Read KapsikiDC 2 Wəshi nyi Mene Ka Meghe 36 Bible Online

2 Wəshi nyi Mene Ka Meghe 36 - KapsikiDC bible

2 Wəshi nyi Mene Ka Meghe 36

¹Mbe Zhɛrəzalɛm ne, dahe ka Zhəwda ntave Zhowakaz, wəzege ta Zhoziyas, kezha nza te ŋkwa yitenyɛ.

²Zhowakaz ne, bakemsə mahekeneghəmbe va ta ŋkɛ nda dzete meghe ŋkɛ. Deke tere mahekene menehwe meghe ŋkɛ nahe mbe Zhɛrəzalɛm.

³Pa Nɛko, meghea ka Ɛzhipte kelemte te meghe mbe Zhɛrəzalɛm, kandeke nda ŋki jaɓeregwale ke hɛɗia Zhəwda le berete kamze kwa tɛawetɛa kakiləwə 3.000 ba'a mze kwa tere tere kakiləwə mahekenemsə.

⁴Ma kwa sebe ta ŋkɛ, pa ntave Ɛliyakim, wəza meghekɛa Zhowakaz kala meghe te hɛɗi meghea Zhəwda ba'a mbe Zhɛrəzalɛm. Pa ŋkɛ zhɛrete sləa ŋkɛ kaZhowakim. Ma wəza meghekɛ Zhowakaz ne, pa keleghe kadzawa Ɛzhipte.

⁵Ma Zhowakim ne, bakemsə mcɛfeghəmbe va ta ŋkɛ nda dzete meghe ŋkɛ. Pa ŋkɛ menete va meŋe kwetɛŋeghəmbe kameghe mbe Zhɛrəzalɛm, wəshi nyi ɗema Shala Mahwətə ta ŋkɛ yamenete ŋkɛ.

⁶Pa Nabəkodonozor, meghea ka Babilone se kampa le. Mɓɛke hwepete Zhowakim le zewe lɛa mze kwa ghwə ghwə, kakeleghe kadzeme Babilone.

⁷Pa fəhwe kweci wəshi keghə keghə shave mbe ghɛa Mahwətə perə kadzeme Babilone, kaveyi ki ghɛ meghea ŋkɛ.

⁸Ma nyi ketene slene ta Zhowakim ne, nahe hɛ kenza kerafe rafe mbe palepa ta slene ta ka meghea ka Israyɛl ba'a ŋa ka Zhəwda. Palepa shɛ nde geze ghena ta wəshi nyi ndiremi ndiremi kashasha nyi se ŋkɛ kamene le wəshi nyi kemenete nda geva pɛtɛ. Wəzege ta ŋkɛ Zhowakin nde kelete meghe te ŋkwa ŋkɛ.

⁹Va deghese menete Zhowakin nda dzete meghe ŋkɛ. Deke tere mahekene le hɛ meŋe yamenete ŋkɛ mbe meghe mbe Zhɛrəzalɛm, wəsə nya kehitema geva yamenete nda ke Mahwətə.

¹⁰Ma hecimə ne, pa Nabəkodonozor keleghe kadzeme Babilone, le wəshi nyi nza zləvə te mbe ghɛa Mahwətə fəhwe ŋkɛ, pa ntave Sɛdɛsiyas, menənyɛa Zhowakin, kameghea hɛɗia Zhəwda le Zhɛrəzalɛm.

¹¹Va bakemsə kwetɛŋeghəmbe menete Sɛdɛsiyas nda kelete meghe ŋkɛ. Pa ŋkɛ menete va meŋe kwetɛŋeghəmbe te meghe mbe Zhɛrəzalɛm.

¹²Wəsə nya ɗema Shala Mahwətə ta ŋkɛ yase ŋkɛ kamene, hɛreɗɛ ɗema shifə ghəa ŋkɛ kwa kema ta Zhɛrɛmi, nde mɛ ŋkwa, nya kegeze nda ghena nya kese va Mahwətə.

¹³Pa Nabəkodonozor ŋkate yitea zeme fela le sləa Shala, ama ya tsagha shɛ ŋkɛ ne, pa ɗema ghena ta ŋkɛ. Pa zhɛrete ghəa ŋkɛ ntɛaŋe ntɛaŋe, kaɗema zhɛne geva kase sha Shala Mahwətə ta ka Israyɛl.

¹⁴Tsagha shɛ mbeli nyi te ghəa ka dzeghe Shala ba'a mbeli, pɛtɛ hɛ kaka nzama dɛŋe dɛŋe te Shala, kendeke nda ghə nci ke mene wəshi nyi ndiremi ndiremi kashasha nyi mene kweci hwelefefi, kezhɛremte ghɛ nya keveyi geva tekeleke mbe Zhɛrəzalɛm wale wale.

¹⁵Pa Mahwətə, Shala ta ka shihɛ nci, nya keɗehwe mbelia kwele kwele ba'a ŋkwa nya keveyi geva tekeleke kaŋa ŋkɛ, ghwenakɛ nda ka mɛ kwele kwele zhigə kageze nda ghena ta ŋkɛ ke hɛ,

¹⁶ama pa ka Israyɛl ŋeŋelete ka ghwene ta ŋkɛ, peleyite se yitea ghena ta Shala ba'a ŋ'wəshikɛ ka mɛ ŋkwa ta ŋkɛ. Vatse wənənyɛ Mahwətə ba'a pelaghe hwepe wənəa ŋkɛ ŋkɛ kənəa mbelia ŋkɛ, kaɗema kwete ntsehwele yite.

¹⁷Pa keleke mpa kadzete hɛɗia nci laka meghea ka Babilone, kaveyi hɛ pɛtɛ mbe dzeve ta ŋkɛ. Pa meghea shɛ mpəmte ka sewajɛ pa mbe ŋkwa nya keveyi geva tekeleke kaŋa Shala. Kesərəakɛ ya ka mempɛhwetɛti, ya deghelɛshi, ya mbelia jama, ya ka meha mehɛɗi we.

¹⁸Pa ŋkɛ fəhwe wəshi nyi mbe ghɛa Shala pɛtɛ, nyi jama jama ba'a nyi ɓɛhwɛ ɓɛhwɛ, tsagha wəshi nyi mbe cɛ kebete wəshi nyi nza zləvə te hɛ nyi mbe ghɛa Shala, ŋa meghe ba'a ŋa ka mene slene ta ŋkɛ, pa fəghe pɛtɛ kadzeme Babilone.

¹⁹Pa ka Babilone ndəyite ghwə yitea ghɛa Shala, ŋzlamte zlia Zhɛrəzalɛm, ndendəyite ghwə yitea ghɛ nyi ganji ganji ba'a bezemte wəshi nyi nza zləvə te hɛ mbe meleme.

²⁰Pa meghea nci fəghe mbeli nyi mba teghweme kadzeme Babilone: mba hɛ kaka mavashia ŋkɛ, kwa sebe ta ŋkɛ, kaŋa ka shihɛnyɛ, pa te və nya kelete meghe ka Pɛrse.

²¹Tsetse yipəte geva ghena ta Mahwətə nya gezeke ŋkɛ le mɛa Zhɛrɛmi nde mɛ ŋkwa: «Mba tenza hɛɗi kaɗema wəndə te kava mberefaŋemsə, pa te və nya tekiɗi vəa zhɛne mpia ŋkɛ, kezha ŋki yɛ vəa zhɛne mpi nyi sema hɛ kaya.»

²²Ma mbe kwa ghate ta va ta Sirəs, meghea ka Pɛrse mbe meghe ne, pa Mahwətə zəzəte kayipə ghena nya gezeke ŋkɛ le mɛa Zhɛrɛmi, nde mɛ ŋkwa. Pa ŋkɛ feɗeghete mehele ta Sirəs kezha zlape nda ke mbeli te hɛɗia ŋkɛ, le mɛ ba'a rafe rafe te palepa le ghena kala nya:

²³«Wa nya ghena nya zlape Sirəs, meghea ka Pɛrse nya: Nahe Shala Mahwətə nya pelɛ ghweme keveyi meghe nyi te hɛɗi lema pɛtɛ mbe dzeve ta ɗa. Nahe ŋkɛ kegezete ɗa kaŋa nda ghɛ mbe Zhɛrəzalɛm, te hɛɗia Zhəwda. Mbeli nyi hwa gheyɛ nyi kambelia ŋkɛ ne, zhɛneghe geva hɛ pɛtɛ kajive Zhɛrəzalɛm. Pa Shala Mahwətə ta nci nza le hɛ!»