Read KapsikiDC 2 Wəshi nyi Mene Ka Meghe 4 Bible Online

2 Wəshi nyi Mene Ka Meghe 4 - KapsikiDC bible

2 Wəshi nyi Mene Ka Meghe 4

¹Pa mbeli menete reghwetɛ le mze kwa tɛawetɛa, kamɛtre meŋe yayata bela ta ŋkɛ, kamɛtre mcɛfe ta ŋkɛ biya yite ghweme.

²Pa mbeli menete darawe kwa taghele ghele kakwa mze kwa tɛawetɛa. Kamɛtre mcɛfe ŋkwa nya kwa hwəa ŋkɛ, bake mɛtre ba'a gasle yite dzeme yitea ghweme ba'a meŋe mcɛfeghəmbe dzasle ta ŋkɛ.

³Ma dzeyi yitea mɛa ŋkɛ ne, dzasle mbeli rafemte le pa ta mcɛmcɛli. Bakemsə rafeyi mbeli te mɛtre kwetɛŋe, bake zəɗəa ŋkɛ. Zlaɓe kanya kwetɛŋe menete rafea shɛhɛ le darawe.

⁴Pelɛ mcɛmcɛli nyi vɛsəte mbeli le mze kwa tɛawetɛa meŋe bakeghəmbe ntareyi kwenə nya wəba[1] mbeli: mahekene mcɛmcɛli nyi kenewe ŋkwa nya laka bela kwa gwela, mahekene nyi laka pəkwə ta veci, mahekene nyi laka ŋkwa nya laka bela kwa zeme, mahekene nyi laka ŋkwa kesame ta veci, kadzembe yitere darawe zeweve ta nci pɛtɛ.

⁵Ma deɓedea mɛa ŋkɛ ne, deghese kwa gwəmsə ta bela ta mɛtre. Nahe pəkələa nci kenza kala ghwə ta gatawəfa. Wərə ŋkɛ kakelete yɛmə kalitrə gwəmsə ba'a bakemsə.

⁶Pa mbeli vɛsəte kwenə kwa mze kwa tɛawetɛa meŋe. Kabeteyi mcɛfe laka bela kwa zeme ta ghɛa Shala ba'a mcɛfe laka bela kwa gwela, kezha yaɓe geva: kwa hɛ pɛ wəshi keseɗa kedzeghe melɛ tere tere mbeli. Ma yɛmə ya kwa kwenə nya wəba ne, kezha yaɓe geva ta ka dzeghe Shala.

⁷Pa mbeli menete wəshi kentare paterela meŋe kakwa mze kwa tere tere, kala nya kegezeke geva, kabeteyi mbe cɛ kwa wəba ta ghɛa Shala, mcɛfe laka bela kwa zeme meŋe laka bela kwa gwela.

⁸Pa mbeli menete tabele meŋe, kabeteyi mbe cɛ nya wəba shɛ perə, mcɛfe laka bela kwa zeme, mcɛfe laka bela kwa gwela. Pa mbeli menete helape keyisə ŋkwa gwəmsə kakwa mze kwa tere tere.

⁹Pa mbeli slave ŋwela kezha ka dzeghe Shala, tsagha kwete ŋwela kewəbanyɛ nya meneyi yɛ gelembe mɛ, pa mbeli fiaghe mze kwa ghwə ghwə kənəa gelembea shɛhɛ.

¹⁰Ma kwenə nya wəba nya taghele ghele ne, laka bela kwa zeme veyi mbeli mbe ghɛa Shala, takwa yitea mejikə ta cɛ laka bela kwa zeme kala wəsə kedzeyi laka same ta veci.

¹¹Ma kwa menemte yɛ 'yɛmbe kefə pəsəɗə, yɛ pɛlə ba'a yɛ helape keyisə ŋkwa Hiram ne, nahe ŋkɛ kekiɗimte mene wəshi nyi 'yɛwete meghe Salomon ve kezha ghɛa Shala:

¹²Selə bake, wəshi bake kala derə meghe kave pelɛ ghəa yɛ selə, wəshi bake kala zamba kave kənəa derə meghe nyi pelɛ ghəa yɛ selə,

¹³wəshi gwəmsə wəfaɗe kala yɛ ya ta kwakweme hwepeyi mbeli pelɛ te zamba, bake zəɗəa ŋkɛ te yayata zamba kezha zaɗekɛ pəli nyi bake nyighɛ.

¹⁴Pa ŋkɛ menete yɛ ŋkwa keve wəshi le yɛ darawe kezha ve te,

¹⁵pa kwenə kewəbanyɛ kakwa taghele ghele, 12 mcɛmcɛli nyi kekele kwenəa shɛ,

¹⁶yɛ 'yɛmbe kefə pəsəɗə, yɛ pɛlə ba'a lɛ kwa njaŋa ŋa kezha kele sli. Pɛtɛa wəshi nyi menete nyi Həwram-Abi kezha ghɛa Mahwətə, kala nya gezete nda Salomon ne, nahe hɛ kenza kamze kwa ghwə ghwə nyi shɛanɛa shɛanɛa.

¹⁷Kwa zlərəa hələa Zhəwrdɛŋe te ŋkwa nya nza rekɛ ghene vɛsəte hɛ meghe, kwelɛ yɛ meleme ta Səwkot le Serɛdata.

¹⁸Pa Salomon menete wəshi nyi kwele kwele nya ɗema mbeli keɗepete ɗaŋeɗa ta mze kwa tɛawetɛa nyi menete hɛ ŋkɛ le.

¹⁹Nahe Salomon kemenete kweci wəshi kwa mze kwa tere tere nyi kenza wərə kezha ghɛa Shala: reghwetɛa 'wərdə le mze kwa tere tere, yɛ tabele nyi bete ɗafa nyi ve nda mbeli ke Shala kawəsə gəmə,

²⁰Wəshi keve paterela ba'a yɛ paterela ta nci nyi nza ghwə katse kwa hɛ kwa kema ta cɛ nya keveyi geva tekeleke tsape kala ghena nya kegezete geva, kamze kwa tere tere nya slɛfe slɛfe,

²¹yɛ ghwə ta wəfe, yɛ paterela, yɛ mekese kezha wəshi keve paterela, le mze kwa tere tere nya ganyɛ ma,

²²wəshi kepesle ghwə kwa yɛ paterela, yɛ helape keyisə ŋkwa, yɛ zlerekwe, yɛ dəghwə, kamze kwa tere tere nya wɛŋe, yɛ gelembea ghɛa Shala, pa le nyi mbe mbe mɛa ŋkwa nya keveyi geva tekeleke tsape ba'a ŋa cɛ nya wəba, kamze kwa tere tere.