Read KapsikiDC 2 Wəshi nyi Mene Ka Meghe 5 Bible Online

2 Wəshi nyi Mene Ka Meghe 5 - KapsikiDC bible

2 Wəshi nyi Mene Ka Meghe 5

¹Ma kwa nahemte ŋa ta ghɛa Mahwətə Salomon ne, pa fəke wəshi nyi veyi nda David yitenyɛ tekeleke ke Mahwətə, mze kwa ghwə ghwə, mze kwa tere tere, ba'a kweci wəshi keghə keghə, pa beteyi hɛ mbe cɛ kebete wəshi nyi nza zləvə te hɛ ta ghɛa Shala.

²Ma vəa ŋkwa shɛ ne, pa meghe Salomon hekakɛ mbelia jama ta ka Israyɛl, mbeli nyi te ghəa hwelefe, mbeli nyi jama jama kepelə kepelə kezha tsene mbe Zhɛrəzalɛm kakele səndəkwəa jikə geva Shala Mahwətə se mbe meleme ta David, nya heka mbeli kaSiyon, kadzembe ghɛa Shala.

³Pɛtɛa ka Israyɛl ketsenete geva yitea meghe kezha gəsəkəa tere kwa mberefaŋe.

⁴Pa mbelia jama ta ka Israyɛl beghakɛ ka Lɛvi nyi kekele səndəkwəa jikə geva ta Shala.

⁵Ka dzeghe Shala le ka Lɛvi ka kele səndəkwə zlaɓe le cɛ lekwesa kebegeme geva perə, le wəshi nyi keveyi geva kaŋa Shala mbe.

⁶Pa meghe Salomon ba'a jikə ta ka Israyɛl nyi ketsenete geva yite te kema ta səndəkwə dzeghekɛ melɛ le timɛti ba'a mcɛmcɛli kwele kwele, kaɓelate hɛ wəndə kaɗepete tiɗiɗi we.

⁷Ma kwa sebe ta ŋkɛ ne, pa ka dzeghe Shala veyi səndəkwə te ŋkwa nya tarete mbeli kezha gheŋkɛ, mbe cɛ nya heka mbeli kaŋkwa nya keveyi geva kaŋa Shala tsape, mbeyitere bidzəa ka shɛrəbɛŋe.

⁸Meslete bidzəa ka shɛrəbɛŋe kənəa ŋkwa nya tareyi nda mbeli ke səndəkwə, kezha dəpə geva kənəa səndəkwə le yɛ geta nyi kele mbeli te.

⁹Bebiyake geta shɛhɛ. Kanakɛ kwa miɗi ta nci mbeli keɗema wəndə kenza kwelɛ yɛ səndəkwə le ŋkwa kedzembe cɛ we, ama kanakɛ wəndə pelɛke te ŋwela we. Mba hɛ te ŋkwa shɛ pa ɓeshi.

¹⁰Deke pelɛ kwa slapesla bake ya kwa səndəkwə, nyi beteyi Moyize kwa. Pelɛ kwa slapesla nyi kemave ŋkɛ pelɛ ghweme ta Horɛb, kwa menete jikə geva ta Mahwətə le ka Israyɛl kwa sebe ta nya fəakave hɛ ŋkɛ mbe Ɛzhipte.

¹¹Pa ka dzeghe Shala shavenji mbe ŋkwa nya keveyi geva kaŋa Shala. Pɛtɛa ka dzeghe Shala nyi tagha ne, nahe hɛ keyaɓemte geva, kese mbeli kaɓela nza ta wəvəsəa nci we.

¹²Nde Lɛvi nya ketsa wəshi, Asaf, Hɛman, Yedəwtəwn, le yɛ ŋwalea nci ba'a kweci mbelia nci nyi kwa yita ta nci, mbe lekwesa kwa slɛfeslɛ hɛ. Meslete hɛ le yɛ gwalɛaŋe, yɛ gagera ba'a ŋgwəleŋə laka bela kesame ta veci sha reghwetɛ. Tagha yitea hɛ ne, gwəmsə ba'a bakemsə kweci ka dzeghe Shala nyi keɗepe vɛ veke.

¹³Pa ka vɛ tereme ba'a ka gha cimə gakate gaka kanya kwetɛŋe kezha tsahe ba'a kezha ve zləvə te Mahwətə. Ma kwa ghate geva cimə zlaɓe le yɛ gaka ta tereme, yɛ gwalɛaŋe ba'a kweci wəshi ketsa keghə keghə: «Tsahe ɓəmə Mahwətə, kwa nza ŋkɛ ganyɛke ŋkɛ, kakiɗi ɗe ta ŋkɛ we.» Pa meləkwə ləkwə viɗikɛ ghɛa Shala, ghɛa Mahwətə.

¹⁴Kashɛ ka dzeghe Shala mene slene ta nci va meləkwə ləkwəa shɛ we, kwa nza ŋkɛ zləvəa Mahwətə nya tagha hwa hɛ nde viɗikɛ ghɛa Shala.