Read KapsikiDC 2 Wəshi nyi Mene Ka Meghe 7 Bible Online

2 Wəshi nyi Mene Ka Meghe 7 - KapsikiDC bible

2 Wəshi nyi Mene Ka Meghe 7

¹Ma kwa kiɗimte səkwə ghə nya Salomon ne, pa ghwə sawa pelɛ ghweme ba'a teremte wəshi melɛ kwa tere tere ba'a ŋa jikə ta mbeli pɛtɛ, pa kwelea Mahwətə viɗikɛ ŋkwa nya mbe ghɛa Shala.

²Kashɛ ka dzeghe Shala dzembe ghɛa Shala, va nya viɗikɛ ŋkɛ zləvəa Mahwətə we.

³Nahe pɛtɛa ka Israyɛl nyi tagha kenakɛ ghwə kasawa pelɛ ghweme ba'a zləvəa Mahwətə kaɓele mbe ghɛa ŋkɛ. Taghanyɛ ne, gwegwəɗəŋə hɛ ntiŋə ghə mbe hɛɗi te diɓere, kezha hawe ba'a kezha tsahe Mahwətə yitea ganyɛa ŋkɛ ba'a ɗe ta ŋkɛ nya ɗema ghala kwa.

⁴Pa meghe le mbeli pɛtɛ dzeghekɛ melɛ kazləvəa Mahwətə.

⁵Pa hɛ slamte ghə te sləa te mcɛmcɛli 22.000, yɛ timɛti le kwi 120.000 kezha ghwene ghɛa Shala.

⁶Te ŋkwa slene ta nci ka dzeghe Shala. Ma Lɛvi ne, mbe tsa wəshi nyi menete David kaveyi kaŋa Mahwətə hɛ. Katsahe Mahwətə hɛ yitea ɗe ta ŋkɛ nya ɗema ghala kwa, kala cimə nyi tekave nda David ke hɛ. Kwa kema ta nci ka dzeghe Shala kavɛ tereme. Pɛtɛ ka Israyɛl satenji meslete.

⁷Pa Salomon veyi ŋwela nya kwa kema ta ghɛa Mahwətə tekeleke kaŋa Shala. Kwa nza ŋkɛ, ma reghwetɛ mze kwa tɛawetɛa nya menete Salomon ne, kakelete wəshi melɛ nyi te vecia shɛ we, pelɛke te ŋwela shɛ dzeghekɛ melɛ kwa tere tere Salomon, wəshi gəmə nyi le wəshi kwa wəza wəza ba'a merege nyi te melɛa jikə geva ta mbeli pɛtɛ.

⁸Ma mbe vəa shɛnyɛ ne, pa ŋkɛ menete gəsəkəa ghwəli jikə le ka Israyɛl nyi ketsenete geva kwele kwele: se te yayata ŋkwa se hɛ, se mbe Lebo-Hamat nya laka bela kwa gwela hwa'a hələa Ɛzhipte nya laka bela kwa zeme.

⁹Pa mbeli menete tsene nya wəba te kwa deghese ta hɛa gəsəkə, kwa nza ŋkɛ, gəsəkəa reghwetɛ yamene mbeli nda jivenyɛ hɛ mberefaŋe. Kwa sebe ta ŋkɛ, pa gəsəkə le ghəa ŋkɛ menete hɛ mberefaŋe.

¹⁰Ma te kwa bakemsə mahekeneghəmbe ta hɛ mbe tere kwa mberefaŋe ne, pa meghe pelakɛ mbeli kalə sha ghɛa nci. Cape hɛ sha ghɛ pɛtɛa nci le zlama ba'a farefa ta wənə, kwa nza ŋkɛ nahe Mahwətə kencɛte nda ganyɛa ŋkɛ laka David, laka Salomon ba'a ka Israyɛl, mbelia ŋkɛ.

¹¹Ma kwa nahemte ŋa ta ghɛa Mahwətə le ghɛa meghea ŋkɛ Salomon, ma kwa himte wəshi nyi nakɛ ŋkɛ megela kamene ki ghɛ nyi bake nyi ne,

¹²pa Mahwətə ncɛte nda geva heviɗi, ma ke shɛ: «Nahe 'ya kefate səkwə ghə ta ŋa. Nahe 'ya kentave ŋkwa nya kezha dzeghe ɗa melɛ mbeli te.

¹³Banda ta ŋkɛ, pa 'ya ŋzlete ŋkwa kedzeme yitea ghweme kaɗema va kazhɛne kame, keɗema ne, pa gezete nda ke yɛ dzale kave ɗa te hɛɗi, keɗema ɓiyitsa ne, pa 'ya ghweneke ba kadzeghəa mbelia ɗa:

¹⁴ma kesəkwə ɗa mbelia ɗa le shifə ghə, mbeli nyi vate sləa ɗa 'ya te hɛ, ma kenza ka Israyɛl kazele ɗa kwa sərəakɛ nza kwa ndiremi hɛ, 'ya, pelɛ ghweme, kave sleme 'ya yite, kakelemte beze ghena ta nci 'ya te wənə ke hɛ ba'a kakeseyi hɛɗia nci 'ya megela.

¹⁵Se tsetsenyanyɛ, kapele ntsə ta ɗa 'ya. Kateve sleme 'ya yitea səkwə ghə nya səkwə ɗa mbeli ki ghɛa nya.

¹⁶'Ya nde ntave, 'ya nde veyi tekeleke yitea ncɛ nza ta ɗa kaghala ghala hwa gheyɛ. Katenewe ghweme 'ya te, keveci keveci le ganyɛa mehele laka gheyɛ.

¹⁷Ma gha gɛ, ma kenza na kadzeghwa kwa kema ta ɗa kala yiteyɛ ŋa David, ma kenza na kamene wəshi nyi geze ŋa 'ya pɛtɛ, ma kenza na kayɛ fete yitea wəshi mahalegəa ɗa ba'a nyi gezave ŋa 'ya,

¹⁸ɗepete pɛtɛ ve ŋa berete ta meghe 'ya, kala jikə geva nya menete ghen'yɛ le yiteyɛ ŋa David kwa gezete nda 'ya: keveci keveci tenza kwete hwa ŋwalea ŋa kwetere wəmbəa ŋa, kameghea mbelia ɗa, ka Israyɛl.

¹⁹Ma kezhɛrave ɗa wəmbə yɛ ne, ma kepeleyite se yɛ yitea wəshi mahalegəa ɗa ba'a ghena nyi gezeke ŋayɛ 'ya, ma kenza yɛ kahawe va kweci shala, kagwəɗəŋə kwa kema ta nci,

²⁰Kateŋkamte ŋayɛ 'ya te hɛɗi nya ndeke ŋayɛ nya 'ya, kateneghamte ghɛa ɗa nya ŋate nya 'ya kazləvəa ɗa cakeɗake le 'ya. Ma tsagha ne, mbeli pɛtɛ kateyiɗə ka Israyɛl ba'a kaŋ'wəshi hɛ.

²¹Ma kadzeyi mbeli vare ghɛa Shala nya wəba nya ghalanza ne, kala meŋele newe hɛ, ntake hɛ kageze: ‹Wa raberə nda menete nda wəsə nya Mahwətə ke hɛɗi nya le ghɛa ŋkɛ nya wa?›

²²Ma ke mbeli sha tezhɛne nda ke hɛ: ‹Va nya sərəakɛ Mahwətə ka Israyɛl, Shala ta ka shihɛ nci, nya kekelakave hɛ mbe Ɛzhipte. Mahwətə nde vate ndiremi nyi pɛtɛ te hɛ va nya nza hɛ kahawe va kweci shala.›»