŋki nda hɛ ke ka mene slene nyi kehi ghɛa kakwa berete.

¹¹Pa hɛ ndeke ŋkɛ ke ka feɗe sheghwə ba'a ka ŋa ŋkwa kezha pave pelɛ nyi bebiya bebiya ba'a yɛ sheghwə nyi kehi hɛ kezha slene ta ŋa ta ŋkwa nyi peleyite se ka meghea ka Zhəwda yitea hɛ.

¹²Mbe mene slene ta nci ka mene slene le mehele, ka Lɛvi Yahat ba'a Obadiya, kwa yita ta Merari, Zakari ba'a Meshəwlam kwa yita ta Kɛhat ya te te ghəa slene. Ma kweci ka Lɛvi nyi keɗepe tsa wəshi kwa tsa tsa ne,

¹³hɛ ka sleke ka kekele wəshi le ka mene slene pɛtɛ, kala nza slene ta nci. Ma slene ta rafe wəshi gəmə, rafe wəshi mahalegə ba'a ya mɛa degha, ka Lɛvia shɛhɛ ka mene.

¹⁴Ma vəa ŋkwa nya kele cɛdɛ mbeli same kwa səndəkwə nya veyi mbeli kwa mbe ghɛa Shala, pa Hilkiya, wəndə kwelea ka dzeghe Shala ntsate palepa ta wəsə mahalegəa Mahwətə, nya ndeke nda ŋkɛ ka Israyɛl laka Moyize.

¹⁵Pa Hilkiya gezete nda ke nde rafe wəshi Shafan nahe ŋkɛ kentsate palepa ta wəsə mahalegə mbe ghɛa Mahwətə, pa ŋkɛ ndeke nda ŋkɛ.

¹⁶Pa Shafan keleghe nda palepa shɛ ke meghe kagezete nda ghena nya te: «Slene ta nci yamene ka mene ŋa slene kala nya ndeke nda na ke hɛ, wa'a ke shɛ.

¹⁷Pa ka dzeghe Shala təkwəmte səndəkwə ba'a ndeke nda cɛdɛ ke mbeli nyi te ghəa slene ba'a ke ka mene slene.»

¹⁸Zhɛne ne, ma ke mtsehete: «Hilkiya, wəndə kwelea ka dzeghe Shala nde ndeke ɗa palepa nya.» Ntake kajaŋga nda ke meghe.

¹⁹Ma kwa fate ghena mbe palepa ta wəsə mahalegə meghe Zhoziyas ne, pa ŋkwahemte lekwesa ta ŋkɛ.

²⁰Pa hekakɛ Hilkiya, Ahikam, wəzege ta Shafan, Abdon, wəzege ta Mika, Shafan, nde rafe wəshi ba'a Asaya, kwete hwa ka mene slene ta ŋkɛ, ma ke sha hɛ:

²¹«Kwiɗi mə 'yɛwakɛ ɗa mə ghena va Mahwətə, ba'a kezha ka Israyɛl le ka Zhəwda nyi ketene, te ghəa ghena nyi mbe palepa nya ntsate nya mbeli tsetsenya. Kwa nza ŋkɛ nahe ka shihɛ ɓəmə keɗema yɛ fete yitea ghena nyi gezeke ŋkɛ, tewəmbəreke wəsə nya ne, kwele kwele tenza hwepe wənəa Mahwətə kənəa gheɓəmə.»

²²Cape yɛ Hilkiya le kweci mbeli nyi ghwenakɛ meghe kalə sha nde mɛ ŋkwa Həwlda, nya kamale mbe ghedəkwə nya kamɛnɛfɛ mbe Zhɛrəzalɛm. Ma za nta Shaləwm, wəzege ta Tokehat ba'a shinyɛ Hasra ne, te dzeve lekwesa nyi keveyi geva tekeleke mbe ghɛa Shala ve. Pa mbelia shɛhɛ gezete nda ghena shɛ ke nde mɛ ŋkwa.

²³Pa Həwlda gezete nda ghena ke hɛ kalə kageze nda ke meghe kala nya:

²⁴«Wa nya ghena nya gezeke Mahwətə, Shala ta ka Israyɛl nya: ‹Kateve ndiremi 'ya kadzete Zhɛrəzalɛm le mbeli nyi mbe kala nyi kerafete geva mbe palepa nya jaŋgate nya mbeli te kema ta meghea Zhəwda.

²⁵Nahe ka Zhɛrəzalɛm keneghakɛ ɗa, nahe hɛ keterekɛ nda 'wərdə kwa hə hə ke kweci shala. Pɛtɛa wəshi nyi menete nyi hɛ kehwepete ɗa wənə. Vatse hwepete wənəa 'ya va meleme nya kwele kwele, kagweɗakwete geva ŋkɛ we.

²⁶Ma kaŋa meghe le ghəa ŋkɛ nya keghweneke ŋayɛ ka'yɛwe ntsehwele va 'ya ne, wa nya wəsə nya geze nda 'ya, Shala Mahwətə ta ka Israyɛl nya: nahe na kefate ghena nya geze palepa nya.

²⁷Nahe na keveyite sleme yitea wəsə nya gezete 'ya te yɛ Zhɛrəzalɛm le mbeli nyi mbe. Nahe na kempiyi dzeve, pa na ɗepete fete ta ŋa kwa kema ta ɗa, pa na ŋkwahemte lekwesa ta ŋa ba'a kanehweneyi nehwene sərəɓə sərəɓə. 'Ya perə, nahe 'ya kefate, 'ya Mahwətə nde gezete.

²⁸Vatse tesərə ŋa 'ya kamte le kwelɛŋe. Katelamte ŋa mbeli kaɗema na kenakɛ ndiremi nyi teɗa Zhɛrəzalɛm le mbeli nyi mbe 'ya le pɛtɛ.›» Pa yɛ Hilkiya, wəndə kwelea ka dzeghe Shala le mbeli nyi nza hɛ le keleghe nda ghena shɛ ke meghe Zhoziyas.

²⁹Taghanyɛ hekakɛ mbelia jama ta ka Zhɛrəzalɛm le ka Zhəwda meghe.

³⁰Cape hɛ pɛtɛ kalə kadzeki Ghɛa Mahwətə, zlaɓe le ka Zhɛrəzalɛm ba'a ka Zhəwda, ka dzeghe Shala, ka Lɛvi ba'a mbeli pɛtɛ. Kwa sebe ta ŋkɛ, pa meghe jaŋgate nda palepa ta jikə geva nya ntsate mbeli mbe ghɛa Shala pɛtɛ ke hɛ.

³¹Pa meghe sletenyɛ te ŋkwa ŋkɛ, kazhɛne kamenete jikə geva le Mahwətə. Yayata wəndə kahi ghəa ŋkɛ kezha nza dɛŋe dɛŋe te Mahwətə, kayɛ fete le wənəa ŋkɛ ba'a le mpia ŋkɛ pɛtɛ yitea ghena nyi gezeke ŋkɛ, yitea wəshi nyi teke nda ŋkɛ ke mbeli ba'a wəshi nyi gezeke ŋkɛ kamene mbeli, kahawe va hɛ kala nya kerafete geva mbe palepa ta jikə geva.

³²Pa meghe gezete nda ke ka Zhɛrəzalɛm le ka Bɛnjamɛn pɛtɛ kayipə meɗe mɛa shɛ kwa. Se mɛa vəa shɛ ne, pɛtɛ ka Zhɛrəzalɛm kamene le hawe va jikə geva nya le Shala ta ka shihɛ nci.

³³Pa Zhoziyas zamte sebe te wəshi nyi ndiremi ndiremi kashasha nyi kemene geva te hɛɗia Israyɛl ba'a ŋkate mbeli pɛtɛ kahawe va Shala Mahwətə ta nci. Ma nda nzahwe nza ŋkɛ teghweme ne, wəndə shɛ ya kwetɛŋe hwa hɛ nya kezhɛremte geva va Shala Mahwətə ta ka shihɛ nci we.